《綠色短評》

 | | | 轉寄

方芳chit款ê無人情狗！

作者 李南衡, ChoânTâijī/全台字 by Chng Hūiphêng 2022.02.06

Choânbîn Tâioânjī pán/全民台灣字版簡稱ChoânTâiJī

《 Le̍ksek toánphêng 》 Lí Lâmhêng

方芳 chit khoán ê bô jînchêng káu!


2021 nî cha̍pjīgoe̍h jīla̍k sinbûn pòtō, chuchhim gējîn 方芳 kòekhì tī Tâioân mā sǹg sī chonggē kài ê itché. Kúi kang chêng i tī siākûn téngbīn hoaⁿhí pò hō͘ ta̍kê chaiiáⁿ chi̍tê hó siausit, tio̍h sī i íkeng niá tio̍h Tiongkokkongbîn sinhūnchèng, ínkhí bāngiú jia̍tlia̍t thólūn. Chi̍tê Tâioân lâng hoaⁿhí beh chò Bíkoklâng, Tekkoklâng á·sī Ji̍tpúnlâng, sī i soánte̍k ê chūiû. I nā sūnlī the̍h tio̍h i só͘ ìài hit kok ê sinhūnchèng á·sī le̍kkhah chi lūi ê bûnkiāⁿ, lán suijiân kah i bô se̍ksāi mā thè i hoaⁿhí.. Sinbûn pòtō kóng, 方芳 chin hoaⁿhí hō͘ ta̍kê khòaⁿ i ê Tiongkok kongbîn sinhūnchèng, thàulō͘ i sī tī cha̍pitgoe̍h jīsaⁿ sinpò, cha̍pjīgoe̍h jīsì niá tio̍h sinhūnchèng, jîchhiáⁿ soankò kóng, Ùi chitmá khí, góa kah ta̍kê kāngkhoán, mā sī ū Tiongkok kongbîn sinhūnchèng ê lâng ah! ū Tâioân bāngiú tōasiaⁿ hoah kóng, 方芳 kìjiân the̍h tio̍h Tiongkok kongbîn sinhūnchèng, engkai kā Tâioân ê kiānpókhah chián tiāu bē sái koh tńglâi Tâioân khòaⁿ pēⁿ hióngsiū kiānpó. 方芳 ìn kóng, bô lâng ū khoânlī iaukiû góa chián tiāu Tâioân kiānpókhah! 方芳 kóngōe ná ē hiah tōasiaⁿ leh? Ū ba̍kchiu khah lāi ê bāngiú khòaⁿchhut 方芳 the̍h hō͘ lâng khòaⁿ hit tiuⁿ m̄ sī "Tionghôa Jînbîn Kiōnghôkok kubîn sinhūnchèng", kánchheng "Tiongkok kongbîn sinhūnchèng", sī kah 黃安in hit chióng lâng kāngkhoán the̍h ê sī "Tionghôa Jînbîn Kiōnghôkok Tâioân kubîn kuchūchèng", kánchheng "Tâipau kuchūchèng", putkoánsî iáu ētàng tńglâi Tâioân súiōng kiānpó khah khòaⁿpēⁿ. 方芳 nā chinchiàⁿ beh the̍h tio̍h "Tiongkok kongbîn sinhūnchèng", tio̍h ài chhinchhiūⁿ lēnggōa chi̍t ūi gējîn Chhengpahhūi ánne, seng hòngkhì Tâioân kokchek, chiah ētàng the̍h tio̍h "Tiongkok kongbîn sinhūnchèng", chhinchhiūⁿ 方芳 ánne bô sitkhì Tâioân kokchek, tongjiân iáu ētàng tńglâi Tâioân hiáng ēng kiānpókhah.

