《綠色短評》

 | | | 轉寄

中國褪褲圍海koh圍山！

作者 李南衡, ChoânTâijī/全台字 by Chng Hūi-phêng 2023.09.17




Choânbîn Tâioânjī pán/全民台灣字版簡稱ChoânTâiJī


《 Le̍ksek toánphêng 》 Lí Lâmhêng

Tiongkok thǹg khò͘ ûi hái koh ûi soaⁿ!

　　 Pehgoe̍h jīpeh, Tiongkok Chūjiân Chugoânpō͘ hoat pò͘ "2023 nî pán phiauchún tētô͘ ", lāité paukoat Saisoa kûntó kah Lâmsoa kûntó, koh kā goânpún ê Lâmhái "káu tōaⁿ sòaⁿ"（Tio̍h sī ùi Tâioân lâm pêng ê Pasū háikiap hiòng lâm iân Huilu̍tpin sepō͘ háihōaⁿ ōe·lo̍hkhì, iân Phôlôchiu pakpō͘ háihōaⁿ liáu chiah hiòng sai pak, iân Oa̍tlâm tangpō͘ háihōaⁿ hiòng saipak ōe kàu Háilâmtó lâm pêng ûichí, chhinchhiūⁿ chi̍t tè gûchi̍h hêng ）, khoktiong kàu Tâioân tangpō͘ háie̍k chiâⁿchoh cha̍p tōaⁿ sòaⁿ, kā Tâioân ōe·ji̍pkhì, sīmchì kā Ji̍tpún ê Tiòhîtâi ōe ji̍p Tiongkok ê pántô͘. Tiongkok "微博" tōasiaⁿ kóng,"Tiongkok tētô͘ chi̍t tiám chi̍t sòaⁿ to bēsái chhò","tētô͘ chi̍t tiám chi̍t sòaⁿ lóng tāipiáu chó͘kok tōahó soaⁿhô".

Pehgoe̍h saⁿcha̍pit, Tâioân Gōakaupō͘ hôeèng 《 Ji̍t keng Achiu 》 chhâsûn ê sî piáusī,"Tionghôa Bînkok Tâioân sī chi̍tê chúkoân to̍kli̍p ê kokka, put lēsio̍k tī Tionghôa Jînbîn Kiōnghôkok. Tionghôa Jînbîn Kiōnghôkok chūlâi m̄bat thóngtī kòe Tâioân. Che sī sūsi̍t, mā sī kokchè siāhōe phó͘phiàn chiapsiū ê hiānkhóng. Bôlūn Tiongkok chènghú ánchóaⁿ niúkhiok tùi Tâioân chúkoân ê chútiuⁿ, lóng bô hoattō͘ káipiàn Tionghôa Bînkok Tâioân chûnchāi ê khehkoan sūsi̍t." pehgoe̍h saⁿcha̍pit, Huilu̍tpin Gōakaupō͘ sengbêng piáusī,"chòe sin chi̍t kiāⁿ chhìtô͘ ha̍phoat hòa Tiongkok tùi Huilu̍tpin léngthó͘, háie̍k chúkoân kah koánhat koân ê chútiuⁿ, pēng bô hûha̍p Kokchèhoat, te̍kpia̍t sī 1982 nî Liânha̍pkok tāihōe koatgī ê háṳûⁿ hoat kongiok （UNCLOS）", ho͘io̍k Pakkiaⁿ tongkio̍k tiánhiān hū chekjīm kiâⁿkèng, chunsiú Háṳûⁿhoat kongiok kah 2016 nî "Lâmhái tiōngchhâi" hó͘ⁿkoat Tiongkok káu tōaⁿ sòaⁿ ê chhâisī. Pehgoe̍h saⁿcha̍pit àm, Oa̍tlâm Gōakaupō͘ hoatgiânjîn í subīn hôehok mûithé sûnmn̄g piáusī, Tiongkok chitê hêngûi chhimhoān tio̍h Oa̍tlâm tùi Saisoa kûntó kah Lâmsoa kûntó ê chúkoân, iáu ū 1982 nî Liânha̍pkok Háṳûⁿhoat kongiok （UNCLOS） só͘ khakli̍p Oa̍tlâm tùi só͘ sio̍k háie̍k ê chúkoân, chúkoân khoânlī kah koánhat koân. Pehgoe̍h saⁿcha̍pit, Ìnnî gōakau pō͘tiúⁿ 勒特諾（Retno Marsudi） chiū Tiongkok sin tētô͘ pēngthun Ìnnî léngthó͘ hiòng Tiongkok thêchhut khònggī, i piáusī, ōe sòaⁿ ahsī chò jīmhô chútiuⁿ lóng tio̍h hûha̍p 1982 nî Liânha̍pkok Háṳûⁿhoat kongiok. Pehgoe̍h saⁿcha̍pit, Málâisea Gōakaupō͘ hoatpiáu siaⁿbêng kóng, Tiongkok chòe sin hoatpò͘ ê tētô͘ kā Málâisea ê kiongthô͘ ōe·ji̍pkhì, Málâisea bētàng sêngjīn chit khoán ê chútiuⁿ.


