《陳雷文選》

 | | | 轉寄

荔枝大出ê時陣

作者 陳雷 2007.12.02

1)

He捷運ê電車tú-chiah iⁿ-ò͘ⁿ iⁿ-ò͘ⁿ 駛離車站，月臺hit頭chhun伊一個人。起先無看著伊ê面，因為伊頭chhih-chhih，顧看土腳，概成teh chhōe啥物。M̄-kú he健美ê形體若吸石kā我吸leh，我變作一尾ia̍h-á hō͘大蕾芳味ê牡丹siâⁿ óa 去。電車又koh入站來，伊跳上車，車門tō關起來。這時伊才gia̍h頭起來，tú好有影著伊ê面。我無張持gāng-gāng kā伊ia̍t手，伊mā kā我ia̍t，kheh tī車門內底，長長ê頭鬃á尾pa̍k一條紅phà-phà ê li-bóng。He車iⁿ-ò͘ⁿ iⁿ-ouN3koh起行，月台chhun我一人。我頭chhih-chhih，學伊土腳chhōe。成實tī pùn-sò筒hia有一粒金金，我假無意pa̍k鞋帶，ku落去kā耳鉤khioh起來，koh有掛一粒細粒真珠。

隔轉日早起伊又koh tī hia，穿一領水紅ê té-ńg衫，白色半通光ê百景裙。Tòe伊kheh上車，ùi士林站到雙連，伊攏無oa̍t頭過來，大概tèⁿ m̄ 知？Tòe伊落車，伊koân屐á khī-kho̍k khī-kho̍k直直行，明明是teh趕時間。街á路三oat四oat，oat入去一間店內。

店面一枝鐵門，khang-páng有五個紅字“茵娜委託行”。伊khiā tī櫃臺後面叫：“歡迎光臨”，kā我行禮。The̍h siah-chuh出來hō͘我看，講：“今á日一律拍五折。”我無注意teh聽，kan-na看伊現光ê肩胛kap手骨，he皮膚光生（siⁿ）koh幼mī-mī，若通光ê hûi á。Khiā óa去，身軀koh有牡丹ê芳味…，我chhìn-chhái kéng一領siah-chuh kap一條拍花ê neh-khuh-tái。“攏總一千八百五十khì …”伊最後笑一下，我耳鉤bē記得還伊tō精神起來a。

普通時真少作夢，連續二工作這個夢，koh頭á尾ta̍k項記kah chiah詳細，也是真龜怪。拍電話去查，成實有一間“茵娜委託行”。這日，專工ùi士林坐捷運去雙園，tòe夢裡ê路三oat四oat，chhōe著hit間店。Khang-páng寫紅字，鐵門已經拍開a。我入去店內，櫃臺後面一個查某gín-á teh叫“歡迎光臨”，kā我行禮。Kā看，細細漢電khiû頭鬃，koh m̄ 是夢裡hit個。“先生，今á日一律拍五折。”伊the̍h siah-chuh hō͘我看，我問伊：“恁店裡敢猶有另外一個小姐？”伊搖頭，概成無啥歡喜我ê問題。“頭鬃留tn̂g-tn̂g,pa̍k一個紅li-bóng hit個。”“麗蕙ìh?”伊koh搖頭，“前幾工tú-chiah辭頭路，無tòa a。”我chhìn-chhái kéng一條neh-khuh-tái。“你敢知影伊sóa 去tó 位？”伊tiām-tiām，大概對我生份無信心，知影mā m̄ kā我講。我ioh是按呢生。

以後無koh作這個夢。最後這學期，教阮天文物理ê是一個少年姓范ê教授，聽講是美國phuh-lin-su-tun(Princeton) tú-chiah轉來ê。伊上愛講這個論理：“根據量子力學ê理論，宇宙是多數ê，m̄ 是單一ê。Tī hia ê算bē了ê多數ê宇宙中間，有可能有一個宇宙kap咱這個仝款仝款，…m̄-kú in中間時空ê距離實在太大太hn̄g，互相交流相遇ê機會會使講是零。…”Tō tī烏pang頂koân 寫一大堆公式數字，證明hō͘阮看。我感覺這個理論是純數學演算ê結果，若beh算作是創造者hō͘咱ê一個基本現實，實在是sa無niau-á毛，khah想to想無lah。

畢業了，hō͘人派去高雄大崗山基地作炮兵。因為阮讀物理ê khah會曉算炮彈發射ê導線。Hit個禮拜日，部隊放假，我坐一隻野雞á車轉去台南阮tau。Tú-chiah上公路無外hn̄g，野雞á pōng 車，車lián phàng-khuh。運chiàng操一句“駛恁…”，公路邊tō停落來。Hit chām咱南部荔枝當teh大出。路邊樹á腳一擔賣荔枝ê，插一支牌á:“現挽荔枝，一斤12 khì。”阿婆看有人停車，tō hoah：“買荔枝來。…現挽ê，無tiⁿ m̄免錢。”Kā看，láng-á底chhun二把，koh一大堆落米á，kap阿婆仝款ta-pó͘ ta-pó͘。“Chhun chia ê貨底？”我kā嫌。阿婆phùi一嘴檳榔，大聲應：“內面猶足chē leh。Che家己ê，hō͘你買bē了leh-lah。”隨tō 手機á the̍h出來khà:“Ôe，Lēng a，a̍h你m̄叫恁阿姊hit láng荔枝khah緊先車來。”Tu椅頭á叫我坐，koh at一oe荔枝hō͘我，講：“試看māi 。Liâm-mih來。”我pháiⁿ勢走。看運chiàng ku tī土腳，車lián猶未換好，樹á腳坐落來bóng等。

