《綠色短評》

 | | | 轉寄

原來烏克蘭mā ē-sái拍俄羅！

作者 李南衡, ChoânTâijī/全台字 by Chng Hūiphêng 2022.12.25

Choânbîn Tâioânjī pán/全民台灣字版簡稱ChoânTâiJī


《 Le̍ksek toánphêng 》 Lí Lâmhêng

Goânlâi 烏克蘭mā ēsái phah Gôlô!

　　2022 nî jīgoe̍h jīsì, Gôlô kuntūi chèngsek chhimlio̍k 烏克蘭 kàu taⁿ 280 gōa kang, ēsái kóng sī 烏克蘭hō͘ Gôlô chhi̍h teh thô͘kha phah, mānā chiànchhia, tōaphàu sìkè tōaⁿ, huitôaⁿ bô thêng, hoattiānchhiúⁿ, chúi khò͘, tiānle̍k tiān sìn hēthóng siū phòhoāi, liân chin chē pēⁿīⁿ, ha̍khāu mā hō in chàchàtiāu, si̍tchāi chin khóó͘ⁿ! hókachài í Bíkok chhōa thâu ê Pakiok kokka cheksî thêkiong kok chióng sin búkhì chioân, 烏克蘭 chiah ētàng tòng kàu kináji̍t. Lán mā bat siūⁿ, 烏克蘭ná ē bô ài kā phah tòtńgkhì?

　　 Bô gîgō͘ cha̍pjīgoe̍h chhegō͘ thàuchá 6 tiám 4 pun, tī Gôlô Salatobu（Saratov） chiu ê Unkosu（Engels） khongkun kitē chosiūtio̍h chūsat bôlângki se̍kkek, ínhoat chiok tōa ê po̍kchà siaⁿ. Chitê khongkun kitē lī 烏克蘭 piankài ū 724 konglí, tī Gôlô siúto͘ Bo̍hsukho tanglâmhong iok 875 konglí ê só͘chāi, sī Gôlô hiòng 烏克蘭 hoatsiā hóechìⁿtôaⁿ chiànki ê chúiàu khíkàng tē, mā sī Gôlô khongkun ū chhionghun siatpī, ētàng ūi chìnkong 烏克蘭ê tōa hêng hongchàki thêkiong ûisiu póióng ê îit kitē. Kúi kang chêng kantia̍p ūichheⁿ ū show chhut TU90 kah TU160 hongchàki chūchi̍p ê só͘chāi. Po̍kchà hoatseng āu, bô siū hāi ê chiànki lóngchóng khí poe līkhui kitē.

　　 Kâng chi̍t kang thàuchá, lī 烏克蘭 piankéng 482 konglí ê Gôlô tiongpō͘ siâⁿchhī Lachan(Ryazan) hūkīn ê Chiagilebô(Dyagilevo) khongkun kitē mā sī chosiūtio̍h bôlângki ê kongkek. Chitê khongkun kitē ū thêng chin chē chiah Gôlô tōa hêng chiànlio̍k hongchàki.

　　 烏克蘭 lāichèng pō͘tiúⁿ kò͘būn Jielasenko (Anton Gerashchenko) tī Twitter téngbīn piáusī, ū siausit kóng Unkosu (Engels) khongkun kitē kah Chiagilebô(Dyagilevo) khongkun kitē ê kunki goânpún ūtēng beh tī cha̍pjīgoe̍h chhegō͘ chákhí chiphêng hongchà 烏克蘭 lênggoân kichhó͘ siatsi ê jīmbū. Bô siūⁿtio̍h 烏克蘭 seng chhutchhiú.

　　 Gôlô kokhôngpō͘ tī siausit pha̍kkng liáuāu thiàuchhut lâi piáusī, chit nn̄g piàn kongkek sūkiāⁿ ū chōsêng 3 sí 4 siong, 2 chiah Tu95 hongchàki kah 1 chiah Tu22M̀ hongchàki húi sún

　　 Bûsam putsênglé, cha̍pjīgoe̍h chhela̍k chákhí, lī 烏克蘭 bô lōa hn̄g ê Khusukhu(Kursk) kun ēng kitiûⁿ mā chosiūtio̍h bôlângki se̍kkek, kitiûⁿ lāi chi̍t chō tûiûchô po̍kchà to̍h hóe, Gôlô koaⁿhong soanchheng bô jînoân siongbông.

Tēit kang po̍kchà hoatseng kúi tiámcheng āu, 烏克蘭 choân kéng khangse̍k kéngpò kohchài hiángkhí. Gôlô koh hiòng 烏克蘭 hoattōng sin chi̍tpho ê huitôaⁿ kongkek. 烏克蘭 chóngthóng kóng, goán íkeng cha̍h tiāu chin chē lia̍p huitôaⁿ, tānsī iûgoân ínhoat chin chē só͘chāi thêng tiān.

