《陳雷文選》

 | | | 轉寄

身世

作者 陳雷 2009.04.18

(1)

進前，阿月有tī--leh ê時，阮tī hia tòa真久。大路koh過--去，離市á無外hn̄g hia。厝足大間，牆á壁圍--leh，頂頭一chōa紅花，足好認--ê。Óa壁一欉chhêng-á，khiau-ku khi一旁，樹ōe tàm--落-來，sôe tī牆á外。過路狗ùi hia過，食飽siuⁿ-êng，看bē做--得，無歡喜會pūi。我若peh起lih樹á頂kā看，he狗tō lú無歡喜，pūi lú大聲。阿月m̄愛人吵，牆á內hoah，狗tō tiām--去。

這個以外，其實ta̍k項sù是。阿月人上好，bē輸家己ê老母。阮母--a，chēng細漢我m̄ bat--伊，我出世無外久hō͘車tōng--死。人講我生作成--伊。Chēng細漢hō͘阿月io，食伊ê奶大漢--ê。實在hia tòa真久真慣勢--a，搬--出-來是姑不而衷，主要是hit個少年--ê，bē合--lah。

阿月老--a，身體無好。去看醫生，到taⁿ猶未轉--來，che我上煩惱。這個少年--ê孝男面，嘴角一粒痣，新來tō會kā我phngh，人客khah惡主人？Hit陣我顧teh煩惱阿月，m̄愛kap伊計較，ná知lú讓--伊lú惡。我拍算，阿月無tī--leh，mài chhap--伊，搬--出-來khah頭路直。阿月若有tī--leh，才無通hō͘伊惡sńg--ê。主要是這個少年ê問題，我出來chhōe阿月。

Chit-má chia真細位，無前--a hia好勢。頭前一腳大腳pùn-sò桶，落大雨會潑水。M̄-kú tī巷á尾，mā有牆á壁，頂頭有紅花。Uat--出-去一-tè-á tō到大路，ta̍k項有，主要取方便--lah。精差不時車足chē，走真雄，過大路ài細字。臨時--ê-leh，主要是chhōe阿月。

頭--a家己一個bē慣勢，chhōe無阿月，想beh koh轉--去。少年--ê猶tī hia，khiā tī門口kā我惡，我緊beh走。Tō是這個緣投--ê看bē做--得，走來為--我，kā伊phngh倒轉。少年--ê看伊勇，驚--伊，soah走入去厝內bih，乖乖m̄敢出聲。阿月以外，kan-na伊為--我。

有影是緣投，親切koh好禮，chhōa我四界chhit-thô，chia伊ta̍k位熟。Kap伊，我bē輸細漢gín-á，無煩無惱，也無想beh轉--去，連阿月mā bē記--得。人kā我勸：「好是好，khah細字--leh。」，講『緣投--ê』人無實，bē靠--得。敢是看阮二個相好teh怨妒，加講--ê。我刁治無beh kā聽。查某gín-á tō是驚人嘴tiⁿ，講我外súi tú外súi，beh kap我作伙一世人。畫天畫地，hō͘我酒醉兼作夢。Thài有影--leh？！無一禮拜，phiu--leh作伊去，也無相辭，走kah無看影。驚我kā jiok？總--是，我也無後悔，chit-má kā想--起-來，tō是我一生上蓋快樂、滿足。我敢是目睭放kheh-kheh，家己teh騙家己？若是有影，mā是歡喜甘願。阿月若知影，定著會罵我gōng呆，查某gín-á感情粗俗，bē曉想。

Chit-má搬--出-來-a，ta̍k項看真chē，猶是家己一個khah清khah自由，精差chit-má大pak肚無方便，大路車chē pháiⁿ過。市á hit旁chit-má我無啥愛去。大kho͘查某賣魚--ê，金hīⁿ鉤、金phoa̍h鍊，看--著tō hiu:「恁看！巧-a-lah！…娟--a teh chhōe伊無。…」Tàn魚á hō͘我食。「可憐，thài會變chiah sán?！…僥倖--a，恁看，大pak肚有身--a。」大細聲，bē輸是偷生--ê。Beh kā我抱。我m̄愛人按呢ko-ko-tîⁿ，緊走。市á hia我chit-má無愛去。

阿月chín若有tī chia tō好--lah。Che嬰á ê代誌伊khah bat。人講頭胎pháiⁿ生，生--出-來soah bē háu。Pak肚iau，食無奶，suh二嘴tō m̄ suh。阿月奶上chē，我食伊ê奶大漢--ê，chín若有tī chia tō好--lah。Ài食khah chē才有奶，市á hit旁ta̍k項有，khah有通食，ài過大路。嬰á無人顧，siaⁿ放--chia，出--去隨轉--來。

