《綠色短評》

 | | | 轉寄

中國對台灣án-ne統戰，笑死人！

作者 李南衡, ChoânTâijī/全台字 by Chng Hūiphêng 2021.12.12

Choânbîn Tâioânjī pán/全民台灣字版簡稱ChoânTâiJī

《 Le̍ksek toánphêng 》　　　　　　　　 Lí Lâmhêng

　　　　　　 Tiongkok tùi Tâioân ánne thóngchiàn, chhiò sílâng!

　　 Cha̍pitgoe̍h jīcha̍p, Tiongkok koaⁿhong mûithé 《 Jînbîn Chèng hia̍ppò 》tī tēgō͘ pán " nn̄g hōaⁿ keng ha̍p chiukhan " khan chhut chi̍t phiⁿ bûnchiuⁿ, "ūi siáⁿmi̍h kóng Tâioân ê chiântô͘ chāi tī thóngit? " bûnchiuⁿ kóng, nā thóngit Tâioân liáuāu, Tâioân bînchiòng siōngkài ūkám ê hóchhù, mā sī siōng=kài ti̍tchiap ê hóchhù sī, Tâioân 2,300 bān bînchiòng múi lâng múi nî ētàng chēngka siuji̍p sin tâipè nn̄gbān gōa. Lūntiám sī thóngit Tâioân liáuāu, Tiongkok tio̍h bē phah Tâioân, Tâioân tio̍h bián khaichîⁿ bé kunpī búkhì kah kiám khui kimoān gōakau, chit nn̄g tiâu chîⁿ lóng séng·khílâi, chiatséⁿ chichhut sin tâipè 6,000 ek, ētàng pun hō͘ Tâioân 2,300 bān bînchiòng, múi lâng múi nî chēngka siuji̍p sin tâipè nn̄gbān gōa, tùi phó͘thong pehsèⁿ lâi kóng, chiahni̍h hó ê thóngit, tongjiân ē kîthāi.

　　 Thóngit Tâioân liáuāu, Tâioân 2,300 bān bînchiòng múi lâng múi nî ētàng chēngka siuji̍p sintâipè nn̄gbān gōa kho͘, ū siáⁿmi̍h hó kîthāi? Siatsú Tâioân bo̍kchêng sī chi̍tê bô chūiû bô bînchú bô jînkoân ê só͘chāi, Tiongkok sī chi̍tê chūiû bînchú jînkoân sianchìn ê kokka, hoahsiaⁿ kóng nā sī thóngit Tâioân liáuāu, Tâioân 2,300 bān bînchiòng tio̍h ētàng kah cha̍psì ek Tiongkok lâng kāngkhoán, kah sèkài sianchìn kokka ê lâng kāngkhoán, kòe tio̍h ū chūiû si̍thêng bînchú chuntiōng jînkoân ê sengoa̍h, ánne Tâioân phó͘thong pehsèⁿ ē ū kîthāi mā khah ūiáⁿ. Sūsi̍t sī tútú tòhoán, Tâioân sī chi̍tê chūiû bînchú jînkoân ê só͘chāi. Siatsú Tâioân bo̍kchêng sengoa̍h chúichún khah kē, Tiongkok lâng sī kòe tio̍h sèkài kip hùjū ê sengoa̍h, tōasiaⁿ hoahkóng nā sī thóngit Tâioân liáuāu, Tâioân 2,300 bān bînchiòng tio̍h ētàng kah cha̍psì ek Tiongkok lâng kāngkhoán, kah sèkài sianchìn kokka ê lâng kāngkhoán, kòe tio̍h hùjū khoàilo̍k ê sengoa̍h, ū khólêng ū chi̍tkóa Tâioân bînchiòng ē himsiān. Sūsi̍t siōng sī Tâioân pí Tiongkok hó chin chē, Tâioân jînkháu 2,300 bān lâng, múi lâng pêngkin GDP sī bíkim 2.838 bān, Tiongkok siōng ài tián ê itsòaⁿ sì tōa siâⁿchhī "Pak Siōng Kńg Chhim"— Pakkiaⁿ Siōnghái Kńgchiu Chhimchùn, bô chi̍tê siâⁿchhī pí Tâioân khah hó. Pakkiaⁿ jînkháu 2,189 bān lâng, múi lâng pêngkin GDP sī bíkim 2.391 bān, Tâioân ê 84.2%; siōng hái jînkháu 2,487 bān lâng, múi lâng pêngkin GDP sī bíkim 2.256 bān, Tâioân ê 79.5%; Kńgchiu jînkháu 1,867 bān lâng, múi lâng pêngkin GDP sī bíkim 1.940 bān, Tâioân ê 68.4%; Chhimchùn 1,756 bān lâng, múi lâng pêngkin GDP sī bíkim 2.284 bān, Tâioân ê 79.5%.

