《綠色短評》

 | | | 轉寄

中國疫苗，無講你m̄知thang驚！

作者 李南衡, ChoânTâijī/全台字 by Chng Hūiphêng 2021.06.13

Choânbîn Tâioânjī pán/全民台灣字版簡稱ChoânTâiJī
《 Le̍ksek toánphêng 》 Lí Lâmhêng 　　　　　　　 Tiongkok e̍kbiâu, bô kóng lí m̄chai thang kiaⁿ!
　　 Tâioân ê Búhàn hìiām púnthó͘ ànlē chìnji̍p gō͘·go̍eh hutjiânkan chēngka chin chē, chin kín. Tâioân ū lâng itti̍t hoahkóng tio̍h bé Tiongkok e̍kbiâu. Gō͘go̍eh jīla̍k, Tiongkok Koktâipān hoatgiânjîn 朱鳳蓮 mn̄g kóng, tùi sèkài ōeseng cho͘chit jīnkhó ê Tiongkok e̍kbiâu, Tiongkok ū beh koan hō͘ Tâioân, Tâioân tàuté ài á·sī bôài? Lio̍kúihōe ti̍tti̍t kóng lán chènghú kah BⁿT Tekkok goânchhiúⁿ chiapchhiok chháikáng e̍kbiâu, chhaputto chiapkīn oânsêng chhiamiok ê sî, inūi Tiongkok kàiji̍p chó͘tòng, iântî kàu kináji̍t iáu bôhoattō͘ chhiamiok. Khah iàukín·ê, lán engkai hō͘ ta̍kê chaiiáⁿ, Tiongkok e̍kbiâu ê chinsi̍t chōnghóng, kah Tiongkok e̍kbiâu ū jōani̍h khióngpò͘.

Tiongkok e̍kbiâu chúiàu ū saⁿ chióng, tēit chióng sī Tiongkok 科興 e̍kbiâu (Sinovac) , kánchheng kiò choh"科興 e̍kbiâu", choân sèkài ū 23 ê kokka tēkhu chháṳōng; tē jī chióng sī Kokio̍h chi̍pthoân pakkiaⁿ sengbu̍t e̍kbiâu, kánchheng kiò choh"kokio̍h e̍kbiâu"（Sinopharm）, choân sèkài ū 37 ê kokka tēkhu chháṳōng; tē saⁿ chióng sī Tiongkok 康希諾 sengbu̍t e̍kbiâu 克威莎（Convidencia）, te̍ktiám sī chù chi̍t tâng tio̍h ēsái, chin chió gōakok chháṳōng. Chiàu sèkài ōeseng cho͘chit choanka ê pòkò, Tiongkok saⁿ chióng e̍kbiâu ê kiōngtông te̍ksek sī, ūsin ê chabó͘lâng, 60 hòe ísiōng nîtióngchiá kah ū bānsèngpēⁿ ê hoānchiá, chù liáuāu ê hoánèng téng anchoânsèng ê chèngkì bô kàu.

　　 Lâm Bíchiu 智利ū bé 6,600 bān che ê Tiongkok 科興 e̍kbiâu, jīgoe̍h chhesaⁿ khaisí chù ílâi, tī choânkok 1,900 bān jînkháu tiong íkeng ū 29%（551 bān lâng ） chù tēit che, ū 15%（285 bān lâng ） chù liáu nn̄g che, tānsī khakchín lē tiantò jú chē. Saⁿgoe̍h chhe, Thó͘níkî khaisí chù Tiongkok 科興 e̍kbiâu, kàu saⁿgo̍eh jījī, ū chhiaukòe 800 bān lâng chù kòe tēit che, ū 500 bān lâng chù oân nn̄g che, iok chiàm Thó͘níkî jînkháu ê 15%. Kàu saⁿgo̍eh jīit lúikè khakchín ànlē thu̍tphòa 300 bān, tanji̍t liânsòa sìkang phòa nn̄gbān lē. Ínkhí Thó͘níkî jînbîn siongtong putbóan. Tiongkok thêkiong hō͘ Pase siōngkài chē Tiongkok 科興 e̍kbiâu, tānsī Pase Búhàn hìiām síbông jînsò͘ íkeng chhiaukòe 40 bān lâng. Sìgo̍eh jīkáu. Thàikok lúchú pâikiûtūi tūioân kah kangchok jînoân khì chù Tiongkok 科興e̍kbiâu, gō͘go̍eh cha̍pjī, jīcha̍p jī ê lâng khì chò sàichêng kiámchhek, giām chhut lóng chóng iôngsèng hoánèng.

