《《陳夫人》日譯台e5台灣小說 第一部》 |
 |
 |
|
 轉寄 |
《陳夫人》第一部 第七章（更新版）
作者 庄司總一 著 楊東傑 指導 林俊育 台譯 2017.04.30
過了年，安子ê身體iáu是無爽快，倒tī眠床頂，mā無法度kah頂年底仝款，kah in翁做伙去街á買有寫吉祥對句ê春聯。雖然其中有一個春聯án-ne寫：「喜溢高堂椿萱茂，慶鐘洞府琴瑟和」，m̄-koh，今年無辦法有像chit款thang歡喜ê情景。新正（chiaⁿ），安子kan-taⁿ食一塊甜粿，只有kā新年ê氣氛小khóa用舌tam一下niā-niā。正月初一hit工中晝，氣溫koân到攝氏40度，無適合新年ê氣氛。
一般人ê病kiáⁿ期已經過去，m̄-koh，安子iáu是吐bē停，lóng無食慾，身體一工一工消瘦落去。清文漸漸心情憂鬱bē爽快，無ài講話。安子想講kám是她家己一直無爽快，倒tī眠床頂，chiah致使清文感覺無趣味，而且看伊身體漸漸衰弱，soah開始煩惱in bó͘ ê身軀；本來是歡喜安子有娠，chit-má 卻煩惱安子若無tú好可能會流產，所以hō͘ 伊感覺不安。M̄-koh，有一工，清文來到她ê枕頭邊，講：
「你看怎樣？咱chhōe一工來做人工流產，kám好？Gín-á隨時ē-tàng koh懷孕來生，kám m̄是？」
清文án-ne講ê時，安子心內感覺m̄是滋味；「gín-á隨時」 chit句話，hō͘ 人聽tio̍h 感覺是一種冷淡無熱切koh無謹慎ê口氣。受氣hit當時，清文tú聽tio̍h她有娠，伊滿心歡喜牽她ê手講：「聖Ga-bu-li-l（Gabrial，天使長）終其尾來報喜loh！」。Chit兩種情況比較起來，差別真大，安子感覺孤單不滿。
「醫生kám有對你講我ê身軀chih載bē-tiâu？伊bat對我講chit-má iáu未到tio̍h採取最後手段ê必要時刻。」
「講是án-ne講，m̄-koh，你ê身體hiah-ni̍h衰弱，我chiah會án-ne想。準講你忍受艱苦，勉強kā嬰á生出來，mā是無法度保證是健全ê gín-á，而且你ê身體若有萬一ê tāi-chì發生，to̍h無thang補救loh！」 「無問題lah！醫生有保證，一切lóng有神好旨意ê安排。假使知影會生出智障á是殘障ê gín-á，我想這mā是咱人類tio̍h去面對，來kā它好好處理ê tāi-chì。」
「無聊！」
清文用輕視ê口氣講，koh露出kah-ná無歡喜ê pháiⁿ面chhiuⁿ。
「Ai-ah！真失禮。無lah！無hiah無聊ê tāi-chì！咱會生一個受祝福ê優秀ê gín-á lah！我時時刻刻teh期待—gín-á若會像爸爸，有勇壯ê體格，聰明ê頭腦，是一個完全傳承你ê gín-á，我to̍h會真歡喜neh。」 He是安子真實ê ǹg望，lóng無扶tháⁿ ê意思，m̄-koh，tī清文小khóa火大ê chit chūn，soah hō͘ 伊感覺有扶tháⁿ ê口氣，這mā是難免ê lah！既然是án-ne，伊m̄是m̄知in bó͘ bē講白賊ê正直性格，若beh koh khah受氣是無理ê。
「你最近kah-ná有啥物tāi-chì teh煩惱ê款，若是為tio̍h我，he是khah無要緊；你是m̄是有其他煩惱ê tāi-chì neh？」
「無lah！」
「Án-ne to̍h好。若有艱苦心ê tāi-chì，請隨時kā我講講leh。我án-ne kan-taⁿ倒tī眠床頂，hō͘ 你感覺真煩，而且我koh bē-tàng kā你tàu做啥物，可能án-ne soah hō͘ 你bē-tàng kah我參詳tāi-chì，m̄-koh….，tio̍h lah！無gōa久前ê財產問題，chit-má變án怎ah？最近lóng無聽你講起chit件tāi-chì。」
