《綠色短評》

 | | | 轉寄

中國無人機實在是皮chiūⁿ，欠拍！

作者 李南衡, ChoânTâijī/全台字 by Chng Hūiphêng 2022.09.18

Choânbîn Tâioânjī pán/全民台灣字版簡稱ChoânTâiJī

《 Le̍ksek toánphêng 》　 Lí Lâmhêng

　　　　　　 Tiongkok bôlângki si̍tchāi sī phôechiūⁿ, khiàm phah!

Pehgoe̍h chhejī, Bíkok Liânpang Chiònggīīⁿ gītiúⁿ Phelosi (Nancy Pelosi) sūnlī chhōa thoân hóngbūn Tâioân, Tiongkok chó͘tòng bô hāu, kiànsiàu tńg siūkhì, ùi pehgoe̍h chhesì tiongtàu kàu chhechhit tiongtàu, tī Tâioân sìkho͘ûi la̍kê háie̍k chìnhêng huitôaⁿ si̍ttôaⁿ iánsi̍p liáuāu, tī Tiongkok kok háihōaⁿ si̍tsi si̍t tôaⁿ iánsi̍p. Chit tiongkan, Tiongkok khaisí ēng bôlângki jiáuloān Κimmn̂g Lia̍ttó, pehgoe̍h chhechhit àm thâu chi̍tchiah Tiongkok bôlângki poelâi Κimmn̂g jiáuloān, tējī àm koh poelâi chi̍t chiah. Pehgoe̍h chhekáu àm chi̍t chiah bôlângki poelâi Chio̍htiāⁿtó, pehgoe̍h cha̍pla̍k ēpo͘ chi̍t chiah poelâi Jītáⁿ, kokkun ēng chio̍hthâu kā khian, bôlângki ū hip tio̍h chitê kiàⁿthâu, tī Tiongkok ê bānglō͘ itti̍t pòchhut. Pehgoe̍h jīchhit, chi̍t chiah bôlângki poelâi Lia̍tsū, pehgoe̍h jīkáu ēpo͘, chi̍t chiah bôlângki poelâi Saisū. Tiongkok bôlângki poelâi Κimmn̂g Lia̍ttó náchhiūⁿ teh kiâⁿ chàukha.

　 Pehgoe̍h jīkáu. Tiongkok gōakaupō͘ kìchiáhōe, ū kìchiá mn̄g khí Tiongkok bôlângki poe khì Κimmn̂g hipsiōng chit kiāⁿ tāichì, Tiongkok gōakau pō͘ hoatgiânjîn Tiō Li̍pkian kóng,"Tiongkok ê bôlângki tī Tiongkok ê niáthó͘ téng thâu poe chi̍tē, ū siáⁿmi̍h ta̍ttit tōakiaⁿsiókoài? " kâng chi̍t ji̍t, Tâipak chhītiúⁿ Koa Bûntiat kóng " góa bē sitkhùi kah ēng chio̍hthâu khian bôlângki, chá tio̍h giâ chhèng kā phahlo̍hlâi." lâng mn̄g kóng, nāsī lí chò chóngthóng kám ē kā Kiōngki phah lo̍hlâi? Koa Bûntiat ìn kóng :,"góa ē bē m̄chai, tānsī 小英 khaktēng bô hoattō͘."

Pehgoe̍h saⁿcha̍p ēpo͘, Chhòa Engbûn chóngthóng sītō háikun 146 Kàmtūi liáuāu tì sû, chíchhut kīnlâi Tiongkok Káihòngkun kunián liáuāu ēng bôlângki chhimjiáu téng "phúsek tētài" chhiongtu̍t ê chhiúhoat, i ho͘io̍k ta̍kê "tekkun jú chhiàngtù, lán tio̍h jú léngchēng. Lán bē hō͘ tùihōaⁿ ū puttong ê chiàkháu lâi chèchō chhiongtu̍t, lán bē thiaukhí chiàntoan, lán chūngó͘ khekchè, tānsī pēng m̄ sī piáusī lán bē hoánchè." i íkeng hālēng Kokhôngpō͘, tī sektòng ê sîchūn chháichhú pitiàu jîchhiáⁿ kiông koh ūla̍t ê hoánchè chhòsi, siúhō͘ kokka niákhong ê anchoân.