(2)

無想著二個會bē合。害巧--a規日miau-miau叫，攏m̄食。Soah m̄知tiâng時家己一個走--出-去，到taⁿ攏chhōe無。博愛獸醫講，狗kap niau若m̄是細隻抱來作伙，攏bē合--lah。像巧--a，細隻路邊khioh--來-ê，目睭猶未開，niau母講是hō͘車kauh--死。Pak肚iau，家己一個爬出來tī溝á邊，chhōe老母。Tú好hit陣阿月生一siūⁿ狗á kiáⁿ，抱轉來hō͘阿月飼。心適--a，阿月奶hō͘ suh，準家己ê。食阿月ê奶大漢--ê。莫怪阿月去了後，m̄食m̄睏，miau規日，soah會數念。精牲kap人仝款，有感情--lah，bē曉講niā-niā。阿月老--a，博愛診斷淋巴生瘤，koh醫是加拖加艱苦--ê。抱去博愛注射hō͘睏。阿月家己知，巧--a tī身軀邊iⁿ-iⁿ叫，m̄ hō͘走。

母--a講，koh飼一隻來hō͘巧--a作伴。這個勇--a，軍用狗母生--ê，khah孤hng pháiⁿ性癖，會kā pūi。害巧--a bih kah無位m̄敢出--來。M̄知tiâng時，家己一個偷走--出-去。Tī chia tòa chiah久--a，僥倖，m̄知外艱苦--leh，若m̄是真正姑不而衷，bē按呢tō出--去-lah。

秤--a hit日tī市á賣魚有看--著，講規身軀thái-ko lōaⁿ-lô，毛落kah一簇一簇，概成著thái-ko皮膚病。巧--a無m̄ tio̍h--lah，規隻烏--ê，尾溜一簇白--ê。Iau kah sán-pi-pa。僥倖，koh大pak肚teh beh生。The̍h魚á hō͘食，好心beh kā抱，soah拍青驚走無--去。巧--a出去作野niau，chēng細漢關tī厝內，m̄ bat出門，beh thài討有食？！Taⁿ大pak肚teh beh生，iau koh sán-pi-pa，m̄知siū作tī tó位？害我街á路巡幾lōa日，mā是無看影。

In宏--a先看--著，去報--伊。秤--a走去認，無m̄ tio̍h--lah。規隻好好，倒tī路頭，規身軀烏--ê，尾溜一節白--ê。過路人有看--著，講o͘-to͘-bái衝足緊，bē赴擋。秤--a來學校kā我報，緊走去看，已經無tī hia，掃街路--ê清掉--a，土腳一tah血。過路人講，hia定定有niau á、狗 á hō͘車kauh--死，攏駛siuⁿ緊--lah。我問秤--a，敢有生--a?伊hàiⁿ頭，規隻好好，倒tī土腳，無注意kā看pak肚。走去問in宏--a，mā是講看--起-來規隻好好，無去注意。

Tú好巷á內真tiām，有聽著niau á kiáⁿ iⁿ-iⁿ háu，kā chhōe，bih tī pùn-sò桶邊，tī『菊之鄉』邊--a ngiauh-ngiauh爬。足細隻，規身軀tâm-lok-lok，臭ko͘ⁿ-ko͘ⁿ，phi̍h-phi̍h-chhoah，目睭猶未開，若niau鼠á kiáⁿ。用手巾á kā包--起-來，抱轉來厝，拭清氣，用電火球kā chhiō hō͘燒lō。可憐，sán-pi-pa，pin-á骨一枝一枝。飼牛奶，suh二嘴，phēⁿ-phēⁿ喘tō m̄ suh。阿母講是著肺炎，巧--a細隻抱--轉-來mā是按呢。抱去博愛急診，已經關--a，明á chài透早才koh抱--去。

半暝起來巡，猶teh喘。透早tō停--去，bē赴救。Tī巾á內底規隻好好，規身烏--ê，尾溜一節白--ê。Kap巧--a生作相仝。出世ê身世也仝款。Niau母hō͘車kauh--死，pak肚iau，爬出來路邊chhōe老母。路口hia車真雄，定定kauh死niau á、狗á。

勇--a pháiⁿ，害巧--a走出去作野niau，hō͘車tōng--死。狗精牲bat一個啥？怪我家己m̄ tio̍h，抑是騎o-to͘-bái ê人siuⁿ雄？