《綠色短評》

 | | | 轉寄

世界上kài bē見笑ê是tó一个？

作者 李南衡, ChoânTâijī/全台字 by Chng Hūiphêng 2021.07.18

Choânbîn Tâioânjī pán/全民台灣字版簡稱ChoânTâiJī

《 Le̍ksek toánphêng 》 Lí Lâmhêng


Sèkài siōng kài bē kiànsiàu ê sī tó chi̍tê?
　　
Chhitgoe̍h chheit sī Tiongkok Kiōngsántóng kiàn tóng chi̍tpah chiunî kìliāmji̍t, kinkì Tiongkok Sinhôasiā la̍kgoe̍h saⁿcha̍p ēpo͘ ê pòtō, paukoat Tiongkok Kokbîntóng chêng chúse̍k Liân Chiàn, Âng Siùthiāu, Chhinbîntóng chúse̍k Sòng Chhó͘jû téng, lio̍ksio̍k hiòng Tiongkok Kiōngsántóng piáuta̍t chiokhō.

　　 Kinkì pòtō, Liân Chiàn tī hōtiān chíchhut,"Tiongkok Kiōngsántóng chhòng kiàn pah nî, chútō sîn chiu tāilio̍k kiànsiat chhitcha̍pjī nî, Tionghôa bîncho̍k ho̍kheng chìntêng íkeng ta̍tkàu gō͘chheng nî le̍ksú sin ko’hong!"chin ǹgbāng nn̄g hōaⁿ koanhē hôpêng hoattián,"só͘ū Tionghôa jîlú ha̍p la̍t ūi lán bîncho̍k ê sūgia̍p chài chō sin iû". Bat chòkòe Tionghôa Bînkok hù chóngthóng, Tiongkok Kokbîntóng chúse̍k ê Liân Chiàn, i ê hōtiān sī kóng, hó tit chi̍tpah tang chêng ê chhitgoe̍h chheit Tiongkok Kiōngsántóng kiàn tóng, chiah ū hoattō͘ tī jīcha̍ppeh nî āu ê 1949 nî, kā Tiongkok Kokbîntóng ê Tionghôa Bînkok iántó, Tiongkok Kiōngsántóng chiah ē tàng "chútō sîn chiu tāilio̍k kiànsiat chhitcha̍pjī nî, "Tionghôa bîncho̍k ho̍kheng chìntêng" chiah ū hoattō͘ "íkeng ta̍tkàu gō͘chheng nî le̍ksú sin kohong!" Liân Chiàn chittīn sī móasim kámsiā Tiongkok Kiōngsántóng, 1949 nî kā Tiongkok Kokbîntóng ê Tionghôa Bînkok chènghú phah kah cháu bô lō͘, puttekí chiah cháulâi Tâioân chò lānbîn.

　　 Tiongkok Kokbîntóng chêng chúse̍k Âng Siùthiāu thàukòe hōhâm piáusī,"Tionghôa bîncho̍k úitāi ho̍kheng sī le̍ksú ê pitjiân". Chiok hibāng nn̄g hōaⁿ "chhiokchìn iôngha̍p, simlêng khèha̍p, kia̍tchīn simla̍t kiōngtông oânsêng kokka thóngit tōa gia̍p, kiōng tiok kokka hùkiông, bîncho̍k ho̍kheng, jînbîn hēnghok ê Tiongkok bāng." lán kanta beh mn̄g Âng Siùthiāu chêng chúse̍k, lí tng nî ná ē í "lānbîn" ê sinhūn cháulō͘ lâi Tâioân? Phiah siáⁿmi̍h lān lâi Tâioân chhòng siáⁿ?