Pehgoe̍h saⁿcha̍p ēpo͘ gō͘ tiám 59 hun, chi̍t chiah Tiongkok bôlângki poelâi Jītáⁿ, kokkun kéngkò bô hāu, khui chhèng kā phah bô phah tio̍h. Che sī "Patpehsaⁿ Phàuchiàn" 1979 nî chiaⁿgoe̍h chheit chèngsek thênghóe 43 nî āu, Κimmn̂g kokkun phah ê tēit chhèng, ínkhí kokchè koansim. Tējī kang Tiongkok bānglō͘ ū pòchhut chitê ōebīn, koh ke pò chhut chi̍tê Tiongkok chohsitlâng the̍h chi̍t tè chhânthô͘ kā bôlângki khianlo̍hlâi ê ōebīn, teh chhiò Tâioân kunjîn ê chúichún tio̍h sī ánne nānīa. Káugoe̍h chheit tiongtàu cha̍pjī tiám 3 hun, chi̍t chiah Tiongkok bôlângki poelâi Κimmn̂g Saisū, kokkun sīkéng khulī bô hāu liáuāu khui chhèng kā phah lo̍h hái. Tiongkok Koktâipān hoatgiânjîn Chu Hōngliân kóng,"Bînchìntóng chiá kihōe chháchoh, chèchō kíntiuⁿ khìhun, seng koân nn̄g hōaⁿ tùili̍p tùikhòng, chinchiàⁿ līkeng hóchhiò."

　　 Káugoe̍h chhejī sinbûn, kokkun íkeng kā 40 ki bôlângki kanjiáuchhèng sàng kàu gōató, nńg ê ngē ê chiànhoat chòhóe lâi, seng phah bôlângki, kanjiáuchhèng phòhoāi i ê GPS hēthóng, náchhiūⁿgíná sîtāi khòaⁿ koaáhì bútiûⁿ ê "tēngsinhoat", tiám lo̍hkhì, tùihong tiāmtiām bē tíntāng, lán chiah khòaⁿ beh ánchóaⁿ kā chhúlí. Chóngkóng chi̍t kù tio̍h sī hō͘ Tiongkok bôlângki ū lâi tio̍h bô tńgkhì, chīnliōng hō͘ Chu Hōngliân kèsio̍k chhiò, chhiò bē soah.

　　 Tiongkok bôlângki si̍tchāi sī phôechiūⁿ, khiàm phah! (220909)

Chù, 小英 chhiáⁿ tha̍k Hôagí


Pe̍h-ōe-jī-pán/白話字版

《 Le̍k-sek toán-phêng 》　 Lí Lâm-hêng

　　　　　　 Tiong-kok bô-lâng-ki si̍t-chāi sī phôe chiūⁿ, khiàm phah!

Peh-goe̍h chhe-jī, Bí-kok Liân-pang Chiòng-gī-īⁿ gī-tiúⁿ Phe-lo-si (Nancy Pelosi) sūn-lī chhōa thoân hóng-būn Tâi-oân, Tiong-kok chó͘-tòng bô hāu, kiàn-siàu tńg siū-khì, ùi peh-goe̍h chhe-sì tiong-tàu kàu chhe-chhit tiong-tàu, tī Tâi-oân sì-kho͘-ûi la̍k-ê hái-e̍k chìn-hêng hui-tôaⁿ si̍t-tôaⁿ ián-si̍p liáu-āu, tī Tiong-kok kok hái-hōaⁿ si̍t-si si̍t tôaⁿ ián-si̍p. Chit tiong-kan, Tiong-kok khai-sí ēng bô-lâng-ki jiáu-loān Κim-mn̂g Lia̍t-tó, peh-goe̍h chhe-chhit àm thâu chi̍t-chiah Tiong-kok bô-lâng-ki poe-lâi Κim-mn̂g jiáu-loān, tē-jī àm koh poe-lâi chi̍t chiah. Peh-goe̍h chhe-káu àm chi̍t chiah bô-lâng-ki poe-lâi Chio̍h-tiāⁿ-tó, peh-goe̍h cha̍p-la̍k ē-po͘ chi̍t chiah poe-lâi Jī-táⁿ, kok-kun ēng chio̍h-thâu kā khian, bô-lâng-ki ū hip tio̍h chit-ê kiàⁿ-thâu, tī Tiong-kok ê bāng-lō͘ it-ti̍t pò-chhut. Peh-goe̍h jī-chhit, chi̍t chiah bô-lâng-ki poe-lâi Lia̍t-sū, peh-goe̍h jī-káu ē-po͘, chi̍t chiah bô-lâng-ki poe-lâi Sai-sū. Tiong-kok bô-lâng-ki poe-lâi Κim-mn̂g Lia̍t-tó ná-chhiūⁿ teh kiâⁿ chàu-kha.

