《綠色短評》

 | | | 轉寄

Chit遍惡罷成功，台灣人náē-sái無覺醒！

作者 李南衡, ChoânTâijī/全台字 by Chng Hūiphêng 2021.11.07

Choânbîn Tâioânjī pán/全民台灣字版簡稱ChoânTâiJī

《 Le̍ksek toánphêng 》 Lí Lâmhêng

　　　 Chit piàn ok pā sêngkong, Tâioânlâng ná ēsái bô kakchhéⁿ!

　　 Cha̍pgoe̍h jīsaⁿ, Tâitiong tējī soánkhu, iā chiūsī Soalo̍k, O͘ji̍t, Tōatō͘, Liôngchéⁿ, Būhong gō͘ khu ê soánbîn kíhêng "pābián li̍púi Tân Pekî tâuphiò "gō͘ khu soánkí jînsò͘ sī 29 bān 4,976 lâng, pābián thongkòe ê hō͘tēng sī sìhun chṳt, iā chiūsī 7 bān 3,744 phiò, jîchhiáⁿ, tôngì phiò tio̍h pí put tôngì phiò khah chē chiah ū chúnsǹg. Chin lântit tâuphiò lu̍t chhiaukòe 51.72%. Kàu ēpo͘ chhit tiám só͘ tittio̍h ê kiatkó, tôngì phiò 7 bān 7,899 phiò, ū hāⁿ kòe pābián ê hō͘tēng, jîchhiáⁿ pí put tôngì phiò 7 bān 3,433 phiò ū khah chē. Só͘í pābián thongkòe.

　　 Chit piàn ê pābián ēsái kóng sī chi̍t tiûⁿ tōa ap sè, kiông phah jio̍k, ok khi siān, oânchoân bô kongpêⁿ ê pābián. Chi̍tê sèkài siōng tōa tóng, ū 9,500 bān ê tóngoân ê Tiongkok kiōngsántóng, kah Tâioân tēit tōa chāṳá tóng, tī li̍phoatīⁿ ū 38 sek ê Tiongkok Kokbîntóng tàukhang, beh kā li̍phoatīⁿ siōng sè tóng, kantaⁿ ū chi̍tê li̍phoat úigoân ê Tâioân Kichìn li̍phoat úigoân Tân pekî pābián tiāu, kohchài phòeha̍p tēhng sèle̍k chin kiông ê Gânka bú chit chhut pābián àn.

　　Chit saⁿ hongbīn ū bô kāngkhoán ê siūⁿhoat kah phahsǹg. Káugoe̍h jīla̍k, Tiongkok Kiōngsántóng Chóngsukì Xíjìnpíng hoat hō͘ Chu Li̍plûn tòngsoán tóngchúse̍k ê hōtiān, tûliáu kah íóng kāngkhoán, kianchhî "Kiújī kiōngsek", hoántùi "Tâito̍k" ê kiōngtông chèngtī kichhó͘ siōng ê liôngsèng hō͘tōng, kakiông ha̍pchok ígōa, kiⁿî kah éngnî bô kâng ê "sèngchí" sī, "ūi kokka bô͘ thóngit". Xíjìnpíng kiaⁿ Chu Li̍plûn bē kìtit, te̍kpia̍t tī Chu Li̍plûn chiūjīm tóngchúse̍k hit kang, tī < Tiongiong tiānsītâi > iû Tiongkok Siākho īⁿ Tâioân giánkiùsó͘ hù giánkiùoân Tân Kùichheng hē chítō kî, te̍kpia̍t thêchhéⁿ Chu Li̍plûn ê sì ki chìⁿ, ū chi̍t ki sī pābián Tân Pekî, ū chi̍t ki sī pābián Lîm Chhióngchò, ū chi̍t ki sī nîté ê sì tōa kongtâu, tēngūi choh "tókoh kongtâu", hō͘ hiānchāi Bînchìntóng chipchèng ê hêngchèng thoântūi chi̍tê kiôngle̍k ê táⁿkek.