　　Bat chòkòe Tiongkok Kokbîntóng tiongiong tóng pō͘ pìsu tiúⁿ, Tâioân séngtiúⁿ, hiānjīm Chhinbîntóng chúse̍k ê Sòng Chhó͘jû tī hōtiān tiong chíchhut, "Tiongkok Kiōngsántóng kankhó͘ tohcho̍at, hùntàu put hāi, tiôngchìn hoahā, í jînbîn hokchí ūi seng, jînlūi miāūn kiōngtôngthé ūi liām, chhimchhim hō͘ sèkan lâng tiôngsin khòaⁿthāi". Sêng ǹgbāng bīlâi sianghong tìle̍k chhiokchìn nn̄g hōaⁿ hôpêng hoattián,"si̍thiān Tionghôa bîncho̍k ho̍kheng". Sòng Chhó͘jû sī kóng, hókachài 100 nî chêng Tiongkok Kiōngsántóng chhòngli̍p, 1949 nî kā Tiongkok Kokbîntóng ê Tionghôa Bînkok chènghú kóaⁿ lâi Tâioân, chiah ē tàng tiôngchìn hoahā, Tiongkok Kiōngsántóng si̍tchāi chin liáuputkhí. Chhéngkàu Sòng Chhó͘jû chúse̍k, lí tng nî ná ē í "lānbîn" ê sinhūn cháulō͘ lâi Tâioân? Sī tó chi̍tê úitāi ê tóng hāi lí piàn choh lānbîn? Lí kináji̍t tōatōa kā oló?

　　 Siōng kài khiáu ê sī Tiongkok Kokbîntóng tiongiong tóng pō͘, oânchoân bô phah sǹg beh hoat hōtiān, kanta kiôngtiāu kòekhì bôlūn Tiongkok Kokbîntóng iah sī Tiongkok Kiōngsántóng ê tóng khèng, nn̄g tóng lóng bô phah hōtiān hō͘ tùihong ê chêng lē.

Cháchêng Tiongkok Kokbîntóng tī Tâioân kàuio̍k lán, Tiongkok kiōngsántóng sī "萬惡的共匪", lán nā bô tòe i ánne kóng tio̍h sī "susiúⁿ ū būntê". Kináji̍t Tiongkok Kiōngsántóng iáu chng nn̄gchheng lia̍p huitôaⁿ tùi Tâioân, iáu chhùchhù chó͘gāi lán Tâioân bé Búhàn hìiām e̍kbiâu, bô mā in to̍h chhám síliáu ah, Samūi Tiongkok Kokbîntóng chêng chúse̍k kèngjiân kongkhai tōatōa oló Tiongkok Kiōngsántóng, chi̍tê pí chi̍tê koh khah bē kiànsiàu!

Sèkài siōng kài bē kiànsiàu ê sī tó chi̍tê? Lí kóng leh. 　　(210702)
Chù," 萬惡的共匪"　　 chhiáⁿ liām Hôagí

Pe̍h-ōe-jī-pán/白話字版

《 Le̍k-sek toán-phêng 》 Lí Lâm-hêng

Sè-kài siōng kài bē kiàn-siàu ê sī tó chi̍t-ê?

　　 Chhit-goe̍h chhe-it sī Tiong-kok Kiōng-sán-tóng kiàn tóng chi̍t-pah chiu-nî kì-liām-ji̍t, kin-kì Tiong-kok Sin-hôa-siā la̍k-goe̍h saⁿ-cha̍p ē-po͘ ê pò-tō, pau-koat Tiong-kok Kok-bîn-tóng chêng chú-se̍k Liân Chiàn, Âng Siù-thiāu, Chhin-bîn-tóng chú-se̍k Sòng Chhó͘-jû téng, lio̍k-sio̍k hiòng Tiong-kok Kiōng-sán-tóng piáu-ta̍t chiok-hō.

　　 Kin-kì pò-tō, Liân Chiàn tī hō-tiān chí-chhut,"Tiong-kok Kiōng-sán-tóng chhòng kiàn pah nî, chú-tō sîn chiu tāi-lio̍k kiàn-siat chhit-cha̍p-jī nî, Tiong-hôa bîn-cho̍k ho̍k-heng chìn-têng í-keng ta̍t-kàu gō͘-chheng nî le̍k-sú sin ko-hong!"chin ǹg-bāng nn̄g hōaⁿ koan-hē hô-pêng hoat-tián,"só͘-ū Tiong-hôa jî-lú ha̍p la̍t ūi lán bîn-cho̍k ê sū-gia̍p chài chō sin iû". Bat chò-kòe Tiong-hôa Bîn-kok hù chóng-thóng, Tiong-kok Kok-bîn-tóng chú-se̍k ê Liân Chiàn, i ê hō-tiān sī kóng, hó tit chi̍t-pah tang chêng ê chhit-goe̍h chhe-it Tiong-kok Kiōng-sán-tóng kiàn tóng, chiah ū hoat-tō͘ tī jī- cha̍p-peh nî āu ê 1949 nî, kā Tiong-kok Kok-bîn-tóng ê Tiong-hôa Bîn-kok ián-tó, Tiong-kok Kiōng-sán-tóng chiah ē tàng "chú-tō sîn chiu tāi-lio̍k kiàn-siat chhit-cha̍p-jī nî, "Tiong-hôa bîn-cho̍k ho̍k-heng chìn-têng" chiah ū hoat-tō͘ "í-keng ta̍t-kàu gō͘-chheng nî le̍k-sú sin ko-hong!" Liân Chiàn chit-tīn sī móa-sim kám-siā Tiong-kok Kiōng-sán-tóng, 1949 nî kā Tiong-kok Kok-bîn-tóng ê Tiong-hôa Bîn-kok chèng-hú phah kah cháu bô lō͘, put-tek-í chiah cháu-lâi Tâi-oân chò lān-bîn.