　　 Gôlô chíchek 烏克蘭 kongkek Gôlô léngthó͘. Chin kîkoài, Gôlô khì phah 烏克蘭 léngthó͘ 280 gōa kang ná chhiūⁿ chiâⁿ chèngtong, 烏克蘭tī Gôlô kénglāi khian saⁿê niāniā tio̍h kaiⁿkaiⁿ kiò!

　　Oh, goânlâi 烏克蘭mā ēsái phah Gôlô!

Chù, 烏克蘭　　 chhiáⁿ liām Hôagí


Pe̍h-ōe-jī-pán/白話字版



《 Le̍k-sek toán-phêng 》 Lí Lâm-hêng

Goân-lâi 烏克蘭mā ē-sái phah Gô-lô!

　　2022 nî jī-goe̍h jī-sì, Gô-lô kun-tūi chèng-sek chhim-lio̍k 烏克蘭 kàu taⁿ 280 gōa kang, ē-sái kóng sī 烏克蘭hō͘ Gô-lô chhi̍h teh thô͘-kha phah, mā-nā chiàn-chhia, tōa-phàu sì-kè tōaⁿ, hui-tôaⁿ bô thêng, hoat-tiān-chhiúⁿ, chúi khò͘, tiān-le̍k tiān sìn hē-thóng siū phò-hoāi, liân chin chē pēⁿ-īⁿ, ha̍k-hāu mā hō in chà-chà-tiāu, si̍t-chāi chin khó-ó͘ⁿ! hó-ka-chài í Bí-kok chhōa thâu ê Pak-iok kok-ka chek-sî thê-kiong kok chióng sin bú-khì chi-oân, 烏克蘭 chiah ē-tàng tòng kàu kin-á-ji̍t. Lán mā bat siūⁿ, 烏克蘭ná ē bô ài kā phah tò-tńg-khì?

　　 Bô gî-gō͘ cha̍p-jī-goe̍h chhe-gō͘ thàu-chá 6 tiám 4 pun, tī Gô-lô Salatobu（Saratov） chiu ê Unkosu（Engels） khong-kun ki-tē cho-siū-tio̍h chū-sat bô-lâng-ki se̍k-kek, ín-hoat chiok tōa ê po̍k-chà siaⁿ. Chit-ê khong-kun ki-tē lī 烏克蘭 pian-kài ū 724 kong-lí, tī Gô-lô siú-to͘ Bo̍h-su-kho tang-lâm-hong iok 875 kong-lí ê só͘-chāi, sī Gô-lô hiòng 烏克蘭 hoat-siā hóe-chìⁿ-tôaⁿ chiàn-ki ê chú-iàu khí-kàng tē, mā sī Gô-lô khong-kun ū chhiong-hun siat-pī, ē-tàng ūi chìn-kong 烏克蘭ê tōa hêng hong-chà-ki thê-kiong ûi-siu pó-ióng ê î-it ki-tē. Kúi kang chêng kan-tia̍p ūi-chheⁿ ū show chhut TU-90 kah TU-160 hong-chà-ki chū-chi̍p ê só͘-chāi. Po̍k-chà hoat-seng āu, bô siū hāi ê chiàn-ki lóng-chóng khí poe lī-khui ki-tē.

　　 Kâng chi̍t kang thàu-chá, lī 烏克蘭 pian-kéng 482 kong-lí ê Gô-lô tiong-pō͘ siâⁿ-chhī Lachan(Ryazan) hū-kīn ê Chiagilebô(Dyagilevo) khong-kun ki-tē mā sī cho-siū-tio̍h bô-lâng-ki ê kong-kek. Chit-ê khong-kun ki-tē ū thêng chin chē chiah Gô-lô tōa hêng chiàn-lio̍k hong-chà-ki.

　　 烏克蘭 lāi-chèng pō͘-tiúⁿ kò͘-būn Jielasenko (Anton Gerashchenko) tī Twitter téng-bīn piáu-sī, ū siau-sit kóng Unkosu (Engels) khong-kun ki-tē kah Chiagilebô(Dyagilevo) khong-kun ki-tē ê kun-ki goân-pún ū-tēng beh tī cha̍p-jī-goe̍h chhe-gō͘ chá-khí chip-hêng hong-chà 烏克蘭 lêng-goân ki-chhó͘ siat-si ê jīm-bū. Bô siūⁿ-tio̍h 烏克蘭 seng chhut-chhiú.

