《綠色短評》

 | | | 轉寄

中國ê制裁，啥人ē驚？

作者 李南衡, ChoânTâijī/全台字 by Chng Hūiphêng 2022.08.28


Choânbîn Tâioânjī pán/全民台灣字版簡稱ChoânTâiJī

《 Le̍ksek Toánphêng 》　　 Lí Lâmhêng

　　　　 Tiongkok ê chèchhâi, siáⁿ lâng ē kiaⁿ?

　　 Pehgoe̍h cha̍pla̍k sinbûn pòtō, Tiongkok chènghú í Bíkok Liânpang Chiònggīīⁿ gītiúⁿ Phelosi(Nancy Pelosi) hóngbūn Tâioân choh chiàkháu, tùi Tâioân hoattōng tōa kuibô͘ bûnkongbúheⁿh. Tiongkok Káihòngkun tī Tâioân chiuûi 6 ê háikhonge̍k chìnhêng si̍t tôaⁿ siākek kunsū iánsi̍p, Tiongkok chù Bí tāisài Chîn Kong tī Bíkok hoattōng soanthoân chiàn, tī “Twitter” téngbīn hoat bûn, pehgoe̍h chhesì tī 《 Washengton Iûpò 》 tâusu kóng Tâioân chúkoân sī Tiongkok ê, chíchek Phelosi hóngbūn Tâioân sī "ûipōe Bíkok bô beh kah Tâioân hoattián koaⁿhong koanhē ê sênglo̍k."

Lán Tâioân ê chù Bí tāipiáu Siau Bíkhîm chekke̍k èngchiàn. Pehgoe̍h chhegō͘ chì cha̍pit, chhit kang lāi chiapsiū paukoat CBS Sinbûn Bāng, Bíkok Kongkiōng Tiānsītâi, Microsoft Kokka Kóngpò͘ Kongsi, CNN kah Fox sinbûn téng Bíkok gō͘ keng chúiàu mûithé choanhóng, hiòng Bíkok kokkài jînsū soatbêng bo̍kchêng Tâihái kio̍ksè, Tâioân chènghú chèngchhek kah li̍ptiûⁿ, hoánpo̍k Tiongkok tùi Tâi chúkoân biūlūn, chengchhú kokchè ûlūn chichhî.

　　 Pehgoe̍h cha̍pla̍k, Τiongkiōng Tiongiong Tâipān hoatgiânjîn soanpò͘ tùi chi̍t phoe "台獨頑固分子" si̍tsi chèchhâi, ū Siau Bíkhîm, Kò͘ Li̍phiông, Chhòa Kîchhiong,Koa Kiànbêng,Lîm Huiphâng, Tân Siokhôa, Ông Tēngú téng chhit ê lâng.

　　 Siūⁿkhí Bíkok Liânpang Chiònggīīⁿ gītiúⁿ Phelosi hóngbūn Tâioân tńgkhì Bíkok liáuāu, Tiongkok chènghú sûisî soanpò͘ chèchhâi Phelosi choânke. I ê suná kekiám ge Tiongkok, mn̄g amá kóng,"Tiongkok kā lán chèchhâi, sī m̄ sī beh santû TekTok tiùⁿhō? tānsī góa kinpún m̄bat ēng kòe TekTok!"

　　 Bíkok chèchhâi Hiangkáng koaⁿoân chiah ē hông kiaⁿ. Bíkok chèchhâi paukoat Hiangkáng Te̍ksiú LîmTēⁿ Goa̍tngô͘ chāilāi cha̍pit ūi koaⁿoân, hongsó ti̍tchiap á·sī kanchiap tī Bíkok chhîiú ê pângsán kah koânek, bētàng súiōng kah Bíkok siongkoan gînhâng ê sìniōngkhá. Kìmchí chiahê koaⁿoân kah Bíkok lâng á·sī tī Bíkok kénglāi chò senglí, bô hoattō͘ chò jīmhô kah Bíkok kikim, hòephín, ho̍kbū ê bébē, bētàng ū Bíkok ji̍pkéng chhiamchèng.