「你án-ne煩惱東煩惱西，m̄好lah！這對你ê身體無好。有關財產分配ê tāi-chì，我已經bē記得à。景文kah-ná是考慮你teh破病，最近mā lóng無koh來；有時相tú-tio̍h，我提起Chit件tāi-chì，伊kah-ná無啥物心思，就講tùi別項tāi-chì去。這本來是伊家己先提起ê問題，實在真奇怪。」
清文講tio̍h kah自身有關ê tāi-chì ê時，bē輸小弟hiah認真，m̄-koh，chit-má soah講bē記得，所以清文ê憂鬱顯然kah hit-ê問題完全無關係。安子想講一定是kah伊ê職務工作有關係；以前她bat問過hit-ê問題，m̄-koh，清文含含糊糊回答，kah-ná盡量無ài去kha̍p-tio̍h chit-ê問題，看起來相當傷腦筋ê款。安子bat小khóa聽講in翁tī辦公室內無啥受歡迎，m̄-koh，最近引起排斥運動等等ê tāi-chì，她一點á都m̄知影。既然翁婿無beh講明，安子感覺對公務方面伊mā不便插嘴；雖然心痛，她mā是就án-ne，無beh koh提起。
Án-ne ê日子一工一工過去，安子臨盆ê日子到à，生產過程非常無順，胎兒hō͘ 老母足足艱苦兩日兩暝，終其尾chiah生出來。 總是，chit-ê gín-á拒絕出世做人ê光榮，卻tī暗暗ê所在來死去，因為臍帶ân-ân捲tiâu伊ê頷頸。
男嬰ê發育相當好，夫婦兩人更加灰心失望。若是心臟小khóa有teh tín動，m̄知gōa好leh！Án-ne 伊to̍h會哭、會笑，koh會讀冊、談戀愛，mā有優秀ê思想kah偉大ê行動，有無限發展ê可能性。Án-ne kā有活命ê恩惠kah趣味放棄，hiah-ni̍h無膽to̍h死去，做老父ê清文感覺chit-ê嬰á實在有夠亂來，心內非常受氣。M̄-koh，做老母ê khah單純，她感覺連一分鐘ê生都m̄知ê死實在是全無意義；受一點á祝福都無ê嬰á，實在有夠可憐。安子無kā嬰á當做死去，kah-ná伊iáu活leh hō͘ 伊睏tī身軀邊，禁bē-tiâu kā面貼tī無血氣冰冷ê嬰á ê面。 連ta-ke阿嬌mā來到眠床頭，流目屎講真可惜，表示遺憾，講出真怨嘆ê話：
「所以我m̄是有kā你講過，ài請道士來誦經安胎，pháiⁿ器具mā tio̍h貼安胎符。M̄-koh，你感覺我講ê話無路用，無beh聽，chiah會致到chit種ê不幸。總是，你iáu少年，以後iáu ē-tàng生幾nā個gín-á，m̄-koh，chit-ê嬰á bē-sái án-ne khǹg leh，因為死去ê嬰á有鬼附身。」
阿嬌án-ne講了，就命令cha-bó͘-kán-á kā死嬰tùi安子身邊抱走。
「Ah！Chit-ê嬰á你beh kā伊怎樣leh？」
「Tio̍h kā伊tàn落去水裡。」
「Ai-ah！Hiah殘酷！Βē-sái對嬰á做hiah-ni̍h可憐ê tāi-chì lah。阿母，chit-ê gín-á死去à，我無beh kā伊浸tòa水裡，mā bē kā伊用火燒。」
「死去ê gín-á無án-ne處理bē-sái lah！若無kā死嬰á tàn落去水裡，伊會變做鬼來kā你作怪，你to̍h bē-tàng koh再生kiáⁿ。M̄-nā是án-ne，咱全家mā m̄知會遭遇tio̍h啥物款ê災厄neh。」
「我無ài lah！請mài kā伊抱走。Lín絕對無隨便kā伊處理ê權利，伊是我ê gín-á，神ê kiáⁿ。」
