《陳雷文選》

 | | | 轉寄

美麗世界

作者 陳雷 2008.10.19

伊phak tī土腳ná chhê,若一隻近視ê四腳水雞，面tu tī電視頭前，tòe紫薇小姐ná唱「愛你愛到chia，咱已經無相欠，枉費一場青春夢，…牽你ê雙手，m̄願kā你放，m̄甘看你目kho͘紅，…」 這日下晡，南都電台kha-la-o͘-khe比賽，chia ê歌伊攏會曉唱。Kap緣投--ê規日關tī房間內，叩應聽唱歌，上蓋歡喜。紫薇唱soah，節目主持人勇哥講：「各位觀眾朋友，請大家kā伊批分。歡迎電話khà--來，先報你ê大名。」敏智早tō電話mo͘h tī pak肚邊，khà入去講：「我是鐵人。」這個「鐵人」tō是伊家己號ê叩應ê名。電台ê人攏bat--伊，知影「鐵人」是“殘障”，雙腳bē行，雙手也無啥好勢，又koh目睭內障霧霧，看bē真清楚。見若伊叩應入--來，勇哥tō刁治工kā觀眾特別介紹。這個「鐵人」雖然“殘障”，人真勇敢，意志是鐵拍--ê,mā真gâu唱歌。勇哥問：「多謝鐵人。Tú-chiah這位紫薇小姐唱了有贊--無？」「真贊，真贊。」「Ah你beh kā注幾分？」「100分！」這個紫薇小姐看--起-來無紫也無薇，hit個名m̄知按怎號--來-ê?上無beh 50--a，hâ一領phòng裙紅phà-phà,bē輸穿一枝大枝雨傘thí開開，khàm到腳頭u。頭毛電作一球，若鳥á作一個siū tī hia，頭殼頂pa̍k一隻chio-chió,歡喜敬禮：「多謝鐵人，多謝大家。」敏智講：「這條歌，我mā會曉唱。」勇哥講：「按呢敢會使請鐵人唱一擺，hō͘大家欣賞？…來，各位觀眾，請欣賞，鐵人唱…初戀夢。」音樂tō tân,敏智kā電話tu tòa嘴邊，ām-kún giú直直，大聲tō唱：「愛你愛到chia，咱已經無相欠，…當初有chiù-chōa,bē tàng來照希望，…只有笑笑假輕鬆，若提起思念hit個人，青春ê戀夢化作一枝白頭鬃。…」ná唱ná拚汗，有聽著緣投--ê teh叫：「贊！贊！」雄雄頭殼烏暗hîn,腳手bán ân,規身軀kiù筋kho̍k-kho̍k chùn,目睭仁吊koân,tō m̄知人--a。

M̄知昏去外久，hīⁿ空內人teh叫：「贊！贊！」還魂過--來，tō是緣投--ê khiā tī電視頂teh hoah。佳哉kā伊叫醒。褲底tâm chiuh-chiuh，才知影koh再羊hîn發作chhoah尿。頂禮拜mā一擺，無力thang爬sóa,phak tòa土腳等，外面漸漸落暗，車聲lú吵，koh無外久，阿母市á菜賣soah tō會轉--來。

聽著有人開門，khàng去房間門口大聲hiu：「阿母，褲tâm--a。」阿蘭袋á khǹg--leh，入來房間看，僥倖--a，土腳tâm lok--lok，規房間ê尿味，這日天氣hip，窗á koh無開，罵伊：「Ah你門關tiâu-tiâu是teh創啥？！kan-na熱mā死！」緣投--ê tī電視頂叫：「贊！贊！」「贊！贊啥？…贊你ê死人！」阿蘭kā hat，伊tō tiām--去。The̍h褲來換，thǹg-pak-theh，kā敏智kap緣投--ê吹電風。

