《綠色短評》

 | | | 轉寄

涉嫌詐領助理費，真正有志一同？

作者 李南衡, ChoânTâijī/全台字 by Chng Hūiphêng 2021.03.07

Choânbîn Tâioânjī pán/全民台灣字版簡稱ChoânTâiJī

　　　 Sia̍phiâm chàniá chō͘lí hùi, chinchiàⁿ iúchì ittông?

　　 Sintóng Tâipakchhī gīoân Phoaⁿ Hoâichong kah i ê pānkongsek Tân chújīm, sia̍phiâm chàniá chō͘lí hùi, kengkòe tn̂gkî chengpān, kiⁿî itgoe̍h jīla̍k iû Chújīm kiámchhatkoaⁿ Tân Bênghong, kiámchhatkoaⁿ Lîm Sūsûn chíhui Tâipakchhī Tiâuchachhù téng, chiphêng chhiauchhōe la̍kê só͘chāi jîchhiáⁿ khàuah siongkoan chèngkì, hoathiān Phoaⁿ, Tân nn̄g lâng līiōng lângthâu chàniá chō͘lí hùi lâu chò suēng, chho͘pō͘ kó͘sǹg chàniá kimgia̍h sintâipè 300 bān, sìn āu jīnûi nn̄g lâng ū ianbia̍t chèngkì kah kauchhoàn ê khólêng, nn̄g lâng siaⁿah kìm kìⁿ. Sūlîm Tēkiámsú chíchhut, Phoaⁿ Tân nn̄g lâng ùi 2008 nî kàu 2020 nî, chêngāu ēng lângthâu chàniá pó͘chō͘ hùi. Tānsī tējī kang chhâitēng Phoaⁿ Hoâichong 200 bān kaupó, Tân chújīm 150 bān kaupó, nn̄g lâng hānchè kuchū, chhutkéng chhut hái.

Siōng hóchhiò ê sī pêⁿpêⁿ Sintóng ê chhīgīoân Lí Khènggoân, i jīnûi Phoaⁿ Hoâichong chò tāichì únkiān pósiú, mā m̄sī thamchâi ê lâng, jîchhiáⁿ i ū chin chē hùgia̍p siuji̍p, chiàu siônglí lâi khòaⁿ i bē ūitio̍h chi̍t kò goe̍h nn̄gbān gōa kho͘ khì hoānhoat, siôngchêng engkai ū suiàu koh lîchheng.

Lán ná ē kóng Lí Khènggoân chhīgīoân hóchhiò, i káⁿ chinchiàⁿ m̄chaiiáⁿ "chiàu siônglí lâi khòaⁿ", ài chîⁿ ê lâng bô hun hógia̍h, sànchhiah. Siáng kóng hógia̍h lâng tio̍h bē tham sètiâu chîⁿ, sànchhiah lâng khòaⁿtio̍h chîⁿ chhiú ittēng tio̍h ē ngiau? Khah chhùbī ê sī, thamchâi ê lâng tóngphài bô hun nâ le̍k o͘pe̍h, tētiám bô hun tang, sai, lâm, pak, kimgia̍h bô hun tōatiâu sètiâu. Lán kanta khòaⁿ chòekīn chin chē sia̍phiâm chàniá chō͘lí hùi chit hāng tio̍h chiok chhengchhó.