“來a！來a！”無一bān-niah阿婆hoah。成實一隻細隻紅thì-la-khuh ùi公路hit頭chông來，hut一下停來tī樹á腳。駛車ê koh是一個查某gín-á，戴瓜笠、包面巾、帶手siū 、koh lông 手lông ，包kah一大堆密密。伊ùi thì-la-khuh後面lêng一láng大大láng ê荔枝落來。Láng-á拍開tō 問：“Beh幾斤？”

注意kā看，he面若pha̍k日ê牡丹紅hóaⁿ 紅hóaⁿ，thài會面熟面熟？荔枝秤好，我the̍h錢hō͘ chāu。伊oa̍t頭叫：“母a，你一千ê有通chāu無？”阿婆the̍h錢來chāu，吩咐講：“你先轉去kā Lēng a鬥腳手。”這時伊kā我笑一下，oa̍t頭tō 行。我看伊去，he健美ê形體若吸石kā我吸leh。我頭殼內若kan-lo̍k se̍h lin-long，趕緊直直想，tī tó位bat遇過？雄雄才想起以前hit個龜怪ê夢，有一個頭鬃á尾pa̍k紅li-bóng ê查某gín-á!足緊jiok óa去，問伊：“你敢是bat去tī台北？”…“你敢是bat tī台北ê委託行作--過？”伊停腳落來，目睭chiah大蕾kā我chîn,雄雄瓜笠the̍h掉，he頭hàiⁿ一下，規頭殼烏sìm-sìm ê頭毛落來到肩胛頭，頭鬃á尾pa̍k一條紅phà-phà ê li-bóng ，我驚一tiô，hoah一聲：“麗蕙！”伊概成也無意外。“是你ìh?穿che兵á衫攏bē認得。”雄雄伸手kā我ê肩胛chang leh：“你是按怎無納錢tō走？！”“無納錢？…我tú-chiah一千khì hō͘你chāu a”“攏總一千八百五十khì｡”“A̍h m̄ 是一斤12 khì?”伊搖頭，“He siah-chuh kap neh-khuh-tái ê錢。Tī台北hit 間委託行…”“我…我…”我一身軀肉phi̍h-phi̍h-chhoah，伊…伊是啥人？…伊…thài知影he siah-chuh kap neh-khuh-tái外chē錢？Thài會知影我夢--裡ê代誌？“你害我hō͘頭家娘辭頭路。”伊瓜笠á戴起lih，ná講ná發車。Hit隻舊舊ê Nissan thì-la-khuh khu̍h-khu̍h-khu̍h嗽幾偌聲，chhèng一bông ian-ia tō peh上公路去a。

“Oeh，少年ê，好行a。”運chiàng車lián換好勢a，坐tī車內kā我hiu。我行óa 去車邊，jîm一把車錢hō͘ 伊，“你先去。我到chia tō好。”“台南m̄去a？”“M̄去a，我chia有代誌。”

2)

所以今年荔枝大出ê時陣，我專工chhōe這副有掛真珠ê耳鉤送伊，心內不時感謝這二冬ham伊作伙ê祝福。Kā伊掛耳鉤ê時，伊細聲問：“你敢會記得咱第一回tī hia相遇？”“Thài會bē記得？！Tī公路邊樹á腳kā你買荔枝，一斤12 khì，離大崗山koh出來hia。…”伊搖頭：“Koh khah hit個進前，上蓋第一擺。”我tiām-tiām無應。伊身軀the óa來，耳鉤tīn-tōng hàiⁿ，目睭chiah大蕾咬我ê目。“你成實bē記得？”我搖頭。“Tī士林捷運hit個車站。我tī月臺hia teh chhōe 耳鉤。”Ah！Hit回，hit回第一擺我夢著你，你thài會知影？你敢會tī你ê夢裡也作kap我仝款ê夢？攏總二擺。Che是啥款ê緣份leh？我知影伊會講，che是命運注定ê，m̄-kú命運是啥貨？或者像大學上尾年hit個美國phuh-lin-su-tun轉來ê教授講ê，事實有幾偌ê宇宙，tī chia ê滿億滿萬算bē了ê宇宙中間，有另外一個kap咱這個宇宙仝款仝款。…是m̄是雖然in離開真hn̄g真hn̄g，mā有時oan-nā會相遇、時空交流？Hō͘咱經驗著，bē輸親像teh作仝一個夢？

“你實在kāu面皮。”伊liàm我ê面皮。“按怎kāu面皮？”“成實hit二láng荔枝攏總買！”“害我一lak袋á錢開kah ta-ta。”我gīm伊ê雙手燒hōng-hōng 。“無按呢你ná會koh轉來？”伊mā gīm我ê雙手燒hōng-hōng 。“害阿母手機á直直khà，講hit個阿兵哥荔枝食了好食，beh總買。叫我趕緊koh挽二láng去。”“我tī hia等你等二點鐘。”“我挽荔枝挽kah手破皮。”“我食荔枝食kah pak肚痛。”我kā伊身軀mo͘h leh，二人the tī古古古干烏（kan-o͘）ê火山石，看熱人ê恆春kap恆春尾ê大海。

這時海風一陣thàu，海鳥tòe風chhèng koân起lih，si̍t thí開tī頭殼頂ì-ià叫。阿麗óa來tī耳á邊，微微á笑，講：“我昨暝昨一個夢，…”