《母語e5心靈雞湯》

 | | | 轉寄

紫丁香

作者 Li KhinhoaN 2007.03.18

listen





--春天花展8之八
--Chhun-thiⁿ hoe-tián 8 chi peh

一開始你看阮phú-phú
Chi̍t-khai-sí lí khòaⁿ góa phú-phú
藏tī ām-ām 淺綠色ê 葉堆裡
Chhàng tī ām-ām chhián-le̍k-sek ê hio̍h-tui-ni̍h
一點點仔ê 淺紫
Chi̍t-tiám-tiám-á ê chhián-chí
一點點仔ê 深紫
Chi̍t-tiám-tiám-á ê chhim-chí
一點點ê 白
Chi̍t-tiám-tiám ê pe̍h
真緊阮tio̍h 一簇一簇
Chin-kín goán tio̍h chi̍t-chhok-chhok
一串一串
Chi̍t-chhoàn chi̍t-chhoàn
探頭nǹg 出來葉堆
Thàm-thâu nǹg--chhut-lâi hio̍h-tui

你若猶koh 看阮霧霧
Lí nā iáu-koh khòaⁿ goán bū-bū
夜色若罩落來
Iā-sek nā tà--lo̍h-lâi
阮ê 野性
Goán ê iá-sèng
化做誘惑ê 芳水味
Hòa-chò iú-he̍k ê phang-chúi-bī
你tio̍h 知
Lí tio̍h chai
原來阮是勾人神魂ê
Goân-lâi goán sī kau lâng sîn-hûn--ê
青春少女
Chheng-chhun siàu-lú

---2003/5/22 Harvard