Tiongkok thǹg khò͘ ûi hái iáu bē soah, koh thǹg khò͘ ûi soaⁿ. Ìntō͘ kah Tiongkok ū chenggī ê piankài chhiaukòe 3,488 konglí, kîtiong, Ìntō͘ si̍tchit tīlí tiong ê阿魯納查 séng （Arunachal Pradesh）, Tiongkok chhengchoh Chōnglâm tēkhu; lēnggōa tōapō͘hūn tēkhu bo̍kchêng sī iû Tiongkok iúhāu khòngchè ê阿克賽欽（Aksai Chin）, mā lóng ōe ji̍pkhì Tiongkok sin tētô͘. Pehgoe̍h jīkáu ēpo͘, Ìntō͘ Gōakau pō͘ hoatgiânjîn巴格奇（Arindam Bagchi） hoatpiáu siaⁿbêng kóng, Tiongkok só͘ūi ê 2023 nî phiauchún tētô͘ kā Ìntō͘ léngthó͘ ōe·ji̍pkhì, Ìntō͘ íkeng thàukòe gōakau koántō hiòng Tiongkok thêchhut " kiônglia̍t khònggī". Ìntō͘ gōakau pō͘tiúⁿ 蘇杰生 （Subrahmanyam Jaishankar） kiônglia̍t hôeèng kóng, kā pa̍t kok ê léngthó͘ ōe·ji̍pkhì kakī ê tētô͘, íkeng sī Tiongkok kú nî ê lāu si̍pkoàn, chit chióng chokhoat bô hoattō͘ káipiàn sūsi̍t.


　　 kîkoài, Tiongkok thǹg khò͘ ûi hái koh ûi soaⁿ, ná ē bô ài kuikhì thǹg khò͘ ûi tēkiû, kám bô khah sóng? 　　(230908)


Chù, 微博 　勒特諾　阿魯納查 　阿克賽欽　巴格奇　蘇杰生 　　 chhiáⁿ liām Hôagí



Pe̍h-ōe-jī-pán/白話字版


《 Le̍k-sek toán-phêng 》 Lí Lâm-hêng

Tiong-kok thǹg khò͘ ûi hái koh ûi soaⁿ!

　　 Peh-goe̍h jī-peh, Tiong-kok Chū-jiân Chu-goân-pō͘ hoat pò͘ "2023 nî pán phiau-chún tē-tô͘ ", lāi-té pau-koat Sai-soa kûn-tó kah Lâm-soa kûn-tó, koh kā goân-pún ê Lâm-hái "káu tōaⁿ sòaⁿ"（Tio̍h sī ùi Tâi-oân lâm pêng ê Pa-sū hái-kiap hiòng lâm iân Hui-lu̍t-pin se-pō͘ hái-hōaⁿ ōe-·lo̍h-khì, iân Phô-lô-chiu pak-pō͘ hái-hōaⁿ liáu chiah hiòng sai pak, iân Oa̍t-lâm tang-pō͘ hái-hōaⁿ hiòng sai-pak ōe kàu Hái-lâm-tó lâm pêng ûi-chí, chhin-chhiūⁿ chi̍t tè gû-chi̍h hêng ）, khok-tiong kàu Tâi-oân tang-pō͘ hái-e̍k chiâⁿ-choh cha̍p tōaⁿ sòaⁿ, kā Tâi-oân ōe-·ji̍p-khì, sīm-chì kā Ji̍t-pún ê Tiò-hî-tâi ōe ji̍p Tiong-kok ê pán-tô͘. Tiong-kok "微博" tōa-siaⁿ kóng,"Tiong-kok tē-tô͘ chi̍t tiám chi̍t sòaⁿ to bē-sái chhò","tē-tô͘ chi̍t tiám chi̍t sòaⁿ lóng tāi-piáu chó͘-kok tōa-hó soaⁿ-hô".