　　 Kiⁿî it·goe̍h, Tiongkok Kokbîntóng Sinpakchhī gīoân Chan Hoànka, hông khòngkò ùi 2016 nî khí chàniá chō͘lí hùi nn̄gpah gōa bān, Sinpak Tēhng Hoatīⁿ hoatkoaⁿ jīnûi Chan Hoànka sia̍phoān Thamu tīchōe tiâulē kah hênghoat hō͘ kongbūoân tengchài putsi̍t chōehiâm, hoān tāngchōe koh ū chhoànchèng ê khólêng, chhâitēng kiah kìm kìⁿ. Phêⁿô͘ koān chêng bînchèngchhù tiúⁿ bôtóngchek Chiâⁿ Bānkǹg, hông khòngkò tamjīm nn̄g kài koāngīoân kîkan, sia̍phiâm ēng lângthâu pò chō͘lí hùi kiōng 829 bān kho͘, hō͘ Phêⁿô͘ Tēīⁿ í Thamu tīchōe tiâulē phòaⁿ chhú tô͘hêng cha̍pjī nî, Kohiông koân punīⁿ kiah móa saⁿ kògoe̍h liáuāu, chhâitēng kohchài iânah nn̄g kò goe̍h, i tio̍h tī lôngákeng kòenî. Tiongkok Kokbîntóng Sintek koāngīoân Tân Phekûi hông khòngkò ùi 2012 nî kàu 2017 nî chàniá chō͘lí hùi 191 bān gōa, tāng phòaⁿ saⁿ nî la̍k kògoe̍h. Bînchìntóng Sinpakchhī la̍k liânpà gīoân Ko Bínhūi sia̍phiâm chàniá chō͘lí hùi hông khísò͘, Sinpak tēīⁿ ha̍pgītêng í 600 bān kho͘ kaupó, hānchè chūku, chhutkéng chhuthái. Tiongkok Kokbîntóng Tâilâm chhīgīoân Lí Tionggîm sia̍phiâm chàniá chō͘lí hùi hō͘ kiámhong tī 2020 nî cha̍pjīgoe̍h chhe chengpān kaupó, cha̍pjīgoe̍h tiong, Tâilâm chhīgīhōe koh ū chi̍t miâ Tiongkok Kokbîntóng gīoân Chhòa Io̍khui mā sia̍phiâm chàniá chō͘lí hùi í peh bān kho͘ kaupó. Tàutàu chi̍tē 2020 nî Tâilâm chhīgīhōe íkeng ū gō͘ miâ hiānjīm gīoân kah chi̍t miâ siàjīm gīoân, lóng chóng la̍kê lâng inūi sia̍phiâm chàniá chō͘lí hùi hō͘ kiámtiàu tanūi chengpān. Tiongkok Kokbîntóng Tâitang koān gīoân Lîm Uichì sia̍phiâm chàniá chō͘lí hùi 56 bān kho͘, Tâitang tēkiámsú cha̍pjīgoe̍h té chengkiat khísò͘, kā chāiah ê Lîm Uichì îsàng Tâitang tēhng hoatīⁿ, hoatkoaⁿ têngsím āu, chhâitēng í 80 bān kaupó, pēng hānchè chūku kah tēngkî hiòng phàichhutsó͘ pòtò.

Tâioân kok chèngtóng chin chē ìkiàn bē ha̍p. Kîkoài, kanta chàniá chō͘lí hùi chit hāng, iúchì ittông! (210226)


Pe̍h-ōe-jī-pán/白話字版


　　　Sia̍p-hiâm chà-niá chō͘-lí hùi, chin-chiàⁿ iú-chì it-tông?

　　 Sin-tóng Tâi-pak-chhī gī-oân Phoaⁿ Hoâi-chong kah i ê pān-kong-sek Tân chú-jīm, sia̍p-hiâm chà-niá chō͘-lí hùi, keng-kòe tn̂g-kî cheng-pān, kin-nî it-goe̍h jī-la̍k iû Chú-jīm kiám-chhat-koaⁿ Tân Bêng-hong, kiám-chhat-koaⁿ Lîm Sū-sûn chí-hui Tâi-pak-chhī Tiâu-cha-chhù téng, chip-hêng chhiau-chhōe la̍k-ê só͘-chāi jî-chhiáⁿ khàu-ah siong-koan chèng-kì, hoat-hiān Phoaⁿ, Tân nn̄g lâng lī-iōng lâng-thâu chà-niá chō͘-lí hùi lâu chò su-ēng, chho͘-pō͘ kó͘-sǹg chà-niá kim-gia̍h sin-tâi-pè 300 bān, sìn āu jīn-ûi nn̄g lâng ū ian-bia̍t chèng-kì kah kau-chhoàn ê khó-lêng, nn̄g lâng siaⁿ-ah kìm kìⁿ. Sū-lîm Tē-kiám-sú chí-chhut, Phoaⁿ Tân nn̄g lâng ùi 2008 nî kàu 2020 nî, chêng-āu ēng lâng-thâu chà-niá pó͘-chō͘ hùi. Tān-sī tē-jī kang chhâi-tēng Phoaⁿ Hoâi-chong 200 bān kau-pó, Tân chú-jīm 150 bān kau-pó, nn̄g lâng hān-chè ku-chū, chhut-kéng chhut hái.