Tiongkok Kokio̍h e̍kbiâu mā bô hó kah tohūi khì. Sìgo̍eh chhekáu sinbûn pòtō, Huilu̍tpin chóngthóng ê 126 ê sûisin anchoân jînoân, khòsè tī kūnî té to̍h lóng ū chù Kokio̍h e̍kbiâu, chòekīn kiámchhek choânthé khakchín. Gō͘go̍eh chhegō͘ sinbûn pòtō, Lamhui tangpō͘, jînkháu cha̍pbān ê tókok Sisea, íkeng ū la̍ksiâⁿ bînchiòng chù kòe Búhàn hìiām e̍kbiâu, kîtiong la̍ksiâⁿ (saⁿbān la̍k chheng lâng) chù Tiongkok Kokio̍h e̍kbiâu. Chòekīn chi̍tⁿ̄g lépài kai kok e̍kchêng sengun, ū saⁿhun chṳt ê tāngpēⁿ pēⁿlē ū chù kòe nn̄g che e̍kbiâu. Jīgo̍eh chhesì, 匈牙利 chèngsek khàihòng bînchiòng tōa kuibô͘ chù Tiongkok Kokio̍h e̍kbiâu liáuāu, khiok piàn choh choânkiû Búhàn hìiām síbông lu̍t siōng koân ê kokka.

Gō͘goe̍h jīcha̍p sinbûn pòtō, ū gō͘ miâ chiânóng Oa̍tlâm khóchhat ê Tiongkok choanka, tńgkhì Tiongkok liáuāu khakchín liámpēⁿ, chit gō͘ ūi choanka chhutkok chêng lóng ū chù kòe Tiongkok kok sán e̍kbiâu, khósioh bô kóng toh chi̍t pâi ê e̍kbiâu. Kîtiong chi̍t miâ choanka íkeng choán choh tāngchèng hoānchiá, kàu gō͘go̍eh cha̍ppeh i itti̍t ū"siókhóa ho͘khip khùnlân".

　　 Tiongkok e̍kbiâu, bô kóng lí m̄chai thang kiaⁿ! Beh chù Tiongkok e̍kbiâu ê lâng chhiáⁿ gia̍h chhiú. (210528)

Chù, 智利 　匈牙利 　chhiáⁿ liām Hôagí

Pe̍h-ōe-jī-pán/白話字版

《 Le̍k-sek toán-phêng 》 Lí Lâm-hêng 　　　　　　　 Tiong-kok e̍k-biâu, bô kóng lí m̄-chai thang kiaⁿ!
　　 Tâi-oân ê Bú-hàn hì-iām pún-thó͘ àn-lē chìn-ji̍p gō͘-go̍eh hut-jiân-kan chēng-ka chin chē, chin kín. Tâi-oân ū lâng it-ti̍t hoah-kóng tio̍h bé Tiong-kok e̍k-biâu. Gō͘-go̍eh jī-la̍k, Tiong-kok Kok-tâi-pān hoat-giân-jîn 朱鳳蓮 mn̄g kóng, tùi sè-kài ōe-seng cho͘-chit jīn-khó ê Tiong-kok e̍k-biâu, Tiong-kok ū beh koan hō͘ Tâi-oân, Tâi-oân tàu-té ài á-·sī bô-ài? Lio̍k-úi-hōe ti̍t-ti̍t kóng lán chèng-hú kah BⁿT Tek-kok goân-chhiúⁿ chiap-chhiok chhái-káng e̍k-biâu, chha-put-to chiap-kīn oân-sêng chhiam-iok ê sî, in-ūi Tiong-kok kài-ji̍p chó͘-tòng, iân-tî kàu kin-á-ji̍t iáu bô-hoat-tō͘ chhiam-iok. Khah iàu-kín-·ê, lán eng-kai hō͘ ta̍k-ê chai-iáⁿ, Tiong-kok e̍k-biâu ê chin-si̍t chōng-hóng, kah Tiong-kok e̍k-biâu ū jōa-ni̍h khióng-pò͘.