　　 Tiong-kok Kok-bîn-tóng chêng chú-se̍k Âng Siù-thiāu thàu-kòe hō-hâm piáu-sī,"Tiong-hôa bîn-cho̍k úi-tāi ho̍k-heng sī le̍k-sú ê pit-jiân". Chiok hi-bāng nn̄g hōaⁿ "chhiok-chìn iông-ha̍p, sim-lêng khè-ha̍p, kia̍t-chīn sim-la̍t kiōng-tông oân-sêng kok-ka thóng-it tōa gia̍p, kiōng tiok kok-ka hù-kiông, bîn-cho̍k ho̍k-heng, jîn-bîn hēng-hok ê Tiong-kok bāng." lán kan-ta beh mn̄g Âng Siù-thiāu chêng chú-se̍k, lí tng nî ná ē í "lān-bîn" ê sin-hūn cháu-lō͘ lâi Tâi-oân? Phiah siáⁿ-mi̍h lān lâi Tâi-oân chhòng siáⁿ?

　　Bat chò-kòe Tiong-kok Kok-bîn-tóng tiong-iong tóng pō͘ pì-su tiúⁿ, Tâi-oân séng-tiúⁿ, hiān-jīm Chhin-bîn-tóng chú-se̍k ê Sòng Chhó͘-jû tīhō-tiān tiong chí-chhut, "Tiong-kok Kiōng-sán-tóng kan-khó͘ toh-cho̍at, hùn-tàu put hāi, tiông-chìn hoa-hā, í jîn-bîn hok-chí ūi seng, jîn-lūi miā-ūn kiōng-tông-thé ūi liām, chhim-chhim hō͘ sè-kan lâng tiông-sin khòaⁿ-thāi". Sêng ǹg-bāng bī-lâi siang-hong tì-le̍k chhiok-chìn nn̄g hōaⁿ hô-pêng hoat-tián,"si̍t-hiān Tiong-hôa bîn-cho̍k ho̍k-heng". Sòng Chhó͘-jû sī kóng, hó-ka-chài 100 nî chêng Tiong-kok Kiōng-sán-tóng chhòng-li̍p, 1949 nî kā Tiong-kok Kok-bîn-tóng ê Tiong-hôa Bîn-kok chèng-hú kóaⁿ lâi Tâi-oân, chiah ē tàng tiông-chìn hoa-hā, Tiong-kok Kiōng-sán-tóng si̍t-chāi chin liáu-put-khí. Chhéng-kàu Sòng Chhó͘-jû chú-se̍k, lí tng nî ná ē í "lān-bîn" ê sin-hūn cháu-lō͘ lâi Tâi-oân? Sī tó chi̍t-ê úi-tāi ê tóng hāi lí piàn choh lān-bîn? Lí kin-á-ji̍t tōa-tōa kā o-ló?

　　 Siōng kài khiáu ê sī Tiong-kok Kok-bîn-tóng tiong-iong tóng pō͘, oân-choân bô phah sǹg beh hoat hō-tiān, kan-ta kiông-tiāu kòe-khì bô-lūn Tiong-kok Kok-bîn-tóng iah sī Tiong-kok Kiōng-sán-tóng ê tóng khìn, nn̄g tóng lóng bô phah hō-tiān hō͘ tùi-hong ê chêng lē.

