《陳雷文選》

 | | | 轉寄

放帖

作者 陳雷 2007.12.23

阮bân叔a以早tòa tī草地關廟hia，作人上蓋土直，一tō是一，bē曉khi-khiau計較。若是作sit上蓋gâu種綠竹á筍。普通時無啥teh出門，罕罕有來市內，攏會功夫kōaⁿ一籠筍á來相送，講：“無啥tah。Che家己ê tah。早起現割ê tah。”Hia ê gín-á有時會學伊講：“Bân叔tah，你che筍á tah，上蓋好食tah。”成實he筍á鮮koh tiⁿ-but，市內買無這款ê。五十出頭tō來過身去，阮老母定定唸：“冤枉lah，草地人一tō是一，成實hiah刁直。” 這項代誌尾a tī龍崎、關廟傳成久，迷信ê人講kah一大堆，有影koh有跡。M̄-kú無信ê人也真chē，講he無啥，攏是咱人家己想出來ê，pháiⁿ運tú-chhiāng著ê niā-niā。

阮三叔大漢後生水盛a hit年teh beh chhōa某，親成大妗介紹ê，代誌khah chē he狗毛。查某gín-á台南女中畢業，叫作淑娟。In tau tī民權路開布店。聽講生作koân-koân lò-lò，鼻á直直，bē輸美國阿tok á電影明星，外súi tú外súi leh。M̄-kú我m̄-bat親目看過。Hit chām盛a tú-chiah作兵轉來，看了一下 tō kah意，無外久tō問名、kōaⁿ定。盛a人kut力，ta̍k項代誌家己hoat-lo̍h，親成、朋友一位一位去放帖hēng餅。娟a mā tòe去，講起來，這點市內人有khah開化。聽講hit暗到五姑hia ê時已經òaⁿ-òaⁿ ah，五姑講：”Ai-ioh，盛a，你thái chiah功夫，一chōa路chiah hn̄g，你也專工來。” 看娟a生作súi koh iû-ia̍h，歡喜叫in入去坐。盛a kā帖á kap大餅hēng了，lim一嘴茶tō beh走。姑丈講：“Koh坐lah，敢有beh趕啥？”盛a應：“姑丈，今á日阮chēng透早出門，到chín tú-tú走一工無停腳。猶chhun一位猶未去。”姑丈問：“按呢nih？Tó一位猶未去？”盛a講：“Hioh lah，bân叔a hia lah。上蓋sòa尾lah。分hō͘了通轉去歇睏。” 姑丈應:“若是bân叔hia，關廟順路lah，chia去無外hn̄g。”盛a騎一台o͘-to͘-bái紅phà-phà，娟a坐tī後面相載。離開龍崎ê時，天開始sap-sap落雨。五姑吩咐講：“Teh落雨ah，咱chia山路滑溜，ta̍uh-ta̍uh-á駛。” 盛a應：“會lah，五姑、五姑丈，時到hit日會記得來hō͘阮請。” O͘-to͘-bái催leh tō走，有聽he盛a teh hoah：“來去！趕來去！”。


M̄知到底怎樣，in òaⁿ-òaⁿ離開龍崎，聽講到bân叔hia ê時，已經天beh拍phú光，雞猶未啼。Bân叔a āiⁿ一枝鋤頭，tú beh去園裡作sit。看in來，叫:“盛a，ah你thái chiah gâu早tah？”盛a應：“Ah tō ùi五姑hia來。”Kā看，僥倖a，規台車掛人攏是路糊á moâi，問：“Ah是按怎tah？全全土tah？”盛a應：“落雨路滑，去hō͘ chhu去。Tō是按呢chhiân到chín｡”叫入去厝內，the̍h巾á hō͘ in拭身軀。盛a the̍h帖á kap大餅hō͘ bân叔。Bân叔講：“恭喜tah，ah tiâng時beh chhōa tah？”“後個月lah” Bân叔歡喜，指娟a講：“恭喜tah，新娘súi tah。” Tō是話講了chē，問題出tī chia！Taⁿ he娟a市內gín-á m̄-bat聽人講話chia tah hia tah，起愛笑，代先lún-tī心內，尾a擋bē tiâu，chhi̍h一下大聲笑出來，ki-ki叫笑bē soah。Bân叔聽伊笑，才斟酌kā看，ai-ioh-ôe，thái會大細hīⁿ tah！無彩一個súi查某gín-á，一旁hīⁿ á若柚á bān，另外一旁若柑á bān。Tō是草地人土直，he hīⁿ á指leh hoah講：“心適tah，大細hīⁿ tah。”mā是擋bē tiâu，笑kah哈哈叫。二個人tī hia你笑我，我笑你，lú笑lú大聲。He娟a笑kah bē輸猴teh吱，強beh無khùi，雄雄起變面，tiām去無koh笑，二蕾目睭青gîn-gîn，受氣掠bân叔a一直chîn。Bân叔a驚一tiô，soah bē笑。Tú好這時埕裡chhio雞啼，二個少年ê雄雄peh起來，面色白死殺，講：“阮taⁿ緊來去。”行到門口，無張持盛a oa̍t過來，kā bân叔a講：“時到hit日tio̍h會記得來hō͘阮請…。”Bân叔a應：“定著去tah！定著去tah！”雄雄手骨會痛，kā看，盛a一枝手白死殺，冷ki-ki若冰，出死力kā伊掠ân-ân m̄放。He手骨soah teh流血水，bē輸鬼á jiàu著，身軀起畏寒phòng雞母皮。

