《疼你e5厝邊》

 | | | 轉寄

耶穌tī路上看見一個生落來就失明ê人

作者 Chhòa Tiat-bîn 2005.09.25

第一pái行入hit間教會，遠遠就看tio̍h一個矮小奇怪ê身影：一位非常嚴重ê肢體殘障會友，kui-ê人差不多是身軀折teh，行路ê時手必須掠tiâu腳chiah能往前移動。

以往bat接觸過bē少殘障朋友，通常身體ê缺陷會hō͘ in無法度用正常ê心態kap一般人相處，á眼前chit位會友，卻是帶有比我以前接觸過ê人iáu khah嚴重ê肢體殘障，因此， 我是非常小心m̄敢隨意觸(tak)tio̍h任何kap殘障有關ê話題。無想tio̍h伊開朗健談，主動表明伊是因為小兒麻痺症致到身體殘障，學歷也kan-ta到國中，從事雕刻ê工作。阮成做真好ê朋友，伊也另外帶了一位重度殘障ê朋友進入教會kap青年團契。Chit兩位殘友，帶hō͘我生命真大ê衝擊。In真實tī我眼前，活出被上帝改變ê生命，ē-tàng怎樣突破身體kap環境ê限制。一開始，我照過去所認定ê殘障人士刻板印象來對待in，m̄敢觸(tak)tio̍h in ê身體殘缺，m̄敢kap in談殘障可能帶來ê後遺症，m̄敢邀in參加阮爬山涉水ê郊遊活動，也m̄敢邀請in參加阮chit群研究生ê查經班，因為我想in ê學歷無koân，查經班ê內容對in來講恐驚有kóa siuⁿ深奧。

後來我chiah發現，一切lóng是我考慮siuⁿ chē lah。Chit兩位朋友不但ē-tàng坦然面對殘障ê事實，koh-khah持有感恩kap珍惜ê心情來面對生命。In kā我講，因為脊椎彎曲jú來jú嚴重，真可能koh活無過幾年。但in卻充滿了喜樂，對上帝無怨懟ê聲音。In勇敢試探各種挑戰，週日聚會完，常常主動邀我同齊騎o-to-bái去山區sńg。In騎殘障專用ê o-to-bái，照常ē-tàng翻山越領。In ê學歷雖然無koân，卻無影響in研讀聖經ê努力kap熱情；因為視力無好，in總是真食力讀影印放大ê聖經，就án-ne，幾年落來，in甚至ē-tàng家己閱讀艱澀ê神學書籍，比一kóa受過高等教育ê人koh-khah能理解其中奧義。

Hit時我tú-teh交大修讀博士學位，做研究ê過程總是會tú-tio̍h瓶頸，難免心情鬱卒來失志。但是每一pái，我見tio̍h chit兩位朋友，就感覺我當今所遭遇ê困難，不過是無病呻吟。我家己對上帝hō͘我ê託付，根本無夠認真熱情。我根本無夠珍惜家己ê生命；對周遭ê一切，也無夠感恩。In ê生命品質，不斷teh提醒我：一個認識造物者ê人，應該是怎樣teh活。In將苦難化做榮耀上帝ê舞台，見證了上帝ê能力kap恩典。即使病痛纏身，in照常開朗樂觀，並且對人寬宏大量、和氣仁慈，這怎能bē hō͘人刮目相看？Chit種kap世俗無仝ê生命態度，絕對m̄是生成ê，一定有某種力量相助。Tī in ê身上，我看tio̍h耶穌。

後來，我the̍h-tio̍h博士學位，tńg來到南部工作。七年了後，有機會tńg去新竹，我帶阮bó͘ kap gín-á去chhōe in。一見面，我hit兩個幼稚園ê gín-á，lóng m̄-bat看過án-ne怪模怪樣ê重度殘障者，便失聲笑出來，馬上hō͘我kā in大大責備，但in一屑á to無在意。我kap平常仝款幫in處理了o-to-bái ê khǹg物品問題，一切妥當了後，阮開始話sian。In生命熱度仝款，並且凡事感恩。Beh離開chìn前，其中ê一位笑笑á kā我講：「我ê脊椎最近koh-khah彎loh，可能活bē過下一個十年，不是過我三十歲ê時chūn，就teh講家己可能活bē過四十歲，現在也已經經四十歲loh……」

我一聽，目屎差一點á滴出來。原來擁有優渥環境ê家己，常常無實實在在teh掌握上帝所賞賜ê一切。Chit兩位肢體殘障、知識無koân ê基督徒，koh一pái用in ê生命教導我看清楚生命ê意義kap價值。離開in了後，我隨時khà電話hō͘一位tú到新竹工作，tú-tú陷入生命低潮ê學弟。邀請伊週日chhōe時間去hit-ê教會行行leh，認識我hit兩位真特別ê朋友……。 轉載自《耕心週刊》