《《陳夫人》日譯台e5台灣小說 第一部》 |
 |
 |
|
 轉寄 |
《陳夫人》第一部 第六章（更新版）
作者 庄司總一 著 楊東傑 指導 林俊育 台譯 2017.04.23
景文sak開銀行ê門行出來，涼風對面吹來，感覺真爽快。已經是十二月天，微弱ê日頭照tio̍h厝瓦，m̄-koh，感覺m̄是寒冷ê天氣，景文會án-ne感覺，是因為伊ê面燒燒。
景文tú tī銀行存入去一大筆錢，而且chit筆錢差一點á to̍h kah-ná去hō͘ 大風吹tio̍h樹葉á，飛了了；伊tī米市thàn來ê一萬圓差一點á to̍h去hō͘ in bó͘玉簾搶去。因為玉簾ê súi面貌，景文對玉簾ê固執kah奢華，一向lóng有某種程度ê容允；這是kah-ná teh割肉，姑不而將ê做法。所以，對玉簾來講，丈夫對她ê所做所為，她lóng無感覺tio̍h一屑á好意ê溫暖，而且景文容允她自由使用ê錢mā是有限。最近幾年來，玉簾ê後頭厝手頭無方便ê時來借錢，她講借in一千圓好無，景文就回答講：「我to̍h m̄是teh開銀行。」她若beh借一百圓，siōng加hō͘ 她十分之一來融通to̍h算bē bái à。
玉簾明知丈夫hiah-ni̍h凍霜，她偏偏beh向伊ê凍霜性格挑戰，奢華亂開錢。她ê容貌姿色、服裝á是生活水準，lóng無ài輸陳家任何一人；事實上，是無一人ē-tàng達到她ê水準。M̄-koh，忽然間，tùi安子chit-ê外來分子踏入陳家以後，她ê優越地位開始受tio̍h威脅。安子lóng無意beh kah伊競爭，只是玉簾無beh輸人，soah起著急；tùi邊á kā她看起來，實在真好笑。玉簾mā無明白家己為啥物tio̍h án-ne kah安子競爭neh？玉簾若知影安子使用進口ê白粉，家己若無趕緊去模仿她soah bē-sái得；若看安子穿洋裝，家己mā beh去做洋裝來穿；安子ê手指(chí)若有鑽石閃光，她就要求in翁買鑽石手指hō͘ 她。
Kan-taⁿ像chit款ê裝飾品，景文會勉強kā她應付；鑽石手指就買五圓左右ê玻璃模仿品來kā她瞞過去。M̄-koh，有時她會提出koh khah無理ê要求。
「你mā為咱起一間á新厝leh！咱tòa ê是百gōa年ê老厝，有臭phú味koh四界lóng是siān尪á kah ka-choa̍h。阿兄ê厝真好，新koh現代化，看起來真爽快，而且in koh m̄知tang時也買一台鋼琴ā。Tòa hit款厝，心情自然to̍h明朗起來，mā khah 高尚。你kan-taⁿ會曉積聚金錢，無路用lah！咱來起一間bē輸in ê新厝kám m̄好？」
Chiah-ê競爭心kah虛榮心，景文ē-tàng kā她當做是淺薄ê女人心，笑笑á kā她應付to̍h ē-tàng解決。M̄-koh，chit-má soah発生koh khah現實koh迫切ê問題來。最近玉簾ê後頭厝kiōng-beh面臨經濟崩盤。
玉簾出世ê王家，tùi清朝時代起to̍h代代做官，有一代做到縣知事，ē-sái講是名門世家。總是，到日本統治以來，王家就發展無路來。假使玉簾ê老父王世澤做人khah溫柔忠厚leh，靠伊ê家世背景留落來ê光輝，應該ē-tàng hō͘ 伊tī社會上有某種程度ê地位。事實上，有一段時間伊bat擔任過市ê協議員kah某合作社ê社長。總是，伊是一個見識koân，急性koh無深思ê人，kha̍p-bē-tio̍h to̍h beh kah人起衝突。因為chit種生來to̍h án-ne ê性格缺點，最後無人beh kah伊往來，繼承ê財產mā漸漸開了了，chit-má就用冤家kah相爭來發洩伊ê鬱卒。 有時父kiáⁿ、夫婦之間mā去法院相告，ē-sái講是台灣人愛訴訟ê例。王世澤經常kah人惹起糾紛，去法院kah-ná是伊ê興趣leh。