Siōng hó-chhiò ê sī pêⁿ-pêⁿ Sin-tóng ê chhī-gī-oân Lí Khèng-goân, i jīn-ûi Phoaⁿ Hoâi-chong chò tāi-chì ún-kiān pó-siú, mā m̄-sī tham-châi ê lâng, jî-chhiáⁿ i ū chin chē hù-gia̍p siu-ji̍p, chiàu siông-lí lâi khòaⁿ i bē ūi-tio̍h chi̍t kò goe̍h nn̄g-bān gōa kho͘ khì hoān-hoat, siông-chêng eng-kai ū su-iàu koh lî-chheng.

Lán ná ē kóng Lí Khèng-goân chhī-gī-oân hó-chhiò, i káⁿ chin-chiàⁿ m̄-chai-iáⁿ "chiàu siông-lí lâi khòaⁿ", ài chîⁿ ê lâng bô hun hó-gia̍h, sàn-chhiah. Siáng kóng hó-gia̍h lâng tio̍h bē tham sè-tiâu chîⁿ, sàn-chhiah lâng khòaⁿ-tio̍h chîⁿ chhiú it-tēng tio̍h ē ngiau? Khah chhù-bī ê sī, tham-châi ê lâng tóng-phài bô hun nâ le̍k o͘-pe̍h, tē-tiám bô hun tang, sai, lâm, pak, kim-gia̍h bô hun tōa-tiâu sè-tiâu. Lán kan-ta khòaⁿ chòe-kīn chin chē sia̍p-hiâm chà-niá chō͘-lí hùi chit hāng tio̍h chiok chheng-chhó.

　　 Kin-nî it-·goe̍h, Tiong-kok Kok-bîn-tóng Sin-pak-chhī gī-oân Chan Hoàn-ka, hông khòng-kò ùi 2016 nî khí chà-niá chō͘-lí hùi nn̄g-pah gōa bān, Sin-pak Tē-hng Hoat-īⁿ hoat-koaⁿ jīn-ûi Chan Hoàn-ka sia̍p-hoān Tham-u tī-chōe tiâu-lē kah hêng-hoat hō͘ kong-bū-oân teng-chài put-si̍t chōe-hiâm, hoān tāng-chōe koh ū chhoàn-chèng ê khó-lêng, chhâi-tēng ki-ah kìm kìⁿ. Phêⁿ-ô͘ koān chêng bîn-chèng-chhù tiúⁿ bô-tóng-chek Chiâⁿ Bān-kǹg, hông khòng-kò tam-jīm nn̄g kài koān-gī-oân kî-kan, sia̍p-hiâm ēng lâng-thâu pò chō͘-lí hùi kiōng 829 bān kho͘, hō͘ Phêⁿ-ô͘ Tē-īⁿ í Tham-u tī-chōe tiâu-lē phòaⁿ chhú tô͘-hêng cha̍p-jī nî, Ko-hiông koân pun-īⁿ ki-ah móa saⁿ kò-goe̍h liáu-āu, chhâi-tēng koh-chài iân-ah nn̄g kò goe̍h, i tio̍h tī lông-á-keng kòe-nî. Tiong-kok Kok-bîn-tóng Sin-tek koān-gī-oân Tân Phek-ûi hông khòng-kò ùi 2012 nî kàu 2017 nî chà-niá chō͘-lí hùi 191 bān gōa, tāng phòaⁿ saⁿ nî la̍k kò-goe̍h. Bîn-chìn-tóng Sin-pak-chhī la̍k liân-pà gī-oân Ko Bín-hūi sia̍p-hiâm chà-niá chō͘-lí hùi hông khí-sò͘, Sin-pak tē-īⁿ ha̍p-gī-têng í 600 bān kho͘ kau-pó, hān-chè chū-ku, chhut-kéng chhut-hái. Tiong-kok Kok-bîn-tóng Tâi-lâm chhī-gī-oân Lí Tiong-gîm sia̍p-hiâm chà-niá chō͘-lí hùi hō͘ kiám-hong tī 2020 nî cha̍p-jī-goe̍h chhe cheng-pān kau-pó, cha̍p-jī-goe̍h tiong, Tâi-lâm chhī-gī-hōe koh ū chi̍t miâ Tiong-kok Kok-bîn-tóng gī-oân Chhòa Io̍k-hui mā sia̍p-hiâm chà-niá chō͘-lí hùi í peh bān kho͘ kau-pó. Tàu-tàu chi̍t-ē 2020 nî Tâi-lâm chhī-gī-hōe í-keng ū gō͘ miâ hiān-jīm gī-oân kah chi̍t miâ sià-jīm gī-oân, lóng chóng la̍k-ê lâng in-ūi sia̍p-hiâm chà-niá chō͘-lí hùi hō͘ kiám-tiàu tan-ūi cheng-pān. Tiong-kok Kok-bîn-tóng Tâi-tang koān gī-oân Lîm Ui-chì sia̍p-hiâm chà-niá chō͘-lí hùi 56 bān kho͘, Tâi-tang tē-kiám-sú cha̍p-jī-goe̍h té cheng-kiat khí-sò͘, kā chāi-ah ê Lîm Ui-chì î-sàng Tâi-tang tē-hng hoat-īⁿ, hoat-koaⁿ têng-sím āu, chhâi-tēng í 80 bān kau-pó, pēng hān-chè chū-ku kah tēng-kî hiòng phài-chhut-só͘ pò-tò.