Kiⁿî chi̍tgoe̍hchhe, 方芳 chiapsiū Tiongkok Tiongng Tiānsītâi ,”《 Khòaⁿ Tâihái 》chiatbo̍k chúchhîjîn hóngbūn, i kóng, Tâioân sī góa tī hia chhutsì sengtióng ê só͘chāi, kóng tùi hit tè chúithô͘ bô kámchêng sī bô hū chekjīm, sī phiànlâng·ê. Tâioân iáu ū chin chē thiàⁿsioh góa ê pêngiú. Thiaⁿ·khí·lâi náchhiūⁿ tùi Tâioân iáu ū chin chhim ê kámchêng. Phiàn· lâng·ê! I kóngtio̍h Tâioân ê sî, i kóng sinûi Tiongkok kongbîn, beh kóng chi̍t kù ōe, lán koánkà gíná ê honghoat, gíná nā kóng tōlí, tio̍h ēsái ka thiaⁿ, gíná nā bô kóng tōlí, ūsîchūn chinchiàⁿ tio̍h kā siàn nn̄gē chhùiphóe, i chiah ē chaiiáⁿ līhāi. Só͘í góa chinchiàⁿ huisiông kîthāi khòaⁿtio̍h Nn̄ghōaⁿ thóngit hit chi̍t kang. 　　方芳 káⁿ m̄chaiiáⁿ, Tiongkok nā chhutchhiú siàn Tâioân nn̄gē chhùiphóe , ū khólêng sī hiòng Tâioân phah kúi lia̍p huitôaⁿ, mā ū khólêng chiànki lâi Tâioân khongsi̍p kúi piàn, chhùthe̍h kahn̂g húihoāi, jînbîn chhám sí siūsiong. Chhèngchí bô seⁿ ba̍kchiu, m̄nā方芳 thóià ê Tâioânlâng siū hāi, chin ū khólêng chà sí chi̍t kóa方芳 chhùi·ni̍h só͘ kóng ê "chin chē thiàⁿsioh góa ê pêngiú"; suijiân tī Tâioân kah方芳 kāngkhoán jīntông kakī sī "Tiongkoklâng" ê kàu kiⁿî chiah chhun 2.8% niāniā, mā iáu ū la̍kcha̍psìbān sìchhenggōa lâng. Ittēng ē ū lâng sí tī chiànhóe tiong. 方芳 ê liôngsim íkeng khì hō͘ Tiongkok káu kākhì ah!

　　 Káu mā sī ū pahpahchióng, ū tiongsim ê káu, ū bôlūn siáⁿlâng the̍h mi̍hkiāⁿ hō͘ chia̍h tio̍h ē iô bóe ê káu, mā ū khì kā chhī i tōachiah ê chúlâng hit chióng bô jînchêng káu, 方芳 sǹg sī chit chióng "ok khián"! (220121)
Chù, 黃安 方芳 　chhiáⁿ liām Hôagí


Pe̍h-ōe-jī-pán/白話字版

《 Le̍k-sek toán-phêng 》 Lí Lâm-hêng

方芳 chit khoán ê bô jîn-chêng káu!

