《巴克禮普世版聖經（試讀本）》

 | | | 轉寄

巴克禮普世版（試讀本） 約翰福音第十九章

作者 巴克禮普世版小組 2014.02.09

1 Jiân-āu, Pí-lia̍p-to kiò lâng kā Iâ-so͘ chhōa chhut-khì ēng piⁿ phah. 2 Hiah-ê peng-á ēng chhì-á pīⁿ-chò chi̍t-téng bián-liû, kā i tì tī Iâ-so͘ ê thâu-khak, koh kā I moa chi̍t-niá chí-sek ê tn̂g-phàu. 3 In lâi-kàu Iâ-so͘ ê bīn-chêng, kóng, "Iû-thài-lâng ê ông, Pêng-an! " Koh-chài siàn Iâ-so͘ ê chhùi-phóe. 4 Pí-lia̍p-to koh chhut-khì gōa-bīn kā in kóng, "Lín khòaⁿ, góa chhōa I chhut-lâi hō͘ lín, hō͘ lín chai góa chhâ-liáu kiat-kó, I bô chōe." 5 Iâ-so͘ tì chhì-á ê bián-liû, moa chí-sek ê tn̂g-phàu, chhut-lâi gōa-bīn. Pí-lia̍p-to kā in kóng, "Lín khòaⁿ, chit-ê lâng tī chia!" 6 Chè-si-tiúⁿ kah sèng-tiān ê kéng-ōe khòaⁿ-tio̍h Iâ-so͘ chiū tōa-siaⁿ hoah: "Kā I tèng si̍p-jī-kè! Kā I tèng si̍p-jī-kè!" Pí-lia̍p-to kā in kóng, "Lín ka-kī chhōa I khì tèng, in-ūi góa chhōe bô lí-iû kā I tēng-chōe." 7 Hiah-ê Iû-thài-lâng ìn kóng, "Goán ū lu̍t-hoat, chiàu lu̍t-hoat I eng-kai sí, in-ūi I chū-chheng ka-kī sī Siōng-Chú ê Kiáⁿ." 8 Pí-lia̍p-to thiaⁿ-tio̍h in án-ne kóng chiū koh-khah kiaⁿ. 9 I koh ji̍p-khì chóng-tok-hú mn̄g Iâ-so͘ kóng, "Lí tùi tó-ūi lâi?" M̄-koh Iâ-so͘ bô ìn. 10 Pí-lia̍p-to kā I kóng, "Lí m̄ kah góa kóng ho͘h? Lí Kám m̄-chai góa ū koân thang pàng Lí, mā ū koân kā Lí tèng si̍p-jī-kè?" 11 Iâ-so͘ ìn kóng, "Nā m̄-sī Siōng-Chú sù lí koân-pèng, lí bô koân thang pān góa, só͘-í chiong Góa kau hō͘ lí ê lâng, i ê chōe koh-khah tāng." 12 Pí-lia̍p-to thiaⁿ-tio̍h chiah-ê ōe chiū jú siūⁿ-beh pàng Iâ-so͘, m̄-koh hiah-ê Iû-thài-lâng koh tōa-siaⁿ hoah: "Lí nā pàng chit-ê lâng, chiū m̄-sī Lô-má hông-tè ê pêng-iú, in-ūi nā hong ka-kī chò ông chiū-sī pōe-poān Lô-má hông-tè." 13 Pí-lia̍p-to thiaⁿ-tio̍h chiah-ê ōe chiū chhōa Iâ-so͘ chhut-lâi, ka-kī chē tī sím-phòaⁿ-se̍k. Hit-ê só͘-chāi kiò-chò " Pho͘-chio̍h-tē". Hi-pek-lâi-ōe kiò-chò " Lek-pa-tāi". 14 Hit ji̍t sī Pôaⁿ-kòe-cheh ê chêng chi̍t ji̍t, chha-put-to tiong-tàu ê sî. Pí-lia̍p-to tùi hiah-ê Iû-thài-lâng kóng, "Lín khòaⁿ, che sī lín ê ông!" 15 In tōa-siaⁿ hoah: "Hō͘ I sí! Hō͘ I sí! Kā I tèng si̍p-jī-kè." Pí-lia̍p-to kā in kóng, "Lín ài góa kā lín ê ông tèng si̍p-jī-kè sī-bô?" Chiah-ê chè-si-tiúⁿ ìn kóng, "Lô-má hông-tè í-gōa, goán bô ông."