Le̍ksú siōng tit phiò lu̍t siōng kē tòngsoán Tiongkok Kokbîntóng chúse̍k ê Chu Li̍plûn, kín beh tī pābián Tân pekî chit àn li̍pui, koh khah iàukín sī, pābián ū chiâⁿ koh ētàng hiòng pakkiaⁿ chhéngkong, kā tī li̍phoatīⁿ siōng kianchhî Tâioân to̍kli̍p ê Tâioân Kichìn îit ê li̍púi pābián tiāu, chhiáⁿ kì liaulô chi̍t tōa kong.

Gânka ê siūⁿhoat chin kántan, khòaⁿ Tân pekî chi̍t nî cha̍p kò goe̍h chò li̍phoat úigoân chò liáu thài hó, tánthāi i chi̍t jīm chò liáu, āu chi̍t jīm li̍púi oânchoân bián siūⁿ beh soán iâⁿ, thàn i chi̍t jīm iáu bōe chò oân, sòa kā pābián tiāu tio̍h ētàng ansim á khùn.

Tiongkok Kokbîntóng tio̍h chhut oklia̍t ê pō͘sò͘, bôkoán sī chōiâu , boah o͘, súnhāi jînkeh, chhōe bô pābián ê líiû tio̍h chèchō chi̍t kóa "chiàkháu", chò chi̍t tōatui khòaⁿpán siá "chōechōng". Só͘í lâng chiah ē kóng che sī chi̍t tiûⁿ ê "ok pā". Chit pō͘ nā ē thong, Tiongkok Kiōngsántóng bián ēng chi̍t peng chi̍t chut, kantaⁿ hē chi̍t tō chi̍t tō ê "sèngchí", Tâioân ê liaulô tio̍h ētàng kā Tâioân bú kah o͘thiⁿ àmtē, puttek anlêng.

　　 Chit piàn ok pā sêngkong, Tâioânlâng ná ēsái bô kakchhéⁿ! 　　 (211023)

Pe̍h-ōe-jī-pán/白話字版

《 Le̍k-sek toán-phêng 》 Lí Lâm-hêng

　　　 Chit piàn ok pā sêng-kong, Tâi-oân-lâng ná ē-sái bô kak-chhéⁿ!

　　 Cha̍p-goe̍h jī-saⁿ, Tâi-tiong tē-jī soán-khu, iā chiū-sī Soa- lo̍k, O͘-ji̍t, Tōa-tō͘, Liông-chéⁿ, Bū-hong gō͘ khu ê soán-bîn kí-hêng "pā-bián li̍p-úi Tân Pek-î tâu-phiò "gō͘ khu soán-kí jîn-sò͘ sī 29 bān 4,976 lâng, pā-bián thong-kòe ê hō͘-tēng sī sì-hun chi-it, iā chiū-sī 7 bān 3,744 phiò, jî-chhiáⁿ, tông-ì phiò tio̍h pí put tông-ì phiòkhah chē chiah ū chún-sǹg. Chin lân-tit tâu-phiò lu̍t chhiau-kòe 51.72%. Kàu ē-po͘ chhit tiám só͘ tit-tio̍h ê kiat-kó, tông-ì phiò 7 bān 7,899 phiò, ū hāⁿ kòe pā-bián ê hō͘-tēng, jî-chhiáⁿ pí put tông-ì phiò 7 bān 3,433 phiò ū khah chē. Só͘-í pā-bián thong-kòe.