這時bân嬸a ùi內面出來，問講：“煌a，ah你笑kah chiah大聲，是kap啥人teh講話？”Bân叔指埕裡，“盛a kap娟a tah。專工來放帖tah。”Bân嬸看he埕，幾隻雞á teh chhéng食，thái有啥物人，罵：你是teh看著鬼！也無半個人。…敢是家己kap鬼teh講話。“話講soah，埕裡chhio雞ia̍t一下si̍t，又koh啼。Bân叔a看hit二個少年ê青青狂狂o͘-to͘-bai騎leh，ia̍h一下手tō無去，kā bân嬸a講：“雞teh啼tah。去a tah。”

Liâm-mih厝內電話giang，龍崎五姑丈khà來ê:“煌a nih。講hit lō ho͘ⁿh，盛a kap娟a o͘-to͘-bái péng車lah…”“Hioh tah。Tú-chiah有來tah。” “Tú-chiah？Tú-chiah tiâng時？” “天beh光進前tah。雞啼tō走tah。” “天beh光hit陣？你是看tio̍h抑是m̄ tio̍h?” “Tio̍h tah，來hēng餅tah。路滑去hō͘ chhū去tah。Chhiân到chín tah。規身軀全土tah。…人nih，人攏無按怎tah …ôe?…ôe?…。” 驚一下電話chôaⁿ按呢掛斷去。Tō是這日透早三叔ùi台南有拍電話去五姑丈hia，講盛a，娟a昨暗車禍過身去。半暝警察叫去認屍。O͘-to͘-bai péng tī山路邊a，離龍崎無外hn̄g hia。二個siak kah規身軀血，死tī現場。

雄雄吱一聲，厝kòa beh péng去。Bân叔電話放leh，chông去看，taⁿ慘a，bân嬸a面á白死殺，khiā tī hia腳手phi̍h-phi̍h-chhoah，話that tī nâ喉頭講bē出來。一土腳紅ki-ki，攏是血。HiahN一tiô，土腳巾á khioh起來，血chhauh-chhauh tin，hoah：“Tú-chiah hō͘ in拭路糊á moâi tah，ah thái紅ki-ki tah，全血tah？”

根據派出所調查ê記錄，hit暗落雨，山路滑，o͘-to͘-bái駛離龍崎出去無外hn̄g，猶未到關廟hia tō péng車，cheng著大樹。二個cheng kah規身軀血，死tī現場。

Bân嬸著驚，m̄敢kā厝邊頭尾講盛a來放帖ê代誌。Ta̍k日家己去廟裡燒香拜拜，kā盛a、娟a講好話，燒足chē金hō͘ in。過一chām了後，tō也ta̍k項代誌平平，人好好，sit頭照作，bân嬸a才lio̍h-lio̍h-á定著安靜落來。

Hit一日bân叔早早去園裡，割一堆竹筍，裝裝作一籠。豬tiâu修理一半，雄雄家己唸：“我taⁿ緊來去tah”Tō去換一su西裝，穿一雙皮鞋beh出門。Bân嬸看了龜怪，問：“Beh去tó?”Bân叔a kan-na直直唸：“我taⁿ緊來去tah。”作伊行去隔壁火a hia，大聲叫：“火a，taⁿ咱tio̍h緊來去tah。”火a駛一隻tho͘-io-tah ê細隻tho͘-la-khuh，ta̍k日載咱關廟ê青菜去市內，問伊：“煌a，beh去市內nih ？”Bân叔無應伊，一籠竹筍giâ上車，peh起tho͘-la-khuh坐。路尾警察阿泉去現場調查，有詳細記錄hit個經過。講tho͘-la-khuh也m̄是駛外緊，離關廟出去無外hn̄g hia ，ùi車路衝出去，cheng著大樹。M̄知cheng著tó位要害，無流血，也無破皮，bân叔西裝穿齊齊，一仙人好好坐tī車裡，現場死去。火a講是一隻紅色ê o͘-to͘-bái駛足緊，m̄知ùi tó來，雄雄對面衝來，一個少年家載一個查某gín-á tī後面。Tō是beh閃he o͘-to͘-bái，tho͘-la-khuh soah chông出去，cheng著大樹。O͘-to͘-bái無停落來，phiû leh作伊去。結果警察mā chhōe無tio̍h，不而過，阿泉普通時kap bân叔、火a攏有熟sāi，看伊這日西裝、皮鞋穿齊齊，感覺龜怪，身軀kā巡，lak袋á內底摸著一張帖á，tō是盛a、娟â ê結婚請帖。看he好日，咱人八月初十，一日to無差，對對tō是hit日。

所以真chē人迷信，講hit日bân叔a穿súi-súi，tō是趕beh去盛a、娟a ê婚禮，beh去hō͘ in請。盛a用o͘-to͘-bái來kā伊載去。前a，盛a、娟a趕beh去bân叔hia放帖，猶bē放tō來tōng車死，tō是按呢m̄願死心，隔轉早雞啼進前，二個身魂專工koh拚去bân叔in tau，帖放了才走。Koh特別吩咐，kap bân叔約：“時到hit日tio̍h會記得來hō͘阮請。”Bân叔mā有答應“定著去tah。定著去tah。”阮老母定定khioh起來講，tō是這句話上蓋關係。Bân叔a人直，講一tō是一，bē曉變khiáu。有人鐵齒無信che有ê無ê，koh敢講sńg笑：“昆煌a算bē hô lah，專工走去到hia食這頓。”

阮三叔、三嬸迷信，mā有可能是疼kiáⁿ ê關係，尾a kap新娘頭參詳，kā盛a、娟a ê墓sóa作伙，準翁á某hit款禮數kā in安tâi tī關廟口hia。聽講關廟、龍崎hit tah ê人，會記得bân叔a收帖á ê時，笑人大細hīⁿ ê代誌，後來若是新娘生作有小khóa khiap-sì ，查甫、查某攏khiàn-sńg，無人敢koh khioh起來lām-sám講。