《台語chit條路》

 | | | 轉寄

《台語chit條路》--建立台語文ê文學批評─林央敏訪問(九）

作者 謝瑞華 2008.12.14

卵：老師hit時開始轉台文道清楚是按呢，或者是tī hia ê過程內底體會出來？

林：開始轉寫ê時，代先我是感覺復興台灣文化、挽救台灣文化、台灣語言，hit chūn我鼓吹福佬ê朋友寫，伊母語若是客語＝e尚好mā愛有chit ê認識，用客語寫，原住民我道少鼓吹，因為原住民真少，總共三十外萬人，九族m̄若種語言，有ê一族才幾千人，但是伊若beh用伊ê族語，咱mā真kā鼓勵，代先是按呢。我講台語文學才是尚有代表性ê台灣文學，che是尾＝a khah思考來ê。

凰：你有講著宋澤萊，聽講伊mā有發明另外一套台語文ê系統，kám有影？

林：che照講mā無算發明，初期ê時chūn逐家攏認為漢字愛用所謂ê純正，其實字無所謂啥麼叫做純正，約定俗成，公定＝e道是叫做純正。傳統ê純正道是講古早人＝e叫做純正。

凰：你頭仔講你對文學界寫中文＝e，攏足氣hâm in做伙？

林：m̄是講寫中文ê人，是講投機ê人，不管伊寫啥麼。目前是寫台文ê人khah bōe投機，iah是khah少投機ê人，比較tek思想也khah覺醒，我也無發覺著投機＝e。

凰：阮是想講，台灣ê台語失屎kap失育是無教材、無資料，所以若有一萬人來寫，咱道bōe hiah驚，所以咱道kā chia ê紅kah發紫ê giú-giú來，來kā影響，加減mā做一寡khang-khòe。 林：按呢伊著bōe紅＝a，in並m̄是寫了比人khah好，in道是無chit ê使命感、chit ê覺醒。

凰：你ê意思是in無重要是m̄？

林：m̄是講in無重要，in若願意阮mā足歡迎、足欽佩，不管伊過去外投機，iah是過去觀念外錯誤攏無要緊，伊若願意做，尤其是正式覺醒來做，我攏mā足kā肯定。

用表演、演講ê方式傳播台灣文學ê台灣語言

江：你認為台語文運動ê目標應該是按怎，咱應該按怎做？我chit ê問題其實是分兩部分，一部份是民進黨執政以前，因為我看國民黨無啥希望，第二ê是民進黨執政以後咱應該按怎做？