安子知影台灣人迷信，mā知影chit位老大人koh khah特別迷信，m̄-koh，她無法度容允chit款愚戇koh無慈悲ê迷信。安子ná親像孵卵ê雞母向侵害者做拚生死ê防衛kah狠猛ê反抗，雄kài-kài ê目chiu金sih-sih，kā嬰á攬tòa胸前保護tiâu-leh，極力拒絕ta-ke固執ê舊習慣ê要求。M̄-koh，he只不過是冰冷koh軟siô-siô ê一塊肉，橫直iah bē-tàng kā伊飼奶，也bē-tàng永遠hō͘ 伊睏tī身軀邊。Tāi-chì m̄-nā án-ne niā-niā；雖然m̄是應驗阿嬌ê講法。總是，續落來死神行óa來到產婦本身。
安子起月內風，體溫koân到攝氏四十度以上，開始講陷眠話，有時koh會亂tín動，烏白講話，真是意外ê tāi-chì。若這是病症ê一時發作，就無特別奇怪，m̄-koh，tùi平常時hiah-ni̍h安靜優雅ê性情看起來，清文無法度相信安子會有chit款發狂亂來ê姿態出現，而且她ê胡言亂語無完全是亂來ê妄想；清文感覺he是ná親像平常時講bē出ê心思意念，kah-ná酒醉ê人大膽kā伊ê坦白話lóng piàⁿ-piàⁿ出來。其中對陳家厝裡ê人不滿ê話非常刻薄pháiⁿ聽，罵in ná親像豬hiah-ni̍h kē路、無知、固執、無人情味等等，終其尾對家己翁婿ê不平kah不滿mā lóng拚拚出來，chiah-ê話惡毒kah卸(sià)伊ê面子，伊m̄知beh怎樣chiah好。
陷眠話中間不時出現「想beh食蒜蔥！」M̄-koh，清文m̄-bat看過mā m̄-bat食過，所以m̄知她teh講啥。In bó͘ ê命好佳哉救活了後，伊為tio̍h beh探查hit句「蒜蔥」ê秘密含意，就恬恬á去查《言海》(譯註：日本ê國語辭典)。伊查tio̍h蒜蔥是「蔥類，葉真細，綠色，春天過了，葉ê味真重，無適合食用。」
Kan-taⁿ án-ne ê解說，清文無法度理解到底蒜蔥是有gōa好ê滋味，m̄-koh，he應該是安子故鄉ê植物chiah tio̍h。安子懷念hit-ê記憶中ê滋味，可見tī她ê潛在意識中有真深ê鄉愁。 安子ê健康日日回復起來，清文特別會記得hit件蒜蔥ê tāi-chì。
「你kah-ná有思鄉病，是m̄是？你tńg去日本內地ê故鄉一chōa看māi leh。」
有一工清文án-ne講，安子感覺chit句話無真體貼，清文並無hit種心，kah-ná是teh kā她khau洗leh。
「你講思鄉病oh，無hit-ê tāi-chì lah！你ná會忽然講chit款話 neh？」
「台灣無蒜蔥chit種物，he kám m̄是真好食？你ē-sái tńg去故鄉一chōa，kā它食一下chiah tńg來。」
「Ai-ah！你講啥物話？」
「你kám bē記得ah？」清文苦笑，ná像bē通tèⁿ戇講：「前pái你生產破病ê時，你講陷眠話講亂嚷，kā所有ê tāi-chì lóng講講出來。我聽tio̍h心肝真艱苦，hiah-ê話lóng是事實，m̄-koh，hō͘ 我小khóa失望，感覺孤單。」
「Ai-ah！我kám講kah hiah-ni̍h過份？我lóng bē記得了了à。無lah！我是知影家己病發作ê時，ná起siáu teh亂來，烏白亂嚷，m̄-koh到底講啥物，我已經記bē清楚à。」
「Kám án-ne？你kám bē記得所講ê一切？」
「我kah-ná有講真pháiⁿ聽ê話，請原諒，因為hit當時我已經精神失常。請你kā我講hit時我所講過ê話，koh kā我責備，一直到你心爽；你若恬恬m̄講，會比啥物lóng khah艱苦。」
「是lah！恬恬m̄講確實真艱苦。無lah！我m̄是teh kā你責備，kan-taⁿ感覺真意外，soah小khóa失望。」
