《陳雷文選》

 | | | 轉寄

大樹公

作者 陳雷 2009.04.12

咱這個小所在西港，bi tī曾文溪南旁，óa溪á出口ê所在，不時風大水大。北旁有一間將軍庵，西旁有一間鎮海宮，討海人迷信，靠in保庇。M̄-kú，日本時代以來，老大人hit輩親像阮阿公、阿媽，也有人拜大樹公，仝款迷信，不過有一個心適ê因緣。

Taⁿ大樹公外老--a確實無人真知。阮阿公--a伊，作gín-á ê時bat聽阮阿祖講，日本兵來西港hit年，beh展威風háⁿ西港ê人，用炮pōng大樹，規欉pōng一半去。大樹著傷流紅膏，庄--裡ê人驚，講大樹替西港ê人流血，m̄甘心，感恩kā拜，大樹公ê名tō是按呢來。結果大樹無倒也無死，soah lú發lú旺。Chit-má樹oe樹葉ām-ām-ām，圓圓一kho͘圍，若thí開ê大枝雨傘，比將軍庵khah大bô͘。Chhêng-á鬚hô͘-sà-sà，有ê sôe到土腳，釘入去土--裡，大細枝上無2、30枝，有ê比咱人腳腿khah粗。Taⁿ che大樹古早hō͘炮pōng著傷，chit-má空嘴攏生好--a，樹皮結作kāu-kāu一丸一丸ê瘤，有文旦hiah大粒。Hn̄g-hn̄g看--起-來，概成一個老歲á，khiau-ku gia̍h一枝大枝雨傘。庄--裡ê人講，200歲敢有--a。

阮阿公上蓋敬意，ta̍k日ùi厝--裡騎o͘-to͘-bái，去hia清掃。有時eng-ia大，用水châng，kā大樹洗嘴鬚、洗身軀。阮阿媽講，chēng少年m̄-bat làng工，連娶某hit日mā去。樹á腳不時一大堆人，lim茶行棋、開講消涼，鬧熱chhih-chhih，比廟á khah ka-ia̍h。

這日阮阿公騎o͘-to͘-bái beh出門，目頭結結，面憂憂。阮阿媽kā叫：「旺--a，你人若無看活，一日無去無要緊，…水清--a mā會掃。」Hit chām阮阿公67，身體有無tú好，心臟無勇，應講：「惜--a，我夢去大樹公hō͘水淹。」阿媽講：「咱chia海腳，作大風會淹水。」阿公應：「To也天清，無風也無雨。」連續三工，夢去大樹hō͘水淹，lú淹lú koân，規欉淹kah無看--去。

Lú想lú bē放心，去鎮海宮poa̍h杯抽一枝籤，寫講：「盡心盡意盡感恩，救草救木救家己。」想想--leh，去請教朝木老師，火爐伯--a in後生：「朝木--a，咱chia無風颱無地動，thài會大樹hō͘水淹bē退？」朝木--a應：「旺伯--a，會--lah。Koh 30冬、50冬，咱chia tō會淹水bē退。」阮阿公驚一tiô:「朝木--a，你m̄通創治我老人。Koh 30冬、50冬，我早tō m̄知去到tó位去--a。」「旺伯--a，我kap你講真--ê，世界lú來lú熱，南極、北極ê冰溶了，海水漲koân，海腳tō淹水bē退。」

阮阿公轉來厝，ām-kún kiu-kiu，面憂憂，念：「30冬、50冬，大樹無彩工。」阿媽問：「Taⁿ你是teh念啥？Che大樹100冬、200冬，照顧咱西港，怎樣30冬、50冬無彩工？」阮阿公kā朝木老師ê話學hō͘伊聽，阿媽問：「Ta°咱tio̍h緊來kā救。」

隔轉日去大樹腳kap朋友參詳。Hit個赤牛伯，khah早tī市á thâi牛，kā笑：「旺--a，朝木--a少年人創治咱老歲á，講講he無--ê。」另外hit個茂松，薰suh大，he-ku hī-hū叫，講話tō khuh-khuh嗽，也講：「30冬、50冬，咱to m̄知走去到tó位--a，煩惱啥？」Tō是火爐伯上有歲，普通時講話人會尊重。「Ah若是大樹淹水，咱tō kā sóa khah內面去。」再生--a in tòa tī東旁khah內底hit頭，手kā giú--leh，hoah:「火爐--a，你mā講khah有譜--ê。Che大樹若大廟，四圍大thiāu 2、30枝，beh按怎sóa?！」「Ah若無法度sóa，咱tō用圍--ê。」大南á少年ê時bat tī水利局食頭路，講是bat水利。「咱起堤á來kā圍。」大家kā笑：「起堤á圍大海！南á，che堤á圍外闊、外koân?你mā teh講he gín-á話。」一句來一句去，lim茶膨風，規晡無一個頭尾。

阮阿公koh去請教朝木老師，面憂憂，ām-kún kiu-kiu，問伊：「朝木--a，這個大樹淹水，bē sóa--得，也bē圍--得，taⁿ beh怎樣？」朝木--a應：「旺伯--a，che kan-na一步。」「你緊講。」「減碳--lah。」「啥物叫作減碳？」伊講tō是地球碳氣siuⁿ chē，才會lú來lú熱，海水漲koân。阮阿公問：「Ah che碳氣ùi tó來？」「汽車、工廠燒油、燒炭來--ê。」阿公想想--leh，講：「若是按呢，m̄ khah簡單。」