王世澤續尾行到破產ê地步，只好chhōe看有啥人thang哭求；伊已經無啥物thang koh顧體面kah志氣à。對cha-bó͘-kiáⁿ玉簾來講，這mā已經m̄是像白粉kah sui衫hiah-ni̍h簡單ê tāi-chì。她kah in老父仝款，有真高貴ê優越感，chit-má是她第一pái謙卑，àⁿ頭向in翁拜託。
「若老父所講ê兩萬圓有困難，á無he ê一半mā好。這m̄是講beh hō͘ 伊，是beh kā你借ê。」
「Hō͘ 伊kah借伊ê講法雖然無仝，實際上是仝款ê tāi-chì。」景文顯出一屑á都無參詳餘地ê口氣。
「無no͘h，一定會還lah！阮老父是信用可靠ê人，因為siuⁿ過清廉，所以chiah會kah人無法度和睦tàu陣lah！伊絕對m̄是hit款有借無還奸巧ê人lah！」
「講是án-ne講，m̄-koh，無手ńg to̍h ia̍t無路來lah！親chiâⁿ眞正起糾紛ê時，我無hiah大膽去控告丈人，準講lín老父告我，我mā m̄敢。」
「Koh khah án怎，伊mā bē做hit款tāi-chì，而且還錢mā m̄是講無望ā。阮小弟肇基明年beh進入醫學院，等伊做醫生了後，會加倍還你lah！我無法度目chiu金金看我ê後頭厝破產，年老ê雙親kah小妹kah-ná乞食tī街頭流浪，若是án-ne，我寧可死死leh khah好。Ah！景文，我一生chiah kā你求chit pái。過去我固執拗蠻，真失禮lah！以後我會注意，bē koh ài奢華ê衫褲kah貴重ê裝飾品，ta̍k項tāi-chì mā lóng會照你ê意思，做一個好bó͘ lah！你phah拚thàn錢ê心情，我chit-má知影lah！你不管別人án怎kā你恥笑，lóng無搖動向你自信ê路勇敢前進，實在是無tè比可靠ê人，真偉大！我以後mā會改頭換面，phah拚kā你協助。若有一工，咱ē-tàng成做親像林本源án-ne ê億萬富翁，m̄知beh gōa好leh！」
玉簾用幼綿綿ê手指(cháiⁿ)kā in翁ê手惜命命tēⁿ-.leh，kah-ná龍眼籽ê烏目chiu仁偷看伊ê面，一時á頭to̍h àⁿ落去，目屎chha̍p-chha̍p滴。景文khǹg tī桌頂ê手hō͘ 她ê目屎滴kah tâm-lok-lok；伊感覺家己親像tēng土ê心kah-ná hō͘ 溫柔ê雨水ak tâm去。總是，景文平常lóng是利益贏過感情，何況女人ê心kah天氣仝款，變化無常，尤其是chit-má玉簾所講ê話kah所流ê目屎，若kā它當做是真正對翁婿ê信賴kah戀慕，he to̍h siuⁿ過愚戇無知loh！景文到taⁿ iáu記kah真清楚：結婚後一禮拜，玉簾ê老母來探訪hit工，她講：「阿母，我嫁來chia lóng無快樂，我對伊一屑á kah意都無。」景文有偷聽tio̍h她對婚姻ê失望kah不滿。實際上，伊ê愛情到taⁿ iáu未開花leh！雖然結婚chiah一年ê時，景文用盡苦心beh得tio̍h súi bó͘ ê愛，m̄-koh，hiah-ê熱心kah痴情lóng無效，結果伊曉悟女人不過是hō͘ 男人ê活動力變遲鈍，甚至是kan-taⁿ破壞niā-niā。
玉簾用盡sai-nai、哀求ê辦法，m̄-koh，in翁ê心完全hō͘ 她phah bē tín動。開錢比人加倍大方，性情激烈koh感情脆弱ê玉簾，對in翁ê冷酷感覺無奈kah失望。
M̄-koh，玉簾每工哭teh哀求，景文ê硬心腸也漸漸軟落來。總是，昨暗景文phah開khǹg tī客廳地板下ê金庫，發見內底ê銀票lóng無了了去à！He是會hō͘ 伊面失色ê大條錢。伊隨時注意tio̍h，就chông去隔壁ê房間，玉簾倒tī眠床頂teh假睏。
「玉簾，你是án怎lah？錢lám-teh睏bē bái ho͘ⁿh！」