　　 Tiongkok kóng beh chèchhâi Phelosi, hiānsî kiàkha Bíkok ê1989 nî O̍hūn léngsiù Ông Tan kā Tiongkok chng siáu, kóng thêkiong 4 hāng chèchhâi hō͘ Phelosi hō͘ Tiongkok chhamkhó, tēit "kìmchí Phelositī Hôlâmséng chhuntìn gînhâng chûnkhoán. "Chòekīn Hôlâmséng chhuntìn gînhâng tósiàu, putchún chûnkhoánjîn khì niá chîⁿ; tējī "kìmchí Phelosi tī Tn̂gsoaⁿ chhī pòaⁿmê chhutmn̂g khì chia̍h Siauiā. "La̍kgoe̍h chhecha̍p pòaⁿmê, Tn̂gsoaⁿ chhī chi̍t keng hangbah tiàm, ū chi̍tê lâmchú beh bíkosiûⁿ chi̍t ūi lúsèng kò͘kheh bô chiâⁿ, kiànsiàu tńg siūkhì chhutchhiú phah lâng. Tēsaⁿ "kìmchí Phelosi tī Tiongkok tāikhoán bé 爛尾樓." 2020 nî Tiongkok chènghú hānchè kiànsiong tāi khoán, gînhâng koattēng thiu cháu kiànsiong gîn kin, chin chē pângtēsán khaihoat siong chhuthiān ûiiok. Tiongkok chènghú kīchoa̍t ūitio̍h iáu bōe oânkang ê 爛尾樓 hù khoán bé chhù ê bînchiòng pângok tāikhoán, ū chhiaukòe 240 bān hō͘, ha̍p kè iok sin tâipè 11.09 tiāu. Tēsì "kìmchí Phelosi khì Chhîchiu thàmsī Thi̍hliānlú." 2022 nî itgoe̍h Chhîchiu Sóliānlú ge̍kthāi sūkiāⁿ, khansia̍p tochhù jînkháu hoànūn ànkiāⁿ, ū chi̍t miâ chengsîn īⁿsiòng hông siûkim ê lúchú ū sengio̍k peh ê gíná ê pikio̍k. Ông Tan mn̄g kóng ísiōng 4 hāng chèchhâi, Phelosiē kiaⁿ ah bē?!

　　 Tiongkok ê chèchhâi ke̍kke sī, put chún lí khì Tiongkok, Hiangkáng kah Òmn̂g. Siáⁿ lâng ē kiaⁿ? 　(220819)

Chù,"台獨頑固分子" 爛尾樓 　　 chhiáⁿ liām Hôagí

Pe̍h-ōe-jī-pán/白話字版

《 Le̍k-sek Toán-phêng 》　　 Lí Lâm-hêng

　　　　 Tiong-kok ê chè-chhâi, siáⁿ lâng ē kiaⁿ?

　　 Peh-goe̍h cha̍p-la̍k sin-bûn pò-tō, Tiong-kok chèng-hú í Bí-kok Liân-pang Chiòng-gī-īⁿ gī-tiúⁿ Phe-lo-si(Nancy Pelosi) hóng-būn Tâi-oân choh chià-kháu, tùi Tâi-oân hoat-tōng tōa kui-bô͘ bûn-kong-bú-heⁿh. Tiong-kok Kái-hòng-kun tī Tâi-oân chiu-ûi 6 ê hái-khong-e̍k chìn-hêng si̍t tôaⁿ siā-kek kun-sū ián-si̍p, Tiong-kok chù Bí tāi-sài Chîn Kong tī Bí-kok hoat-tōng soan-thoân chiàn, tī “Twitter” téng-bīn hoat bûn, peh-goe̍h chhe-sì tī 《 Washengton Iû-pò 》 tâu-su kóng Tâi-oân chú-koân sī Tiong-kok ê, chí-chek Phe-lo-si hóng-būn Tâi-oân sī "ûi-pōe Bí-kok bô beh kah Tâi-oân hoat-tián koaⁿ-hong koan-hē ê sêng-lo̍k."

Lán Tâi-oân ê chù Bí tāi-piáu Siau Bí-khîm chek-ke̍k èng-chiàn. Peh-goe̍h chhe-gō͘ chì cha̍p-it, chhit kang lāi chiap-siū pau-koat CBS Sin-bûn Bāng, Bí-kok Kong-kiōng Tiān-sī-tâi, Microsoft Kok-ka Kóng-pò͘ Kong-si, CNN kah Fox sin-bûn téng Bí-kok gō͘ keng chú-iàu mûi-thé choan-hóng, hiòng Bí-kok kok-kài jîn-sū soat-bêng bo̍k-chêng Tâi-hái kio̍k-sè, Tâi-oân chèng-hú chèng-chhek kah li̍p-tiûⁿ, hoán-po̍k Tiong-kok tùi Tâi chú-koân biū-lūn, cheng-chhú kok-chè û-lūn chi-chhî.

