《宋澤萊ê台文蕃薯園》

 | | | 轉寄

Tùi台灣女性運命看庄司總一ê長篇小說《陳夫人》

作者 宋澤萊, 台譯：Lîm ChùnIo̍k 2021.08.01

婚姻對一個台灣chabó͘人來講是真重要ê，因為往往teh決定她一生ê幸福kah無幸福，特別是日治時代。

日本時代siōng下層社會ê婦女ná親像teh過奴才一般ê生活，甚至tio̍h淪為用身軀來換三頓；一般chabó͘人大部分lóng隨便選一個人嫁掉就了事。

Ánne，kám講ētàng嫁hō͘上層社會ê婦女就無婚姻ê困擾？無lah！ 日本時代，台灣ê chapo͘人有娶細姨ê pháiⁿ習慣，一個有錢人ê丈夫，往往娶真chē細姨。傳統ê婦女對丈夫ê娶細姨行為其實並無像想像中ê慷慨，元配會為chit款tāichì顯得非常ê致意kah傷心，差不多是上層社會婦女ê惡夢。日據時代台灣小說家賴慶寫一篇叫做〈娶細姨風波〉ê小說，to̍h是寫bó͘堅強不屈，想beh反抗有錢丈夫娶細姨所造成ê家庭風波，chitê爭鬥當然非常慘烈。另外有一篇是咱tio̍h濃縮紹介ê，to̍h是長篇小說《陳夫人》裡ê一段娶細姨經過，chit段小說，寫出上層社會婦女tī chit種pháiⁿ習慣之下ê大不幸，hō͘ 男性會見笑kah kui面全汗。

原來日本時代，有一位相當有名ê日本人作家叫做庒司總一（19061961）寫一本長篇小說《陳夫人》（九歌出版社ê冊名是《嫁台灣郎ê日本女子》）。Chit本冊描寫台灣一個大家族三代ê故事。第一代ê家長叫做陳阿山，因為擁有大批祖產，非常富有，先娶一個bó͘，後來死去，koh續絃一個chabó͘ gín’á。阿山有三個kiáⁿ兒，老大叫做清文，留學日本，娶一個信奉基督教ê chabó͘ gín’á，叫做安子，mā to̍h是本冊內底ê「陳夫人」。大kiáⁿ清文無娶細姨，因為伊是基督徒。M̄koh，第二kiáⁿ叫做景文，伊先娶一個叫做玉簾ê súi bó͘，後來koh娶一個粗劣ê chabó͘ gín’á叫做「龍」當二房。老三叫做「瑞文」，先取一個叫做春鶯ê bó͘，後來koh娶一位平埔族ê chabó͘ gín’á做細姨。

庒司總一kah其他日本殖民作家無仝款，伊tī台灣長大，koh有基督教ê宗教背景，比較khah有疼心。作者寫小說ê真正意圖m̄是單一ê，內底應該有一種想beh hō͘台灣向現代化邁進ê善意。另外，伊ê寫作手路真幼，真像人類學ê調查仝款，ētàng詳細反應當時台灣家庭ê生活習慣，包括食衣住行詳情、財產分配處裡、經濟狀況ê變遷、權力賦予（hùû）kah分配、成員ê愛情kah紛爭種種tāichì。庒司總一因為ánne故意tī chit本小說中用真大ê篇幅披露台灣社會ê多妻制度，內底ê chapo͘人差不多lóng娶兩個bó͘以上，非常不公平（庒司總一mā講當時ê日本mā是ánne）。

Chit種儒家文化ê野蠻制度往往造成家庭真大ê困擾，hō͘舊社會ê chabó͘人tī大家庭中充滿操心kah怨恨，非常無人道，hō͘人極其憤慨。小說內底以愛錢ná命lóng無文化水準ê「景文」chitê角色siōng突出，伊ê bó͘「玉簾」tī厝裡族裡背負極大ê侮辱。內容濃縮如下：