景文目chiu金sih-sih koh面青sún-sún，看起來非常激動；真冷靜ê冷笑參雜khau洗ê口氣，koh顯露出一種會hō͘ 人起驚惶ê面chhiuⁿ。玉簾tùi眠床頂落來，m̄-koh，她一手若無掠tiâu眠床邊就無法度khiā在。Tùi她淺紅色格á紋ê睏衫下面ê藍色天鵝絨褲腳，ē-tàng看tio̍h她可愛ê縛腳，in顯然無法度支持她phi̍h-phi̍h-chhoah ê身軀。為tio̍h無ài hō͘ 人看tio̍h，她一手the̍h物件藏tī kha脊後，用她驚惶，ná beh消失ê聲講。
「我m̄知lah！」
「我是一個非常無警覺ê人，竟然tī厝裡，我ê身邊有飼一個賊á。」
玉簾chit時kah-ná一隻hō͘ 貓á相tio̍h ê niáu鼠。景文對in bó͘ 從來m̄-bat粗魯動手過，mā m̄-bat kā伊大聲嚇(hat)過，所以eng暗伊面色發青火色ê大受氣，hō͘ 玉簾感受tio̍h m̄-bat見過ê恐怖，而且她是想kah無法度chiah採取chit種無應該ê卑賤行為，致使本性有潔癖ê玉簾感受tio̍h侮辱ê劇痛，soah hō͘ 伊失常，完全失去辯解kah抵抗ê氣力。
她原本一手the̍h錢藏tī腰ê後壁，m̄-koh，tī in翁衝來beh搶去chìn前，她kui氣the̍h出來tī伊ê面前。總是，m̄知是出tī啥物心思，大概是beh救後頭厝ê chit大筆錢iáu放bē落手，她並無kā百圓ê銀票馬上交出來，soah tùi中間抽出幾張，向空中tàn去。Chit時，tú好西pêng ê窗á吹入一chūn風，hō͘ 銀票四界散落。In翁tio̍h驚，趕緊去拾(khioh) hiah-ê銀票ê姿態，hō͘ 玉簾緊張ê心真奇妙放鬆落來，忽然大聲笑出來。然後koh the̍h幾張銀票tàn出去。
「Ah！有夠好笑，你宛然kah-ná乞食生(chheⁿ)狂teh拾錢。你雖然財產百萬，m̄-koh，你ê心kah乞食仝款。鳥á飛ê時mā會lak一支羽毛，m̄-koh，你連一粒鼻屎都m̄肯hō͘ 人；你是一個見錢死，無人性ê人lah！我嫁來一開始to̍h無kah意你，chit-má我koh khah討厭你。清文兄kah你是無仝ê，lín兩人成做兄弟，ē-sái講是神明ê作弄。伊hō͘ 人一看to̍h知是一個可靠ê高尚人物；chit-má我明白à，我m̄是teh恨安子阿嫂，是有一點á teh嫉妒。我是嫉妒她ē-tàng kah hiah高尚ê人teh過美好ê生活。我所恨ê是景文，m̄是她lah！M̄-koh，我又koh kah你生兩個gín-á，實在有夠愚戇。總是，án-ne mā好ā！無論如何，我以後無beh koh kah你生kiáⁿ，你以後chiah家己lám錢睏好lah！」
玉簾ê怨恨kah pháiⁿ嘴亂講無soah，m̄-koh，景文kah-ná lóng無聽入耳，伊kan-taⁿ全心teh一張一張拾(khioh)落tī土腳ê銀票。
講實在，景文有phah算beh為tio̍h in bó͘ the̍h出一萬圓，m̄-koh，伊慎重ê想法soah hō͘ in bó͘ 拒絕。景文án-ne teh為昨暗無爽快ê tāi-chì自我辯解；伊常常kā利益khǹg tī感情ê tāi先，所以玉簾亂來ê行為，顛倒hō͘ 伊免付chit條大錢，講起來mā算伊好運。
講是án-ne講，tú-chiah kā hit筆錢存入去銀行了後，心情卻有一種奇妙ê後悔kah失落ê感覺。玉簾當然mā有khah過份，m̄-koh，景文mā bē-sái講無傷tio̍h她ê心。