In bó͘ tī危險狀態ê時，清文一心kan-taⁿ想beh救她ê命，根本都無心chiâⁿ去思考安子hiah-ê陷眠話。M̄-koh，chit-má in bó͘回復健康，tùi危急中救tńg來，因為安心kah歡喜ê感情漸漸消退，soah有反常ê想法。清文就kā以前買了bē記得讀ê佛洛伊德(譯註：Sigmund Freud，德國出名ê心理學家) hit本《夢ê解析》(“Die Traumdeutung”) 掀開來讀。作者講：「直接ê責備kah正面ê受氣是ē-sái得，m̄-koh，ná親像狐狸hiah-ni̍h疑心重來試探bó͘ ê內心，chit種做法是下賤ê。」清文是因為伊tī社會上有tú-tio̍h非常ê逆境，就不得不kā chiah-ê失意kah不安ê心情對in bó͘來tháu氣。
「He叫做潛在意識。Tùi無ê內底無法度生出啥物物件；心內有物件chiah會講出來。你ná親像聖女hiah-ni̍h純真恬靜，溫柔koh有耐心，我真感心，mā真kā你感謝。M̄-koh，你心中若有抱不滿，感覺無幸福，án-ne 就lóng無路用，kám m̄是？若是án-ne，你顯然teh對我表示隨在你大聲亂嚷，我m̄知gōa-ni̍h-á好leh。」
「無lah，無lah！Hit時，我kui個頭殼變kah真奇怪。我m̄知你講ê潛在意識是啥物意思，m̄-koh，kā我起siáu ê時所講ê話當做真ê來kā我責備，我感覺有小khóa khah過份。你家己最近chiah是有小khóa變，焦心koh多疑，你lóng kā tāi-chì想偏去。」
「Mā有可能，m̄-koh，你看起來ná親像無幸福；你無幸福是我siōng無ài ê tāi-chì。」
「你家己若無幸福，我ná有可能幸福neh？」
「你問講我有幸福á無？我想我kah-ná是kah幸福lóng無緣ê人。第一，咱ê婚姻一開始to̍h無順利，你ê親chiâⁿ硬beh kā你giú離開我，唯一ê理由是因為我是台灣人。我去到你ê故鄉，tī tha-tha-mih頂磕頭kā lín老父哀求，m̄-koh受tio̍h極其冷淡ê拒絕。Hit種屈辱感時時kah-ná舊傷發作teh刺傷我ê心。我知影chit種無像(sêng)基督徒ê狹(e̍h)心胸真見笑，m̄-koh也無法度改善。Hit當時，你決定beh kah我分離，若是你ê疼kah理解有夠深，hit時，我tī火車站大聲hoah，唱「願主保護咱後會有期」(譯註：台語聖詩第446首)，á是發生鐵路事故mā無定tio̍h，m̄-koh….。」
「請mài koh講hit件tāi-chì à！Hit時，我是軟弱ê人，我無像你hiah堅強，欠缺突破命運ê氣力。我感覺對你真pháiⁿ勢，m̄-koh，神若有指示咱方向，我to̍h絕對bē koh搖動á是迷路，ǹg望你ē-tàng了解chit點。我若後悔kah你結婚，若講對tī陳家ê生活不滿，感覺艱苦，án-ne tī提出分財產，你講beh離開chit間厝ê時，我ná會無gia̍h雙手贊成leh？你siuⁿ過神經質teh掛意我ê tāi-chì lah。你若硬beh問我講幸福á是無幸福，án-ne，終其尾會hō͘ 我變成無幸福；ná親像無罪ê人經過拷問，mā會講出假ê口供。」
安子目屎含leh，真罕得hiah激動án-ne回答。她不得不慎重反駁清文無合情理ê講法，m̄-koh，她家己心內kám有bē堪得hō͘ 清文kha̍p-tio̍h ê所在？她時常án-ne teh疑問，不時掛tiâu tī心肝內。清文看tio̍h in bó͘無幸福，比啥物都khah艱苦心，m̄-koh，問題是兩人所追求ê幸福，性質有真大ê距離。清文對無幸福感覺恐怖，盡力beh逃避，也就是kah世俗追求幸福ê人仝款；安子卻kah伊對反，她m̄驚無幸福，會直接面對事實，有時顛倒會去接近hit-ê無幸福ê狀態，也就是beh追求宗教上精神安定ê人。