※
Tī大宅ê陳家厝內，景文ê bó͘玉簾ê美貌koh khah顯眼，大家lóng講ētàng娶tio̍h chit種bó͘是真幸福ê tāichì。M̄koh，守財奴ê景文並無感覺幸福。玉簾bē任性，mā bē嫉妒，m̄koh，siōng重要ê是她tī景文ê眼中是浪費成性ê chabó͘人，景文對她tī金錢ê浪費上ēsái講是近tī敵意ê感覺，常常認為不如娶一個bái bó͘會khah好。 玉簾thang講是出tī名門，老父叫做王世澤。王家tī清朝以來就代代做官，某一代甚至做到縣長。王世澤tī日據之下mā做都市協議會員，iáu有某某合作社ê社長，總講一句，伊ê見識真koân。可惜伊kha̍pbētio̍h to̍h kah人發生衝突，無人想beh kah伊來往，伊所做ê是lóng是無順利。到chitmá繼承來ê財產差不多開了了à，而且不時kah人發生小是非，常常上法院。玉簾因為ánne，想beh幫助老父渡過經濟ê難關。

Chit工，玉簾tī景文ê起居室ê naiho室金庫裡the̍h出五千kho͘，想beh救濟後頭厝，m̄koh卻hō͘ 丈夫發見，愛錢ná命ê景文ná ētàng放任chit筆錢hō͘玉簾the̍h走。兩人因為ánne為這筆錢發生大衝突。 景文認為伊tī厝裡飼一個賊á，ài她kā五千kho͘ the̍h出來。景文從來lóng m̄bat粗魯á是大聲責備過chitê súi bó͘，m̄koh，chit pái卻面色發青，火大起來，玉簾看tio̍h都有kóa驚惶。

玉簾先用一支手la̍ktiâu銀票，藏tī腰後，後來kui氣全部the̍h出來，然後並無kā銀票交hō͘景文，她thiau故意tùi hit束銀票中抽出幾張，往空中掖去，hō͘ in飄散落來，tú好風tùi窗á外吹入來，紙幣四散。景文看tio̍h，驚惶kah去土腳抾（khioh）起來。

玉簾大聲罵講：「Ah！hiahni̍h好笑，你「手忙腳亂」，ná親像喪事裡掖錢時ê乞丐teh拾tio̍h錢仝款。準講有一百萬錢財，你ê心kah乞丐是無兩樣ê。飛鳥有時mā會lak落來一支毛，á你neh，連鼻屎mā m̄甘hō͘別人。你真是一個見錢死ê守財奴！無風度ê人！我tùi嫁過來一開始就無kah意你！Chitmá是討厭你。」

玉簾因為怨恨，講話無經過頭腦講落去。景文kahná一句話mā無聽入去，kantaⁿ顧抾（khioh）金錢。 了後，景文kā錢the̍h.leh，去銀行存起來，行出銀行。臘月ê日頭光照tī舖石á ê路上，m̄是真冷ê天氣，景文卻因為腦袋衝血soah面發紅。 In bó͘ hiahni̍h pháiⁿ聲嗽teh罵伊，hō͘ 伊真憤怒。伊想beh對in bó͘ 報復，就去chhōe其他ê chabó͘人。M̄koh，伊生做粗魯，文化素養差，家己知影chitê世界上bē有chabó͘人真正信賴伊。伊ê心內感覺有kóa空虛。

忽然，伊想tio̍h一個chabó͘ gín’á叫做「龍」。Tī市內ê一個老舊ê藥店，楊姓店主欠景文一kóa債，因為無能力還，就想beh kā chabó͘ kiáⁿ龍交hō͘伊。景文無意ánne做，因為龍生做粗枝大葉，若是用還伊ê金錢ētàng買一個比龍súi一倍ê chabó͘ gín’á。

M̄koh，chit pái伊卻考慮ánne做，其實景文對chitê chabó͘ gín’á iáu是有一kóa好感，有一種無明顯ê歡喜隱藏tī伊心內，kantaⁿ是m̄知啥物原因而已。

伊去到草藥店就對龍講：「妳來做我ê第二夫人！」

龍一聽to̍h驚kah gāng去，有一點á pi̍hpi̍h chhoah起來，講：「大人，mài kah我講sńg笑lah！」

景文就講：「啥人kah妳講sńg笑，妳明明是kah牛仝款hiah慢鈍。」 In開始講tio̍h心底ê話，龍就kā伊講，她真ài存錢，有tī牆壁內底ê大洞裡存錢ê習慣，自細漢她就kā賣花ê錢、中元節得tio̍h ê零用錢、過年ê teh年錢，凡是屬tī家己ê錢，lóng存tī牆洞裡，到chitmá m̄知影存有gōa chē。

