《台語chit條路》

 | | | 轉寄

《台語chit條路》序二

作者 楊允言 2008.02.17

1、
今年，我ùi學校畢業，因為無按算koh讀博士班，會使講正式beh踏入社會。Tī chit-ê過渡ê時期，我一直the想，關係台語文運動，我會當提出啥物觀念，會當做啥物代誌？ 採訪計畫是tī chit-ê情形下所想出來--ê，感覺會使來試看māi。 老實講，kàu taⁿ我iā m̄知，hit當陣接「學生台灣語文促進會」(STPA)ê會長，到底是對iá是m̄對，對當teh起步ê學生界台語文運動，kam有產生啥物款無好ê影響？
2、
1991年，大學畢業三冬了後，我順利考入清華ê研究所。Hit種感覺真奇怪，那像以前做學生時所有ê 一寡特權雄雄koh轉來身軀邊。大學畢業hit年，研究所考無tiâu，過無gōa久koh抽著馬祖籤，硬將我kap台灣切斷，學生時代ê熱情kap理想只好暫時khǹg一邊，mā不得不將家己ê觀念kap態度藏起來。 馬祖hia講福州話，語言bē通，對chi̍t-ê tú開始beh舞台語文字化ê我來講，總是感覺淡薄--á失志、淡薄--á苦悶。我趁第二冬khah有閒ê時間，將一寡華文小說翻做台語，退伍了後有整理、phah字。因為著作版權ê問題，驚去惹著一寡麻煩，所以無按算正式出版，總是一寡學校ê台語社團有印來讀。 無的確是因為chit項大家看會著ê成果，koh熱心teh做連線ê空課，得著一寡朋友ê肯定，所以選我出來做STAPA第一任會長。 在我看來，92年二月大家tī交大聚會，提出chi̍t-ê初步ê構想，koh五月初三STAPA順利成立，hō͘我對chit陣朋友有chi̍t-ê印象(無的確是錯誤--ê)，我感覺大家lóng真有心、真拚勢，真願意做伙來做一寡代誌。當初我teh想，借chi̍t-ê會，tī半年ê會長任內，應該會當交出一張真sui氣ê成績單hō͘ lán ê社會看。 但是無gōa久，隨發覺幻夢破滅。一方面，大家分散各地，台灣頭kàu台灣尾(實際上是台北kàu台南)lóng有，有地理條件ê制限；另外一方面，大部分ê社團，tī學校內都已經做ka艱苦死，既然校內都霧sà sà，beh哪會有khah加ê氣力做伙來做代誌？ Koh一項，因為我研究所以經第二冬，論文ê壓力真大，koh因為《台語學生》ê發行，真chē事務性ê空課mā lóng愛來處理，實在無khah加ê氣力chhōa大家做伙來衝。 《台語學生》會出chia nī捷(一個月三期)，大部分ê原因是台大hit邊一寡創社元老ê堅持，一開始我teh想，假使大家矯好勢，而且願意做，我mā免了傷chē精神tī頂峘，m̄-koh hit陣已經有按算，上bái ê情形就是我愛擔起來做。後來，當初話講上大聲--ê，尾也弄港，為著chit件代誌，台大hit邊mā有一寡不滿ê聲音出現。 其實，換另外chi̍t-ê角度來看，因為有出刊ê壓力，所以其實有偵chē稿是逼出來--ê，可能有一寡人hō͘主編催稿催ka擋bē tiâu，姑不二衷寫一下，然後chit篇就是作者chit世人第一篇台語文章(希望m̄是chit世人唯一ê一篇)。《台語學生》另外一項特色是，因為gún無認為lán有法度真緊來統一漢字ê用法，除非社會上有真chē人phah拚teh寫，所以gún無 kā人改字 ，各篇文章ê用字lóng無啥一致，畢竟改用字加khah費氣，有時--á koh會phah pháiⁿ作者ê感情，而且，lin本身ê用字都無一定khah高明，chit點是kap所有其他台語刊物做法無仝ê所在。 93年二月beh改選會長ê時，無人願意出來接，可能是驚無法度應付刊物ê發行kap其他事務性ê空課。 我只好放外外，專心應付我ê畢業論文，一直kàu我畢業，無koh再是學生，自動消失會長資格。 