假使hō͘ 家己ê bó͘ hiah-ni̍h侮辱kah lé罵，koh看破到伊ê心底，伊當然mā會bē爽快。景文為tio̍h報復，心中想beh chhōe別ê cha-bó͘，m̄-koh，無一個cha-bó͘ 會hō͘ 伊kah意得。伊想beh去妓女戶開cha-bó͘，m̄-koh，he是kan-taⁿ想niā-niā。事實上，hit種慾望一屑á都無；伊是一個kah人無仝款，有志氣ê人。除了思春期ê一段時期以外，女人對伊來講，kan-taⁿ是極其小部分ê存在，m̄-koh，chit-má伊kah-ná忽然覺醒，原來he是男性本來ê渴慕。景文家己想講，世界上無一個cha-bó͘人會真正信賴伊koh愛伊；一想tio̍h án-ne，伊就感覺家己無完滿。金錢對伊來講是kah-ná有性命ê物仝款，因為強烈追求金錢ê強烈慾望發出lòng-lòng叫ê大聲，hō͘ 伊tńg-se̍h kah失去方向。Chit-má chit-ê慾望機械忽然停止ê奇妙時刻，伊心內soah感覺空虛寂寞起來。
無no͘h，我mā bē-sái講完全無kah意ê人，景文忽然想起一個cha-bó͘ gín-á。伊雖然是無閒kah bū-sà-sà，hō͘ 伊bē記得hit-ê cha-bó͘ gín-á，其實是日時無閒辦tāi-chì，到暗時倒tī眠床頂ê時，伊ê腦海中就浮起hit工teh講seng-lí kah利純ê tāi-chì ê時，出現hit-ê叫做阿龍ê cha-bó͘ gín-á。M̄-koh，he kan-taⁿ是瞬間ê tāi-chì，伊隨時to̍h睏落重眠，連眠夢中mā無koh看tio̍h hit-ê cha-bó͘ gín-á ê面。
「啥物？Hit種面容無好看ê戇cha-bó͘ gín-á，無法度lah！」景文醒起來就án-ne kāu-kāu唸，m̄-koh，伊ê腳iáu是行向hit間厝ê方向去，真是不可思議。
Tī台灣人真chhiaⁿ-iāⁿ ê市場ê 一角落，kah-ná hō͘ 人bē記得ê巷á內，有一間滿地塵埃koh舊ê藥草店。Hit-ê姓楊ê店主欠景文一kóa錢，m̄-koh lóng無法度還，就提起beh用cha-bó͘-kiáⁿ來還債。總是，景文無想beh接受；店主一直teh ǹg望ê交換條件，伊lóng無意向。Hit-ê cha-bó͘ gín-á無súi，若用hit-ê債務ê金額，伊ē-tàng買tio̍h加倍súi ê cha-bó͘。
M̄-koh，景文mā m̄是完全討厭chit-ê cha-bó͘ gín-á，只是伊m̄知chit-ê cha-bó͘ gín-á ê優點tī tó位。她身材粗大；m̄是豐滿，ē-sái講是骨格粗大ê感覺。因為她無縛腳，雙腳親像客人ê大腳蹄，大kah真無好看。她ê容貌若kā它一一詳細看起來，mā m̄是講gōa bái，m̄-koh，她全然欠缺hō͘ 人ē-tàng明確分別súi-bái ê容貌，kan-taⁿ kah一般人仝款平凡。她無像都市cha-bó͘ gín-á hit種ê活潑敏捷，hō͘ 人感覺遲飩bē輕爽，隨時會hō͘ 人想講她是田庄cha-bó͘。景文想講家己若是hō͘ chit款cha-bó͘吸引去，實在是無比這koh khah見笑ê tāi-chì。景文家己辯解講，伊tiāⁿ-tiāⁿ來楊家ê目的，m̄是beh來看她，是希望ē-tàng早一日討回債務。
景文一旦peh上藥草店ê二樓，姓楊ê店主就退去，換 cha-bó͘-kiáⁿ phâng點心kah烏龍茶出來。景文真粗魯kā茶甌(au) the̍h起來，大嘴lim落去，然後無講話，目chiu chîn阿龍ê面一下，隨時to̍h心神不定，oa̍t頭看別位。平常時態度爽快ê景文，今á日卻真奇妙心神定定，一時無開嘴講話。阿龍感覺景文kah以前態度無仝，想講m̄知會發生啥物tāi-chì，soah kui身軀lóng硬起來。總是，對方是gâu講話ê社交專家，並無掛意阿龍對伊無講話ê冷淡態度，m̄-koh，mām̄知tó一位teh款待。講起來mā無啥物調戲ê動作，到taⁿ iáu m̄-bat對她有情慾性ê戲弄。老父命令她無論啥物要求lóng bē-sái拒絕；她記tiâu tī心肝內，m̄-koh，chit-ê大人一向lóng無hit款意思，對她從來m̄-bat有動腳動手ê下流行為，beh tńg去ê時koh lóng會塞（siap）五十錢tī她ê手心。