清文ê理性知影in bó͘講了有理，m̄-koh，感情上卻無法度心平氣和。安子因為失落嬰á，心內空虛，無容易解脫，所以短時間內，夫婦ê感情無真融洽(ha̍p)。秋天已經臨到，m̄-koh，四界lóng無秋季ê氣氛，熱kah kah熱天差不多仝款，而且樹葉á mā無變紅，mā無落葉。Kan-taⁿ街á因為台灣人過中秋節真鬧熱，mài講廟祭ê鬧熱喧嘩免講，連陳家mā是連續幾nā日吵吵鬧鬧ê聲不斷。放炮á、燒金紙銀紙ê煙滿四界，宴席排到半暝，吵鬧ê音樂響無停。M̄-koh，安子對看台灣歌á戲無趣味，食月餅mā無感覺好食。安子目chiu 金金看hiah-ê人劇烈生活慾望ê表現，koh khah hō͘ 她感覺家己ê孤單。她心內tiāⁿ-tiāⁿ想起tī日本內地ê親兄弟kah眾親人ê tāi-chì，一工過一工，她kah in jú離jú遠，對chit種hō͘ in bē記得去ê悲哀命運，她感覺心痛。她tī病床無意識中講出chiah-ê鄉愁；以前一直沉tī心底ê chit種無幸福感，iáu無成做精神生活ê障礙，iáu無顯露tī表面，m̄-koh，清文chiah-ê話kah-ná弄草驚蛇，顛倒引起她ê鄉愁。
清文有一工kah平常無仝ê情形tùi辦公室tńg來；激動ê眼色，變橫ê面有小khóa蒼白。安子比平常時koh khah小心，kā伊ê官服thǹg落來。已經是涼爽ê季節，m̄-koh，伊ê siá-chuh 卻hō͘ 汗濕kah是tâm lok-lok。
「你是m̄是身體無爽快？」
安子phâng加冰角ê kha-lu-phi-suh (譯註：可爾必思，是一種乳酸菌飲料) hō͘ in翁，心內膽膽(tám-tám)kā伊問。
「Ngh！」清文發出曖昧ê聲，用吸管lā杯á內ê飲料，嘴角振(tín)動kah-ná想beh講啥物話。忽然，伊受氣大聲罵：
「無路用！」
因為siuⁿ過突然，安子kah-ná去hō͘ 電電tio̍h，感覺kui身軀麻起來。
「Chit款ê飲料kám會lim得？」
清文激動kā杯á tu還安子，安子ǹg杯á內一看，原來內底有浮一隻胡蠅。
「Ai-ah！我真無注意，m̄知tang時飛入去，我緊來換一杯。」
「我無ài à lah！」
清文用kah-ná beh吐出ê口氣講了，懊惱kah目頭結結行出房間，peh起lih二樓ê冊房。安子想無撇步，一時tī hia驚kah gāng去。清文個性相當激烈，m̄-koh，到taⁿ為止伊iáu m̄-bat對in bó͘發出hiah-ni̍h明顯ê受氣。
食了無味無素ê暗頓了後，「Tú-chiah我m̄好，請赦免我！」清文án-ne會失禮。雖bóng伊率直講出，其實伊ê心內有啥物痛苦bē堪得忍受ê款，伊ê目chiu甚至有看見目屎。
「無lah！是我無細膩，失禮lah！因為我lóng無注意tio̍h有胡蠅飛入去。」
「M̄是胡蠅ê tāi-chì；hō͘ 我受氣ê是人，人kah-ná胡蠅浮tī杯á裡。清文teh beh苦笑ê面隨時變成痛苦ê嚴肅氣氛，「安子，我決定beh辭職無ài koh去上班lah！」
因為以前m̄-bat聽過伊講chit款話，安子真意外tio̍h驚。Chit-chūn伊chiah明白kan-taⁿ一隻胡蠅hō͘ 伊hiah-ni̍h受氣ê理由。對安子本身來看，無論如何，對清文來講一定有種種ê理由tī-.leh，所以是大問題koh是重大ê變化，安子kan-taⁿ感嘆一聲「Ai-ah！」以外，無法度koh講落去。