　　 Peh-goe̍h cha̍p-la̍k, Τiong-kiōng Tiong-iong Tâi-pān hoat-giân-jîn soan-pò͘ tùi chi̍t phoe "台獨頑固分子" si̍t-si chè-chhâi, ū Siau Bí-khîm, Kò͘ Li̍p-hiông, Chhòa Kî-chhiong,Koa Kiàn-bêng,Lîm Hui-phâng, Tân Siok-hôa, Ông Tēng-ú téng chhit ê lâng.

　　 Siūⁿ-khí Bí-kok Liân-pang Chiòng-gī-īⁿ gī-tiúⁿ Phe-lo-si hóng-būn Tâi-oân tńg-khì Bí-kok liáu-āu, Tiong-kok chèng-hú sûi-sî soan-pò͘ chè-chhâi Phe-lo-si choân-ke. I ê sun-á ke-kiám ge Tiong-kok, mn̄g a-má kóng,"Tiong-kok kā lán chè-chhâi, sī m̄ sī beh san-tû TekTok tiùⁿ-hō? tān-sī góa kin-pún m̄-bat ēng kòe TekTok!"

　　 Bí-kok chè-chhâi Hiang-káng koaⁿ-oân chiah ē hông kiaⁿ. Bí-kok chè-chhâi pau-koat Hiang-káng Te̍k-siú Lîm-Tēⁿ Goa̍t-ngô͘ chāi-lāi cha̍p-it ūi koaⁿ-oân, hong-só ti̍t-chiap á-·sī kan-chiap tī Bí-kok chhî-iú ê pâng-sán kah koân-ek, bē-tàng sú-iōng kah Bí-kok siong-koan gîn-hâng ê sìn-iōng-khá. Kìm-chí chiah-ê koaⁿ-oân kah Bí-kok lâng á-·sī tī Bí-kok kéng-lāi chò seng-lí, bô hoat-tō͘ chò jīm-hô kah Bí-kok ki-kim, hòe-phín, ho̍k-bū ê bé-bē, bē-tàng ū Bí-kok ji̍p-kéng chhiam-chèng.

　　 Tiong-kok kóng beh chè-chhâi Phe-lo-si, hiān-sî kià-kha Bí-kok ê1989 nî O̍h-ūn léng-siù Ông Tan kā Tiong-kok chng siáu, kóng thê-kiong 4 hāng chè-chhâi hō͘ Phe-lo-si hō͘ Tiong-kok chham-khó, tē-it "kìm-chí Phe-lo-sitī Hô-lâm-séng chhun-tìn gîn-hâng chûn-khoán. "Chòe-kīn Hô-lâm-séng chhun-tìn gîn-hâng tó-siàu, put-chún chûn-khoán-jîn khì niá chîⁿ; tē-jī "kìm-chí Phe-lo-si tī Tn̂g-soaⁿ chhī pòaⁿ-mê chhut-mn̂g khì chia̍h Siau-iā. "La̍k-goe̍h chhe-cha̍p pòaⁿ-mê, Tn̂g-soaⁿ chhī chi̍t keng hang-bah tiàm, ū chi̍t-ê lâm-chú beh bí-ko-siûⁿ chi̍t ūi lú-sèng kò͘-kheh bô chiâⁿ, kiàn-siàu tńg siū-khì chhut-chhiú phah lâng. Tē-saⁿ "kìm-chí Phe-lo-si tī Tiong-kok tāi-khoán bé 爛尾樓." 2020 nî Tiong-kok chèng-hú hān-chè kiàn-siong tāi- khoán, gîn-hâng koat-tēng thiu cháu kiàn-siong gîn kin, chin chē pâng-tē-sán khai-hoat siong chhut-hiān ûi-iok. Tiong-kok chèng-hú kī-choa̍t ūi-tio̍h iáu bōe oân-kang ê 爛尾樓 hù khoán bé chhù ê bîn-chiòng pâng-ok tāi-khoán, ū chhiau-kòe 240 bān hō͘, ha̍p kè iok sin tâi-pè 11.09 tiāu. Tē-sì "kìm-chí Phe-lo-si khì Chhî-chiu thàm-sī Thi̍h-liān-lú." 2022 nî it-goe̍h Chhî-chiu Só-liān-lú ge̍k-thāi sū-kiāⁿ, khan-sia̍p to-chhù jîn-kháu hoàn-ūn àn-kiāⁿ, ū chi̍t miâ cheng-sîn īⁿ-siòng hông siû-kim ê lú-chú ū seng-io̍k peh ê gín-á ê pi-kio̍k. Ông Tan mn̄g kóng í-siōng 4 hāng chè-chhâi, Phe-lo-siē kiaⁿ ah bē?!

