《《陳夫人》日譯台e5台灣小說 第二部》

 | | | 轉寄

《陳夫人》第二部 親子 第二十四章（更新版）

作者 庄司總一著 賴永祥指導 林俊育台譯 2017.04.16

Tī女子中學ê校園有勞動服務ê時間，四界lóng有幾個人做伙khû-.leh teh挽草ê學生。已經是十月天ā，m̄-koh，一絲á秋意都無；無同情心ê日頭lóng無留情，kā hiah-ê少女曝kah烏sô-sô。

清子chit-má kah in老父生做koh khah仝款，身材koân，m̄-koh瘦koh軟弱ê身體大概是傳承tio̍h in老母。所以，tī體操kah勞動服務ê時間，她tiāⁿ-tiāⁿ申請免參加，一個人tī樹蔭下歇睏，靜靜teh看「岩波文庫」之類ê冊。
「Oeh！陳同學，你生做hiah大漢卻hiah lán-si，你頭腦好to̍h感覺了不起hio͘h？你chit種無認真ê心態，kan-taⁿ成績好有啥路用？」

清子受tio̍h新任體操老師ê誤解kah侮辱以後，她決心死mā beh參加勞動服務。清子體材koân大，雖然有khah瘦，m̄-koh，無虛弱ê款；所以，tī老師kah同學眼中看起來，她無beh參加勞動服務，是因為驕傲kah lán-si。其實她若硬參加，了後ê一兩工to̍h無法度來上課。若講她是身軀有啥缺陷，醫生koh診斷bē出有啥毛病。所以，清子家己認為她ê身體無適合台灣hiah-ni̍h炎熱ê天氣。事實上，tī冬天寒冷ê季節，她ê身體情況to̍h非常好，m̄-koh，chit種爽快ê氣候，一年總共只有三個月niā-niā。她對家己成長tī chit-ê殖民地ê奇異反感，其中之一ê原因to̍h是chit種生理上bē適應所引起ê。

清子生日hit工，老母講今暗beh kā她做生日，叫她chhōa幾個á同學來厝裡食飯。清子無法度決定beh邀請tó幾個；平常時做伙chhit-thô ê同學雖然有幾個，m̄-koh，她真正ê好朋友卻無半個。

老母叫她chhōa幾個á同學來厝裡食飯，m̄-koh，清子感覺mài請任何人，一個人kah雙親tī厝裡過十六歲ê生日mā bē bái ā。若是阿明tī厝裡，她一定beh請伊，阿明mā一定會歡喜來為她慶祝生日；只有阿明會kah她同歡喜同悲傷。阿明對她了解kah清清楚楚；記bē起來是tang時，阿明bat對她講：「Oeh！Chiok好neh，你ê面有獵戶星座teh閃sih！」清子去照鏡詳細看，她看tio̍h有三個雀斑整齊排做伙。她家己lóng無發見tang時生雀斑，因為真微細，所以連家己都無發見，m̄-koh，阿明卻早to̍h發見。阿明實在真可憐，伊寫幾張phoe hō͘ 她，她lóng無讀tio̍h。Cha-bó͘-kán-á講phoe是hō͘ 老父沒收ê；若是老母án-ne做，她一定會極力爭取the̍h tńg來，m̄-koh，因為是老父沒收ê，她就無想beh露出她ê缺點....。
「怜子，你今暗kám有閒？」

清子對chit時行oá來ê一個同學講。她為啥物專工beh邀請chit位同學neh？清子家己mā bē清楚家己ê心態；柏木怜子m̄-nā m̄是她siōng好ê朋友，tī班上koh是競爭ê對手。
「啥物？陳同學，我ta̍k工lóng有閒，我tńg去厝裡了後，真少寫學校ê功課。」

