《綠色短評》

 | | | 轉寄

中俄兩國頭人會談，ná有可能帶來烏克蘭和平！

作者 李南衡, ChoânTâijī/全台字 by Chng Hūiphêng 2023.04.02


Choânbîn Tâioânjī pán/全民台灣字版簡稱ChoânTâiJī

《 Le̍ksek toánphêng 》 Lí Lâmhêng

Tiong Gô nn̄g kok thâulâng hōetâm, ná ū khólêng tòalâi 烏克蘭 hôpêng!

　　 Saⁿgoe̍h jīcha̍p chì jījī, Tiongkok kok kechú 習近平 khì Bo̍hsukho kah Gôlô chóngthóng Phûteng hōetâm, lāṳông paukoat kachhim siang pêng koanhē, kengchè lénghe̍k, kokchè kio̍ksè kah 烏克蘭 gûiki téng. Kîtiong hō͘ choân sèkài siōng koansim ê sī 烏克蘭ê hôpêng. Saⁿgoe̍h chhecha̍p, toānkau chhit nî ê Ilóng kah 沙烏地阿拉伯 tī Tiongkok chhiâuchhiok hia̍pgī chi hā. Soanpò͘ tiôngkiàn gōakau koanhē, só͘í ū lâng jīnûi, 習近平 piàⁿsì beh chhioksêng Gô O͘ chiàncheng thêngchiàn, chhiamtēng hôpêng tiâuiok. 習近平 ū khólêng ē tittio̍h 諾貝爾 hôpêng chióng.

　　 Jīgoe̍h jīsì, Gô O͘ chiàncheng móa chi̍t nî hit kang, Tiongkok ū thêchhut "koanû chèngtī káikoat 烏克蘭 gûiki ê Tiongkok li̍ptiûⁿ", thêchhut 12 tiám kónghoat, bô chi̍t tiám tùi kiatsok Gô O͘ chiàncheng ū pangchō͘.

　　 Saⁿgoe̍h cha̍psaⁿ, Tiongkok gōakaupō͘ soanpò͘ chi̍t lépài āu 習近平 beh khì hóngbūn Gôlô. Saⁿgoe̍h cha̍pchhit, kokchè hêngsū hoatīⁿ (ICC) í huihoat kā jîtông tòa līkhui 烏克蘭 choh líiû, tùi Gôlô chóngthóng Phûteng hoatpò͘ chiàncheng chōe tāipó͘ lēng, sîkan chat kah chiah túhó? Náchhiūⁿ sī sūnsòa kéngkò chi̍t ji̍t kàu àm kóng bô beh hòngkhì búle̍k phah Tâioân ê 習近平, chhianbān m̄thang khì hoān tio̍h chiàncheng chōe!

Saⁿgoe̍h jīcha̍p chì jījī, Tiongkok kokka chúse̍k習近平 tī Bo̍hsukho kah Gôlô chóngthóng Phûteng kìⁿbīn hōetâm, sianghong tī hōe āu liânha̍p sengbêng tiong kiôngtiāu beh "thongkòe hôtâm" lâi káikoat 烏克蘭 gûiki. Tānsī sehong kokka putchí kíntiuⁿ, khióngkiaⁿ Tiongkok ē chháichhú gōakau ásī kengchè ígōa ê chhiútōaⁿ, chìn chi̍tpō͘ chichhî Gôlô —— thêkiong búkhì hō͘ Phûteng tī chiàncheng tiong súiōng —— jîchhiáⁿ kiankò͘ chi̍tê hoántùi Pakiok kah Bíkok ê kiôngtōa chi̍pthoân. Sehong kokka ê hoânló sī kegia̍h·ê," kiankò͘ chi̍tê hoántùi Pakiok kah Bíkok ê kiôngtōa chi̍pthoân" sī chin·ê, tānsī "thêkiong búkhì hō͘ Phûteng tī chiàncheng tiong súiōng " sī bôkhólêng ê tāichì. Tiongkok piáubīn siōng késian kóng kiaⁿ Pakiok kah Bíkok kā chèchhâi, sūsi̍t siōng sī Tiongkok ài Gôlô kèsio̍k tī 烏克蘭ê chiàncheng, 習近平 chúse̍k choa̍ttùi bôkhólêng hiòng Phûteng chóngthóng si ap, khǹg i thêngchí chiàncheng chōehêng kah pōhêng, sīmchì khǹg i thiat cháu kuntūi. Chiàn jú ke̍klia̍t, chiàn jú kú jú hó. Thi̍h phah ê sinthé mā bē khamtit saⁿ kang ê lo̍hsái, kèsio̍k chiàn·lo̍hkhì, Gôlô ittēng ē siausán lo̍hbah, kui bóe Gôlô ē piàn choh Tiongkok láutōa sengkhupiⁿ kiò chhùi ê "sèhàn ê". Tôngsî Pakiok kah Bíkok ê kok la̍t mā sī ē tōa sún, kàusî sèkài chinchiàⁿ ê láutōa tio̍h sī Tiongkok.