Iâ-so͘ Hông Tèng Si̍p-jī-kè (Mt 7:32-44;Mk 15:21-32;Lk 23:26-43)
16 Jiân-āu, Pí-lia̍p-to chiong Iâ-so͘ kau hō͘ in khì tèng si̍p-jī-kè. In chiū kā Iâ-so͘ ah-khì. 17 Iâ-so͘ giâ ka-kī ê si̍p-jī-kè chhut-khì, lâi-kàu chi̍t-ê kiò-chò " Thâu-khak-óaⁿ" ê só͘-chāi. Hi-pek-lâi-ōe kiò-chò " Kok-kok-thaⁿ". 18 In tī hia kā Iâ-so͘ tèng si̍p-jī-kè, koh ū nn̄g lâng kah I chò-hóe tèng, chi̍t pêng chi̍t-ê, Iâ-so͘ tī tiong-ng. 19 Pí-lia̍p-to siá chi̍t-tè chōe-chn̄g hē tī si̍p-jī-kè téng-bīn, siá kóng, "Ná-sat-le̍k-lâng Iâ-so͘, Iû-thài-lâng ê Ông." 20 Iâ-so͘ siū tèng ê só͘-chāi kīn-óa Iâ-lō͘-sat-léng-siâⁿ, só͘-í ū chin-chē Iû-thài-lâng tha̍k-tio̍h chit-ê chōe-chn̄g. Hit-ê chōe-chn̄g koh sī ēng Hi-pek-lâi-bûn, Lia̍p-teng-bûn, Hi-lia̍p-bûn siá-.ê. 21 Iû-thài-lâng hiah-ê chè-si-tiúⁿ kā Pí-lia̍p-to kóng, "M̄-thang siá,' Iû-thài-lâng ê ông'. Tio̍h siá, ' I ka-kī kóng, Góa sī Iû-thài-lâng ê ông.'" 22 Pí-lia̍p-to ìn kóng, "Góa siá lo̍h-khì chiū hó à." 23 Peng-á kā Iâ-so͘ tèng si̍p-jī-kè liáu-āu, the̍h I ê gōa-phàu lâi pun chò sì hūn, chi̍t lâng chi̍t hūn. In koh the̍h I ê lāi-saⁿ, chit-niá lāi-saⁿ bô kap-chōa, sī téng-ē sio-thàu chit-chò chi̍t-tè. 24 In chò-hóe chham-siông kóng, "M̄-thang thiah-li̍h, lán tio̍h lâi liam-khau, khòaⁿ siáⁿ-lâng tit-tio̍h kui niá." Che sī beh èng-giām Sèng-keng só͘ kóng: In chò-hóe pun Góa ê gōa-phàu, Ūi-tio̍h Góa ê lāi-saⁿ lâi liam-khau.( chù: SPh 22:18) Peng-á kó-jiân chiàu án-ne chò. 25 Iâ-so͘ ê lāu-bú, I ê a-î, Kek-liû-pa ê bó͘ Má-lī-a, kah Boa̍t-tāi-lia̍p ê Má-lī-a lóng khiā tī Iâ-so͘ ê si̍p-jī-kè piⁿ. 26 Iâ-so͘ khòaⁿ-tio̍h lāu-bó kah só͘ thiàⁿ ê bûn-tô͘ khiā tī piⁿ-á, chiū tùi lāu-bó kóng, "A-bú ah, khòaⁿ, lí ê kiáⁿ!" 27 Koh tùi hit-ê bûn-tô͘ kóng, "Khòaⁿ, lí ê lāu-bú!" Tùi hit sî khí, hit-ê bûn-tô͘ chiū kā Iâ-so͘ ê lāu-bú chiap tńg-khì in tau.

