《疼你e5厝邊》

 | | | 轉寄

顯出上帝ê大能

作者 Lîm Chùn-io̍k 2005.12.18

踏頭話
「新ê誡命」就是馬太福音二十二章39節：「你tio̍h愛你ê鄰人，親像愛你家己。」，這是基督徒lóng真熟悉ê經節，但無真chē人ē-tàng用行動表現出來，Koh-khah m̄知聖經上所講ê「鄰人」就是tī咱四周圍上需要關懷kap幫助ê弱勢團體，á盲人koh是弱勢中ê弱勢。如果用眼罩蓋住眼睛去生活一天，你一定會體會出，看bē tio̍h世界ê盲人是何等需要關懷kap鼓勵ê「鄰人」。

約翰福音第九章中耶穌講：青暝ê m̄是伊抑是伊ê父母有罪，khiok是上帝beh tī伊ê身上顯出上帝ê作為。視障朋友雖然肉眼看無，心靈ê目睭卻是明亮ê,其他ê潛能koh是豐富ê,只要咱伸出關懷kap鼓勵ê手，in ê成就bē輸hō͘明眼ê人，tī某方面koh-khah嬴一層，海倫凱勒kap雙連教會西羅亞合唱團便是真好ê例。

台灣教會盲人事工ê源起頭
1991年底，我有機會去賴永祥長老府上作客，伊將伊ê著作「教會史話」第一集送hō͘我。我隨手翻開一看，tú好是第211頁ê「盲人事工ê發軔」，當時tú-tú為tio̍h雙連教會盲朋友聯誼會無閒kah霧sà-sà ê我，有一種怎樣hiah-nih-á tú好 ê感覺。這段有關台灣長老教會盲人事工ê記事，hō͘我真大ê鼓勵。

聖經tùi舊約開始就有關於盲人ê記載，新約koh-khah有耶穌醫好青瞑ê神蹟。台灣盲人教育ê開拓者是英國長老教會宣教師甘為霖牧師 (Rev. William Campbell)，大約tī 1882年就開始，根據伊ê估計，hit當時台灣kap閩南地區，大約有二萬五千個盲人，其中台灣就有一萬七千人。甘牧師非常同情盲人，伊認為教育一定ē-tàng改善in ê悲慘處境；所以決心致力tī盲人教育事工。伊大約tī 1885年就準備好廈門音羅馬字淨凸活字，但beh製作一本聖經需要六十二本大冊，成本也真高。後來，伊改用波金斯點字(Perkins Braille)，干單需要四十九冊，而且費用折半。Tùi傳教ê觀點來講，有盲人用ê冊tō ē-tàng啟發盲人接近福音冊，hō͘ in進入得救之門；對盲人ê福祉來講，消除文盲，知識之門也tō開loh。甘牧師tī 1889年開始展開創設盲校ê事工，tī府城(台南)洪公祠設立訓瞽堂盲校，這是台灣盲人特殊教育ê先驅，也拍開台灣基督長老教會ê盲人事工。

雙連教會ê盲人事工
雙連教會tī 1988年成立超教會ê盲朋友聯誼會，tī beh成立ê hit當時，我擔任服務委員會主委，看tio̍h主日崇拜中有二､三位盲朋友獨來獨往，只有真少數ê會友kap in相借問，我感覺真奇怪á非常鬱卒。根據陳溪圳牧牧講，tī雙連老禮拜堂ê時期，每禮拜有二､三十位盲朋友來參加禮拜，為何教會改建十一層大樓了後，hia-ê盲朋友漸漸離開雙連教會neh?

當時服務委員會大多做寡對會友ê服務，其實會友來教會lóng想beh服事他人，那tio̍h服務委員會來服務呢? 我tī一pái透早整理庭院獨處ê時，假若有tùi天頂來ê信息kā我講： 應該對服務目前教會內ê盲人會友開始，幫in籌備組織盲朋友聯誼會，hō͘ in選出幹部來計畫in家己合(kah)意ê活動，由服務委員會發動會友來接觸in,關懷in,幫助in,共同為弱勢團體創造一個公平ê無障礙環境。 有這個構想了後，服務委員會就開始會同卓忠輝牧師kap教會幹事主任蔡芳文長老去探訪常來教會ê盲朋友，再koh由in介紹鬥陣去探訪koh-khah chē ê盲朋友。Tùi探訪中才知影in真chē lóng來過雙連教會；但每pái坐落椅á了後，就發現原來坐tī仝條椅á頂ê會友馬上離開，去別條ê椅á坐。禮拜soah後，也無會友向in相借問，in感覺雙連教會一年四季m̄-nā冷氣真冷，對弱勢ê關懷koh-khah冷。我問in有關籌備組織盲朋友聯誼會ê意見，大家lóng贊成，真緊就進行籌備並且訂好章程、選舉幹部，正式成立聯誼會。

服務委員會向長執會提案得到多數通過，1988年4月26日第一pái舉辦陽明山郊遊，一百外位盲朋友kap三十幾位義工參加，大家lóng感覺得真有意義。Hit年盲朋友慶祝聖誕節大會，有四百外人參加；in家己安排節目，家己表演，熱鬧滾滾，為in服務ê義工lóng非常感動。尤其是一寡愛唱歌ê盲朋友組一個合唱團，tī教會慶祝聖誕ê暗會中，in ê第一pái演唱，受tio̍h全體會友ê肯定，我tī現場感動kah beh講tit。

合唱團tī李鳳珠老師認真koh有耐心ê指導下，每位團員koh-khah無顧in夜間按摩工作ê辛勞，每禮拜一kap禮拜五上午十點到十二點，lóng來教會練歌；in tī教會獻詩，mā受邀請去各地教會詩歌見證，有時mā去學校kap機關團體演唱。大家teh為tio̍h團名想kah頭殼強beh爆開ê時，卓牧師有一工ê講道引用約翰福音第九章來傳講「西羅亞＝奉差遣」ê信息，大家感動koh歡喜，將按呢號名叫做「西羅亞詩班」，對外叫做「西羅亞合唱團」。In事奉主ê熱情滾滾，1991年tī基隆西濱教會ê詩歌見證中，孫長清ê個人信仰分享深深打動我ê心；禮拜soah了，我就kā in講來起立詩歌佈道團，達tio̍h用「西羅亞＝奉差遣」 為團名ê使命。

盲朋友聯誼會mā家己成立查經班，集合各教派ê基督徒，每禮拜四上午十點到十二點聚會，平均lóng有二十幾人參加。猶有每二禮拜一次ê家庭小組聚會，也lóng有二、三十人參加。每禮拜ê主日崇拜mā tùi二、三人增加到一、二十人，in追求信仰ê熱心，hō͘真chē明眼人感kak見笑，我個人mā tùi in中間學習真chē信仰ê課題。

期待
Tùi雙連教會盲人事工ê例ē-tàng看出，教會可以，mā應該扮演關懷盲人ê先驅者角色，進一步koh來關懷其他殘障人士。Hit當時雙連教會盲朋友聯誼會有一個目標，希望邀請有所感動ê教會，tī in ê社區組織盲朋友聯誼會，鼓舞全體會友來關懷盲人事工。透過各地教會ê宣導對殘障人士ê福音關懷，希望mā ē-tàng喚起全國ê教會來關心殘障福利事工，hō͘咱同心協力來為主作好ê見證，榮神益人，實踐咱ê信仰：「上帝是愛」。