《陳雷文選》

 | | | 轉寄

母ôe Kiáⁿ ôe

作者 陳雷 2007.03.11

講著生kiáⁿ這項代誌，古早人一 生十外個，chhìn-chhái飼chhìn-chhái大，m̄免操心計較。現代人生一個kiáⁿ，頭khah大天，按細漢換尿chū-á la̍k屎尿，到大漢讀冊、chhōa某生kiáⁿ，心神m̄知攏總用幾 tho͘-la-khuh。

這個黃太太莉莉生kiáⁿ，頭先tō早產koh破pak。莫怪生出來kiáⁿ ôe惜命命，ta̍k項細字ta̍k項驚，tō是咱講ê生一個金kiáⁿ鑽石kiáⁿ，號名博koh強。佳哉無事飼到五歲大，看人gín-á teh讀冊，tō kā翁講：「咱博強來去hō͘讀育幼班，按呢早人一步。」Tú好離厝無外hn̄g有一間『天才育幼班』，tō是幼稚園ê預修班。黃太太chhōa博強去報名，育幼班ê頭家娘徐太太問伊一kóa問題，也tō是入學考試。黃太太應：「阮博強六個月會坐，七個月會爬，----」徐太太歡喜講：「按呢這個gín-á有天份！人普通是七坐八爬九發牙----」Tō hō͘伊報名天才育幼班，一禮拜三工，教in唱歌、chhit-thô kap念1、2、3、4 -----A、B 、 C、D----。一期soah，徐太太iap-iap-á kā黃太太nauh：「Che我kan-na kā你講，咱這個育幼班若是有拍分數，恁博強第一名。」黃太太歡喜起毛giang，四界kā人弄揚（lāng-iāng)：「阮博強天才班畢業第一名。」Tō hō͘伊續落去tī hia讀天才幼稚班。

過來九年一貫，讀國小、國中，成績平平，平均七十外，kan-na數學khah好，有時也有九十分。徐太太講：「這個gín-á數學有天份。」hō͘伊補數學先進班。Tō是徐太太這個天才補習班，比咱普通學校khah厲害，in是11年一貫，ùi育幼班到國中三年ta̍k科有。博強tī hia補數學，koh補物理、化學、國文----，soah差不多bē輸一個gín-á讀二個學校，規工上課補習，讀kah m̄知日時暗時，一個身體soah來拍損去。

起先是早時beh去學校頭殼tō會hîn，pak肚會痛，過來不管時nā緊張tō pak肚痛，痛了厲害也tio̍h去chông便所，一日幾nā擺。一個gín-á soah若像au kiâm菜，黃酸pó͘去。黃太太莉莉煩惱，chhōa伊去看醫生，七驗八驗，ta̍k項攏正常。醫生kā老母講：「Che gín-á身軀無病，kan-na是心理有問題。」「精神病o͘h？」「心理壓力siuⁿ大，影響著胃腸。」黃太太bē理解，講：「A̍h to規日kan-na讀冊補習，也無teh煩惱啥，beh thài有心理壓力siuⁿ大？」無beh信，chhōa去看中醫。He中醫gâu kah若仙，節一個脈，叫gín-á舌á thóng長長hō͘看，tō講：「冷身lah ！」Che冷身、熱身ê道理黃太太顛倒聽有，應：「Tō是按呢lah。熱（joa̍h）--人不時teh chhiâng冷水。」中醫仙講：「我chhòng幾帖khah熱(jia̍t) ê kah你補。」吩咐冷ê物m̄通食。買三帖黃花、田七、川芎、烏首----，包包一大包，the̍h轉去choaⁿ hō͘ kiáⁿ lim。凡是芋頭、旺梨、蓮霧---摸tio̍h冷冷ê物攏禁食，mā bē使chhiâng冷水洗浴。He gín-á lim黃花、田七、川芎、烏首---ê藥頭á，一大碗公烏烏若洗土腳水，苦te̍h-te̍h koh澀ta̍p-ta̍p，tok強lim落去，未到nâ喉吐吐出來，一擺tō叫m̄敢。過來pak肚痛，m̄敢chhī-chhn̍gh，恬恬á lún leh，等老母無看ê時去chông便所。In老母想，ôa，che藥chiah好用，一帖tō斷根。