Peh-goe̍h saⁿ-cha̍p-it, Tâi-oân Gōa-kau-pō͘ hôe-èng 《 Ji̍t keng A-chiu 》 chhâ-sûn ê sî piáu-sī,"Tiong-hôa Bîn-kok Tâi-oân sī chi̍t-ê chú-koân to̍k-li̍p ê kok-ka, put lē-sio̍k tī Tiong-hôa Jîn-bîn Kiōng-hô-kok. Tiong-hôa Jîn-bîn Kiōng-hô-kok chū-lâi m̄-bat thóng-tī kòe Tâi-oân. Che sī sū-si̍t, mā sī kok-chè siā-hōe phó͘-phiàn chiap-siū ê hiān-khóng. Bô-lūn Tiong-kok chèng-hú án-chóaⁿ niú-khiok tùi Tâi-oân chú-koân ê chú-tiuⁿ, lóng bô hoat-tō͘ kái-piàn Tiong-hôa Bîn-kok Tâi-oân chûn-chāi ê kheh-koan sū-si̍t." peh-goe̍h saⁿ-cha̍p-it, Hui-lu̍t-pin Gōa-kau-pō͘ seng-bêng piáu-sī,"chòe sin chi̍t kiāⁿ chhì-tô͘ ha̍p-hoat hòa Tiong-kok tùi Hui-lu̍t-pin léng-thó͘, hái-e̍k chú-koân kah koán-hat koân ê chú-tiuⁿ, pēng bô hû-ha̍p Kok-chè-hoat, te̍k-pia̍t sī 1982 nî Liân-ha̍p-kok tāi-hōe koat-gī ê hái-iûⁿ hoat kong-iok （UNCLOS）", ho͘-io̍k Pak-kiaⁿ tong-kio̍k tián-hiān hū chek-jīm kiâⁿ-kèng, chun-siú Hái-iûⁿ-hoat kong-iok kah 2016 nî "Lâm-hái tiōng-chhâi" hó͘ⁿ-koat Tiong-kok káu tōaⁿ sòaⁿ ê chhâi-sī. Peh-goe̍h saⁿ-cha̍p-it àm, Oa̍t-lâm Gōa-kau-pō͘ hoat-giân-jîn í su-bīn hôe-hok mûi-thé sûn-mn̄g piáu-sī, Tiong-kok chit-ê hêng-ûi chhim-hoān tio̍h Oa̍t-lâm tùi Sai-soa kûn-tó kah Lâm-soa kûn-tó ê chú-koân, iáu ū 1982 nî Liân-ha̍p-kok Hái-iûⁿ-hoat kong-iok （UNCLOS） só͘ khak-li̍p Oa̍t-lâm tùi só͘ sio̍k hái-e̍k ê chú-koân, chú-koân khoân-lī kah koán-hat koân. Peh-goe̍h saⁿ-cha̍p-it, Ìn-nî gōa-kau pō͘-tiúⁿ 勒特諾（Retno Marsudi） chiū Tiong-kok sin tē-tô͘ pēng-thun Ìn-nî léng-thó͘ hiòng Tiong-kok thê-chhut khòng-gī, i piáu-sī, ōe sòaⁿ ah-sī chò jīm-hô chú-tiuⁿ lóng tio̍h hû-ha̍p 1982 nî Liân-ha̍p-kok Hái-iûⁿ-hoat kong-iok. Peh-goe̍h saⁿ-cha̍p-it, Má-lâi-se-a Gōa-kau-pō͘ hoat-piáu siaⁿ-bêng kóng, Tiong-kok chòe sin hoat-pò͘ ê tē-tô͘ kā Má-lâi-se-a ê kiong-thô͘ ōe-·ji̍p-khì, Má-lâi-se-a bē-tàng sêng-jīn chit khoán ê chú-tiuⁿ.