Tiong-kok e̍k-biâu chú-iàu ū saⁿ chióng, tē-it chióng sī Tiong-kok 科興 e̍k-biâu (Sinovac) , kán-chheng kiò choh"科興 e̍k-biâu", choân sè-kài ū 23 ê kok-ka tē-khu chhái-iōng; tē jī chióng sī Kok-io̍h chi̍p-thoân pak-kiaⁿ seng-bu̍t e̍k-biâu, kán-chheng kiò choh"kok-io̍h e̍k-biâu"（Sinopharm）, choân sè-kài ū 37 ê kok-ka tē-khu chhái-iōng; tē saⁿ chióng sī Tiong-kok 康希諾 seng-bu̍t e̍k-biâu 克威莎（Convidencia）, te̍k-tiám sī chù chi̍t tâng tio̍h ē-sái, chin chió gōa-kok chhái-iōng. Chiàu sè-kài ōe-seng cho͘-chit choan-ka ê pò-kò, Tiong-kok saⁿ chióng e̍k-biâu ê kiōng-tông te̍k-sek sī, ū-sin ê cha-bó͘-lâng, 60 hòe í-siōng nî-tióng-chiá kah ū bān-sèng-pēⁿ ê hoān-chiá, chù liáu-āu ê hoán-èng téng an-choân-sèng ê chèng-kì bô kàu.

　　 Lâm Bí-chiu 智利ū bé 6,600 bān che ê Tiong-kok 科興 e̍k-biâu, jī-goe̍h chhe-saⁿ khai-sí chù í-lâi, tī choân-kok 1,900 bān jîn-kháu tiong í-keng ū 29%（551 bān lâng ） chù tē-it che, ū 15%（285 bān lâng ） chù liáu nn̄g che, tān-sī khak-chín lē tian-tò jú chē. Saⁿ-goe̍h chhe, Thó͘-ní-kî khai-sí chù Tiong-kok 科興 e̍k-biâu, kàu saⁿ-go̍eh jī-jī, ū chhiau-kòe 800 bān lâng chù kòe tē-it che, ū 500 bān lâng chù oân nn̄g che, iok chiàm Thó͘-ní-kî jîn-kháu ê 15%. Kàu saⁿ-go̍eh jī-it lúi-kè khak-chín àn-lē thu̍t-phòa 300 bān, tan-ji̍t liân-sòa sì-kang phòa nn̄g-bān lē. Ín-khí Thó͘-ní-kî jîn-bîn siong-tong put-bóan. Tiong-kok thê-kiong hō͘ Pa-se siōng-kài chē Tiong-kok 科興 e̍k-biâu, tān-sī Pa-se Bú-hàn hì-iām sí-bông jîn-sò͘ í-keng chhiau-kòe 40 bān lâng. Sì-go̍eh jī-káu. Thài-kok lú-chú pâi-kiû-tūi tūi-oân kah kang-chok jîn-oân khì chù Tiong-kok 科興e̍k-biâu, gō͘-go̍eh cha̍p-jī, jī-cha̍p jī ê lâng khì chò sài-chêng kiám-chhek, giām chhut lóng chóng iông-sèng hoán-èng.

Tiong-kok Kok-io̍h e̍k-biâu mā bô hó kah toh-ūi khì. Sì-go̍eh chhe-káu sin-bûn pò-tō, Hui-lu̍t-pin chóng-thóng ê 126 ê sûi-sin an-choân jîn-oân, khò-sè tī kū-nî té to̍h lóng ū chù Kok-io̍h e̍k-biâu, chòe-kīn kiám-chhek choân-thé khak-chín. Gō͘-go̍eh chhe-gō͘ sin-bûn pò-tō, Lam-hui tang-pō͘, jîn-kháu cha̍p-bān ê tó-kok Si-se- a, í-keng ū la̍k-siâⁿ bîn-chiòng chù kòe Bú-hàn hì-iām e̍k-biâu, kî-tiong la̍k-siâⁿ (saⁿ-bān la̍k chheng lâng) chù Tiong-kok Kok-io̍h e̍k-biâu. Chòe-kīn chi̍t-nn̄g lé-pài kai kok e̍k-chêng seng-un, ū saⁿ-hun chi-it ê tāng-pēⁿ pēⁿ-lē ū chù kòe nn̄g che e̍k-biâu. Jī-go̍eh chhe-sì, 匈牙利 chèng-sek khài-hòng bîn-chiòng tōa kui-bô͘ chù Tiong-kok Kok-io̍h e̍k-biâu liáu-āu, khiok piàn choh choân-kiû Bú-hàn hì-iām sí-bông lu̍t siōng koân ê kok-ka.