　　 烏克蘭ê Chelensuki chóngthóng ū thàulō͘ kóng 烏克蘭kah Gôlô ê hôpêng tâmphòaⁿ té sòaⁿ, Gôlô tio̍h hoeho̍k 烏克蘭 léngthó͘ oânchéng, chuntiōng Liânha̍pkok hiànchiuⁿ, pôesióng itchhè chiàncheng súnsit, tênghoa̍t múi chi̍tê chhiokhoān chiàncheng chōe ê hoānlâng, íki̍p póchèng bē koh chhimhoān 烏克蘭 téng chiântê.

Gôlô chóngthóng Phûteng lāisim chin siūⁿ beh thêng chiàn, tānsī i chhùi ta̍h chin ngē, i kóng 烏克蘭tio̍h chinchiàⁿ chòkàu "khì Nazi hòa","khì kunsū hòa" kah oânchoân tiongli̍p ê saⁿ tōa iàukiāⁿ, siōng iàukín ê sī i kóng, Gôlô ê kuntūi bô beh ùi só͘ chiàm·tio̍h ê jīmhô thó͘tē thiatthè.

　　 Tiongkok, Gôlô nn̄g kok thâulâng hōetâm, ná ū khólêng tòalâi 烏克蘭 hôpêng? góa khòaⁿ, nn̄gê thâulâng chíputkò sī ōe chi̍tê khangkhak piáⁿ, hō͘ gōnglâng chí íāu. 　　　(230324)

Chù, 習近平 　　 烏克蘭　　 沙烏地阿拉伯 　　諾貝爾 chhiáⁿ liām Hôagí


Pe̍h-ōe-jī-pán/白話字版


《 Le̍k-sek toán-phêng 》 Lí Lâm-hêng

Tiong Gô nn̄g kok thâu-lâng hōe-tâm, ná ū khó-lêng tòa-lâi 烏克蘭 hô-pêng!

　　 Saⁿ-goe̍h jī-cha̍p chì jī-jī, Tiong-kok kok ke-chú 習近平 khì Bo̍h-su-kho kah Gô-lô chóng-thóng Phû-teng hōe-tâm, lāi-iông pau-koat ka-chhim siang pêng koan-hē, keng-chè léng-he̍k, kok-chè kio̍k-sè kah 烏克蘭 gûi-ki téng. Kî-tiong hō͘ choân sè-kài siōng koan-sim ê sī 烏克蘭ê hô-pêng. Saⁿ-goe̍h chhe-cha̍p, toān-kau chhit nî ê I-lóng kah 沙烏地阿拉伯 tī Tiong-kok chhiâu-chhiok hia̍p-gī chi hā. Soan-pò͘ tiông-kiàn gōa-kau koan-hē, só͘-í ū lâng jīn-ûi, 習近平 piàⁿ-sì beh chhiok-sêng Gô O͘ chiàn-cheng thêng-chiàn, chhiam-tēng hô-pêng tiâu-iok. 習近平 ū khó-lêng ē tit-tio̍h 諾貝爾 hô-pêng chióng.

　　 Jī-goe̍h jī-sì, Gô O͘ chiàn-cheng móa chi̍t nî hit kang, Tiong-kok ū thê-chhut "koan-û chèng-tī kái-koat 烏克蘭 gûi-ki ê Tiong-kok li̍p-tiûⁿ", thê-chhut 12 tiám kóng-hoat, bô chi̍t tiám tùi kiat-sok Gô O͘ chiàn-cheng ū pang-chō͘.