對阿龍來講，無koh有比伊khah安全ê人客à。雖然án-ne，總講一句，chit-ê男人的確對她無愛意，只是對sàn-chhiah koh bái ê cha-bó͘ gín-á表示可憐niā-niā。想tio̍h án-ne，kah-ná是不動感情ê娼婦，尤其是手裡the̍h hit五十錢ê時chūn，奇妙傷tio̍h她ê自尊心，hō͘ 伊感覺寂寞起來。M̄-koh，男人總是男人，今á日kah-ná有啥物tāi-chì beh發生ê款，所以伊ê身軀kah-ná石頭tēng起來。
「阿龍，你ná會驚驚teh見笑啥？過來chia lah！」
景文án-ne ná講ná離開椅á行óa去。阿龍kah-ná beh防衛tńg身向後，景文kā她厚厚ê雙肩掠tiâu。
「Oeh！阿龍，你來做我ê細姨kám m̄好？」
伊án-ne講，kah-ná晴天tân雷公，阿龍驚kah phi̍h-phi̍h-chhoah。她想講伊若ài她ê身軀，買一副耳鉤ê代價就siuⁿ有夠額à，ná-tio̍h用hiah-ni̍h過份ê甜言蜜語leh？
「大人，請mài kah我講sńg笑，我會聽你ê吩咐to̍h是。」
「Ai-ah！你teh驚啥物？Ha-ha！你誤會我ê意思lah！Oeh！阿龍，你kám無相信我chit-ê人？」
Cha-bó͘ gín-á iáu是緊張，kiu-kiu無講話。「我tī seng-lí場ê做法是信用第一，其它方面mā是仝款，我無pháiⁿ意，kan-taⁿ想beh hō͘ 你知我真kah意你，你kám m̄相信？」
阿龍oa̍t tńg身，正面直直看景文，露出kah-ná無聽tio̍h伊講ê話hit款正經ê面容。
「大人，mài án-ne kā我蹧躂lah！厝裡kā你借ê錢，阮一定會還lah！」
「戇大獃，啥人teh講借錢ê tāi-chì，你kah-ná牛hiah-ni̍h gōng。」
景文án-ne kā她罵，就離開她，tī室內操煩kah行來行去。本來真罕得受氣ê景文，chit pái是真正受氣à；伊是真無容易動感情ê人，chit-má soah去hō͘ chit-ê小姐拒絕，伊想tio̍h án-ne就感覺家己愚戇，soah起受氣；伊平常時是chiok gâu算，bē hō͘ 感情控制ê人，今á日會án-ne，實在是不可思議。 M̄-koh，受氣hō͘ 伊有真愉快ê新鮮感，過一時á伊就露出平常時ê微笑，半sńg笑講：
「Ngh，若án-ne，我接受你還一kóa錢to̍h好，m̄免用你ê身軀來抵賬(tú-siàu) lah！」
「Eh，雖然無法度全部還，m̄-koh，我有一kóa錢。」
「Haⁿh，你有存一kóa錢oh，真感心neh。到底有gōa chē？Ē-tàng還kóa mā bē bái ā。」
「M̄-koh….。」
「無to̍h是無，無法度lah！Á是可能有錢，mā m̄甘the̍h出來。」景文想beh刁難，目chiu向阿龍ê面金金看，m̄-koh，隨時又koh bē記得伊ê phah算，口氣溫柔講：「你免煩惱hit種tāi-chì，我m̄是teh ài你ê sai-khia錢ê人。」
「M̄是án-ne講lah，該還ê錢無還bē-sái得，m̄-koh….。」阿龍有困難ê款式，吞吞吐吐講。
「M̄-koh，因為beh kā錢the̍h出來，tio̍h破壞厝」
「會kā厝破壞？這是lín tau ê tāi-chì，lín chit間破厝mā值無三文錢ā。Mài koh講chiah-ê，我m̄是teh講錢ê tāi-chì，你lóng聽無，你chit-ê cha-bó͘ gín-á ná會hiah戇直，hiah固執。」
「M̄是lah，大人，我講ê m̄是厝宅lah，我是講厝內，我存ê錢khǹg tī厝壁內底lah！」