總是咱人這個心理ê壓力若m̄是ùi pak肚下面hit空tháu，tō是按頂面這空出。Taⁿ這個gín-á chit-má下面hit空that leh m̄敢tháu，a̍h tō換ùi頂面這個嘴空來。見若緊張chheⁿ-cho̍h，tio̍h chhōe食ê來that嘴空，才會定著。Tō是按呢，不時hit個嘴無êng食東食西，kap in老pē仝款，食kah大大kho͘。老母看gín-á gâu食koh會大，想講是有勇身，心內歡喜。 九年一貫讀soah，兼11年一貫補soah，考tiâu台大經濟系。四冬大學畢業，好頭路pháiⁿ chhōe，又koh人大kho͘免作兵，老母講：「去美國留學。」報名加州hit間m̄知啥名ê大學，讀企業管理碩士。老母原在對補習有信心，叫伊暑假先去報名碩士預修班，補起來khǹg。講來徐太太可取，tòe社會進步，chit-má幾nā年一貫，世界第一先進，連碩士補習班也有。

Taⁿ博強去美國留學，黃太太m̄甘kiáⁿ，美國、台灣二位走。三個月tòa美國顧kiáⁿ，三個月轉來台灣看翁，問題tō是tī chia。伊若三個月tī台灣顧翁，he kiáⁿ家己一個tī美國無老母吵，心情輕可，無koh不時食東食西，人tō sán落去。He老母三個月了來美國看kiáⁿ，害a，若雞kui-á消風，pò͘去a。罵in kiáⁿ：「大人大種a，連一個食也bē曉！」He kiáⁿ看老母轉來，又koh緊張，tō烏白食又koh肥身起來。Taⁿ三個月kiáⁿ顧好，轉來台灣，害a，he翁kap kiáⁿ仝款，無某人輕鬆，食睏正常，人也sán落去。In某罵：「大人大種a，連一個食也bē曉，ta̍k項攏tio̍h我一個。---」三個月又koh翁keng肥肥。Tō是按呢，bē輸台灣、美國雙頭pûn雞kui，這旁pûn好phòng起來，另外hit旁tō消風naih落去。可憐黃太太，這頭chông過來，hit頭chông過去，雙頭食肥走sán，一個人也bē得分二身，真是氣身惱命。

終其尾to也碩士讀soah，轉來台灣，老母替伊chhōe一個好頭路。黃太太in阿兄黃總台tō是奇蹟投資集團ê總經理，專門賣咱台灣人美國相對基金。Tī hia chhiàⁿ博強作投資顧問『Ah-lu-bái-sah』(adviser)，也tō是相對基金推銷員。上班第一工，黃太太kā後生裝撇撇，穿一su輸割肉（Scabal）英國量身西裝，hiù一身啥人ê(Channel)法國芳水，結一條闊板ê德國紅neh-khu-tái，穿一雙尖尖ê義大利烏皮鞋，載伊來到公司，親身陪伊去見總經理黃總台。雄雄感覺若像20外冬前hit工第一回，chhōa博強去天才育幼班仝款，kā kiáⁿ講：「M̄免驚，阿母liâm-mih koh來kā你看。」Taⁿ這個美國企管碩士，第一工上班見總經理，mā bē輸hit日第一回tī天才班見徐太太，soah緊張過頭，雄雄pak肚痛beh食物件。黃太太早tō有準備，袋á內面一tè麵包the̍h出來，hō͘伊大嘴咬落去。

Taⁿ這個後生美國碩士讀了，頭路也有a，tō beh kā伊chhōa一個某。拜託人鬥chhōe，開四個條件：大學畢業、160到165公分、45到50公斤、22到25歲，也tō是相猴、雞、狗、豬ê在內。佳哉無外久chhōe著一個相豬ê，身koân 162，體重48，師大畢業tī國中教數學。黃太太kā kiáⁿ講：「這個你有合。」