Chit位同學一開嘴to̍h露出她ê對抗意識。柏木怜子是一位高級官員ê cha-bó͘-kiáⁿ，成績好，人koh súi，tī班上真有人緣。M̄-koh，她自入學以來，成績m̄-bat有一年超過清子。這大概hō͘ 她感覺真遺憾，所以每pái考試ê時，她ê面色蒼白，可能是因為父母有teh kā她督促鼓勵ê款。尤其是頒獎典禮ê時，清子lóng是受獎者ê代表，怜子ê老父穿禮服坐tī來賓席，koh khah ē-tàng發覺她ê心情無好。清子並m̄是有意beh kah她競爭，m̄-koh，若是免輸她卻來輸她，自尊心bē允准清子án-ne做。怜子真少kah清子講話，若講tio̍h啥物，lóng是帶有khau洗ê語氣；像講：清子in tau ê cha-bó͘人雖然真致意外表ê打扮，m̄-koh m̄知tùi tó位帶來ka-cháu，kui厝裡ê人lóng被咬；清子ê阿叔是chit-ê城市算有tio̍h ê好額人，卻從事污穢ê臭行業等等。怜子提起清子ê阿叔景文ê事業，thiau故意大聲講hō͘ 清子聽tio̍h。

清子無tiuⁿ-tî去邀請怜子，她mā無方便kā話收tńg來，就講：
「今á日是我ê生日，你若肯來....。」
「Ah，是án-ne oh？多謝！Kám是beh去lín tau？生日mā一定tio̍h盛大慶祝oh！婚禮kah喪事都lóng hiah-ni̍h chhia-giâ ā。」

清子聽了，真受氣。班上ê同學lóng叫她「清子」á是「小清子」，只有怜子叫她「陳同學」。她ê話內底有含意，她chit-má ê講法to̍h是teh嘲笑：Lín tau kui家伙iáu teh過舊ê pháiⁿ風俗生活，到taⁿ iáu kan-taⁿ熱心喜慶á是拜拜；她甚至連喪事都講出來。清子chit-má chiah發覺家己邀請chit-ê同學ê用意：怜子從來to̍h m̄-bat去過in tau，她想beh hō͘ 怜子看in tau ê文化水準ê程度，所以chiah會趁她無意中來kā她邀請，想beh hō͘ 她看māi-á leh。今暗tio̍h叫老母加準備kóa好食ê料理；koh hō͘ 她看支那ê陶器，kā她講這是「萬曆赤繪」，總是她聽了mā m̄-bat；mā beh用電唱機放「貝多芬第九交響曲」hō͘ 她聽；清子koh想beh穿長ńg ê和服來彈鋼琴....。

清子無意識中湧起kah怜子抗爭ê心，就án-ne beh kā她giú來到厝裡。
「Ngh，只是小小ê慶祝生日，m̄-koh，怜子若ē-tàng來，我會真歡喜，你kám m̄是當teh學彈小奏鳴曲？我真想ài聽你彈。Án-ne，你beh來ho͘ⁿh？」
「是ah，我想看māi leh。M̄-koh bē-sái neh，阮老父真囉嗦neh。」

Chit-ê同學自開始to̍h無意思beh接受邀請，她拒絕ê理由koh是因為雙親真囉嗦，其中ê意函真深。

清子hngh-hngh teh冷笑。她tńg到厝，chit-ê笑影iáu未消失，看起來顛倒有啥物歡喜ê tāi-chì。生日當然mā歡喜；所以in老母安子mā án-ne感覺。M̄-koh，是清子家己kā家己生日ê星光chhòng暗去，她感覺悲哀，所以她teh笑；tī歡喜ê時，她顛倒無顯示啥物歡喜ê笑容，這是她ê毛病。
「小清子，你今á日去穿hit領台灣衫，bē bái neh。」