Iâ-so͘ ê Sí-bông (Mt 27:45-56; Mk 15:33-41; Lk 23:44-49)
28 Chit-ê tāi-chì í-āu, Iâ-so͘ chai it-chhè ê tāi-chì lóng oân-sêng ā. Ūi-tio̍h beh èng-giām Sèng-keng ê ōe chiū kóng, "Góa chhùi-ta." 29 Tī hia ū chi̍t-ê té móa sng-chhò͘ ê pân. In chiū the̍h hái-mî chìm chhò͘, pa̍k tòa gû-chhek-chháu bóe, tu khì kàu Iâ-so͘ ê chhùi. 30 Iâ-so͘ tam chhò͘ liáu-āu chiū kóng, "Taⁿ it-chhè lóng oân-sêng ā." Án-ne kóng soah, thâu chiū tàm lo̍h-khì, khùi tn̄g.

Iâ-so͘ ê Heng-khám-piⁿ Siū Chha̍k
31 Hit ji̍t sī pài-gō͘, Iû-thài-lâng bô ài tī keh-tńg-ji̍t ê tōa An-hioh-ji̍t lâu sin-si tī si̍p-jī-kè téng, só͘-í in kiû Pí-lia̍p-to kiò lâng kòng-tn̄g siū-hêng-jîn ê kha-kut, thang chiong sin-si siu lo̍h-lâi. 32 chiū khì, chiong kah Iâ-so͘ chò-hóe tèng si̍p-jī-kè hit nn̄g lâng ê kha-kut kòng-tn̄g. 33 Lâi-kàu Iâ-so͘ hia, khòaⁿ-tio̍h I í-keng sí, chiū bô kòng-tn̄g I ê kha-kut. 34 M̄-koh ū chi̍t-ê peng ēng chhiuⁿ chha̍k Iâ-so͘ ê heng-khám-piⁿ, hoeh kah chúi sûi-sî lâu chhut-lâi. 35 Chhin-ba̍k khòaⁿ-kìⁿ ê lâng í-keng ū chò kiàn-chèng, sī beh hō͘ lâng siong-sìn. I ka-kī chai chit-ê kiàn-chèng sī chin, I só͘ kóng ê lóng sī sū-si̍t. 36 Chit-ê tāi-chì ê oân-sêng sī beh èng-giām Sèng-keng só͘ kóng: I ê kut bô chi̍t-ki ē hō͘ lâng phah-chhùi.( chù: CAK 12:46) 37 Koh ū lēng-gōa chi̍t-kù Sèng-keng kóng: Lâng ē gióng-bōng in só͘ chha̍k ê lâng.( chù: SKL 12:10)

Iâ-so͘ ê Bâi-chòng (Mt 27:56-61; Mk 15:42-47; Lk 23:50-56)
38 Chiah-ê tāi-chì liáu-āu, ū chi̍t-ê A-lī-má-thài-lâng Iok-sek. I in-ūi kiaⁿ Iû-thài-lâng chiah thau-thau-á chò bûn-tô͘. I lâi kiû Pí-lia̍p-to chún i khì siu Iâ-so͘ ê sin-si. Pí-lia̍p-to ín-chún. Iok-sek chiū khì siu Iâ-so͘ ê sin-si. 39 Koh ū chêng bat àm-sî lâi kìⁿ Iâ-so͘ ê Nî-ko-tí-bó͘ mā lâi. I tòa chha-put-to saⁿ-cha̍p kong-kin ê bu̍t-io̍h chhiau tîm-hiuⁿ ê phang-liāu lâi. 40 In nn̄g lâng chiong Iâ-so͘ ê sin-si siu lo̍h-lâi. Chiàu Iû-thài-lâng bâi-chòng ê koàn-lē kā sin-si boah phang-liāu koh ēng iù-tē-pò͘ pau khí-lâi. 41 Iâ-so͘ tèng si̍p-jī-kè ê só͘-chāi ū chi̍t-khu hn̂g. Hn̂g-lāi ū chi̍t-ê iáu m̄-bat chòng kòe lâng ê sin bōng. 42 Hit ji̍t sī Iû-thài-lâng chún-pī cheh ê ji̍t, bōng koh bô hn̄g. In chiū kā Iâ-so͘ bâi-chòng tī hia.