　　 Gô-lô kok-hông-pō͘ tī siau-sit pha̍k-kng liáu-āu thiàu-chhut lâi piáu-sī, chit nn̄g piàn kong-kek sū-kiāⁿ ū chō-sêng 3 sí 4 siong, 2 chiah Tu-95 hong-chà-ki kah 1 chiah Tu-22M̀ hong-chà-ki húi sún

　　 Bû-sam put-sêng-lé, cha̍p-jī-goe̍h chhe-la̍k chá-khí, lī 烏克蘭 bô lōa hn̄g ê Khusukhu(Kursk) kun ēng ki-tiûⁿ mā cho-siū-tio̍h bô-lâng-ki se̍k-kek, ki-tiûⁿ lāi chi̍t chō tû-iû-chô po̍k-chà to̍h hóe, Gô-lô koaⁿ-hong soan-chheng bô jîn-oân siong-bông.

Tē-it kang po̍k-chà hoat-seng kúi tiám-cheng āu, 烏克蘭 choân kéng khang-se̍k kéng-pò koh-chài hiáng-khí. Gô-lô koh hiòng 烏克蘭 hoat-tōng sin chi̍t-pho ê hui-tôaⁿ kong-kek. 烏克蘭 chóng-thóng kóng, goán í-keng cha̍h tiāu chin chē lia̍p hui-tôaⁿ, tān-sī iû-goân ín-hoat chin chē só͘-chāi thêng tiān.

　　 Gô-lô chí-chek 烏克蘭 kong-kek Gô-lô léng-thó͘. Chin kî-koài, Gô-lô khì phah 烏克蘭 léng-thó͘ 280 gōa kang ná chhiūⁿ chiâⁿ chèng-tong, 烏克蘭tī Gô-lô kéng-lāi khian saⁿ-ê niā-niā tio̍h kaiⁿ-kaiⁿ kiò!

　　Oh, goân-lâi 烏克蘭mā ē-sái phah Gô-lô!

Chù, 烏克蘭　　 chhiáⁿ liām Hôa-gí




　　2022年二月二四，俄羅軍隊正式侵略烏克蘭到taⁿ280外工，ē-sái講是烏克蘭hō͘俄羅chhih teh土腳拍，mā-nā戰車、大砲四界彈，飛彈無停，發電廠、水庫、電力電信系統受破壞，連真chē病院、學校mā hō in炸炸掉，實在真可惡！好佳哉以美國chhōa頭ê北約國家即時提供各種新武器支援，烏克蘭才ētàng擋到今á日。咱mā bat想，烏克蘭náē無愛kā拍倒轉去？

　　無疑誤十二月初五透早6點4分，tī俄羅Salatobu（Saratov）州êUnkosu（Engels）空軍基地遭受tio̍h自殺無人機襲擊，引發足大ê爆炸聲。Chit-ê空軍基地離烏克蘭邊界有724公里，tī俄羅首都莫斯科東南方約875公里ê所在，是俄羅向烏克蘭發射火箭彈戰機ê主要起降地，mā是俄羅空軍有充分設備、ē-tàng為進攻烏克蘭ê大型轟炸機提供維修保養ê唯一基地。幾工前間諜衛星有show出TU-90 kah TU-160轟炸機聚集ê所在。爆炸發生後，無受害ê戰機lóng總起飛離開基地。

　　仝一工透早，離烏克蘭邊境482公里ê俄羅中部城市Lachan（Ryazan）附近êChiagilebô（Dyagilevo）空軍基地mā是遭受tio̍h無人機ê攻擊。Chit-ê空軍基地有停真chē隻俄羅大型戰略轟炸機。

　　烏克蘭內政部長顧問Jielasenko（Anton Gerashchenko）tīTwitter頂面表示，有消息講Unkosu（Engels）空軍基地kah Chiagilebô（Dyagilevo）空軍基地ê軍機原本預訂beh tī十二月初五早起執行轟炸烏克蘭能源基礎設施ê任務。無想tio̍h烏克蘭先出手。

　　俄羅國防部tī消息曝光了後跳出來表示，chit兩遍攻擊事件有造成3死4傷，2隻Tu-95轟炸機kah 1隻Tu-22M̀轟炸機毀損

　　無三不成禮，十二月初六早起，離烏克蘭無lōa遠êKhusukhu（Kursk）軍用機場mā遭受tio̍h無人機襲擊，機場內一座儲油槽爆炸to̍h火，俄羅官方宣稱無人員傷亡。

第一工爆炸發生幾點鐘後，烏克蘭全境空襲警報再度響起。俄羅koh向烏克蘭發動新一波ê飛彈攻擊。烏克蘭總統講，阮已經cha̍h掉真chē粒飛彈，但是猶原引發真chē所在停電。

　　俄羅指責烏克蘭攻擊俄羅領土。真奇怪，俄羅去拍烏克蘭領土280外工那像誠正當，烏克蘭tī俄羅境內khian三個niā-niā tio̍h kaiⁿ-kaiⁿ叫！

　　Oh，原來烏克蘭māē-sái拍俄羅！

註：烏克蘭　　請唸華語