　　Nā sī chiàu Tiongkok Kokbūīⁿ chónglí Lí Khekkiông só͘ kóng·ê, Tiongkok ū la̍k ek lâng múi kògoe̍h ê siuji̍p bô kàu jînbînpè 1,000 kho͘, iok sin tâipè 4,300 kho͘, láusi̍t kóng, Tiongkok nā beh tùi Tâioân thóngchiàn, kóngtio̍h chîⁿ tio̍h chin iànkhì, chha lán hiah chē iā káⁿ kóng chîⁿ. Ū châitiāu tio̍hkóng chètō͘, kóng Tiongkok si̍tsi kiōngsán chúgī chètō͘, siáⁿmi̍h siáⁿmi̍h siáⁿmi̍h, pí Tâioân si̍tsi bînchú chètō͘ ke hó chin chē. Kóng ē chhutlâi, koh kóng ē chhut chi̍t thò thiaⁿliáu lâng ē ho̍k i ê tōlí lâi, lán mā siósió kā chunkèng. Bô, oânchoân kóng bē chhutlâi, kanta ēhiáu ēng búle̍k uihia̍p lán, ahsī ta̍k kang kunki poe ji̍plâi lán ê Sailâm Hôngkhong Sekpia̍tkhu jiáuloān, lán ná khòaⁿ i ē khí leh? Tiongkok lâng hiah chē, káⁿ bô kúiêá khah ū thâukhak ê?

　　 Tiongkok tùi Tâioân ánne thóngchiàn, chhiò sílâng! chinchiàⁿ m̄ kiaⁿ chhiò phòa lâng ê chhùi? 　　(211126)

Pe̍h-ōe-jī-pán/白話字版

《 Le̍k-sek toán-phêng 》　　　　　　　　 Lí Lâm-hêng

　　　　　　 Tiong-kok tùi Tâi-oân án-ne thóng-chiàn, chhiò sí-lâng!

　　 Cha̍p-it-goe̍h jī-cha̍p, Tiong-kok koaⁿ-hong mûi-thé 《 Jîn-bîn Chèng -hia̍p-pò 》tī tē-gō͘ pán " nn̄g hōaⁿ keng ha̍p chiu-khan " khan chhut chi̍t phiⁿ bûn-chiuⁿ, "ūi siáⁿ-mi̍h kóng Tâi-oân ê chiân-tô͘ chāi tī thóng-it? " bûn-chiuⁿ kóng, nā thóng-it Tâi-oân liáu-āu, Tâi-oân bîn-chiòng siōng-kài ū-kám ê hó-chhù, mā sī siōng=kài ti̍t-chiap ê hó-chhù sī, Tâi-oân 2,300 bān bîn-chiòng múi lâng múi nî ē-tàng chēng-ka siu-ji̍p sin tâi-pè nn̄g-bān gōa. Lūn-tiám sī thóng-it Tâi-oân liáu-āu, Tiong-kok tio̍h bē phah Tâi-oân, Tâi-oân tio̍h bián khai-chîⁿ bé kun-pī bú-khì kah kiám khui kim-oān gōa-kau, chit nn̄g tiâu chîⁿ lóng séng-·khí-lâi, chiat-séⁿ chi-chhut sin tâi-pè 6,000 ek, ē-tàng pun hō͘ Tâi-oân 2,300 bān bîn-chiòng, múi lâng múi nî chēng-ka siu-ji̍p sin tâi-pè nn̄g-bān gōa, tùi phó͘-thong peh-sèⁿ lâi kóng, chiah-ni̍h hó ê thóng-it, tong-jiân ē kî-thāi.

