《Tui3台語開始》

 | | | 轉寄

聖經百科全書─搬過節

作者 張德麟 2008.08.10

搬過節 搬過節是以色列人ê一個大節日。Chit-ê節日本來是一個游牧民族向上帝獻祭ê日子，但是tùi以色列人出埃及了後，chit-ê節日就kap以色列人得救ê事hē作伙紀念lah。

照出埃及記十二章ê規定，以色列人ài tī「尼散」月初十， 也就是每年ê正月初十，選擇未滿一歲ê祭物。祭物必須是無瑕疵ê山羊á是綿羊。然後koh過十四日tī黃昏ê時將祭物殺死。殺ê時chūn，必須注意bē-tàng折斷羊骨。羊ê血必須抹tī門楣kap門框上。肉烘熟了後，食ê時chūn必須khiā-teh。而且束腰，手the̍h枴á。tio̍h緊食，無應該chhun物件。假使若有，必須將伊燒掉。所以食ê時chūn，人若尚少，thang kap厝邊作伙食。普通ê情形是每十一人食一隻羊羔。Tī chit-ê時chūn，家長有責任向年輕ê子女解釋節日ê意義(參考出埃及記十二章三四、三九節)。

講到參加ê人mā有規定，見若是滿十二歲ê以色列男子lóng ài參加，婦女kap已經受過割禮ê外國僑胞mā ē-tàng參加。但無清氣ê人，應該tī後月十四日補過。耶穌ê學生所食ê最後晚餐，照馬太、馬可、路加三本福音書ê作者kā咱講，就是搬過節ê晚餐。保羅就根據chit-ê kā咱講，耶穌是搬過節ê羊羔 (哥林多前書五章七節)。伊ê死，是為tio̍h贖咱ê罪愛chiâⁿ做祭壇上ê犧牲。