《主編e5話》

 | | | 轉寄

信望愛2005年結算與2006年預算

作者 tjm 2006.01.22

本來我認為ē-tàng歇睏lah，無想tio̍h執行長講舊年ê結算是我執行ê，iáu是ài我報告，今年ê預算我也參與編列，所以同齊報告一下。好pah！án-ne就來kā這最後ê工作完成pah！

http://tech.fhl.net/~tjm/fhl94f.htm chia有2005年ê結算，tī信望愛站ê 2005年結算中，咱看tio̍h真chē「恩典」。包含神hō͘信望愛站ê，也包含信望愛站眾同工拚命hō͘眾網友ê。

最近我ê爛車換了一台爛汽車音響，ē-tàng直接插入記憶卡聽mp3（聽講目前只有便宜ê汽車音響chiah有chit種功能）。因為我常常需要長途開車，所以就kā全家人beh聽ê音樂lóng由CD轉成mp3塞入去記憶卡中。結果前幾工，無小心聽見我太太歡喜ê區域ê歌，其中有一首歌hō͘我想起信望愛站：王心凌ê「羽毛」，其中愛來愛去ê部分當然bē hō͘我想tio̍h什麼，顛倒是chit段：「我感覺我是雪白ê羽毛嚮往超越家己ê渺小/成做寂寞城堡關不了/能帶hō͘人幸福ê青鳥」，hō͘我想tio̍h chit-ê網站最初以及現在ê夢想。舊年ê結算顯示出咱iáu是繼續朝ǹg chit-ê夢想努力中。

先談神ê恩典，舊年一年，咱ê奉獻預估是73萬，但實際收tio̍h是125.4萬。iáu無包括成立法人所收tio̍h ê hit一百萬奉獻。Tī眾多機構因為南亞水災奉獻下滑、不足時，咱卻發現神hō͘咱夠用ê恩典，支持咱對外十一奉獻、iáu有瘋狂ê進行CBOL內容增補所造成ê花費。

談起信望愛站ê支出，其實大部分lóng kap預估ê差距無大，只有職工薪資ê部分超支真chē。Hit-ê部分其實本來無算是信望愛站ê主業，卻是咱看見CBOL計畫義工ê人力kap能力有限，真chē有能力做資料最後校閱ê人，lóng因為其他機構ê聘請而無法度投入siuⁿ-chē時間，soah致使整個計畫ê進度可能tio̍h延chhiân到真長ê時間以後。因此咱希望試探加行一步，咱不但家己做義工來維繫chit-ê網站，hō͘大家ē-tàng無償看咱ê文章、使用咱ê資源，甚至咱來分出一部分ê奉獻，買專家ê時間來協助加速完成CBOL ê內容，並且也hō͘ chiah-ê內容Open Source，hō͘大家免費使用。眾同工同意án-ne做，但是代價就是職工薪資大量ê增加，chiah半年gōa ê時間就已經用掉了預算量ê 1.7倍，也用掉了舊年預算ê四分之一。

不管怎樣，神hō͘咱ê恩典夠用，咱也拚命kā chiah-ê恩典分享出去了。舊年是我第一pái會感覺信望愛站ê財務有點á困難。Ha-ha！不過看tio̍h真chē ê內容慢慢á lóng分享出來了，實在是hō͘我家己滿心感恩。我也感覺信望愛站ê同工骨底就是拚命beh「分享」，beh帶hō͘別人幸福，beh送hō͘大家禮物ê。kap chiah-ê人同齊拚命，hō͘我感覺非常光榮。

Chit學期我到某個大學上課，出報告hō͘學生寫，有bē少學生選「Open Source運動」chit-ê主題。我發現大部分ê學生認為Open Source運動tī台灣ê環境中是不可能發展ê，因為大家lóng只想beh thàn錢。In看Open Source運動，也只想tio̍h「我免費用軟體，he真好ah」chit種ê利己觀點。有可能，這就是現況pah。但基督徒，怎能kap「大多數ê台灣人」仝款neh？我衷心希望信望愛站永遠無放棄目前ê chit-ê夢想。

