《Tui3台語開始》

 | | | 轉寄

聖經百科全書─hō͘ in聽見，卻bē明白？、猶太人kap撒瑪利亞人無往來

作者 張德麟 2008.07.27

hō͘ in聽見，卻bē明白？
真chē人讀馬可福音四章十到十二節，lóng會產生真大ê giâu疑，因為chit段經文án-ne講：耶穌家己一ê ê時，tī伊周圍ê人kap十二使徒來問伊chit-ê比lū ê意思。耶穌就kā in講：「上帝國ê奧秘已經有hō͘恁，m̄-koh外人ta̍k項攏是用比lū，beh hō͘『in看koh看，mā看無，聽koh聽，mā無了解，若m̄是按呢，in會回心轉意，上帝著kā in赦免。』」

耶穌ê比喻m̄是beh人明白真理mah？怎樣chia講：「聽koh聽，mā無了解」neh？原來chit段話是tùi以賽亞書六章九、十兩節引出來ê。以賽亞講chit句話時，是tī失望koh痛苦ê情緒中。因為伊傳講上帝ê話，卻處處hō͘人拒絕。伊講chit句話ê真實意思是：「上帝差遣我kā真裡帶到人群中，但是不管我傳到toh位，我kah-ná一ê奉命關人心門ê人。」chit種感覺是古今先知常常有ê一種感受。

當耶穌引用chit句話ê時，耶穌kah-ná teh講：「以賽亞ê心hiah-ni̍h沉重，iá我ê感受mā是仝款ah！」所以，耶穌講chit句話m̄是詛咒，是愛心受委屈ê時所發出ê感慨ê聲。

所以chit句話m̄是講上帝beh掩蓋人ê心目，是講先知人看tio̍h 一般人對真理無反應心中所產生ê感慨！

猶太人kap撒瑪利亞人無往來
主前七二一年亞述帝國攻下以色列國(北國)，攻下後無久，亞述人將三萬以色列人搬到瑪代去，siāng時kā巴比倫、古伊、亞瓦、哈馬、西法瓦音ê人搬入來，hiah-ê無搬到瑪代去ê以色列人後來就kap chiah-ê外邦人結婚，in ê後裔就是撒瑪利亞人(chit-ê名稱是猶太人稱呼in ê，in 自稱是「保守派」、「正統人」。)

南方ê猶大國後來mā遭遇tio̍h滅國ê運命。西元前五八七年in hō͘巴比倫人phah敗，siāng時一部份人hō͘人遷徙到巴比倫，但南國chit兩個支派ê人kap北國ê人無仝，in倔強作猶太人，無 kap其他民族thàu-lām。一直到以斯拉、尼希米ê時代，當時ê統治國已變做波斯，波斯chit-ê國家有採取比較寬容ê政策。所以，猶太人會得thang tńg去耶路撒冷重建破碎ê聖殿。修整聖殿ê時撒瑪利亞人beh參加，但是hō͘猶太人拒絕。Chit件事是猶太人kap撒瑪利亞人失和 ê遠因。

後來一位猶太祭司ê kiáⁿ馬拿西娶撒瑪利亞人參巴拉(撒瑪利亞執政ê長官)ê查某kiáⁿ做某，chit-ê冤仇就加深了。馬拿西氣一ê就tī撒瑪利亞ê基利心山頂建築一座聖殿kap耶路撒冷ê聖殿對抗，這就是約翰福音四章記落下面ê話ê由來： 第九節：「你是猶太人，ná會對我chit-ê撒瑪利亞ê查某人討水lim？」原來猶太人kap撒瑪利亞人無來往。 第十九節：婦仁人講，「先生，我看你是先知，阮撒瑪利亞人ê祖先tī chit-ê山頂敬拜上帝，恁猶太人講耶路撒冷chiah是敬拜上帝ê所在。」