Tâi-oân kok chèng-tóng chin chē ì-kiàn bē ha̍p. Kî-koài, kan-ta chà-niá chō͘-lí hùi chit hāng, iú-chì it-tông! (210226)


　　　　涉嫌詐領助理費，真正有志一同？

　　新黨台北市議員潘懷宗kah伊ê辦公室陳主任，涉嫌詐領助理費，經過長期偵辦，今年一月二六由主任檢察官陳銘鋒、檢察官林士淳指揮台北市調查處等，執行搜揣六個所在而且扣押相關證據，發現潘、陳兩人利用人頭詐領助理費留做私用，初步估算詐領金額新台幣300萬，訊後認為兩人有湮滅證據kah勾串ê可能，兩人聲押禁見。士林地檢署指出，潘陳兩人ùi 2008年到2020年，前後用人頭詐領補助費。但是第二工裁定潘懷宗200萬交保、陳主任150萬交保，兩人限制居住、出境出海。

上好笑ê是平平新黨ê市議員李慶元，伊認為潘懷宗做代誌穩健保守、mā m̄是貪財ê人，而且伊有真濟副業收入，照常理來看伊bē為tio̍h一個月兩萬外kho͘ 去犯法，詳情應該有需要koh釐清。

咱那會講李慶元市議員好笑，伊敢真正m̄知影「照常理來看」，愛錢ê人無分好額、散赤。Siáng講好額人tio̍h bē貪細條錢，散赤人看tio̍h錢手一定tio̍h會ngiau？Khah趣味ê是，貪財ê人黨派無分藍綠烏白，地點無分東西南北，金額無分大條細條。咱kan-ta看最近真濟涉嫌詐領助理費chit項tio̍h足清楚。

　　今年一月，中國國民黨新北市議員曾煥嘉，hông控告ùi 2016年起詐領助理費兩百外萬，新北地方法院法官認為曾煥嘉涉犯貪污治罪條例kah刑法hō͘公務員登載不實罪嫌，犯重罪koh有串證ê可能，裁定羈押禁見。澎湖縣前民政處長無黨籍成萬貫，hông控告擔任兩屆縣議員期間，涉嫌用人頭報助理費共829萬元，hō͘澎湖地院依貪污治罪條例判處徒刑十二年，高雄高分院羈押滿三個月了後，裁定koh再延押兩個月，伊tio̍htī廊仔間過年。中國國民黨新竹縣議員陳栢維hông控告ùi 2012年到2017年詐領助理費191萬外，重判三年六個月。民進黨新北市六連霸議員高敏慧涉嫌詐領助理費hông起訴，新北地院合議庭以600萬元交保，限制住居、出境出海。中國國民黨台南市議員李中岑涉嫌詐領助理費hō͘檢方tī 2020年十二月初偵辦交保，十二月中，台南市議會koh有一名中國國民黨議員蔡育輝mā涉嫌詐領助理費以八萬元交保。鬥鬥一下2020年台南市議會已經有五名現任議員kah一名卸任議員，lóng總六個人因為涉嫌詐領助理費hō͘檢調單位偵辦。中國國民黨台東縣議員林威志涉嫌詐領助理費56萬元，台東地檢署十二月底偵結起訴，kā在押ê林威志移送台東地方法院，法官庭審後，裁定以80萬交保，並限制住居kah定期向派出所報到。

台灣各政黨真濟意見bē合。奇怪，kan-ta詐領助理費chit項，有志一同！ (210226)