Koh來soah m̄叫m̄講話。敏智想講，是m̄是hō͘人罵，心情bái?唱歌hō͘伊聽，soah顛倒害，起嗽兼làu屎，m̄食也m̄ lim。無幾工tō khōng腳翹倒--落-去，一kho͘死giān-giān｡阿蘭kā死鳥á the̍h出去tàn pùn-sò,房間內chhun敏智家己一個，想無伴，beh唱歌，khà電話去電台，kā勇哥講：「我beh唱歌hō͘緣投--ê聽。」勇哥問：「緣投--ê是啥人？」「我ê ka-lēng,伊昨hng死--去。伊上愛聽歌。」「按呢真無彩。Che ka-lēng kap你外久--a？」「Beh十外冬--a。」「按呢真傷心。…Ah你beh唱tó一條歌？」「＜我beh想你＞。我家己寫--ê｡」「Hai，各位觀眾朋友，鐵人beh唱＜我beh想你＞，hō͘伊ê朋友緣投--ê｡」敏智唱：「…你是我ê影，我是你ê伴，…咱2人相陪，…你講話，我唱歌…唱歌hō͘你聽。…你是我ê形，我是你ê影，咱二人相tòe,…你會飛，我bē行，咱等候…等候hit一工，好天…好天出去外口行。…」

暗頭á有人送鳥來，tō是觀眾朋友經過電視台送hō͘敏智--ê｡有giap一張kha-lo̍h,寫講：「鐵人，我是張明光。這二隻鳥hō͘你作伴。我ê阿母講，chit-má ka-lēng攏chhōe無。」敏智khà電話去電台，kā張明光說多謝。一個查某人叩應入--來，講伊是張明光ê老母，hit二隻十姊妹是張明光飼--ê,in明光12歲，mā是坐輪椅。

這對十姊妹tī籠á內m̄叫也m̄食。敏智想，是m̄是teh想厝無伴？鳥籠á拍開放--出-來，唱歌hō͘ in聽。He鳥m̄聽歌，跳起leh窗á口tō飛--出-去。仝這時陣，概成雄雄房間內有一個物件也tòe鳥á飛--出-去，bē輸大地動厝崩--去，規間房間tâi tī土腳底，暗眠摸目睭無看，hīⁿ-á無聽。自來m̄-bat有過這種龜怪ê khi-mo͘-chih，全世界chhun伊一個人hit款ê生份孤單。

Phak tī土腳一晡久無tín動，才koh聽著電視tân,tú好teh放保力達ê廣告。Hit個百貨公司ê小姐，長頭毛，薄衫短裙，雙手抱一罐保力達，嘴角菱角笑，講話ùn著蜜，七月荔枝當sai-nai：「保力達，顧肝保腦上價值，老人gín-á第一好，查甫查某蓋有力！…我愛保力達，你愛保力達，…大家來lim保力達！」這個保力達廣告，伊上愛看，見若看著保力達小姐，bē輸lim著二罐保力達，規個人tō攏有力。爬土腳去gia̍h電話，khà入去南都，kā勇哥講：「今á日是特別日。」「啥物特別日？」「我ê查某朋友生日。」「恭喜！恭喜！…請鐵人介紹一下，你ê女朋友。」「伊女中畢業。Chit-má tī新光三越食頭路。」「Ah恁是按怎熟sāi --ê?」「百貨公司遇著相bat --ê｡」「成實有緣tō會來相會。…恁熟sāi外久--a？」「Beh 2 冬--a，今á日伊生日，我beh送伊一個禮物。」「你beh送伊啥物禮物？」「我唱一條歌送--伊。」「多謝鐵人。你beh唱tó一條歌？」「我唱＜愛來愛去＞。」「來，咱南都ê聽眾朋友，請欣賞鐵人唱＜愛來愛去＞，送hō͘伊ê女朋友作生日。」

「Tu-lu,Tu-lu,Tu-lu,有人為著情，打扮súi-súi,想著心愛hit個人笑微微，…mā有人為著情得勇氣，愛這個天使注該tō是你。…」目睭kheh--起-來，有一個查某gín-á khiā tī伊面前，té衫薄裙，身koân 165公分，體動56公斤…。Ná唱肩頭ná輕鬆，心頭lú歡喜，外口車聲來來去去，這個無êng滿足ê美麗世界，漸漸，漸漸落暗--來。