叫學生來做台語文運動實在是先天不良koh兼後天失調，先天不良是因為chit代ê學生囡--á受全面ê北京話教育，台語程度本成就無好(我家己就是chi̍t-ê例，我tòa台北，初中時就已經bē曉講台語，一直kàu大學三年ê時chia開始學轉來)；後天失調是，基本上，學生是chi̍t-ê真無穩定ê階級，比較teh學生khah無法度專心做一項代誌，伊tú入來chi̍t-ê曠闊ê世界，對伊來講啥物代誌lóng mā真趣味真新鮮，自然啥物代誌lóng想beh鬥一腳耍看māi，所以chi̍t-ê台語社ê社員，伊可能同時koh去舞政治、舞學運、舞環保、舞女性主義……等等；按另外chi̍t-ê角度來看，台語文字化chit件大工程，tī大環境無配合ê情形下，觀念ê建立無容易，學習ê時間mā愛有夠長，尤其習慣ê建立(改用台語寫物件)koh khah愛家己大ê決心kap行動，會使講，除非伊大學四年ê時間專心teh做chit方面ê物件，若無，beh培養出chi̍t-ê勇腳ê台語文人才--- 想bong想，可能khah早睏khah有眠。 但是，學生有chi̍t-ê特權，就是媒體kā伊惜命命，可能伊ê形象好，hō͘人感覺m̄是為著利益teh做代誌，koh是受高等教育、學問真飽ê一陣人。 我想，這可能是假象，所有ê人lóng應該有覺悟，beh寄望學生做出啥物貢獻，實在無啥實際。 其實，學生早慢mā lóng愛離開學校進入社會，所以tī我ê觀念內，我真希望tī我會長任內，會當chhōa大家實實在在、恬恬--á做出一寡kàu時逞好tiām社會面頭前囂俳ê物件出來，家己ê實力若有夠，才有法度講大聲話，稀罕別人ê pho̍k-á聲是無路用--ê，mā無實際，因為這是teh做理想，m̄是teh做爽--ê。 基本上，我就是以chit種態度kap觀念來面對各校台語社ê朋友，Chit陣做《台語學生》是án-ne，今má提出chit-ê採訪計劃mā是án-ne。
3、
不管是有達成iá是無達成，chit-ê採訪計劃ê提出，有真chē ê企圖tī內底。 對學生chit邊來看，主要是：
(1) 我想beh交接我kap一寡台文工作者ê人際關係，透過採訪，hō͘學生kap工作者熟似。
(2) 想beh盡量招一寡各校台語社新社員，尤其是台大，希望藉採訪ê過程，hō͘ 這寡新ê腳--á khah緊進入狀況，來受工作者拚勢ê精神感染，認真來思考台語文字化ê問題。
(3) 一寡工作者，可能因為觀念ê無仝，會互相攻擊，透過採訪，希望學生加減聽，有chi̍t-ê全面ê了解。因為這寡學生，以後可能會繼續做台語，而且有可能kap目前ê工作者做伙做代誌，若beh合作，總是愛對對方有初步ê了解。
(4) 上重要--ê，希望負責人會當藉chit-pái ê採訪學者一寡實際ê物件，整理錄音帶、用台文處理chia-nih長ê文章、ùi整理ê過程加減學一寡台語詞(chit寡詞可能lin m̄-bat用過、講過)、用整理好ê採訪稿kap受訪者建立進一步ê關係……。
對歸ê台語界iá是社會ê角度來看，主要是：
(1) 藉採訪來肯定工作者ê phah拚，kā工作者做精神上ê鼓勵。
(2) 互相ê溝通、交流，hō͘大家koh khah知影別人teh做啥物，儘量避免人力資源ê浪費。
(3) 上重要--ê，大環境hō͘ lán ê束縛真大，一般台灣文學界，普遍ê lóng看台語文無夠重，上明顯ê例，in teh整理台灣文學史ê時，差不多lóng bē去講著台語文學ê部分，雖然這chia應該是正統ê台灣文學。換另外chi̍t-ê角度來看，文字習慣ê改變，對一寡人來講總是無hia-nih簡單，既然in無beh整理台語方面ê物件 --- 可能in貧憚iá是in無chit-ê才情 --- án-ne lán家己來整理。