　　 Chit piàn ê pā-bián ē-sái kóng sī chi̍t tiûⁿ tōa ap sè, kiông phah jio̍k, ok khi siān, oân-choân bô kong-pêⁿ ê pā-bián. Chi̍t-ê sè-kài siōng tōa tóng, ū 9,500 bān ê tóng-oân ê Tiong-kok kiōng-sán-tóng, kah Tâi-oân tē-it tōa chāi-iá tóng, tī li̍p-hoat-īⁿ ū 38 sek ê Tiong-kok Kok-bîn-tóng tàu-khang, beh kā li̍p-hoat-īⁿ siōng sè tóng, kan-taⁿ ū chi̍t-ê li̍p-hoat úi-goân ê Tâi-oân Ki-chìn li̍p-hoat úi-goân Tân pek-î pā-bián tiāu, koh-chài phòe-ha̍p tē-hng sè-le̍k chin kiông ê Gân--ka bú chit chhut pā-bián àn.

　　Chit saⁿ hong-bīn ū bô kāng-khoán ê siūⁿ-hoat kah phah-sǹg. Káu-goe̍h jī-la̍k, Tiong-kok Kiōng-sán-tóng Chóng-su-kì Xíjìnpíng hoat hō͘ Chu Li̍p-lûn tòng-soán tóng-chú-se̍k ê hō-tiān, tû-liáu kah í-óng kāng-khoán, kian-chhî "Kiú-jī kiōng-sek", hoán-tùi "Tâi-to̍k" ê kiōng-tông chèng-tī ki-chhó͘ siōng ê liông-sèng hō͘-tōng, ka-kiông ha̍p-chok í-gōa, kin-nî kah éng-nî bô kâng ê "sèng-chí" sī, "ūi kok-ka bô͘ thóng-it". Xíjìnpíng kiaⁿ Chu Li̍p-lûn bē kì-tit, te̍k-pia̍t tī Chu Li̍p-lûn chiū-jīm tóng-chú-se̍k hit kang, tī < Tiong-iong tiān-sī-tâi > iû Tiong-kok Siā-kho- īⁿ Tâi-oân gián-kiù-só͘ hù gián-kiù-oân Tân Kùi-chheng hē chí-tō kî, te̍k-pia̍t thê-chhéⁿ Chu Li̍p-lûn ê sì ki chìⁿ, ū chi̍t ki sī pā-bián Tân Pek-î, ū chi̍t ki sī pā-bián Lîm Chhióng-chò, ū chi̍t ki sī nî-té ê sì tōa kong-tâu, tēng-ūi choh "tó-koh kong-tâu", hō͘ hiān-chāi Bîn-chìn-tóng chip-chèng ê hêng-chèng thoân-tūi chi̍t-ê kiông-le̍k ê táⁿ-kek.
Le̍k-sú siōng tit phiò lu̍t siōng kē tòng-soán Tiong-kok Kok-bîn-tóng chú-se̍k ê Chu Li̍p-lûn, kín beh tī pā-bián Tân pek-î chit àn li̍p-ui, koh khah iàu-kín sī, pā-bián ū chiâⁿ koh ē-tàng hiòng pak-kiaⁿ chhéng-kong, kā tī li̍p-hoat-īⁿ siōng kian-chhî Tâi-oân to̍k-li̍p ê Tâi-oân Ki-chìn î-it ê li̍p-úi pā-bián tiāu, chhiáⁿ kì liau-lô chi̍t tōa kong.

Gân--ka ê siūⁿ-hoat chin kán-tan, khòaⁿ Tân pek-î chi̍t nî cha̍p kò goe̍h chò li̍p-hoat úi-goân chò liáu thài hó, tán-thāi i chi̍t jīm chò liáu, āu chi̍t jīm li̍p-úi oân-choân bián siūⁿ beh soán iâⁿ, thàn i chi̍t jīm iáu bōe chò oân, sòa kā pā-bián tiāu tio̍h ē-tàng an-sim á khùn.