In老母án-ne建議；幾工前tú做好ê烏色長衫，真合清子瘦抽ê身材，實在真súi；年輕ê少女穿起來，會比穿笨chhiâng ê和服khah爽快。
「我看你頂pái穿kah真合軀。我若有kah你仝款ê身材，會常常穿台灣衫，m̄-koh，chit-má已經有khah大kho͘ ā。」
「我無想beh穿，我穿kám真正有合軀？」
「有lah，lín阿爸iáu m̄-bat看過你穿neh。」
「無ài lah，我穿he kah-ná是支那姑娘。我mā無像阿母hiah súi。」
「我已經是老古董ê婦人人面，我真kah意你chit種意志堅定ê現代女子ê面。」
「我無kah意家己ê面，鼻á短，面形圓liàn-liàn。我無ài穿類似支那服ê衫lah。」

清子雖然嘴án-ne講，m̄-koh，她知影若穿類似支那服ê衫，siōng ē-tàng清楚顯示她ê個性。如果她是日本人，她會穿；he kah-ná是一種ê欣慰kah趣味，á是ē-tàng改變一下á心情。總是，chit-má ê情形無仝；雖然穿台灣衫kah她ê個性一致是無話講，m̄-koh tī她家己感覺一半適合一半無適合ê觀念之下，她soah陷入莫名奇妙ê偏見kah迷失；講穿和服，她mā是有chit種ê感覺。
「Án-ne，beh穿tó一種chiah好？」
「Iáu是穿新做ê hit領，阿爸 一定會kah意，伊iáu m̄-bat看過你穿neh。」
「M̄-koh，我iáu是無beh穿hit領，因為同學會來，我感覺pháiⁿ勢pháiⁿ勢。」

柏木怜子m̄來，清子就邀請另外兩位同學。她感覺競爭心強ê同學來chiah有趣味，taⁿ只有極其平凡ê同學來，清子有一點á bē起磅；beh穿啥物衫，á是beh做啥物，她lóng免傷腦筋，mā bē感覺pháiⁿ勢。她無beh穿台灣衫，kan-taⁿ因為老母講án-ne會hō͘老父歡喜；老母用chit-ê理由一直teh勸她穿，hō͘ 她感覺是屈身teh求得人疼，所以她tī無意識中就起反抗ê心。

清子穿長ńg ê和服，he是紫色底有菊花ê花樣，腰帶是用金銀織ê車輪形。 受招待ê hit兩位同學看tio̍h清子ê美麗穿插，驚嘆kah o-ló講：「根本to̍h kah-ná是公主leh。」
「Mài à lah，lín mài án-ne teh kā我chîn。我本來無想beh穿chit種衫，長lòng-sòng，腰帶koh ân，真bē爽快neh。」
「M̄-koh，真súi neh，iáu是和服khah好。」
「阿姆真有日本氣味neh！」