2021 nî cha̍p-jī-goe̍h jī-la̍k sin-bûn pò-tō, chu-chhim gē-jîn 方芳 kòe-khì tī Tâi-oân mā sǹg sī chong-gē kài ê it-ché. Kúi kang chêng i tī siā-kûn téng-bīn hoaⁿ-hí pò hō͘ ta̍k-ê chai-iáⁿ chi̍t-ê hó siau-sit, tio̍h sī i í-keng niá tio̍h Tiong-kok-kong-bîn sin-hūn-chèng, ín-khí bāng-iú jia̍t-lia̍t thó-lūn. Chi̍t-ê Tâi-oân lâng hoaⁿ-hí beh chò Bí-kok-lâng, Tek-kok-lâng á-·sī Ji̍t-pún-lâng, sī i soán-te̍k ê chū-iû. I nā sūn-lī the̍h tio̍h i só͘ ì-ài hit kok ê sin-hūn-chèng á-·sī le̍k-khah chi lūi ê bûn-kiāⁿ, lán sui-jiân kah i bô se̍k-sāi mā thè i hoaⁿ-hí.
Sin-bûn pò-tō kóng, 方芳 chin hoaⁿ-hí hō͘ ta̍k-ê khòaⁿ i ê Tiong-kok kong-bîn sin-hūn-chèng, thàu-lō͘ i sī tī cha̍p-it-goe̍h jī-saⁿ sin-pò, cha̍p-jī-goe̍h jī-sì niá tio̍h sin-hūn-chèng, jî-chhiáⁿ soan-kò kóng, Ùi chit-má khí, góa kah ta̍k-ê kāng-khoán, mā sī ū Tiong-kok kong-bîn sin-hūn-chèng ê lâng ah! ū Tâi-oân bāng-iú tōa-siaⁿ hoah kóng, 方芳 kì-jiân the̍h tio̍h Tiong-kok kong-bîn sin-hūn-chèng, eng-kai kā Tâi-oân ê kiān-pó-khah chián tiāu bē sái koh tńg-lâi Tâi-oân khòaⁿ pēⁿ hióng-siū kiān-pó. 方芳 ìn kóng, bô lâng ū khoân-lī iau-kiû góa chián tiāu Tâi-oân kiān-pó-khah! 方芳 kóng-ōe ná ē hiah tōa-siaⁿ leh? Ū ba̍k-chiu khah lāi ê bāng-iú khòaⁿ-chhut 方芳 the̍h hō͘ lâng khòaⁿ hit tiuⁿ m̄ sī "Tiong-hôa Jîn-bîn Kiōng-hô-kok ku-bîn sin-hūn-chèng", kán-chheng "Tiong-kok kong-bîn sin-hūn-chèng", sī kah 黃安in hit chióng lâng kāng-khoán the̍h ê sī "Tiong-hôa Jîn-bîn Kiōng-hô-kok Tâi-oân ku-bîn ku-chū-chèng", kán-chheng "Tâi-pau ku-chū-chèng", put-koán-sî iáu ē-tàng tńg-lâi Tâi-oân sú-iōng kiān-pó khah khòaⁿ-pēⁿ. 方芳 nā chin-chiàⁿ beh the̍h tio̍h "Tiong-kok kong-bîn sin-hūn-chèng", tio̍h ài chhin-chhiūⁿ lēng-gōa chi̍t ūi gē-jîn Chheng-pah-hūi án-ne, seng hòng-khì Tâi-oân kok-chek, chiah ē-tàng the̍h tio̍h "Tiong-kok kong-bîn sin-hūn-chèng", chhin-chhiūⁿ 方芳 án-ne bô sit-khì Tâi-oân kok-chek, tong-jiân iáu ē-tàng tńg-lâi Tâi-oân hiáng ēng kiān-pó-khah.

Kin-nî chi̍t-goe̍h-chhe, 方芳 chiap-siū Tiong-kok Tiong-ng Tiān-sī-tâi ,”《 Khòaⁿ Tâi-hái 》chiat-bo̍k chú-chhî-jîn hóng-būn, i kóng, Tâi-oân sī góa tī hia chhut-sì seng-tióng ê só͘-chāi, kóng tùi hit tè chúi-thô͘ bô kám-chêng sī bô hū chek-jīm, sī phiàn-lâng·ê. Tâi-oân iáu ū chin chē thiàⁿ-sioh góa ê pêng-iú. Thiaⁿ·khí·lâi ná-chhiūⁿ tùi Tâi-oân iáu ū chin chhim ê kám-chêng. Phiàn· lâng·ê! I kóng-tio̍h Tâi-oân ê sî, i kóng sin-ûi Tiong-kok kong-bîn, beh kóng chi̍t kù ōe, lán koán-kà gín-á ê hong-hoat, gín-á nā kóng tō-lí, tio̍h ē-sái ka thiaⁿ, gín-á nā bô kóng tō-lí, ū-sî-chūn chin-chiàⁿ tio̍h kā siàn nn̄g-ē chhùi-phóe, i chiah ē chai-iáⁿ lī-hāi. Só͘-í góa chin-chiàⁿ hui-siông kî-thāi khòaⁿ-tio̍h Nn̄g-hōaⁿ thóng-it hit chi̍t kang.

　　方芳 káⁿ m̄-chai-iáⁿ, Tiong-kok nā chhut-chhiú siàn Tâi-oân nn̄g-ē chhùi-phóe , ū khó-lêng sī hiòng Tâi-oân phah kúi lia̍p hui-tôaⁿ, mā ū khó-lêng chiàn-ki lâi Tâi-oân khong-si̍p kúi piàn, chhù-the̍h ka-hn̂g húi-hoāi, jîn-bîn chhám sí siū-siong. Chhèng-chí bô seⁿ ba̍k-chiu, m̄-nā方芳 thó-ià ê Tâi-oân-lâng siū hāi, chin ū khó-lêng chà sí chi̍t kóa方芳 chhùi·ni̍h só͘ kóng ê "chin chē thiàⁿ-sioh góa ê pêng-iú"; sui-jiân tī Tâi-oân kah方芳 kāng-khoán jīn-tông ka-kī sī "Tiong-kok-lâng" ê kàu kin-nî chiah chhun 2.8% niā-niā, mā iáu ū la̍k-cha̍p-sì-bān sì-chheng-gōa lâng. It-tēng ē ū lâng sí tī chiàn-hóe tiong. 方芳 ê liông-sim í-keng khì hō͘ Tiong-kok káu kā-khì ah!