轉去kā朋友講：「簡單--lah。」朋友問：「啥物步？」阮阿公講：「M̄免sóa樹，m̄免圍海。咱mài坐車，mài騎o͘-to͘-bái tō會使。」kā朝木老師ê道裡講hō͘大家聽。火爐伯講：「若是按呢簡單。我m̄-bat teh騎o͘-to͘-bái。」大南á講：「Hioh--lah，我mā罕得teh坐車，攏騎鐵馬。」

自按呢大家攏用行--ê，抑是騎腳踏車。Kan-na hit個赤牛，khah早tī市á thâi牛pūn-tōaⁿ，講伊腳痛有關節炎bē行，無騎o͘-to͘-bái bē使。成個月過--去，大家lú行lú hèng-chhih。Hit個茂松--a，3冬前bat斷細條腦筋，kā人展：「Kā恁講恁m̄信。Khah早我不時秘結，chit-má ta̍k日行路，放屎規條--ê，通去到菜市á去。」大南á大kho͘有糖尿病，也講：「實在有好，我糖尿減幾lōa度。」一人講一嘴，有ê好睏眠，有ê好放尿，lú講lú好用，無想著減碳koh會顧身體。

koh拜託體育老師春東來教體操練工夫。這陣老歲á ta̍k日大樹腳作體操，練喘khùi，加食菜，減食臊，叫作大樹功。Hit個赤牛kā in笑：「無彩工--lah，練心願--ê niâ!」熱--人過了，大家功夫ná練路ná行，pak肚一直消--去。赤牛in查某孫花影18歲99公斤，聽著大樹功會減肥，愛súi也來參加。

一日tī路--裡遇著一個老歲á，老khok-khok，嘴鬚hô͘-sà-sà，khiau-ku gia̍h一枝傘。無代無誌雄雄poa̍h倒tī土腳，緊óa去看，二枝腳斷一大koe̍h，血kòng-kòng流，…。驚一tiô精神過--來，kā阮阿媽講：「Ta°害--a!」青狂tō出門，大步細步趕來到位，一大陣人hì-hè叫，4、50人密密圍一個kho͘-á，kā大樹包圍。Gia̍h頭一kā看，驚一tiô!規欉大樹chhò kah光光，chhun一kho͘心，若牛車lián hiah粗，無半枝oe，無半枝葉，連hia ê chhêng-á根釘tī土腳，2、30枝chhun無半枝。阮阿公hoah一聲「ai-io-ôe!」，心臟bē堪得痛，目屎bē赴通流，tī hia現倒倒昏昏--去。

結果tō是hit tah著路，造路--ê透早天母未光來偷chhò樹，無人知影。水清--a早起去將軍庵看--著，叫人來已經bē赴--a，chhò kah chhun一kho͘心。大家ùi早起圍到下晡，kā大樹包圍，無人beh走，m̄ hō͘ in chhò。電視台聽著圍大樹，派人來hip相。He記者中國意識，頭腦浸尿，聽講大樹hō͘日本á pōng炮虐待，作文章o-ló講，大樹光光一kho͘心，看--起-來「象徵中華魂」，是西港抗日ê民族英雄，寫寫一大篇。尾á真chē人抗議，才改路。好得佳哉留一kho͘大樹心，斬頭斬手chhun一個身。

阿公過身了，換阮阿媽去照顧清掃。這日招我：「順--a，今á日kap我來去看大樹。」行beh半點外鐘去到位，四kho͘圍種真chē花，整理kah清氣清氣。Taⁿ he大樹無oe也無葉，也tō無人tī hia lim茶開講。單獨一kho͘樹á心chhāi tī hia，牛車lián hiah粗。古早hō͘日本人pōng炮著傷ê所在，百外冬來，空嘴已經生好--a，樹皮生kāu-kāu，結作一大丸一大丸ê瘤，若文旦hiah大粒。看--起-來bē輸講gín-á故內底ê大bú漢，khiau-ku khi一旁。我問阿媽：「阿公上蓋m̄甘大樹？」伊chhōa我去大樹頭坐，講：「恁阿公少年ê時，大樹救--伊。」伸手去摸he粗pê-pê ê樹皮：「Chia，你看。」斟酌àⁿ落去看，一tah金金，tō是一粒槍子，tiâu tī樹皮內底，挽bē出--來。真久以前，hit年228，中國兵á來庄--裡四界亂tōaⁿ槍掠人。阮阿公peh起lih大樹頂bih，m̄敢落--來。Hit暗看著一個老阿伯，嘴鬚hô͘-sà-sà，khiau-ku gia̍h一枝傘，kā伊講：「作你tòa chia bih，m̄免煩惱。In chhōe你bē著。」我摸hit粒槍子，咬tī樹á內底，ân-tòng-tòng ngiauh bē出--來。問阿媽：「大樹bat hō͘人tōaⁿ槍？」阮阿媽tìm頭，今á日刁治工報我來看。