今年，因為已經成立財團法人，所以預算tio̍h向政府報告。真不幸ê是咱大約tī暑假期間就開始編列預算，hit時缺乏準確ê支出資料，致到編出來ê預算並無精確。不管如何，整個預算ē-tàng參考 http://tech.fhl.net/~tjm/fhl2006.htm，chit-ê預算就是咱向政府報告ê預算ê細目。小khóa比對一下決算資料就知影chit-ê預算是低估了開支，尤其是低估了CBOL相關ê翻譯、校閱kap parsing費用。珍本聖經ê預算則是高估了，因為咱已經tī 2005年kā大部分ê珍本聖經拍攝、上網完成，chhun落來ê工作(如果無人提供新ê聖經來源ê話)大概5萬元台幣就ē-tàng全部完成。Ha-ha！無辦法，網路事工變化siuⁿ大，現在又ài配合政府ê時間，就會出現目前án-ne奇怪ê預算loh。
如果照預估，珍本聖經順利用5萬元結案ê話，he chhun落來ê十萬元將全部周轉過來hō͘ CBOL相關ê翻譯、校閱kap parsing計劃使用，致使咱會有25萬元ē-tàng進行CBOL ê內容製作。但如果照目前ê工作進度，chit種ê錢大概用無到幾個月就會消耗了了。不過，咱想信望愛站本來就是以義工為主，憑信心仰望神ê組織，也無好the̍h本來希望維繫網站經營ê錢過分投入tī內容ê產生上，因此咱也kap目前part time參與ê翻譯、校閱以及parsing工作者達成共識，信望愛站tùi一般正常ê奉獻中就是支持這25萬元來生產「free聖經研究資料」。如果預算用完，án-ne咱就停止支付費用，完全依賴義工ê形式進行，緩慢就緩慢pah！畢竟這是天頂老闆ê計劃，而m̄是咱ê計劃。但咱也會開放網友ē-tàng指定奉獻hō͘ CBOL 計劃，如果您認為chit套「free聖經研究資料」有價值，beh為chit件tāi-chì奉獻，án-ne阮就kā您ê奉獻加入這25萬元以外ê預算，繼續聘請工作人員加速chiah-ê資料ê進行。

Án-ne做是m̄是會排擠信望愛站其他事工ê經費neh？大家看預算就知影，早就已經排擠loh，咱卻iáu是願意儉腸neh肚，發揮早期ê節約精神，儘量hō͘ CBOL計劃所需ê經費ē-tàng擠出來。Chit次，執行長kap眾董事想，不管CBOL計劃是m̄是合乎大家對信望愛站ê期待，既然天頂ê老闆kā chit種ê感動khǹg tī咱心裡，咱願意拼命(有一kóa人講beh當義工，兩年內kā parsing完成，有人講奉獻lóng tio̍h移到chit部分)去完成chit套「free聖經研究資料」。Án-ne咱就koh-khah加行一步，tī信望愛站ê年度預算外，另外成立chit-ê專案，邀請大家為chit-ê部分奉獻。就當做信望愛站為chit-ê「free聖經研究資料」奉獻25萬，其他ê大家同齊來奉獻pah，不過就算錢lóng用完了，咱靠義工也會慢慢完成ê，因為咱清楚這是「呼召」。

另外台語信望愛站所關懷ê，是目前網際網路上比較弱勢ê台語群體，現在連chhōe ē-tàng phah台語ê人lóng真無容易。信望愛站已經修改了網頁產生器並提供網路資源來成立台語網站，但是整個台語部門ê運作iáu是比較薄弱而獨立ê。Chit-ê部門目前ê製作經費也是獨立ê，因為in需要支付phah字kap網頁輸入ê工讀費。您也ē-tàng註明特別為chit-ê部門奉獻。

其他ê部分，除了硬體開支特意被降低之外，kap成立法人前ê信望愛站大部分lóng是一致ê。另外咱ê對外十一奉獻，tī成立法人了後比較無法度隨意支出，咱將透過kap其他團體合辦藝文活動ê方式達成。

信望愛站涉入ê事工jú來jú多，但今年咱是第一pái成做財團法人，一開始kah-ná iáu真混亂ê。Ha-ha！十年前大家窩tī交大ê研究室拼裝機器ê時chūn，誰會想到原來天頂ê老闆ài咱chhòng成án-ne？不管型態如何、事工jōa-chē，其實咱ê目標 kap本質lóng iáu是仝款ê，希望透過免費分享ê方式，藉tio̍h網路hō͘眾人因咱得福。咱為tio̍h chit-ê呼召，今年iáu是會拚命去做ê。邀請大家也來kap阮同齊拚命。

聖經中ê「平安」，原意是指一種「健全狀態」，是一種終極、全面性ê健全狀態。

聖經中ê「恩惠」，是指上帝對不配ê人所施ê恩典。 上帝ê恩典臨到不配ê人，tùi án-ne hit人進入一種終極而全面性ê健全狀態─這就是福音。

求上帝幫助我思考家己寫ê是什麼！

前信望愛資訊中心負責人