Tiong-kok thǹg khò͘ ûi hái iáu bē soah, koh thǹg khò͘ ûi soaⁿ. Ìn-tō͘ kah Tiong-kok ū cheng-gī ê pian-kài chhiau-kòe 3,488 kong-lí, kî-tiong, Ìn-tō͘ si̍t-chit tī-lí tiong ê阿魯納查 séng （Arunachal Pradesh）, Tiong-kok chheng-choh Chōng-lâm tē-khu; lēng-gōa tōa-pō͘-hūn tē-khu bo̍k-chêng sī iû Tiong-kok iú-hāu khòng-chè ê阿克賽欽（Aksai Chin）, mā lóng ōe ji̍p-khì Tiong-kok sin tē-tô͘. Peh-goe̍h jī-káu ē-po͘, Ìn-tō͘ Gōa-kau pō͘ hoat-giân-jîn巴格奇（Arindam Bagchi） hoat-piáu siaⁿ-bêng kóng, Tiong-kok só͘-ūi ê 2023 nî phiau-chún tē-tô͘ kā Ìn-tō͘ léng-thó͘ ōe-·ji̍p-khì, Ìn-tō͘ í-keng thàu-kòe gōa-kau koán-tō hiòng Tiong-kok thê-chhut " kiông-lia̍t khòng-gī". Ìn-tō͘ gōa-kau pō͘-tiúⁿ 蘇杰生 （Subrahmanyam Jaishankar） kiông-lia̍t hôe-èng kóng, kā pa̍t kok ê léng-thó͘ ōe-·ji̍p-khì ka-kī ê tē-tô͘, í-keng sī Tiong-kok kú nî ê lāu si̍p-koàn, chit chióng chok-hoat bô hoat-tō͘ kái-piàn sū-si̍t.


　　 kî-koài, Tiong-kok thǹg khò͘ ûi hái koh ûi soaⁿ, ná ē bô ài kui-khì thǹg khò͘ ûi tē-kiû, kám bô khah sóng? 　　(230908)


Chù, 微博 　勒特諾　阿魯納查 　阿克賽欽　巴格奇　蘇杰生 　　 chhiáⁿ liām Hôa-gí




　　八月二八，中國自然資源部發布「2023年版標準地圖」，內底包括西沙群島kah南沙群島，koh kā原本ê南海「九段線」（Tio̍h是ùi台灣南旁ê巴士海峽向南沿菲律賓西部海岸畫落去，沿婆羅洲北部海岸了chiah向西北，沿越南東部海岸向西北畫到海南島南旁為止，親像一塊牛舌形），擴張到台灣東部海域成作十段線，kā台灣畫入去，甚至kā日本ê釣魚台畫入中國ê版圖。中國「微博」大聲講：「中國地圖一點一線都bē-sái錯」，「地圖一點一線lóng代表祖國大好山河」。

八月三十一，台灣外交部回應《日經亞洲》查詢ê時表示：「中華民國台灣是一個主權獨立ê國家，不隸屬tī中華人民共和國。中華人民共和國自來m̄-bat統治過台灣。Che是事實，mā是國際社會普遍接受ê現況。無論中國政府按怎扭曲對台灣主權ê主張，lóng無法度改變中華民國台灣存在ê客觀事實。」八月三十一，菲律賓外交部聲明表示，「最新一件試圖合法化中國對菲律賓領土、海域主權kah管轄權ê主張，並無符合國際法，特別是1982年聯合國大會決議ê海洋法公約（UNCLOS）」，呼籲北京當局展現負責任行徑，遵守海洋法公約kah 2016年「南海仲裁」否決中國九段線ê裁示。八月三十一暗，越南外交部發言人以書面回覆媒體詢問表示，中國chit-ê行為侵犯tio̍h越南對西沙群島kah南沙群島ê主權，猶有1982年聯合國海洋法公約（UNCLOS）所確立越南對所屬海域ê主權、主權權利kah管轄權。八月三十一，印尼外交部長勒特諾（Retno Marsudi）就中國新地圖併吞印尼領土向中國提出抗議，伊表示，劃線ah是做任何主張lóng tio̍h符合1982年聯合國海洋法公約。八月三十一，馬來西亞外交部發表聲明講，中國最新發布ê地圖kā馬來西亞ê疆土畫入去，馬來西亞bē-tàng承認chit款ê主張。


中國褪褲圍海猶bē煞，koh褪褲圍山。印度kah中國有爭議ê邊界超過3,488公里，其中，印度實質治理中ê阿魯納查省（Arunachal Pradesh），中國稱作藏南地區；另外大部分地區目前是由中國有效控制ê阿克賽欽（Aksai Chin），mālóng畫入去中國新地圖。八月二九下晡，印度外交部發言人巴格奇（Arindam Bagchi）發表聲明講，中國所謂ê2023年標準地圖kā印度領土畫入去，印度已經透過外交管道向中國提出「強烈抗議」。印度外交部長蘇杰生（Subrahmanyam Jaishankar）強烈回應講，kā別國ê領土畫入去家己ê地圖，已經是中國久年ê老習慣，chit種作法無法度改變事實。


　　奇怪，中國褪褲圍海koh圍山，ná ē無ài歸氣褪褲圍地球，kám無khah爽？　　(230908)


註：微博　勒特諾　阿魯納查　阿克賽欽　巴格奇　蘇杰生　　請唸華語