　 Peh-goe̍h jī-káu. Tiong-kok gōa-kau-pō͘ kì-chiá-hōe, ū kì-chiá mn̄g khí Tiong-kok bô-lâng-ki poe khì Κim-mn̂g hip-siōng chit kiāⁿ tāi-chì, Tiong-kok gōa-kau pō͘ hoat-giân-jîn Tiō Li̍p-kian kóng,"Tiong-kok ê bô-lâng-ki tī Tiong-kok ê niá-thó͘ téng thâu poe-- chi̍t-ē, ū siáⁿ-mi̍h ta̍t-tit tōa-kiaⁿ-sió-koài? " kâng chi̍t ji̍t, Tâi-pak chhī-tiúⁿ Koa Bûn-tiat kóng " góa bē sit-khùi kah ēng chio̍h-thâu khian bô-lâng-ki, chá tio̍h giâ chhèng kā phah--lo̍h-lâi." lâng mn̄g kóng, nā-sī lí chò chóng-thóng kám ē kā Kiōng-ki phah-- lo̍h-lâi? Koa Bûn-tiat ìn kóng :,"góa ē bē m̄-chai, tān-sī 小英 khak-tēng bô hoat-tō͘."

Peh-goe̍h saⁿ-cha̍p ē-po͘, Chhòa Eng-bûn chóng-thóng sī-tō hái-kun 146 Kàm-tūi liáu-āu tì sû, chí-chhut kīn-lâi Tiong-kok Kái-hòng-kun kun-ián liáu-āu ēng bô-lâng-ki chhim-jiáu téng "phú-sek tē-tài" chhiong-tu̍t ê chhiú-hoat, i ho͘-io̍k ta̍k-ê "tek-kun jú chhiàng-tù, lán tio̍h jú léng-chēng. Lán bē hō͘ tùi-hōaⁿ ū put-tong ê chià-kháu lâi chè-chō chhiong-tu̍t, lán bē thiau-khí chiàn-toan, lán chū-ngó͘ khek-chè, tān-sī pēng m̄ sī piáu-sī lán bē hoán-chè." i í-keng hā-lēng Kok-hông-pō͘, tī sek-tòng ê sî-chūn chhái-chhú pit-iàu jî-chhiáⁿ kiông koh ū-la̍t ê hoán-chè chhò-si, siú-hō͘ kok-ka niá-khong ê an-choân.

Peh-goe̍h saⁿ-cha̍p ē-po͘ gō͘ tiám 59 hun, chi̍t chiah Tiong-kok bô-lâng-ki poe-lâi Jī-táⁿ, kok-kun kéng-kò bô hāu, khui chhèng kā phah bô phah tio̍h. Che sī "Pat-peh-saⁿ Phàu-chiàn" 1979 nî chiaⁿ-goe̍h chhe-it chèng-sek thêng-hóe 43 nî āu, Κim-mn̂g kok-kun phah ê tē-it chhèng, ín-khí kok-chè koan-sim. Tē-jī kang Tiong-kok bāng-lō͘ ū pò-chhut chit-ê ōe-bīn, koh ke pò- chhut chi̍t-ê Tiong-kok choh-sit-lâng the̍h chi̍t tè chhân-thô͘ kā bô-lâng-ki khian--lo̍h-lâi ê ōe-bīn, teh chhiò Tâi-oân kun-jîn ê chúi-chún tio̍h sī án-ne nā-nīa. Káu-goe̍h chhe-it tiong-tàu cha̍p-jī tiám 3 hun, chi̍t chiah Tiong-kok bô-lâng-ki poe-lâi Κim-mn̂g Sai-sū, kok-kun sī-kéng khu-lī bô hāu liáu-āu khui chhèng kā phah lo̍h hái. Tiong-kok Kok-tâi-pān hoat-giân-jîn Chu Hōng-liân kóng,"Bîn-chìn-tóng chiá ki-hōe chhá-choh, chè-chō kín-tiuⁿ khì-hun, seng koân nn̄g hōaⁿ tùi-li̍p tùi-khòng, chin-chiàⁿ lī-keng hó-chhiò."