景文一聽，chiah知影她為甚麼對chitê chabó͘ gín’á有好感ê原因，原來她mā是一個守財奴。Chitmá，伊真正無娶她bēsái得à。

景文tńg去厝裡，講伊想beh娶細姨，大家忽然一時感覺人「不可貌相」。一段日子了後，秋天ê時節，景文ê第二夫人終其尾入門ā，坐紅花轎來，慶祝ê紅龜粿kah美食料理齊備，炮á、音樂聲非常響亮，chiok鬧熱。

景文ê bó͘ tī中庭teh嚷，非常激動，滿腹牢騷（lâusau）teh吐心中ê苦水。她teh se̍hse̍h唸丈夫ê m̄是，ài大家同情她ê看法。十位女眷圍tī她ê身邊，一直勸她，kui陣teh噪（chhò）人耳。玉簾講她kah景文合bē來，苦bē得tńg去後頭厝。

了後，玉簾常常怨嘆娶細姨了後ê景文m̄chhap她，只看重阿龍，á阿龍生得真bái，竟然娶她過門，叫她無法度理解。玉簾甚至kā chit項tāichì向takoaⁿ阿山埋怨，阿山卻ánne講：「怨嘆ê chabó͘人，丈夫娶細姨就一直teh噪人耳，我lóng m̄bat看過你chit種ê chabó͘人！總講一句，景文是凍霜ê，bē加娶，若是娶三、四個細姨，你就看會開ā！」

玉簾受tio̍h重大打擊，開始真想beh kah安子去教會信基督教，有時mā傳說講她計畫beh刣阿龍chitê細姨，kantaⁿ是無進一步ê消息而已。

Tī厝裡，阿龍是一個奇怪ê chabó͘人，不管玉簾對她án怎pháiⁿ聲嗽，她lóng kahná啞巴leh，bē哭mābē受氣，kantaⁿ恬恬teh看，chit種不抵抗主義大概hō͘玉簾mā無法度thang想！

老三瑞文就對阿嫂安子講：「若beh講玉簾將來會因為ánne變成基督徒，顛倒講她會行向起痟（siáu）ê路途有khah正確。」 Tī chit情況中，只有瑞文ê bó͘春鶯khah ētàng實在ê安慰玉簾，她對玉簾講：「玉簾阿嫂，妳mā iáu算是幸福lah，對丈夫娶細姨，若是我，就ētàng忍受，mā ētàng kah細姨和睦做伙。只要無受丈夫放sak kah bē記得to̍h好。因為第一夫人總比第二夫人佔上風。妳後頭厝ê老父m̄是mā有三個夫人。你m̄thang死性！」

Chit項tāichì就ánne慢慢平靜落來。

※
像ánne，一個chapo͘人任意（jīmì）娶細姨ê故事，就是日治時代有錢人sù常平常ê見笑事(tāi)，kah食鴉片ê習慣，並稱台灣兩大pháiⁿ習慣，ēsái講是台灣人風俗中ê惡瘤，庄司總一並無冤枉台灣人！台灣人只有剷（sán）除chit種pháiⁿ習慣，chiah ētàng toè會tio̍h現代化ê腳步。

Chitmá有部分學者，gia̍h「後殖民主義」ê旗á，批評庄司總一ê小說帶有文化優越感，講伊譬相（phìsiùⁿ）台灣人，看bē起台灣人；chit種講法bē堪得受考驗。因為庄司總一mā批評日本人娶細姨ê pháiⁿ習慣，對家己ê文化mā無掠做當然！

想beh批評庄司總一ê《陳夫人》ê人，siōng好ētàng有基督教素養，chiah ētàng了解娶細姨tī基督教裡是無受許可ê。具體來講，庄司總一所以基督教現代文明ê觀點來批評台灣人ê pháiⁿ習慣，卻m̄是日本帝國主義ê觀點，畢竟基督教mā m̄是日本帝國主義文化ê一部分。忽略chitê觀點，對《陳夫人》ê批評就會無公平，mā bētàng相信！
──2017、07、17寫tī鹿港