Tiong-kok Kok-bîn-tóng tio̍h chhut ok-lia̍t ê pō͘-sò͘, bô-koán sī chō-iâu , boah o͘, sún-hāi jîn-keh, chhōe bô pā-bián ê lí-iû tio̍h chè-chō chi̍t kóa "chià-kháu", chò chi̍t tōa-tui khòaⁿ-pán siá "chōe-chōng". Só͘-í lâng chiah ē kóng che sī chi̍t tiûⁿ ê "ok pā". Chit pō͘ nā ē thong, Tiong-kok Kiōng-sán-tóng bián ēng chi̍t peng chi̍t chut, kan-taⁿ hē chi̍t tō chi̍t tō ê "sèng-chí", Tâi-oân ê liau-lô tio̍h ē-tàng kā Tâi-oân bú kah o͘-thiⁿ àm-tē, put-tek an-lêng.

　　 Chit piàn ok pā sêng-kong, Tâi-oân-lâng ná ē-sái bô kak-chhéⁿ! 　　 (211023)



　　十月二三，台中第二選區，也就是沙鹿、烏日、大肚、龍井、霧峰五區ê選民舉行「罷免立委陳柏惟（Tân pek-î）投票」五區選舉人數是29萬4,976人，罷免通過ê戶碇是四分之一，也就是7萬3,744票，而且，同意票tio̍h比不同意票khahchē chiah有準算。真難得投票率超過51.72%。到下晡七點所得tio̍hê結果，同意票7萬7,899票，有hāⁿ過罷免ê戶碇，而且比不同意票7萬3,433票有khahchē。所以罷免通過。

　　Chit遍ê罷免ē-sái講是一場大壓細、強phah弱、惡欺善，完全無公平ê罷免。一个世界siōng大黨、有9,500萬个黨員ê中國共產黨，kah台灣第一大在野黨、tī立法院有38席ê中國國民黨鬥khang，beh kā立法院siōng細黨、kan-taⁿ有一个立法委員ê台灣基進立法委員陳柏惟（Tân pek-î）罷免掉，koh再配合地方勢力真強ê顏家舞chit齣罷免案。

　　Chit三方面有無仝款ê想法kah phah算。九月二六，中國共產黨總書記習近平發hō͘朱立倫當選黨主席ê賀電，除了kah以往仝款：堅持「九二共識」、反對「台獨」ê共同政治基礎上ê良性互動，加強合作以外，今年kah永年無仝ê「聖旨」是：「為國家謀統一」。習近平驚朱立倫bē記得，特別tī朱立倫就任黨主席hit工，tī《中央電視台》由中國社科院台灣研究所副研究員陳桂清下指導棋，特別提醒朱立倫ê四支箭，有一支是罷免陳柏惟（Tân pek-î），有一支是罷免林昶佐，有一支是年底ê四大公投，定位作「倒閣公投」，hō͘現在民進黨執政ê行政團隊一个強力ê打擊。

歷史上得票率siōng低當選中國國民黨主席ê朱立倫，緊beh tī罷免陳柏惟（Tân pek-î）chit案立威，koh khah要緊是，罷免有成koh ē-tàng向北京請功，kā tī立法院siōng堅持台灣獨立ê台灣基進唯一ê立委罷免掉，請記liau-lô一大功。

顏家ê想法真簡單，看陳柏惟（Tân pek-î）一年十個月做立法委員做了太好，等待伊一任做了，後一任立委完全免想beh選贏，趁伊一任猶未做完，sòa kā罷免掉tio̍hē-tàng安心á睏。

中國國民黨tio̍h出惡劣ê步數，無管是造謠、抹烏、損害人格，chhōe無罷免ê理由tio̍h製造一寡「藉口」，做一大堆看板寫「罪狀」。所以人chiahē講che是一場ê「惡罷」。Chit步nāē通，中國共產黨免用一兵一卒，kan-taⁿ下一道一道ê「聖旨」，台灣ê liau-lô tio̍h ē-tàng kā台灣舞kah烏天暗地、不得安寧。

　　Chit遍惡罷成功，台灣人ná ē-sái無覺醒！　　 (211023)

註1：習近平 請用華語唸 註2：陳柏惟（Tân pek-î）　請用華語唸，才koh唸台語發音 註3：嘍囉　liâu-lô