　　 Káu-goe̍h chhe-jī sin-bûn, kok-kun í-keng kā 40 ki bô-lâng-ki kan-jiáu-chhèng sàng kàu gōa-tó, nńg-- ê ngē-- ê chiàn-hoat chò-hóe lâi, seng phah bô-lâng-ki, kan-jiáu-chhèng phò-hoāi i ê GPS hē-thóng, ná-chhiūⁿgín-á sî-tāi khòaⁿ koa-á-hì bú-tiûⁿ ê "tēng-sin-hoat", tiám-- lo̍h-khì, tùi-hong tiām-tiām bē tín-tāng, lán chiah khòaⁿ beh án-chóaⁿ kā chhú-lí. Chóng-kóng chi̍t kù tio̍h sī hō͘ Tiong-kok bô-lâng-ki ū lâi tio̍h bô tńg-khì, chīn-liōng hō͘ Chu Hōng-liân kè-sio̍k chhiò, chhiò bē soah.

　　 Tiong-kok bô-lâng-ki si̍t-chāi sī phôe-chiūⁿ, khiàm phah! (220909)

Chù, 小英 chhiáⁿ tha̍k Hôa-gí



八月初二，美國聯邦眾議院議長Phe-lo-si（Nancy Pelosi）順利chhōa團訪問台灣，中國阻擋無效，見笑轉受氣，ùi八月初四中晝到初七中晝，tī台灣四箍圍六個海域進行飛彈實彈演習了後，tī中國各海岸實施實彈演習。Chit中間，中國開始用無人機擾亂金門列島：八月初七暗頭一隻中國無人機飛來金門擾亂，第二暗koh飛來一隻。八月初九暗一隻無人機飛來石碇島，八月十六下晡一隻飛來二膽，國軍用石頭kā khian，無人機有hip tio̍h chit-ê鏡頭，tī中國ê網路一直播出。八月二七，一隻無人機飛來烈嶼，八月二九下晡，一隻無人機飛來獅嶼。中國無人機飛來金門列島ná-chhiūⁿteh行灶腳。

　 八月二九。中國外交部記者會，有記者問起中國無人機飛去金門hip相chit件tāi-chì，中國外交部發言人趙立堅講，「中國ê無人機tī中國ê領土頂頭飛飛一下，有啥物值得大驚小怪？」仝一日，台北市長柯文哲講「我bē失氣（sit-khùi）kah用石頭khian無人機，早tio̍h giâ銃kā拍落來。」人問講，若是你做總統kámēkā共機拍落來？柯文哲應講:：「我ēbē m̄知，但是小英確定無法度。」

八月三十下晡，蔡英文總統視導海軍146艦隊了後致詞，指出近來中國解放軍軍演了後用無人機侵擾等「phú色地帶」衝突ê手法，伊呼籲ta̍k-ê「敵軍lúchhiàng-tù，咱tio̍h愈冷靜。咱bē hō͘對岸有不當ê藉口來製造衝突，咱bē挑起戰端，咱自我克制，但是並m̄是表示咱bē反制。」伊已經下令國防部，tī適當ê時陣採取必要而且強koh有力ê反制措施，守護國家領空ê安全。

八月三十下晡五點59分，一隻中國無人機飛來二膽，國軍警告無效，開銃kā拍無拍tio̍h。Che是「八二三砲戰」1979年正月初一正式停火43年後，金門國軍拍ê第一銃，引起國際關心。第二工中國網路有播出chit-ê畫面，koh加播出一個中國作穯人the̍h一塊田塗kā無人機khian落來ê畫面，teh笑台灣軍人ê水準tio̍h是án-ne nā-nīa。九月初一中晝十二點3分，一隻中國無人機飛來金門獅嶼，國軍示警驅離無效了後開銃kā拍落海。中國國台辦發言人朱鳳蓮講：「民進黨藉機會炒作，製造緊張氣氛，升koân兩岸對立對抗，真正離經好笑。」

　　九月初二新聞，國軍已經kā 40支無人機干擾銃送到外島，軟ê硬ê戰法做夥來：先拍無人機，干擾銃破壞伊êGPS系統，ná-chhiūⁿgín-á時代看歌仔戲武場ê「定身法」，點落去、對方tiām-tiām bē振動，咱才看beh按怎kā處理。總講一句tio̍h是hō͘中國無人機有來tio̍h無轉去，盡量hō͘朱鳳蓮繼續笑、笑bē soah。

　　中國無人機實在是皮chiūⁿ，欠拍！　　　(220909)

註：小英　　請讀華語