「夭壽--a，電視頂按呢亂亂chōaⁿ！…愛來愛去，愛你ê死鬼á ！…你ê查某朋友生日！…Taⁿ好--a，你是teh起khong-khám hioh？」Hit暗阿蘭大聲kā罵，因為厝邊菜頭嫂有看電視叩應，敏智唱歌kā查某朋友作生日，刁治故來問阿蘭：「恁敏智無簡單neh，tiâng時也交一個查某朋友？…莫怪--lah，少年家緣投á sàng｡」阿蘭問：「Tó一個查某朋友？」「Ai-ioh，你m̄知？愛來愛去hit個。…今á日生日，恁敏智唱歌hō͘伊。」夭壽死gín-á,恁pē beh 60--a，也m̄-bat生日kā恁pē唱一條歌！Taⁿ這個死查某gín-á…」「阿蘭--a，tiâng 時beh娶新婦？…咱厝邊帖á tio̍h會記放--一-張。」正khau倒siah，阿蘭pháiⁿ勢面紅，煩惱面青，受氣面烏，轉來罵敏智tú-siàu｡你這個死gín-á,電視頂kā恁pē烏吐白吐，畫la-liân,成實bē見bē笑。你這扮，也bē照鏡看māi,…連一隻ka-choa̍h to免想，啥物查某朋友，愛來愛去作生日！。」Tiām-tiām據在老母罵，一大堆念soah，才應：「Che是秘密，你m̄知。」門tō關--起-來，bih tòa房間choān電視，又koh保力達teh廣告，…老人gín-á第一好，查甫查某蓋有力，…伊tòe leh唱，我愛保力達，你mā愛保力達。

Chit-má咱社會進步，有設一個「殘障日」，來照顧破相(siùⁿ)ê人。所以南都這日專工派車來載敏智kap阿蘭去電台。南都黃董事長親身歡迎，kap in上電視，現場宣佈，鐵人當選今年度「南都最熱心觀眾」。今á日「殘障日」，南都beh送鐵人一個特別ê禮物。請勇哥sak--出-來， 一台金siak-siak全新ê電動輪椅，四個lián-á圓圓，一個坐位爽爽。勇哥抱鐵人坐輪椅，教伊用手駛。一手pan--leh，he輪椅tō lu來lu去，頭前後壁，正旁倒旁，滑溜溜無聲無說，bē輸teh lu冰，攏m̄免人sak。阿蘭歡喜kah nâ喉that--起-來，bē講話。 過--來敏智家己駛輪椅出門，lu chia lu hia，駛緊駛慢，自由自在，m̄免人陪。阿蘭tī輪椅後壁pa̍k一枝竹chhôe á lò-lò長二人koân,頂面結一個紅色三角旗。沿路駛，he chhôe-á tō沿路hàiⁿ，旗á iāⁿ-iāⁿ- 飛。過大路，人kap車看著，攏會細字先讓伊過。這日駛來到東寧路口，tō是咱東區鬧熱ê所在，車lìn-lòng 行，人ia̍p-ia̍p是。Tī hia teh想無，beh買一罐保力達，m̄知ài ùi tó一旁去？想beh問--人，看著一個少年查某gín-á,電頭鬃，踏koân屐，薄衫té裙，khiā tī路口看來看去，概成teh等人。Koh龜怪--a，嘴ná念頭ná tìm,見若車駛--過，伊tō kā ia̍t手。過路人ùi伊身軀旁過，目尾使--一-下，頭殼gia̍h koân-koân,目睭掠直直，khi-khi kho̍k-kho̍k向前行，概成刁治beh hō͘人知，in攏無看著伊。Hit個查某gín-á,頭殼kho̍k-kho̍k tìm,目睭se̍k-se̍k看，嘴--裡cha̍uh-cha̍uh念，概成四kho͘圍攏無人，kan-na伊一個，thǹg 光光 tī hia。