　　 Káu mā sī ū pah-pah-chióng, ū tiong-sim ê káu, ū bô-lūn siáⁿ-lâng the̍h mi̍h-kiāⁿ hō͘ chia̍h tio̍h ē iô bóe ê káu, mā ū khì kā chhī i tōa-chiah ê chú-lâng hit chióng bô jîn-chêng káu, 方芳 sǹg sī chit chióng "ok khián"! (220121)

Chù, 黃安 方芳 　chhiáⁿ liām Hôa-gí


2021年十二月二六新聞報導，資深藝人方芳過去tī台灣mā算是綜藝界ê一姊。幾工前伊tī社群頂面歡喜報hō͘ta̍k个知影一個好消息,，tio̍h是伊已經領tio̍h中國公民身分證，引起網友熱烈討論。一個台灣人歡喜beh做美國人、德國人á是日本人，是伊選擇ê自由。伊若順利the̍h tio̍h伊所意愛hit國ê身分證á是綠卡之類ê文件，咱雖然kah伊無熟似mā替伊歡喜.。

新聞報導講，方芳真歡喜hō͘ta̍k个看伊ê中國公民身分證，透露伊是tī十一月二三申報，十二月二四領tio̍h身分證，而且宣告講：Ùi chit-má起，我kahta̍k个仝款，mā是有中國公民身分證ê人ah！有台灣網友大聲喝講，方芳既然the̍h tio̍h中國公民身分證，應該kā台灣ê健保卡剪掉bē使koh轉來台灣看病享受健保。方芳應講，無人有權利要求我剪掉台灣健保卡！方芳講話ná ēhiah大聲咧？有目睭khah利ê網友看出方芳the̍h hō͘人看hit張m̄是「中華人民共和國居民身份證」、簡稱「中國公民身份證」，是kah黃安in hit種人仝款the̍h ê是「中華人民共和國台灣居民居住證」、簡稱「台胞居住證」，不管時猶ē-tàng轉來台灣使用健保卡看病。方芳若真正beh the̍h tio̍h「中國公民身份證」，tio̍h愛親像另外一位藝人千百惠án-ne，先放棄台灣國籍，才ē-tàng the̍h tio̍h「中國公民身份證」，親像方芳án-ne無失去台灣國籍，當然猶ētàng轉來台灣享用健保卡。

今年一月初，方芳接受中國中央電視台《看台海》節目主持人訪問，伊講，台灣是我tīhia出世生長ê所在，講對hit塊水土無感情是無負責任、是騙人ê。台灣猶有真chē疼惜我ê朋友。聽起來ná像對台灣猶有真深ê感情。騙人ê！伊講tio̍h台灣ê時，伊講身為中國公民，beh講一句話，咱管教gín-á ê方法，gín-á若講道理，tio̍hē-sáika聽，gín-á若無講道理，有時陣真正tio̍h kā煽兩下嘴phóe，伊才ē知影厲害。所以我真正非常期待看tio̍h兩岸統一hit一工。

　　方芳敢m̄知影，中國若出手搧台灣兩下嘴phóe，有可能是向台灣拍幾粒飛彈、mā有可能戰機來台灣空襲幾遍，厝宅家園毀壞，人民慘死受傷。銃子無生目睭，m̄-nā方芳討厭ê台灣人受害，真有可能炸死一kóa方芳嘴裡所講ê「真chē疼惜我ê朋友」；雖然tī台灣kah方芳仝款認同家己是「中國人」ê到今年才chhun 2.8% niā-niā，mā猶有六十四萬四千外人。一定ē有人死tī戰火中。方芳ê良心已經去hō͘中國狗咬去ah！

　　狗mā是有百百種，有忠心ê狗、有無論啥人the̍h物件hō͘食tio̍hē搖尾ê狗，mā有去咬飼伊大隻ê主人hit種無人情狗，方芳算是chit種「惡犬」！ (220121)
註：黃安 方芳　　請唸華語