《巴克禮普世版聖經（試讀本）》

 | | | 轉寄

巴克禮普世版（試讀本） 約翰福音第二十章

作者 巴克禮普世版小組 2014.02.16

Khang-khang ê Bōng (Mt 28:1-8; Mk 16:1-8; Lk 24:1-12)
1 Chhit ji̍t ê thâu chi̍t-ji̍t thàu-chá, thiⁿ iáu-bōe kng, Boa̍t-tāi-lia̍p ê Má-lī-a lâi-kàu bōng-tē, khòaⁿ-tio̍h bōng-kháu ê chio̍h í-keng sóa-khui. 2 I chiū cháu-khì chhōe Se-bûn Pí-tek kah hit-ê Iâ-so͘ só͘ thiàⁿ ê bûn-tô͘, kā in kóng, "Ū-lâng chiong Chú tùi bōng-ni̍h sóa-cháu, goán m̄-chai in kā I hē tī tó-ūi." 3 Pí-tek kah hit-ê bûn-tô͘ chiū khì bōng-tē. 4 Nn̄g lâng chò-hóe cháu, hit-ê bûn-tô͘ cháu khah kín, seng kàu bōng-tē. 5 I àⁿ lo̍h-khì khòaⁿ bōng-lāi, khòaⁿ-tio̍h iù-tē-pò͘ hē tī hia, m̄-koh i bô ji̍p-khì. 6 Se-bûn Pí-tek tòe-āu kàu, ji̍p-khì bōng-lāi, khòaⁿ-tio̍h iù-tē-pò͘ hē tī hia. 7 I koh khòaⁿ-tio̍h pau Iâ-so͘ thâu-khak ê kin, bô kah iù-tē-pò͘ hē chò-hóe, kńg teh lēng-gōa hē. 8 Hit sî hit-ê tāi-seng kàu bōng-tē ê bûn-tô͘ mā ji̍p-khì, khòaⁿ liáu chiū siong-sìn. 9 In-ūi in iáu-bōe liáu-kái Sèng-keng ê ōe, kóng Iâ-so͘ it-tēng tio̍h tùi sí-lâng tiong koh-oa̍h. 10 Jiân-āu, in nn̄g lâng chiū tńg-khì in tau.

Iâ-so͘ Tùi Boa̍t-tāi-lia̍p ê Má-lī-a Hián-hiān (Mt 28:9-10; Mk 16:9-11)
11 Má-lī-a khiā tī bōng-gōa teh thî-khàu. I ná khàu ná àⁿ lo̍h-khì khòaⁿ bōng-lāi. 12 I khòaⁿ-tio̍h nn̄g-ê chhēng pe̍h-saⁿ ê thiⁿ-sài, chē tī goân-lâi hē Iâ-so͘ sin-si ê só͘-chāi, chi̍t-ê tī thâu chit-pêng, chi̍t-ê tī kha hit-pêng. 13 Thiⁿ-sài kā i kóng, "Hū-jîn-lâng ah, ná-ē teh khàu?" I ìn kóng, "Ū-lâng kā góa ê Chú sóa cháu, góa m̄-chai in kā I hē tī sím-mi̍h só͘-chāi." 14 Chiah-ê ōe kóng soah, Má-lī-a oat tńg-sin, khòaⁿ-tio̍h Iâ-so͘ khiā tī hia, m̄-koh jīn bē chhut I sī Iâ-so͘. 15 Iâ-so͘ kā i kóng, "Hū-jîn-lâng ah, ná-ē teh khàu? Lí teh chhōe siáⁿ-lâng?" Má-lī-a siūⁿ-kóng I sī kò͘ hn̂g ê lâng, chiū ìn kóng, "Thâu-ke ah, lí nā ū kā I sóa cháu, chhiáⁿ kā góa kóng lí kā I hē tī sím-mi̍h só͘-chāi, góa thang lâi-khì kā I siu tńg-lâi." 16 Iâ-so͘ kiò chi̍t siaⁿ " Má-lī-a ah." I chiū oa̍t tńg-sin, ēng Hi-pek-lâi-ōe kóng, "Lia̍p-pho-nî!" Ì-sù chiū-sī " Lāu-su". 17 Iâ-so͘ kā i kóng, "M̄-thang bong Góa, in-ūi Góa iáu-bōe chiūⁿ-thiⁿ khì Thiⁿ-Pē hia. Lí tio̍h khì chhōe Góa ê hiaⁿ-tī kā in kóng, "Góa chiūⁿ-thiⁿ khì Góa ê Thiⁿ-Pē hia, mā sī lín ê Thiⁿ-Pē hia, khì Góa ê Siōng-Chú hia, mā sī lín ê Siōng-Chú hia." 18 Boa̍t-tāi-lia̍p ê Má-lī-a chiū khì kā bûn-tô͘ kóng, "Góa í-keng khòaⁿ-tio̍h Chú à." Koh kóng Chú ū kā i kóng hiah-ê ōe.