Lu óa--去，有聽著伊teh講：「…日本--lah，…日本買tō有，…泰國m̄-bat去，…」敏智問伊：「小姐，借問--leh，…」查某gín-á講：「少年--ê,來，…hō͘麗君kā你敬--一-杯，…」現現目睭大大蕾有teh看，目神chhāi-chhāi 無tī hia，概成無看著伊。敏智應：「我bē曉lim酒。」一隻烏頭á Bian-juh駛--過-來，停tī路口等紅燈。伊tō kā ia̍t手：「A-li-ga-to͘h，…hái,…o͘-ne-gai si-ma-suh，…hái …」敏智問：「小姐，你teh chhōe啥人？」查某gín-á gī-gī笑：「少年--ê緣投á sàng,…你是beh kā我灌hō͘醉是--無？…麗君海量lim bē醉，…」用手去拭面，胭脂hôe kah hô͘-sà-sà｡敏智pháiⁿ勢，輪椅倒退lu beh走。查某gín-á kā hoah：「…yo͘ like？…Ok？…yo͘ like？…」伸手beh kā giú｡

想攏無這個查某gín-á是啥人？伊ê名敢是麗君？為啥物khiā tī hia ia̍t手？隔轉日，好奇koh駛輪椅去hia看。原在khiā tī路口，kô͘胭脂，薄衫té裙，嘴--裡se̍h-se̍h念，無êng teh ia̍t 手。連續3、4工攏仝款。到尾--a，概成也小寡會認--得-a，路口看著敏智輪椅竹chhôe-á搖，紅旗á hàiⁿ，也tō ia̍t手 ：「…少年--ê緣投á sàng,你是beh kā麗君灌hō͘醉是--無？… yo͘ like？…」原在，過路人攏無看--著也無聽--著，青青cho̍h-cho̍h ùi hia過。

M̄-kú事實in有看--著，也有聽--著。因為車禍了後，真chē人按呢解說，in攏真確實，是這個siáu查某先看著對面hit枝竹chhôe-á ló-ló長，紅旗á tōng-tōng hàiⁿ，雄雄chông--過-去；in有看--著，mā有聽--著，伊teh叫，he，少年ê緣投á sàng,…對對衝紅燈，tú好車chông--過-來cheng--著。菜頭嫂mā kap人chèⁿ，講伊mā有看--著，m̄是車m̄-tio̍h,查某gín-á刁工--ê,刁治故chông去hō͘車tōng｡Chia ê問題，一人講一款，taⁿ也無tàng去對chi̍h--a。報紙、電視報一大堆，南都mā有hip相--出-來。這個siáu查某，to也生作有súi｡有人講，kan-na看相bē準。Té衫薄裙，頭殼後khok一大堆血，tò͘著頭鬃，流--過-來，kian tī pit chōa ê點á膠路面。

敏智kā旗á pak掉，關tī房間內，幾lōa工無出--去，電視也無開。家己專心聽麗君講話，少年--ê緣投á sàng,… 你beh kā麗君灌hō͘醉是--無？…m̄知為啥物，伊beh khiā tī hia ia̍t手？總--是伊chit-má知影，hia ê過路人，目睭掠直直，概成攏無看--著，m̄-kú攏有看--著。大概kap伊仝款，無去想--著，有一工，雄雄beh衝紅燈，hō͘車tōng｡

Hit個龜怪ê khi-mo͘-chih，親像地動厝崩--去，kā伊ê ām-kún束ân-ân,tâi tī土腳底bē喘khùi,全世界chhun伊一人，無聽--著也無看--著。電話gia̍h--起-來khà叩應，講我是鐵人，我beh唱歌。「今á日你beh唱tó一條歌？」「＜愛來愛去＞」「多謝鐵人。Ah最近好--無？」「Mā是真無êng｡我ê查某朋友ta̍k日下班攏來陪--我，駛輪椅去公園散步，…阮chia這個公園chit-má花開足chē｡」伊hit個美麗世界，不時真chē公園攏teh開花，無限季節，隨時想--著tō開。