　　 Saⁿ-goe̍h cha̍p-saⁿ, Tiong-kok gōa-kau-pō͘ soan-pò͘ chi̍t lé-pài āu 習近平 beh khì hóng-būn Gô-lô. Saⁿ-goe̍h cha̍p-chhit, kok-chè hêng-sū hoat-īⁿ (ICC) í hui-hoat kā jî-tông tòa lī-khui 烏克蘭 choh lí-iû, tùi Gô-lô chóng-thóng Phû-teng hoat-pò͘ chiàn-cheng chōe tāi-pó͘ lēng, sî-kan chat kah chiah tú-hó? Ná-chhiūⁿ sī sūn-sòa kéng-kò chi̍t ji̍t kàu àm kóng bô beh hòng-khì bú-le̍k phah Tâi-oân ê 習近平, chhian-bān m̄-thang khì hoān tio̍h chiàn-cheng chōe!

Saⁿ-goe̍h jī-cha̍p chì jī-jī, Tiong-kok kok-ka chú-se̍k習近平 tī Bo̍h-su-kho kah Gô-lô chóng-thóng Phû-teng kìⁿ-bīn hōe-tâm, siang-hong tī hōe āu liân-ha̍p seng-bêng tiong kiông-tiāu beh "thong-kòe hô-tâm" lâi kái-koat 烏克蘭 gûi-ki. Tān-sī se-hong kok-ka put-chí kín-tiuⁿ, khióng-kiaⁿ Tiong-kok ē chhái-chhú gōa-kau á-sī keng-chè í-gōa ê chhiú-tōaⁿ, chìn chi̍t-pō͘ chi-chhî Gô-lô —— thê-kiong bú-khì hō͘ Phû-teng tī chiàn-cheng tiong sú-iōng —— jî-chhiáⁿ kian-kò͘ chi̍t-ê hoán-tùi Pak-iok kah Bí-kok ê kiông-tōa chi̍p-thoân. Se-hong kok-ka ê hoân-ló sī ke-gia̍h-·ê," kian-kò͘ chi̍t-ê hoán-tùi Pak-iok kah Bí-kok ê kiông-tōa chi̍p-thoân" sī chin-·ê, tān-sī "thê-kiong bú-khì hō͘ Phû-teng tī chiàn-cheng tiong sú-iōng " sī bô-khó-lêng ê tāi-chì. Tiong-kok piáu-bīn siōng ké-sian kóng kiaⁿ Pak-iok kah Bí-kok kā chè-chhâi, sū-si̍t siōng sī Tiong-kok ài Gô-lô kè-sio̍k tī 烏克蘭ê chiàn-cheng, 習近平 chú-se̍k choa̍t-tùi bô-khó-lêng hiòng Phû-teng chóng-thóng si ap, khǹg i thêng-chí chiàn-cheng chōe-hêng kah pō-hêng, sīm-chì khǹg i thiat cháu kun-tūi. Chiàn jú ke̍k-lia̍t, chiàn jú kú jú hó. Thi̍h phah ê sin-thé mā bē kham-tit saⁿ kang ê lo̍h-sái, kè-sio̍k chiàn-·lo̍h-khì, Gô-lô it-tēng ē siau-sán lo̍h-bah, kui bóe Gô-lô ē piàn choh Tiong-kok láu-tōa seng-khu-piⁿ kiò chhùi ê "sè-hàn ê". Tông-sî Pak-iok kah Bí-kok ê kok la̍t mā sī ē tōa sún, kàu-sî sè-kài chin-chiàⁿ ê láu-tōa tio̍h sī Tiong-kok.

　　 烏克蘭ê Chelen-su-ki chóng-thóng ū thàu-lō͘ kóng 烏克蘭kah Gô-lô ê hô-pêng tâm-phòaⁿ té sòaⁿ, Gô-lô tio̍h hoe-ho̍k 烏克蘭 léng-thó͘ oân-chéng, chun-tiōng Liân-ha̍p-kok hiàn-chiuⁿ, pôe-sióng it-chhè chiàn-cheng sún-sit, têng-hoa̍t múi chi̍t-ê chhiok-hoān chiàn-cheng chōe ê hoān-lâng, í-ki̍p pó-chèng bē koh chhim-hoān 烏克蘭 téng chiân-tê.