兩位同學án-ne講。
「阮老父mā是仝款。」清子補充講。
「Tio̍h ho͘ⁿh，我從來m̄-bat看過lín老父穿台灣衫neh。」

清子就án-ne用理所當然ê口氣講：
「我mā m̄-bat看伊穿過，伊無ài穿hit種衫，lóng穿西裝á是和服。」

總是，講絕對m̄-bat穿是teh講白賊，講老父bē ài穿台灣衫是真ê；m̄-koh，厝裡ê祭祀kah喜慶ê時，她bat看過老父穿台灣禮服。

清子一點á都無需要裝好看頭á是採取假仙ê做法，因為西道子kah島田豋枝常常來陳家chhit-thô。In kah清子家己所體驗ê仝款，不管hit兩人tang時來，清子ê厝lóng hō͘ in充分感受tio̍h日本內地ê氣氛。高雅ê客廳，裝飾台頂時時有插花，有時清子ê老母koh會泡茶hō͘ in lim。比較起來，in ê厝是kā有白蟻蛀過ê台灣厝改建，koh舖tha-tha-mih而已；in ê家庭是teh過koh khah有台灣味ê生活。道子ê老父是一間金融公司ê職員；豋枝ê厝經營一間無大間ê雜貨á店。Chit兩位同學ê家境雖然m̄是sàn-chhiah，m̄-koh，mā m̄是富裕；兩人lóng欣羨清子ê家境。清子ê家庭富裕，koh有高尚溫和ê父母，á清子家己koh有非常超群ê好頭腦，畫圖kah音樂mā是無人kah她會比得。就混（lām）血ê條件來講，並m̄是ná東洋人kah西洋人ê混血，她kah台灣人ê外貌真相siâng，顯然無啥物複雜ê感覺。道子kah豋枝是tī台灣出世ê日本人，in lóng感覺家己kah日本內地有割bē離ê奇妙感情。
「清子，你畢業了後ê升學學校kám決定ā？Kám是beh去讀女子美術學校？Á是讀音樂學校？你ê英文á是國文lóng真好，究竟是beh讀tó一系，á是beh選擇啥物學校，lóng真傷腦筋ho͘ⁿh？」

道子是一個性情溫和ê大kho͘ cha-bó͘ gín-á，掛銀框ê目鏡，雖然有一點á隨便無夠穩重，卻是心地善良ê好人。她佩服理智koh冷靜ê清子，經常tòe-tiâu清子。另外hit位豋枝，她ê身體瘦，恬恬無嘴尾，雞卵面kah-ná gín-á hiah天真。M̄-koh，tú-chiah道子是用尖叫ê聲teh án-ne講，頷頸瘦抽ê豋枝卻細細聲á講：
「Án-ne真好，我neh，無一項ē-sái得，根本無可能hō͘ 我去日本內地ê學校讀冊。」豋枝真欣羨án-ne講。

豋枝有九州ê口音，聽起來怪怪。M̄-koh，教育ê普及kah有聲電影ê發達，讀正確ê語文kah視聽學習ê機會jú chē，台灣已經採用標準語化ê關西腔。敏感ê少女對殖民地ê語言有自我意識，koh再對殖民地語言ê性格有產生作用tī-.leh。 「烏白講，我知影她是因為未來ê丈夫已經決定ā。」

道子一下kā她ê tāi-chì講破，豋枝ê面變kah紅kòng-kòng，她搖頭極力辯解講：
「道子亂講，她烏白講lah。我m̄知lah。」

清子聽tio̍h mā驚一tiô；chit-ê瘦抽koh薄板ê cha-bó͘ gín-á已經有未婚夫ā ，清子感覺好笑koh可憐。
「Ah，重大ê新聞，án-ne，未婚夫是tó位ê人？」

豋枝kah-ná受tio̍h侮辱，恬恬koh頭lê-lê。道子無了解她ê心情，代替她講：
「伊tī市內ê一間機構工作。豋枝tio̍h繼承雜貨á店ê經營，所以tio̍h緊招kiáⁿ婿。因此，唱了「青青校樹」ê畢業歌，馬上to̍h是結婚進行曲。後年春天，學校ê木棉花開花ê時....我想tio̍h to̍h真感傷。M̄-koh，清子，chit項tāi-chì bē-sái對別人講，tio̍h保守秘密oh！」

道子半kún笑án-ne說明。Kah-ná iáu未熟ê果子ê豋枝，目屎含leh，強beh哭出來ê款。清子同情她，用有一點á指責ê口氣對道子講：
「M̄-thang欺負弱者。我若是án-ne hō͘ 你戲弄，我會kah你絕交oh。」
「Ah，驚死人！」
「當然，豋枝m̄是家己ài招kiáⁿ婿。我知影，無人ē-tàng照家己ê意思來行。你kan-taⁿ會曉講別人ê tāi-chì，你家己neh？聽講你畢業了後beh進入女裝裁縫師ê行業。
「Ngh，成做職業婦女。我不得不tio̍h án-ne，he是麵包ê問題。」道子無lam無neh án-ne講。