Chá-chêng Tiong-kok Kok-bîn-tóng tī Tâi-oân kàu-io̍k lán, Tiong-kok kiōng-sán-tóng sī "萬惡的共匪", lán nā bô tòe i án-ne kóng-tio̍h sī "su-siúⁿ ū būn-tê". Kin-á-ji̍t Tiong-kok Kiōng-sán-tóng iáu chng nn̄g-chheng lia̍p hui-tôaⁿ tùi Tâi-oân, iáu chhù-chhù chó͘-gāi lán Tâi-oân bé Bú-hàn hì-iām e̍k-biâu, bô mā in to̍h chhám sí-liáu ah, Sam-ūi Tiong-kok Kok-bîn-tóng chêng chú-se̍k kèng-jiân kong-khai tōa-tōa o-ló Tiong-kok Kiōng-sán-tóng., chi̍t-ê pí chi̍t-ê koh khah bē kiàn-siàu!

Sè-kài siōng kài bē kiàn-siàu ê sī tó chi̍t-ê? Lí kóng leh. 　　(210702)
Chù," 萬惡的共匪"　　 chhiáⁿ liām Hôa-gí


　　七月初一是中國共產黨建黨一百周年紀念日，根據中國新華社六月三十下晡ê報導，包括中國國民黨前主席連戰、洪秀柱、親民黨主席宋楚瑜等，陸續向中國共產黨表達祝賀。

　　根據報導，連戰tī賀電指出，「中國共產黨創建百年，主導神州大陸建設七十二年，中華民族復興進程已經達到五千年歷史新高峰！」真ǹg望兩岸關係和平發展，「所有中華兒女合力為咱民族ê事業再造新遒（iû）」。Bat作過中華民國副總統、中國國民黨主席ê連戰，伊ê賀電是講，好得一百冬前ê七月初一中國共產黨建黨，才有法度tī二十八年後ê1949年，kā中國國民黨ê中華民國偃倒（ían-tó），中國共產黨才會tàng「主導神州大陸建設七十二年，」「中華民族復興進程」才有法度「已經達到五千年歷史新高峰！」連戰chit陣是滿心感謝中國共產黨，1949年kā中國國民黨ê中華民國政府拍kah走無路、不得已才走來台灣作難民。

　　中國國民黨前主席洪秀柱透過賀函表示，「中華民族偉大復興是歷史ê必然」。足希望兩岸「促進融合，心靈契合，竭盡心力共同完成國家統一大業，共築國家富強、民族復興、人民幸福ê中國夢。」咱kan-ta beh問洪秀柱前主席，你當年ná會以「難民」ê身分走路來台灣？避啥物難來台灣創啥？

　　Bat作過中國國民黨中央黨部秘書長、台灣省長、現任親民黨主席ê宋楚瑜tī賀電中指出，「中國共產黨艱苦卓絕，奮鬥不懈，重振華夏，以人民福祉為先，人類命運共同體為念，深深hō͘世間人重新看待」。誠ǹg望未來雙方致力促進兩岸和平發展，「實現中華民族復興」。宋楚瑜是講，好佳哉100年前中國共產黨創立，1949年kā中國國民黨ê中華民國政府趕來台灣，才會tàng 重振華夏，中國共產黨實在真了不起。請教宋楚瑜主席，你當年那會以「難民」ê身分走路來台灣？是tó一个偉大ê黨害你變作難民？你今á日大大kā o-ló？

　　上蓋巧ê是中國國民黨中央黨部，完全無拍算beh發賀電，kan-ta強調過去無論中國國民黨iah是中國共產黨ê黨慶，兩黨攏無拍賀電hō͘對方ê前例。

早前中國國民黨tī台灣教育咱，中國共產黨是「萬惡的共匪」，咱若無tòe伊án-ne講tio̍h是「思想有問題」。今á日中國共產黨猶裝兩千粒飛彈對台灣，猶處處阻礙咱台灣買武漢肺炎疫苗，無罵in to̍h慘死了ah，三位中國國民黨前主席竟然公開大大o-ló中國共產黨.，一个比一个koh khah bē見笑！

世界上kài bē見笑ê是tó一个？你講leh。　　(210702)
註：「萬惡的共匪」　　請唸華語