　　 Tiong-kok ê chè-chhâi ke̍k-ke sī, put chún lí khì Tiong-kok, Hiang-káng kah Ò-mn̂g. Siáⁿ lâng ē kiaⁿ? 　(220819)

Chù,"台獨頑固分子" 爛尾樓 　　 chhiáⁿ liām Hôa-gí

《綠色短評》　　李南衡

　　　　　　　　中國ê制裁，啥人ē驚？

　　八月十六新聞報導，中國政府以美國聯邦眾議院議長Phe-lo-si（Nancy Pelosi）訪問台灣作藉口，對台灣發動大規模文攻武嚇。中國解放軍tī 台灣周圍6个海空域進行實彈射擊軍事演習，中國駐美大使秦剛tī 美國發動宣傳戰，tī “Twitter”頂面發文，八月初四tī 《華盛頓郵報》投書講台灣主權是中國ê，指責Phe-lo-si訪問台灣是「違背美國無beh kah台灣發展官方關係ê承諾。」

咱台灣ê駐美代表蕭美琴積極應戰。八月初五至十一，七工內接受包括CBS新聞網、美國公共電視台、微軟國家廣播公司、CNN kah Fox新聞等美國五間主要媒體專訪，向美國各界人士說明目前台海局勢，台灣政府政策kah立場，反駁中國對台主權謬論，爭取國際輿論支持。

　　八月十六，中共中央台辦發言人宣佈對一批「台獨頑固分子」實施制裁，有蕭美琴、顧立雄、蔡其昌、柯建銘、林飛帆、陳椒華、王定宇等七个人。

　　想起美國聯邦眾議院議長Phe-lo-si訪問台灣轉去美國了後，中國政府隨時宣布制裁Phe-lo-si全家。伊ê孫仔加減ge中國、問A媽講，「中國kā咱制裁，是m̄是beh刪除TikTok帳號？但是我根本m̄-bat用過TikTok！」

　　美國制裁香港官員才ēhông驚。美國制裁包括香港特首林鄭月娥在內十一位官員，封鎖直接抑是間接tī 美國持有ê房產kah權益，bē-tàng使用kah美國相關銀行ê信用卡。禁止chiah-ê官員kah美國人抑是tī 美國境內做生理，無法度做任何kah美國基金、貨品、服務ê買賣，bē-tàng有美國入境簽證。

　　中國講beh制裁Phe-lo-si，現時旅居美國ê1989年學運領袖王丹kā中國裝siáu，講提供4項制裁hō͘ Phe-lo-si hō͘中國參考：第一「禁止Phe-lo-sitī 河南省村鎮銀行存款。」最近河南省村鎮銀行倒數，不准存款人去領錢；第二「禁止Phe-lo-sitī 唐山市半暝出門去食宵夜。」六月初十半暝，唐山市一間烘肉店，有一个男子beh 米糕siûⁿ一位女性顧客無成，見笑轉受氣出手拍人。第三「禁止Phe-lo-sitī 中國貸款買爛尾樓。」2020年中國政府限制建商貸款，銀行決定抽走建商銀根，真chē房地產開發商出現違約。中國政府拒絕為tio̍h猶未完工ê爛尾樓付款買厝ê民眾房屋貸款，有超過240萬戶，合計約新台幣11.09兆。第四「禁止Phe-lo-si去徐州探視鐵鍊女。」2022年一月徐州鎖鏈女虐待事件，牽涉多次人口販運案件，有一名精神異常hông囚禁ê女子有生育八个gín-á ê悲劇。王丹問講以上4項制裁，Phe-lo-siē驚抑bē？！

　　中國ê制裁極加是，不准你去中國、香港kah奧門。啥人ē驚？　(220819)

註：「台獨頑固分子」 爛尾樓　　請唸華語