因為清子責備道子，所以豋枝控制家己，無哭出來。她chiah gia̍h頭，m̄-koh，她iáu是怨嘆家己kah人bē比得，就欣慕道子講：
「M̄-koh，道子，你bē bái，你ē-tàng去日本內地ā。」
「He是暫時ê幸福lah，無久tio̍h koh tńg來台灣。阮tī日本內地已經無近親ā，真無意思。」
「阮家族tī台灣已經有前人ê墓。」
「真鬱卒ah，人生四界lóng有墓地。日本內地ê秋天真súi neh。清子，你bat去過日本內地兩pái ho͘ⁿh？我kah豋枝lóng m̄-bat去過neh。」
「我真想beh去neh。看tio̍h清子穿長ńg ê和服，我真感傷。」

豋枝kah道子同時看tio̍h清子ê美麗身影，這m̄-nā是單純出tī嫉妒á是欣羨，koh是看見家己淡薄á ê鄉愁。
「Tùi咱chiah-ê tī台灣ê日本人看起來，hia是咱ê故國山河。」
「這是灣生ê悲哀。」

兩個少女外表顯出ê只是kún笑ê口氣，in無真清楚ê內心卻是teh吐氣。「灣生」是台灣出世ê日本人ê俗稱，chit-ê詞彙帶有一點á憐憫kah輕視。道子kah豋枝lóng是灣生ê cha-bó͘ gín-á。道子ê父母來台灣已經二十五年ā；來台ê時to̍h講：馬上就beh tńg去日本內地，馬上beh tńg去。結果in卻tī chit-ê土地生根；準講chit-má tńg去，若beh chhōe維持生活ê頭路，in mā已經來到無自信ê年齡。豋枝in厝裡ê人koh khah早來台灣，四十年前日本占領台灣了後無gōa久，in阿公to̍h來到chit-ê南方ê台灣島；豋枝tī chia已經是第三代。她koh無gōa久to̍h beh招kiáⁿ婿，對chiah-ê人來講，chit-ê殖民地已經是in ê故鄉。M̄-koh，in又koh想beh否定chit-ê事實，意識中iáu有一個真正ê故鄉tī遠遠ê所在，這致使in ê感情bē調和。台灣已經m̄是以前ê台灣，chit-má ē-tàng gia̍h頭挺胸，大步行路；tòa tī台灣kah tòa tī日本內地已經無啥差別；若beh去日本內地隨時to̍h ē-tàng去，beh來往幾pái mā lóng ē-sái。總是，第二代ê灣生有一種奇妙ê鄉愁，he m̄是一種oh得忍受ê強烈懷想，卻是kah-ná tùi厭倦生出ê悲哀。故國山河，有幸tòa tī hia ê人，in認為to̍h是東京；其實並m̄是真正有形ê東京á是大阪，是koh khah「籠統」ê，大概是想beh tńg去殖民地化以前原本ê家己，是tī無意識中產生ê一種叛逆ê心態。

食了種種好食ê料理以後，兩個受邀請ê同學請清子彈鋼琴，她就彈Sio-pháng（譯註：Chopin，1810~1849年，波蘭作曲家）ê《夢幻曲》。清子並m̄是為tio̍h in ê心情來選曲，是因為這是她最近chiah teh練習ê曲。

清子彈琴ê中間，音樂ê節奏ná親像悲哀ê波浪teh滾絞起泡。日本內地，日本內地....；chit兩位同學m̄知它生做啥款，因為in m̄-bat看過；m̄-koh，清子小khóa知影。

