《歷史上ê主耶穌》

 | | | 轉寄

第四章_1 偤太人tī加利利ê生活

作者 杜英助, 台譯：Lîm Chùn-io̍k 2020.03.08

迦南地北部ê加利利地區，以加利利海做中心koh分做上加利利kah下加利利。約書亞tī公元前1200年帶領以色列人進入迦南地ê時，kā上加利利分hō͘ 但、亞設kah拿弗他利三个支派tòa；kā下加利利分hō͘ 西布倫、以薩迦kah瑪拿西三个支派tòa。M̄-koh到公元前931年，以色列聯合王國分裂做北部以色列國，有10个支派；南部為偤大國，只chhun偤大支派kah利未族ê神職人員。

北部以色列國ê歷史，自公元前931年起到公元前722年被亞述帝國消滅亡國了後，以色列人有10个支派差不多全部被掠到亞述做奴隸；亞述人koh再kā tòa tī中東ê外邦人（亞摩利人）移民到以色列ê土地tòa。Tī撒瑪利亞地區無受掠走ê弱勢居民，後來kah新移民通婚，伊ê kiáⁿ孫通稱做撒瑪利亞人，hō͘ 真正純種ê偤太人拒絕往來，因為偤太人確信in kiáⁿ兒ê血統已經m̄是純粹ê以色列人。

Tī南部ê偤大國iáu未亡國chìn前，以賽亞先知講：「西布倫地kah拿弗他利地，沿海ê路（亞設kah瑪拿西之地），約旦河ê hit pêng(瑪拿西地），外邦人ê加利利。」（以賽亞書9：1）；chiah-ê地方tī耶穌時代lóng是tùi亞述統治ê中東地區遷徙來ê阿拉伯新移民、希臘人kah羅馬人teh khiā起。

公元前336～323年，希臘帝國馬其頓ê亞歷山大大帝征服中東kah聖地，希臘人進入聖地統治，而且kā希臘文化帶入去聖地。污染偤太人ê宗教，hō͘虔誠ê偤太人oh得忍受，尤其是tī耶路撒冷聖殿thâi豬（偤太人認為豬是siōng lâ-sâm無清氣ê動物，無飼、無thâi，mā m̄食）獻hō͘希臘眾神明ê舉動引起偤太人極激烈ê反抗；何況希臘人koh tī聖地飼豬、thâi豬、食豬肉，koh khah hō͘偤太人kan-taⁿ受氣m̄敢講出嘴。

到耶穌ê時代，耶穌bat講一个浪子回頭ê譬喻（路加15：11～32）講：當伊kā一切所有ê開了了，koh tú好tú-tio̍h hit所在有大饑荒，就sàn-chhiah起來；伊就án-ne去投靠當地ê一个居民（外邦人），hit-ê人打發伊去田裡飼豬（siōng kē賤lâ-sâm ê工作），當時伊恨bē得the̍h豬所食ê豆莢來充飢（siōng見笑ê食物），mā無人（以色列人）hō͘ 伊食啥物。

有一pái耶穌chhōa門徒坐船到加利利東北岸ê所在去，看見有一位格拉森人hō͘ 鬼附身（路加8：26～39），就憐憫伊；聖經頂面講：「當tī伊身上附tio̍h ê鬼群衝出來ê時，豬群就闖落山崖，投入去湖裡，淹死à。」可見，耶穌傳道ê時，上加利利地區lóng是外邦人tòa ê所在，包括tī約旦河東岸，總共有10个大城lóng是tòa外邦人，通稱kē加坡里，意思to̍h是10个城鎮。

下加利利地區，有幾个小庄頭是有偤太人tùi南部ê偤大地區遷徙過來tòa ê，chiah-ê地方包括拿撒勒、迦拿、迦百農kah伊ê四kho͘ 圍ê小漁村以及農莊。加利利省lóng mā建tī chit地區ê吉坡里；省都是希臘人、羅馬人kah偤太人混合tòa ê希臘化城市。

公元前63年，羅馬帝國ê龐貝將軍率兵佔領聖地，因為án-ne，kui个偤太地ê人民lóng被羅馬帝國統治。探討天文星象家ê記載：最近chiah發見耶穌tī公元前5年3月中降生tī偤太地南pêng ê伯利恆，tī北部ê加利利地區ê拿撒勒長大，用迦百農做傳福音ê中心；chit時chūn，偤太全地lóng被羅馬帝國統治。公元前4年春天，大希律王往生，伊ê王朝分別由伊三个kiáⁿ分治：統治偤太kah以土買（以東）地區ê希律叫亞基老（公元前4年～公元後6年）；統治加利利kah比利亞（約旦河東岸）ê希律是安提帕（耶穌稱伊做狐狸）；希律腓力統治上加利利、以土利亞（敘利亞ê西南地區）kah特拉可尼（約旦ê北部地區）。