　　 Thóng-it Tâi-oân liáu-āu, Tâi-oân 2,300 bān bîn-chiòng múi lâng múi nî ē-tàng chēng-ka siu-ji̍p sin-tâi-pè nn̄g-bān gōa kho͘, ū siáⁿ-mi̍h hó kî-thāi? Siat-sú Tâi-oân bo̍k-chêng sī chi̍t-ê bô chū-iû bô bîn-chú bô jîn-koân ê só͘-chāi, Tiong-kok sī chi̍t-ê chū-iû bîn-chú jîn-koân sian-chìn ê kok-ka, hoah-siaⁿ kóng nā sī thóng-it Tâi-oân liáu-āu, Tâi-oân 2,300 bān bîn-chiòng tio̍h ē-tàng kah cha̍p-sì ek Tiong-kok lâng kāng-khoán, kah sè-kài sian-chìn kok-ka ê lâng kāng-khoán, kòe tio̍h ū chū-iû si̍t-hêng bîn-chú chun-tiōng jîn-koân ê seng-oa̍h, án-ne Tâi-oân phó͘-thong peh-sèⁿ ē ū kî-thāi mā khah ū-iáⁿ. Sū-si̍t sī tú-tú tò-hoán, Tâi-oân sī chi̍t-ê chū-iû bîn-chú jîn-koân ê só͘-chāi. Siat-sú Tâi-oân bo̍k-chêng seng-oa̍h chúi-chún khah kē, Tiong-kok lâng sī kòe tio̍h sè-kài kip hù-jū ê seng-oa̍h, tōa-siaⁿ hoah-kóng nā sī thóng-it Tâi-oân liáu-āu, Tâi-oân 2,300 bān bîn-chiòng tio̍h ē-tàng kah cha̍p-sì ek Tiong-kok lâng kāng-khoán, kah sè-kài sian-chìn kok-ka ê lâng kāng-khoán, kòe tio̍h hù-jū khoài-lo̍k ê seng-oa̍h, ū khó-lêng ū chi̍t-kóa Tâi-oân bîn-chiòng ē him-siān. Sū-si̍t siōng sī Tâi-oân pí Tiong-kok hó chin chē, Tâi-oân jîn-kháu 2,300 bān lâng, múi lâng pêng-kin GDP sī bí-kim 2.838 bān, Tiong-kok siōng ài tián ê it-sòaⁿ sì tōa siâⁿ-chhī "Pak Siōng Kńg Chhim"— Pak-kiaⁿ Siōng-hái Kńg-chiu Chhim-chùn, bô chi̍t-ê siâⁿ-chhī pí Tâi-oân khah hó. Pak-kiaⁿ jîn-kháu 2,189 bān lâng, múi lâng pêng-kin GDP sī bí-kim 2.391 bān, Tâi-oân ê 84.2%; siōng hái jîn-kháu 2,487 bān lâng, múi lâng pêng-kin GDP sī bí-kim 2.256 bān, Tâi-oân ê 79.5%; Kńg-chiu jîn-kháu 1,867 bān lâng, múi lâng pêng-kin GDP sī bí-kim 1.940 bān, Tâi-oân ê 68.4%; Chhim-chùn 1,756 bān lâng, múi lâng pêng-kin GDP sī bí-kim 2.284 bān, Tâi-oân ê 79.5%.

　　Nā sī chiàu Tiong-kok Kok-bū-īⁿ chóng-lí Lí Khek-kiông só͘ kóng-·ê, Tiong-kok ū la̍k ek lâng múi kò-goe̍h ê siu-ji̍p bô kàu jîn-bîn-pè 1,000 kho͘, iok sin tâi-pè 4,300 kho͘, láu-si̍t kóng, Tiong-kok nā beh tùi Tâi-oân thóng-chiàn, kóng-tio̍h chîⁿ tio̍h chin iàn-khì, chha lán hiah chē iā káⁿ kóng chîⁿ. Ū châi-tiāu tio̍h-kóng chè-tō͘, kóng Tiong-kok si̍t-si kiōng-sán chú-gī chè-tō͘, siáⁿ-mi̍h siáⁿ-mi̍h siáⁿ-mi̍h, pí Tâi-oân si̍t-si bîn-chú chè-tō͘ ke hó chin chē. Kóng ē chhut-lâi, koh kóng ē chhut chi̍t thò thiaⁿ-liáu lâng ē ho̍k i ê tō-lí lâi, lán mā sió-sió kā chun-kèng. Bô, oân-choân kóng bē chhut-lâi, kan-ta ē-hiáu ēng bú-le̍k ui-hia̍p lán, ah-sī ta̍k kang kun-ki poe ji̍p-lâi lán ê Sai-lâm Hông-khong Sek-pia̍t-khu jiáu-loān, lán ná khòaⁿ i ē khí leh? Tiong-kok lâng hiah chē, káⁿ bô kúi-ê-á khah ū thâu-khak ê?

