《陳雷文選》

 | | | 轉寄

面會

作者 陳雷 2007.11.04

我想這回設使m̄是坐hiah暗班ê飛機，大概tō bē去遇著這件代誌。總是tī Vancouver等候轉機ê時，已經是半暝過後，規個機場空lòng -lòng，無幾個人客，khih-mo͘h-chhih有khah稀微。另外tō是hit時我已經真thiám ah，愛睏神tîⁿ leh，頭殼bē清楚，che難免也是一個緣故。

這時機場內面ê店攏關ah，飛機ê時間猶真久，無別位通好去，所以原在gōng-gōng-á kā坐，ka-pi khoaⁿ-khoaⁿ-á lim。

無tāⁿ-kìⁿ有眠去一時a，tiâng時伊入來隔壁hit頭坐，我mā m̄知影。不過，第一目我tō有一個chheⁿ-chhìn 龜怪ê直覺，伊ê人氣質無仝。M̄-kú看起來koh面熟，m̄知tī tó位bat見過？大嘴ka-pi lim落去，mā猶koh想無。

伊穿一su tah身ê phòng紗，藍海軟布ê短裙，長長ê烏頭鬃，水水ê紅胭脂，真是青春氣味，摩登小姐ê打扮，mā是家己一個坐tī hia lim ka-pi。Liâm-mi the̍h一枝薰出來beh suh，我用手勢kā伊比，伊概成m̄知影我ê意思，或者有誤解我ê意思，soah peh起來，行按我chia來。我講：「No Smoking。」Koh比罰金1千kho͘。伊笑一下，薰chhòng掉，chôaⁿ大方tī我對面坐落來。

看起來kap我仝款，是teh等che暗班ê飛機。「你beh轉去台灣？」伊tìm頭。「Tòa tī加拿大？」伊搖頭。「來chia chhit-thô?」Koh搖頭，這時笑神變無去，sīm一下才講：「來chhōe人。」

「你tòa tī加拿大？」我tìm頭。「去台灣chhit-thô?」我搖頭。「南鯤鯓開會。」伊歡喜一下講：「南鯤鯓，離台南近近a niâ。」「你tòa tī台南？」「公園路hia。」我歡喜一下，「阮tau以前mā tī公園路。」「Hit條大溝hia，夜婆洞ê對面。」我驚一tiô，tō是阮舊厝ê隔壁邊，chit-má遠東百貨公司ê對面。

「你tī加拿大真久ah ho͘ⁿh？」「30外冬ah。」「作啥事業？」「作醫生。」「醫生上好。」「你tī台灣作啥代誌？」伊停一時á ，想想leh講：「我拚車。」「拚車？！」我叫是聽m̄-tio̍h，koh問一擺，伊tàm頭。「拚車chhit-thô。 」 我知影有一chām，台灣ê少年時行拚車，mā有按呢teh poa̍h輸嬴。M̄-kú這個長頭鬃，穿短裙，斯文摩登ê小姐thái也會拼車？敢是無聊teh kap我講sńg ê。

「拼啥款車？」 「O͘ -to͘-bái。光陽150cc，時速200公里。」聽起來概成真內行，我知影hit陣，o͘-to͘-bái大台ê政府不準進口，in拚車攏用細隻ê去改裝。「真危險ho͘ⁿh？」「Bē lah。」「戴安全帽á ho͘ⁿh？」伊起愛笑。「你外行，那有拚車戴帽á ？Beh拚會贏？」koh講：「Thǹg赤腳lah。」「Thǹg赤腳拚車？」伊目睭微微，一枝指頭á tuh天：「Kā你講一個祕訣。Thǹg赤腳，伊tō kā你保庇。」這款講法我kan-na tī小說內面bat讀過。「真刺激ho͘ⁿh？」「Heⁿh ah。」「你拚車敢bat出過代誌？」

伊想想leh，講：「Kan-na一擺，tī健康路hia…」這時伊若像迷去，無張持目睭神神，嘴裡tuh-tuh念：「…大隻BMW chông過來，刁工ê lah，阿良hō͘伊cheng一下chhū出去，cheng著電火thiāu，o͘-to͘-bái áu作二koe̍h，…」lú 念lú 細聲，目睭釘leh，bē輸teh kā 我念chiù。我頭殼起gông，耳空ki-ki叫，無koh聽著伊teh講啥。現現目前出現一個大車禍ê現場，足chē人teh看鬧熱，tō是「飛車女」拚車ê結尾，10年前我寫ê hit篇小說。Hit個thǹg赤腳ê查某gín-á，cheng一下按o͘-to͘-bái siak落來，péng二liàn，chiⁿ著電火thiāu，規身軀攏血，倒tī土腳，m̄知人去……。Tī hia看鬧熱ê查某人ná看ná罵：「夭壽o͘h！你看he 17、8歲查某gín-a，倒按呢，雙腳開開看現現，一領裙lek hiah koân，敢成實會看得？！」

「阿…英…」我手尾a la̍k-la̍k-chhoah，按呢細聲叫出來。「Tio̍h lah。Tō是阿英lah。」伊tàm 頭，雄雄身軀phîn óa來，目睭chiah大蕾問我：「你thái會知影？你thái會知影阿英？」「我…我知影這篇小說『飛車女』…」「He tō是我！He拚車ê飛車女tō是我lah！」親像學生gín-á考一百分hiah興。我注意看伊ê面，伊ê身軀kap腳手，lú看lú成，原來tō是hit個ùi佳里去台南，chhōe無頭路，kap阿姊去拚o͘-to͘-bái ê飛車女阿英！