Tō按呢kā kiáⁿ chhōa一個某。Hit間尊賢樓五樓ê公寓，本來早tō買起來beh hō͘ kiáⁿ chhōa某用，tō收轉來全新裝璜，開200外萬。Koh買一隻新車Tho͘h-io͘-tah掛保險百外萬，hō͘ in kiáⁿ上班用。按呢in kiáⁿ ùi尊賢樓六樓公寓搬去五樓，離開pē母kap某tòa，問題tō是tī chia。

這個後生搬落來五樓了後，雖然kap老母仝一棟樓á，m̄-kú隔一chàn，心內壓力消一半，tō無koh不時食東食西，雞kui á koh消風去。老母看kiáⁿ sán去，煩惱問新婦：「碧玲a，你早頓有chhòng hō͘博a食無？」He少年人你也知，二個攏teh食頭路，ná有時間食早頓，應講：「阮早時bē iau，攏lim 一個ka-pi niā-niā。」黃太太驚一tiô:「Ai-ioh，莫怪一個身體拍pháiⁿ去。」Ùi hit日起，透早外口運動soah，未六點tō來in kiáⁿ chia，灶腳 khi-khi kho̍k-kho̍k，款早頓beh hō͘ kiáⁿ食。He kiáⁿ若無食，tō hō͘伊念kah臭頭爛鼻，所以無法度食了才敢出門。He五樓厝內ê壓力又koh chhèng到六樓起lih，無外久tō koh肥身起來。

Taⁿ六個月過去---，黃太太莉莉猶未聽講新婦有身beh生，心內著急，想講是m̄是新婦bē生？問in後生：「碧玲a tiâng時beh生？」In後生tō去問某：「Tiâng時beh生？」這個碧玲作老師人，個性ngēⁿ-chiāⁿ，m̄愛ta家雜chhap îⁿ-tîⁿ，罵伊：「你ta̍k項聽恁老母ê嘴！我是嫁你抑是嫁恁老母ê?！」

博強giap tī這二個查某人中央，一個粘thiê，一個ngēⁿ斗ê。Hit個老母粘thi m̄ hō͘伊大漢，這個某ngēⁿ斗m̄讓伊lún膽。博強chēng細漢ta̍k項代誌老母安排決定，家己bē曉主張，若磨á心ta̍k日磨（bôa）se̍h，真是艱苦。又koh hit站奇蹟投資業積無好，壓力5000磅。這回m̄是按下面hit空tháu，也m̄是ùi頂面hit空放，無想著ùi中央來。胃破空出血，soah tio̍h入院。

黃太太tī病院顧kiáⁿ，眠床邊chauh-chauh念，怨嘆hit個新婦bē顧翁，kā kiáⁿ講：「食食hit個m̄成頭路。Iah是規氣辭辭leh tiàm厝裡。」In kiáⁿ應：「碧玲講，等khah óa beh生才來辭。」驚一tiô，才知影新婦有身，罵：「A̍h thài無khah早講：」「猶早leh，年底才beh生。」「年底？年底chhun八個月niâ ！」趕緊chông去上贊（chán）旅行社，取消南非旅遊。業務小姐講：「黃太太，年底猶早leh，你先去chhit-thô一chōa，轉來mā也赴赴leh。」黃太太應：「你m̄知，chit-má少年ê ta̍k項bē，若無跟tòa身軀邊---」Ùi hit日起，管食管睏，hoah燒hoah冷，koh去中醫仙hia買養身安胎陰陽百日丸，若虱目魚丸hiah大粒，烏烏黏黏，臭臭hiam hiam ，gín-á尿味，ta̍k日叫新婦吞。

若是黃太太莉莉hit個症頭，明明是ùi hit通電話開始ê。「阿母！你緊來！---醫生講碧玲beh làu胎a---」駛車chông去病院，仁愛路規chōa that車，雄雄火攻心頭殼hîⁿ，pak肚痛擋bē tiâu，tio̍h-ài chông便所。僥倖a，黃太太莉莉這個症頭tō是半路that車ê時發作ê。