　　 Tiong-kok tùi Tâi-oân án-ne thóng-chiàn, chhiò sí-lâng! chin-chiàⁿ m̄ kiaⁿ chhiò phòa lâng ê chhùi? 　　(211126)

　　十一月二十，中國官方媒體《人民政協報》tī第五版「兩岸經合週刊」刊出一篇文章：「為啥物講台灣ê前途在tī統一？」文章講，nā統一台灣了後，台灣民眾上kài有感ê好處，mā是上kài直接ê好處是，台灣2,300萬民眾每人每年ē-tàng增加收入新台幣兩萬外元。論點是統一台灣了後，中國tio̍h bē拍台灣，台灣tio̍h免開錢買軍備武器kah減開金援外交，chit兩條錢lóng省起來，節省支出新台幣6,000億，ē-tàng分hō͘台灣2,300萬民眾，每人每年增加收入新台幣兩萬外元，對普通百姓來講，chiah-nih好ê統一，當然ē期待。

　　統一台灣了後，台灣2,300萬民眾每人每年ē-tàng增加收入新台幣兩萬外元，有啥物好期待？設使台灣目前是一個無自由無民主無人權ê所在，中國是一個自由民主人權先進ê國家，喝聲講nā是統一台灣了後，台灣2,300萬民眾tio̍h ē-tàng kah十四億中國人仝款、kah世界先進國家ê人仝款，過tio̍h有自由實行民主尊重人權ê生活，án-ne台灣普通百姓ē有期待mā khah有影。事實是tú-tú倒反，台灣是一個自由民主人權ê所在。設使台灣目前生活水準khah低，中國人是過tio̍h世界級富裕ê生活，大聲喝講nā是統一台灣了後，台灣2,300萬民眾tio̍hē-tàng kah十四億中國人仝款、kah世界先進國家ê人仝款，過tio̍h富裕快樂ê生活，有可能有一寡台灣民眾ē欣羨。事實上是台灣比中國好真chē，台灣人口2,300萬人、每人平均GDP是美金2.838萬，中國上愛展ê一線四大城市「北上廣深」—北京上海廣州深圳，無一個城市比台灣khah好。北京人口2,189萬人、每人平均GDP是美金2.391萬、台灣ê84.2%；上海人口2,487萬人、每人平均GDP是美金2.256萬、台灣ê79.5%；廣州人口1,867萬人、每人平均GDP是美金1.940萬、台灣ê68.4%；深圳1,756萬人、每人平均GDP是美金2.284萬、台灣ê79.5%。

　　Nā是照中國國務院總理李克強所講ê，中國有六億人每個月ê收入無夠人民幣1,000元、約新台幣4,300元，老實講，中國nābeh對台灣統戰，講tio̍h錢tio̍h真iàn氣，差咱hiah chē也敢講錢。有才調tio̍h講制度，講中國實施共產主義制度，啥物啥物啥物，比台灣實施民主制度加好真chē。講ē出來、koh講ē出一套聽了人ē服伊ê道理來，咱mā小小kā尊敬。無，完全講bē出來，kan-taē曉用武力威脅咱，ah是逐工軍機飛入來咱ê西南防空識別區擾亂，咱ná看伊ē起咧？中國人hiah chē，敢無幾个á khah有頭殼ê？

　　中國對台灣án-ne統戰，笑死人！真正m̄驚笑破人ê嘴？　　(211126)