「最近課長ê人事變動已經決定，你想看啥人beh來接chit-ê缺？是kah我仝期ê大學同學，這hō͘ 我非常憤慨，而且對方是落第兩pái ê漏屎馬neh。若無仝課iáu無要緊，伊卻是kah我仝課chiah害。我tio̍h每工早暗tī chit-ê以前仝期ê漏屎馬面前tòm頭，服從伊ê命令。我kám有法度忍受chit種ê侮辱？Kám-tio̍h án-ne忍受？」
「Ná會發生chiah-ni̍h奇怪ê錯誤？準講是出tī偶然，mā是有khah過份。」
「並m̄是偶然。」
「Án-ne kám講是thiau故意ê？」
「真惡毒ê計略！In顯然是thiau故意beh惹我受氣，án-ne hō͘ 我tòa bē落去，偷偷á溜soan，chiah hō͘ 人來kā我恥笑。」
「有夠可惡！你kám知是啥人想出chit種惡毒ê主意？你無kah人結啥物冤仇chiah tio̍h。」
「M̄是lah！我kah-ná是容易惹人無歡喜ê人；至少對hit款社會ê人是án-ne。我無法度做到清濁合流，m̄-nā是做bē到，無ài lah，我討厭án-ne做。無四正、曖昧、馬馬虎虎ê tāi-chì我真討厭。我想beh hō͘ 社會來肯定，所以kah-ná有小khóa著急，這是我ê見笑。M̄-koh，我一直要求家己ê價值來肯定人，我m̄是m̄知扶tháⁿ、醜陋ê設計，á是利用金錢ê做法，m̄-koh，我絕對做bē落去lah！我ê性格kah in bē合，m̄-koh，chit pái m̄是個人怨恨引起ê小khóa tāi-chì，是全體ê聯合抵制(boycott)。到chit-ê地步，我無beh koh再厚面皮去上班；我已經看破官僚生活，所以我斷然決心提出辭職書。」
「變kah hiah-ni̍h慘！無chhái你抱tio̍h熱情kah ǹg望teh行chit條路。對chit件tāi-chì你tio̍h平靜落來好好á思考leh，一時ê感情用事來放棄生涯是算bē hô lah！」
「M̄是一時ê感情用事，絕對m̄是。雖然我m̄-bat對你講起，m̄-koh對chit件tāi-chì，我早to̍h不斷teh思考，teh操煩。」
清文ê聲講到chia忽然變無力ê聲說(soeh)，kah-ná無beh koh講落去ê款。清文激動ê火鎮靜落來，看起來kah-ná向oh得抵抗ê壓力àⁿ頭投降ê款。Chit時，安子chiah清楚了解in翁ê心情；台灣人差不多lóng無法度升任高級官員。安子以前加減有聽過in翁無屬tī chit款ê例，m̄-koh，不管in翁gōa-ni̍h努力、gōa-ni̍h用苦心，伊總是有無法度超越ê障礙，伊ê升遷有一定ê限度。大約一年前開始，伊就有不安操煩ê面色，偏見、猜疑心kah急性等性格ê缺點mā非常明顯。安子hit時真無法度了解一個人ná會變kah hiah-ni̍h無溫柔koh刺鑿（chhì-chha̍k），m̄-koh，她chit-má lóng了解à。如果in翁若是日本內地人，tú-tio̍h siâng款ê逆境、苦惱ê時，hit-ê程度雖然相仝，m̄-koh，情況會小khóa無仝chiah tio̍h。這m̄-nā是針對單純社會制度高升ê限制，頂koân iáu有民族ê思想kah感情參雜tī-.leh，所以仝款ê憤慨kah仝款ê苦惱，有可能呈現出無仝koh複雜ê面貌。
「我雖然一直無kā你講....。」清文án-ne講，伊ê話中有悲傷。
「若是án-ne，ná會無beh量早 kā我講neh，ná會無beh kā所有ê煩惱對 我講明，無ài全身óa靠我leh？」安子án-ne teh埋怨。 清文不斷teh掛意ê「無幸福」，安子m̄-bat親像chit-má用chiah明顯强力ê形貌來hō͘ 伊感覺tio̍h。