Gô-lô chóng-thóng Phû-teng lāi-sim chin siūⁿ beh thêng chiàn, tān-sī i chhùi ta̍h chin ngē, i kóng 烏克蘭tio̍h chin-chiàⁿ chò-kàu "khì Nazi hòa","khì kun-sū hòa" kah oân-choân tiong-li̍p ê saⁿ tōa iàu-kiāⁿ, siōng iàu-kín ê sī i kóng, Gô-lô ê kun-tūi bô beh ùi só͘ chiàm-·tio̍h ê jīm-hô thó͘-tē thiat-thè.

　　 Tiong-kok, Gô-lô nn̄g kok thâu-lâng hōe-tâm, ná ū khó-lêng tòa-lâi 烏克蘭 hô-pêng? góa khòaⁿ, nn̄g-ê thâu-lâng chí-put-kò sī ōe chi̍t-ê khang-khak piáⁿ, hō͘ gōng-lâng chí í-āu. 　　　(230324)

Chù, 習近平 　　 烏克蘭　　 沙烏地阿拉伯 　　諾貝爾 chhiáⁿ liām Hôa-gí



　　三月二十至二二，中國國家主席習近平去莫斯科kah俄羅總統浮丁會談，內容包括加深雙旁關係，經濟領域，國際局勢kah烏克蘭危機等。其中hō͘全世界上關心ê是烏克蘭ê和平。三月初十，斷交七年ê伊朗kah沙烏地阿拉伯tī中國chhiâu促協議之下。宣布重建外交關係，所以有人認為，習近平拼勢beh促成俄烏戰爭停戰、簽訂和平條約。習近平有可能ē得tio̍h諾貝爾和平獎。

　　二月二四，俄烏戰爭滿一年hit工，中國有提出「關於政治解決烏克蘭危機ê中國立場」，提出12點講法，無一點對結束俄烏戰爭有幫助。

　　三月十三，中國外交部宣布一禮拜後習近平beh去訪問俄羅。三月十七，國際刑事法院（ICC）以非法kā兒童帶離開烏克蘭作理由，對俄羅總統浮丁發布戰爭罪逮捕令，時間chat kah chiah tú好？ná像是順續警告一日到暗講無beh放棄武力拍台灣ê習近平，千萬m̄-thang去犯tio̍h戰爭罪！

三月二十至二二，中國國家主席習近平tī莫斯科kah俄羅總統浮丁見面會談，雙方tī會後聯合聲明中強調beh「通過和談」來解決烏克蘭危機。但是西方國家不止緊張，恐驚中國ē採取外交抑是經濟以外ê手段，進一步支持俄羅——提供武器hō͘浮丁tī戰爭中使用——而且堅固一个反對北約kah美國ê強大集團。西方國家ê煩惱是加額ê，「堅固一个反對北約kah美國ê強大集團」是真ê，但是「提供武器hō͘浮丁tī戰爭中使用」是無可能ê代誌。中國表面上假仙講驚北約kah美國kā制裁，事實上是中國愛俄羅繼續tī烏克蘭ê戰爭，習近平主席絕對無可能向浮丁總統施壓，勸伊停止戰爭罪行kah暴行，甚至勸伊撤走軍隊。戰愈激烈、戰愈久愈好。鐵拍ê身體mā bē堪得三工ê落屎，繼續戰落去，俄羅一定ē消瘦落肉，歸尾俄羅ē變作中國老大身軀邊叫嘴ê「細漢ê」。同時北約kah美國ê國力mā是ē大損，到時世界真正ê老大tio̍h是中國。

　　烏克蘭ê Chelen-su-ki總統有透露講烏克蘭kah俄羅ê和平談判底線：俄羅tio̍h恢復烏克蘭領土完整、尊重聯合國憲章、賠償一切戰爭損失、懲罰每一个觸犯戰爭罪ê犯人，以及保證bē koh侵犯烏克蘭等前提。

俄羅總統浮丁內心真想beh停戰，但是伊嘴踏真硬，伊講烏克蘭tio̍h真正做到「去納粹化」、「去軍事化」kah完全中立ê三大要件，上要緊ê是伊講，俄羅ê軍隊無beh ùi所佔tio̍hê任何土地撤退。

　　中國、俄羅兩國頭人會談，ná有可能帶來烏克蘭和平？我看，兩个頭人只不過是畫一个空殼餅，hō͘戇人止枵。　　　(230324)

註：習近平　　烏克蘭　　沙烏地阿拉伯　　諾貝爾 請唸華語