Hit個掛目鏡ê查甫學生gín-á 跪tī伊ê身邊，出力ji̍h伊ê胸坎，青狂 teh kā急救。圍tī邊a teh看ê人，一人一嘴，chèⁿ來chhèⁿ去：「He死a lah，猶teh ji̍h啥？」Hit個gia̍h拐á ê老人khah有自信，用手裡ê薰吹指土腳ê阿英：「Kan-na看he血流hiah chē mā知影，he無ah lah。」遠遠警察車ê風螺lú tân lú 大聲，無張持hit隻白狐狸ê o͘-to͘-bái 火燒chhèng koân起來，pōng一聲作一下爆炸…

阿英撞死ah，故事ê結局是按呢寫ê，我明明會記得。Chit-má伊thái會來tī chia ，kap我teh講話？概成伊知影我心內teh想啥，續落講：「撞一下m̄知人去。險險死！」但是hit二個葬儀行ê運轉手已經kā伊kap阿良扛起lih車頂，hit個棺材形ê死人車載走去，thái會koh無死？我擋bē tiâu，一時倉pōng大聲hoah：「A̍h明明撞死ah，thái講無死？」伊無應，雄雄變面，春天ê面色作一下loa̍h無去，像冰凍死去ê人坐tī我對面。Lú想lú m̄-tio̍h ，一陣一陣陰thim ê冷氣對我ê面衝來，我身軀起ka-léng-sún ê雞母皮。

足久伊才問：「你真知？…你敢有真知？」我受氣應伊：「He故事我寫ê，我thái無真知？」伊大笑：「你寫ê?你tō是陳雷？」He笑聲尖koh利（lāi)，牽kah ló-ló長，像受苦刑ê犯人teh哀叫，tī闊long-long ê機場內面se̍h ling-long，走bē出去。

「你thái寫我死？你是按怎一定beh寫我死？」伊大聲問。「我…我…」「你怎樣寫我倒tī hia，雙腳thí開開，裙le̍k hiah koân，現現hō͘人看？」「我…我…」「我m̄是hit款ê pháiⁿ查某gín-á，你thái beh kā我寫按呢？」我一時應bē出來，為啥物beh按呢寫。雖然he kan-na是一篇小說，m̄-kú內面ê人物攏親像是我艱苦親生ê。我m̄是beh侮辱伊，mā m̄是準伊作小說內面一個方便ê角色，一個無血無肉ê人物niā-niā。我是按怎beh寫伊死？Hit當時mā m̄知影。是m̄是因為hit個拚車ê社會暗中要求伊死，期待伊去死？Hia ê真chē看鬧熱ê人攏teh等伊，等beh看伊撞車死ê刺激？Hit個o͘-ba-sáng mā teh等，等伊出事死ê時，通得著贏大家樂ê名牌？Hit二個葬儀行ê運轉手mā teh等，因為in是作搶死人ê生理。我照in ê要求按呢寫出來。

但是chia ê理由我無講出來，因為我無確實，可能是借口niā-niā?「你攏無想著我ê老母，我ê阿姊，in攏想講我死去ah…」Tō是為著這篇10年前ê小說，in teh受苦，伊teh不平。所以專工家己一人ùi台灣來加拿大chhōe我？Beh kā我講伊無死，伊m̄是hit款ê pháiⁿ查某gín-á？

「你tō是陳雷？」伊koh一擺足正經按呢問我。我tàm頭，伊受氣講：「你寫小說mā是tio̍h ài負責任！」Che我知影，對我ê藝術感kap人生觀負責任，其他敢猶有啥物規則leh？是m̄是另外猶有對社會ê責任？我想beh kā說明，寫「飛車女」ê經過，雄雄伊等bē tiâu khiā起來。「你若有時間南鯤鯓開會了，拍電話hō͘我，我chhōa你來台南chhit-thô。」我the̍h筆kā伊講ê電話番寫起來，244-3838，chhoah一tiô，he尾a 6字tō是「飛車女」內面hit隻白狐狸o͘-to͘-bái ê車牌，hit二個o͘-ba-sáng teh等ê大家樂ê號碼。趕緊gia̍h頭起來，伊已經踏koân屐á ê腳步行遠遠去ah。

班機ê時間到，我peh上飛機，規路tī機頂睏bē去，注意kā chhōe，頭到尾攏無看著阿英。

Tī南鯤鯓開會ê中間，我一直考慮這個問題。尾a hit工，照伊hō͘我hit個號碼拍電話去，一個老查某人接。「喂，請問阿英有tī leh無？」「你是啥人？」「我伊ê朋友lah。」停一時a，概成足久，老查某人才應：「A̍h 你m̄知影阮阿英過身去ah？」「O͘h…」「成久ah lah。Beh10冬ah。」「O͘h…」「車禍lah。市內kap in姊a去拚O͘-to͘-bái…」「O͘ h…」「Ah你chiah久ah，chhōe伊beh chhòng啥？…ôe …ôe …」雄雄我頭殼起烏暗hîn，耳空內chhi-chhi chhā-chhā、無停ê、ki-ki叫ê電話聲…。