她想起小學ê時，老母chhōa她tńg去外家。Hit時，大風雪吹kah窗á門枋ko̍k-ko̍k響。因為kā窗á門枋關起來，所以厝內無光線；日時雖然有日頭，內面mā是暗bîn-bong，人tī hit中間生活，感覺真tâm濕；火爐teh燒柴，閃sih ê火光hō͘ 室內有一kóa光線，而且看起來kah-ná有teh kā濕氣烘ta。Gín-á kā馬鈴薯khǹg入去火爐內ê火hu裡pû，pû馬鈴薯the̍h tī手裡，se̍h-se̍h-.leh了後chiah食。暗時，tī暗淡ê燈火下面食柑á，hia ê柑á細粒koh酸。In kā幾塊á煎餅用針穿起來，吊teh sńg；庄腳gín-á teh sńg chit種簡單ê遊戲，sńg kah真歡喜。無舖地板ê室內土腳親像砂糖ê色，koh闊bóng-bóng。有人tī土腳舖草蓆á，tī hia teh搓(so)索á。房間ê邊á to̍h是馬寮，暗時聽會tio̍h馬ê鼻孔teh喘氣ê聲，這一切lóng無啥趣味。行出門外，厝頂垂落來ê冰柱，用棍á一phah，to̍h hoa-la hoa-la lak落來；kā雪chhòng做一團，用紅豆裝做目chiu，用山茶花裝做耳孔，做成一隻兔á ê形狀。
「Ai-ah，真寒neh！Kám hiah-ni̍h有趣味oh？」Hiah-ê gín-á對清子sńg雪ê經驗感覺真不可思議，清子家己mā無感覺真有趣味，m̄-koh，m̄知為啥物，ná會想beh tòa tī hia？她想tio̍h老母雙手合十，tī祖先ê像頭前teh哭；這to̍h是老母ê厝，老母ê故鄉，m̄-koh，對清子來講neh？清子án-ne teh想。

對清子來講，這kám是她ê故鄉？M̄是。她身心所體驗tio̍h ê是：阿公阿山ê葬式，á是廳堂掛leh ê新娘燈，á是廟祭kah絃á ê聲；這to̍h是她ê故鄉。M̄-koh，她koh感覺mā m̄是；這是gōa-ni̍h-á矛盾ê心理？

Chit兩位同學大概是感覺tio̍h日本人tī台灣出世ê鬱卒，m̄-koh，安子想講家己連灣生都m̄是；我既然是日本人，又koh是台灣人，這等於是講我m̄是日本人，mā m̄是台灣人。Chit兩個ná親像是oh得調和ê水彩色料，lóng無法度調配出清爽ê好色彩。

Chit兩位同學ê心內有in ê故鄉，hit-ê故鄉tī遙遠ê所在，茫茫渺渺，mā有可能是虛幻ê，m̄-koh，in ē-tàng想像，koh ē-tàng去走chhōe；有時像chit首優美ê音樂飄出ê鄉愁，有一點á病態ê心靈。總是，家己neh？清子想tio̍h家己所感受ê是莫名奇妙ê不安kah無趣味；有一點á bái，ná親像bē協和ê音樂。 彈完chit首，同學phah pho̍k-á，要求她koh彈一首。音樂真美好，清子感覺心情tháu放，興趣滿滿。然後，in三人就開始ī khe-chi-bang（譯註：「撲克牌遊戲」ê一種），氣氛就án-ne鬧熱起來。
「Ah，lín teh ī khe-chi-bang oh。」Chit時，清子ê老父滿面笑容行入來。

清文穿台灣式ê禮服；伊去赴某一個名門世家ê宴會，tú-tú tńg來。清子tú-chiah kā同學講in老父絕對bē穿chit種衫褲，她從來m̄-bat tī同學ê面前hiah-ni̍h pháiⁿ勢過。因為心理作用，清子感覺同學lóng露出不可思議ê表情。她chit-má chiah後悔，ná會無beh穿hit領台灣衫來hō͘ in老父歡喜？老母勸她穿ê時，為啥物她無beh聽老母ê話neh？而且老父ná會今á日特別穿chit種衫褲？這kám m̄是伊事先設計好勢ê報復手段leh？

清子soah同時怨恨chit兩種衫：她家己穿ê長手ńg ê華麗和服，kah老父chit-má穿teh ê台灣衫。