Iâ-so͘ Tùi Bûn-tô͘ Hián-hiān (Mt 28:16-20; Mk 16:14-18; Lk 24:36-49))
19 Hit ji̍t chiū-sī chhit ji̍t ê thâu chi̍t-ji̍t ê àm-sî, bûn-tô͘ in-ūi kiaⁿ Iû-thài-lâng, chiū tī in tòa ê só͘-chāi kā mn̂g koaiⁿ teh. Iâ-so͘ lâi-kàu in tiong-kan kā in kóng, "Goān lín pêng-an!" 20 Chiah-ê ōe kóng liáu, Iâ-so͘ chiū chiong chhiú kah heng-khám-piⁿ hō͘ in khòaⁿ. Bûn-tô͘ khòaⁿ-tio̍h Chú, chin hoaⁿ-hí. 21 Iâ-so͘ koh kā in kóng, "Goān lín pêng-an! Chhin-chhiūⁿ Thiⁿ-Pē ū chhe-phài Góa, Góa mā beh chhe-phài lín." 22 Iâ-so͘ kóng soah, chiū tùi in pûn khùi, kóng, "Lín niá-siū Sèng-Sîn. 23 Lín sià-bián siáⁿ-lâng ê chōe, in chiū tit-tio̍h sià-bián. Lín nā bô sià-bián lâng ê chōe, in chiū bē tit-tio̍h sià-bián. 24 Iâ-so͘ Tùi To-má Hián-hiān To-má, mā kiò-chò Té-thó͘-má( siang-seⁿ-á ê ì-sù), sī cha̍p-jī bûn-tô͘ ê chi̍t-ê, Iâ-so͘ kàu ê sî, i bô chò-hóe tī hia. 25 Kî-tha ê bûn-tô͘ chiū kā i kóng, "Goán í-keng ū khòaⁿ-tio̍h Chú à." M̄-koh To-má kā in kóng, "Góa nā bô khòaⁿ-tio̍h I chhiú-tiong ê teng-jiah, bô ēng chéng-thâu-á bong hit-ê teng-jiah, bô ēng chhiú bong I ê heng-khám-piⁿ, góa choa̍t-tùi m̄ siong-sìn." 26 Chi̍t lé-pài āu, bûn-tô͘ koh-chài chū-chi̍p tī chhù-lāi, To-má mā chò-hóe tī hia. Mn̂g koaiⁿ khí-lâi, Iâ-so͘ chiū kàu, khiā tī in tiong-ng, kóng, "Goān lín pêng-an!" 27 Iâ-so͘ kā To-má kóng, "Chhun chéng-thâu-á lâi bong Góa ê chhiú, chhun chhiú lâi bong Góa ê heng-khám-piⁿ. M̄-thang bô sìn, tio̍h siong-sìn." 28 To-má ìn kóng, "Góa ê Chú ah, Góa ê Siōng-Chú ah." 29 Iâ-so͘ kā i kóng, "Lí khòaⁿ-tio̍h Góa chiah siong-sìn. Hiah-ê bô khòaⁿ-tio̍h to lâi sìn ê lâng chin ū hok-khì."

Chit Pún Chheh ê Bo̍k-tek
30 Iâ-so͘ tī bûn-tô͘ ê bīn-chêng ū koh kiâⁿ chin-chē sîn-jiah, bô kì tī chit pún chheh. 31 Kì-chài chiah-ê tāi-chì sī beh hō͘ lín sìn Iâ-so͘ sī Ki-tok, sī Siōng-Chú ê Kiáⁿ, koh hō͘ lín thong-kòe sìn, khò I ê miâ lâi tit-tio̍h oa̍h-miā.