Chit-ê意外ê秘密hō͘ 景文驚一tiô。伊kā四周圍ê壁看一liàn。若講是khǹg tī壁ê凹窩(naih-o) á是別ê所在to̍h m̄是不可思議ê tāi-chì，m̄-koh，若講khǹg tī無破壞厝宅bē-tàng the̍h出來ê深入所在，he to̍h真奇怪loh！景文受tio̍h好奇心ê使弄問她講：
「Án-ne，到底是tī tó位？樓腳á是二樓？」
「Tī hia lah！」阿龍手kí hit堵kah隔壁睏房中間ê壁，就行óa過去。景文phah她所kí ê所在了後，soah禁bē-tiâu笑出來。
「孔嘴tī tó位？無孔ê錢筒á一厘mā lok bē落去。你koh真gâu騙人，bē-sái kā你看輕得(tit)neh。」
「M̄是lah！我無亂講，無白賊lah！」
阿龍認真辯解，就講出故事ê因端。He是約十年前ê tāi-chì，她去街á賣花，想講thàn來ê錢beh khǹg tī tó位chiah好。有一工，她忽然發現二樓房間壁面ê磚á會tín動，徙tín動一下就ē-tàng the̍h落來，而且壁內有一個真狹(e̍h)ê孔嘴，內面是深溝。Tùi hit-chūn開始，她就kā賣花thàn ê錢、中元節(七月半)kah過年錢，就是所有她得tio̍h ê錢lóng tàn入去hit-ê壁孔，tàn入去了後，又koh kā磚á khǹg tńg去原位。雙親以下ê厝裡所有ê人lóng無注意tio̍h，家己mā極其小心注意，mài去hō͘ 人發見。有時她想beh買kóa糕á餅來食，m̄-koh，溝真深，手伸bē到，而且mā無法度看到底已經存有gōa chē錢。到少女ê年紀，她mā kah一般cha-bó͘ gín-á仝款，自然會ài粧thāⁿ，想beh買新衫褲、 頭毛簪、耳鉤，m̄-koh，她ê錢連一sián都the̍h bē出來。雖然是án-ne，對阿龍來講，愛súi ê本能慾求kah世俗ê消費慾望，bē比積聚錢銀帶hō͘ 她ê快樂khah大。錢一工一工、一年一年存落來，終其尾到底總共存有gōa chē錢，她家己mā估計bē出來。Mā bat有時險á hō͘ 想beh the̍h出來看ê好奇心khah贏；其實，beh kā錢the̍h出來，用一支鉄槌to̍h ē-sái；kah-ná gia̍h菜刀破雞腹肚hiah簡單。M̄-koh，ná親像破開了後露出討厭ê腸á肚；若是金額無大，就可能會失望。所以，她寧可永遠kā它khǹg tī hia，chit-ê秘密就永遠屬tī伊家己ê，mā是一個謎。Hit-ê寶庫已經超越kan-taⁿ是錢ê計算，它已經擴展，成做幾何級數ê想像空間，所以，不管別人她看做是sàn-chhiah cha-bó͘ gín-á，她認為家己ē-sái講是無限ê富有。Chit十年來，她tī單獨kah-ná káu蟻teh勤勉積聚ê中間，她有感覺tio̍h無人知ê甜蜜kah驕傲。M̄-koh，一年gōa前，in老父發見hit塊磚á會tín動，伊m̄知內底有真chē錢銀，就用紅毛土kā它糊密起來。Tùi hit時起，阿龍ê愉快無限ê空想kah對富有ê精神進展，soah一時陷落tī停止狀態。若 án-ne落去，無趕緊kā它the̍h出來，就會變做死錢。
Chit-ê cha-bó͘ gín-á ê告白，景文聽了感覺她贏過任何美德。她開始tiām-tiām-á儉錢ê時，in老父無像chit-má hiah-ni̍h sàn-chhiah，m̄驚會kā單純ê cha-bó͘-kiáⁿ phah拚儉ê錢搶奪去，所以阿龍kah-ná káu蟻án-ne teh積財慾望，ē-sái講純粹是她天生ê性格。
Chit時，景文chiah曉悟，親像phah伊家己ê腳頭u，看起來無啥可取ê cha-bó͘ gín-á，她teh吸引伊ê魅（bī）力to̍h是tī chia lah！