Gō͘-goe̍h jī-cha̍p sin-bûn pò-tō, ū gō͘ miâ chiân-óng Oa̍t-lâm khó-chhat ê Tiong-kok choan-ka, tńg-khì Tiong-kok liáu-āu khak-chín liám-pēⁿ, chit gō͘ ūi choan-ka chhut-kok chêng lóng ū chù kòe Tiong-kok kok sán e̍k-biâu, khó-sioh bô kóng toh chi̍t pâi ê e̍k-biâu. Kî-tiong chi̍t miâ choan-ka í-keng choán choh tāng-chèng hoān-chiá, kàu gō͘-go̍eh cha̍p-peh i it-ti̍t ū"sió-khóa ho͘-khip khùn-lân".

　　 Tiong-kok e̍k-biâu, bô kóng lí m̄-chai thang kiaⁿ! Beh chù Tiong-kok e̍k-biâu ê lâng chhiáⁿ gia̍h chhiú. (210528)

Chù, 智利 　匈牙利 　chhiáⁿ liām Hôa-gí

　　台灣ê武漢肺炎本土案例進入五月忽然間增加真chē、真緊。台灣有人一直喝講tio̍h買中國疫苗。五月二六，中國國台辦發言人朱鳳蓮問講，對世界衛生組織認可ê中國疫苗，中國有beh捐hō͘台灣，台灣到底愛抑是無愛？陸委會直直講咱政府kah BⁿT德國原廠接觸採購疫苗，差不多接近完成簽約ê時，因為中國介入阻擋，延遲到今á日猶無法度簽約。Khah要緊ê，咱應該hō͘逐个知影，中國疫苗ê真實狀況，kah中國疫苗有jōa-ni̍h恐怖。

中國疫苗主要有三種：第一種是中國科興疫苗（Sinovac），簡稱叫作「科興疫苗」，全世界有23个國家地區採用；第二種是國藥集團北京生物疫苗，簡稱叫作「國藥疫苗」（Sinopharm），全世界有37个國家地區採用；第三種是中國康希諾生物疫苗克威莎（Convidencia），特點是注一筒tio̍hē-sái，真少外國採用。照世界衛生組織專家ê報告，中國三種疫苗ê共同特色是，有身ê查某人、60歲以上年長者kah有慢性病ê患者，注了後ê反應等安全性ê證據無夠。

　　南美洲智利有買6,600萬劑ê中國科興疫苗，二月初三開始注以來，tī全國1,900萬人口中已經有29%（551萬人）注第一劑，有15%（285萬人）注了兩劑，但是確診例顚倒愈chē。三月初，土耳其開始注中國科興疫苗，到三月二二，有超過800萬人注過第一劑，有500萬人注完兩劑，約佔土耳其人口ê15%。到三月二一累計確診案例突破300萬，單日連續四工破兩萬例。引起土耳其人民相當不滿。中國提供hō͘巴西上蓋chē中國科興疫苗，但是巴西武漢肺炎死亡人數已經超過40萬人。四月二九。泰國女子排球隊隊員kah工作人員去注中國科興疫苗，五月十二，二十二个人去做賽前檢測，驗出lóng總陽性反應。

中國國藥疫苗mā無好kahtoh位去。四月初九新聞報導，菲律賓總統ê126个隨身安全人員，靠勢tī舊年底tio̍h lóng有注國藥疫苗，最近檢測全體確診。五月初五新聞報導，南非東部、人口十萬ê島國西施亞，已經有六成民眾注過武漢肺炎疫苗，其中六成（三萬六千人）注中國國藥疫苗。最近一兩禮拜該國疫情升溫，有三分之一ê重病病例有注過二劑疫苗。二月初四，匈牙利正式開放民眾大規模注中國國藥疫苗了後，卻變作全球武漢肺炎死亡率上koânê國家。

五月二十新聞報導，有五名前往越南考察ê中國專家，轉去中國了後確診染病，chit五位專家出國前lóng有注過中國國產疫苗，可惜無講toh一牌ê疫苗。其中一名專家已經轉作重症患者，到五月十八伊一直有「小khóa呼吸困難」。 　　中國疫苗，無講你m̄知thang驚！Beh注中國疫苗ê人請gia̍h手。 (210528)

註：智利　匈牙利　　請唸華語