4、
關係gún對採訪ê其他態度kap想法，會使參考chit本書ê附錄。簡單講，針對受訪者，採訪ê時陣主要有2 ê重點，chi̍t-ê是受訪者ê出身，另外chi̍t-ê是受訪者對歸ê台語文運動ê看法kap態度，假使chit-ê受訪者有發明啥物台語表記ê方法iá是對用字應該愛按怎按怎有真chē ê意見，基本上m̄是chit-pái採訪ê重點，事實上gún mā khah無趣味。另外，gún mā無希望受訪者對採訪稿ê用字有太chē ê意見iá是想beh主導。當然，這只是原則，因為每chi̍t-ê受訪者ê態度lóng無仝，橫直tio̍h是互相chhiâu策，採訪視beh互相結緣互相熟似，m̄是beh phah pháiⁿ關係--ê。 其實gún所熟似ê台語文工作者mā是有限，總是今má已經起chi̍t-ê頭，mā希望有趣味ê同志，會使就lin所熟似ê台文工作者來做採訪，整理hō͘ khah完整--ê。 Hit陣我答應beh負責採訪計劃kap出《台語學生》22期(試刊1~4期 kap1~18期)ê合訂本，因為經費ê問題，可能合訂本暫時無法度通完成。真希望經費ê問題會當緊得著解決，我tio̍h會使免koh將chit層代誌khǹg tī心肝內。 採訪稿，每一篇ê用字無啥仝款，但是仝一篇內底ê用字是一致--ê。基本上，hō͘大家看著ê用字，是負責人、受訪者、kap定稿ê人(我)所chhiâu策ê結果。Chit本書後壁有字詞表，讀者會使先參考，chia來看採訪稿。 我認為，chi̍t-ê台文ê推廣者，因為伊愛面對各種對台文運動無仝意見ê人，所以in應該全羅kap全漢lóng有法度，án-ne chia khah有說服力，所以chit篇序分別用全羅kap全漢來寫，mā算是自我ê訓練。 我khah貧憚kap儂chìⁿ，m̄-koh，對chi̍t-ê贊成全漢ê人，我會提醒伊仝chi̍t-ê漢字有真chē讀法ê缺點；對chi̍t-ê主張漢羅ê人，我會提醒伊用字愛一致，m̄通仝一字liam mi用漢字liam mi用羅馬字，家己寫法若無一致，lin就無才調要求別人來tè lin，因為人bē看著lin ê方便，但是看著in ê亂。 羅馬字部份採用教會羅馬字，畢竟chit套歷史khah久，用ê人mā khah chē，但是為著記泉州音，參考TLPA(台灣語言音標方案)ê用法加「r」chit-ê符號。Chit本書用Ctex排版軟體來處理，tī chia愛感謝台大外文系張裕宏老師，因為羅馬字標調ê符號是伊解決--ê，mā祝伊早日完成伊當teh進行ê大工程。另外，漢字部分是用BIG-5內碼，為著流通性ê問題，字集無ê字lóng無採用，意思就是完全放棄造字，請讀者了解chit點。 本成我koh想beh整理chit寡負責人對受訪者ê評價，不管是好--ê iá是 iá是bái--ê，mā算是對台語文界提出學生立場ê看法，總是後來並無完成。 對鄭良偉先生、林錦賢先生、陳義仁先生、陳明仁先生kap陳豐惠小姐，mā愛tī chia kā in講一聲失禮，gún有去採訪，但是chit寡ê負責人並無將採訪稿完成。我認為chit-ê採訪稿有伊ê時效性，因為台語文運動當teh發展，假使chit-ê工作者一直有teh做chit方面ê空課，今年ê觀點、態度kap明年可能就會小寡無仝。所以對chit寡台語界ê前輩，只有等待後chōa chhē機會重採訪一遍。 上重要--ê，chit本書ê完成，愛感謝每chi̍t-ê負責人、受訪者ê配合kap用心，尤其是負責人ê辛苦。 希望lán大家lóng繼續phah拚，一方面mā來思考lán家己tī chit-ê台語文運動中ê地位、應該愛做啥物款ê代誌、kap歸ê台語文界愛按怎配合……。Tī chia，lán同齊來祝福，祝福台語文運動早日成功！