《巴克禮普世版聖經（試讀本）》

 | | | 轉寄

巴克禮普世版（試讀本） 路加福音第十七章

作者 巴克禮普世版小組 2014.01.26

Iâ-so͘ kóng chiah-ê, chiū kia̍h ba̍k ǹg thiⁿ, kóng, Pē ah, sî kàu lah; goān lí êng-kng lí ê Kiáⁿ, thang hō͘ Kiáⁿ êng-kng lí; Iâ-so͘ Ūi Bûn-tô͘ Kî-tó Iâ-so͘ kóng chiah-ê ōe liáu-āu, gia̍h thâu ǹg thiⁿ, kóng, "Thiⁿ-Pē ah, sî í-keng kàu à. Goān Lí êng-iāu Lí ê Kiáⁿ, thang hō͘ Kiáⁿ mā ē-tàng êng-iāu Lí. 2 chhin-chhiūⁿ lí bat hō͘ Kiáⁿ ū koân tī-lí kìⁿ ū jio̍k-thé ê, beh hō͘ I chiong éng-oa̍h siúⁿ-sù kìⁿ-nā lí só͘ hō͘ I ê lâng. Lí ū chiong thóng-tī bān-bîn ê koân-pèng siúⁿ-sù hō͘ Kiáⁿ, hō͘ I ē-tàng chiong éng-oán ê oa̍h-miā siúⁿ-sù it-chhè Lí kau-tài I ê lâng. 3 Chit ê éng-oa̍h, chiū-sī bat lí to̍k-it chin ê Siōng-tè, kap lí só͘ chhe ê Iâ-so͘ Ki-tok. Éng-oán ê oa̍h-miā chiū-sī jīn-bat Lí sī to̍k-it chin ê Siōng-Chú, koh jīn-bat Lí só͘ chhe-phài lâi ê Iâ-so͘ Ki-tok. 4 Góa í-keng êng-kng lí tī tōe-chiūⁿ; chiū-sī lí só͘ kau-tāi góa kiâⁿ ê kang, góa í-keng chiâⁿ i. Góa í-keng tī tē-chiūⁿ oân-sêng Lí kau-tài Góa ê kang lâi êng-iāu Lí à. 5 Pē ah, taⁿ tio̍h hō͘ góa kap lí saⁿ-kap ū êng-kng, chiū-sī bē ū sè-kan í-chêng góa kap lí saⁿ-kap ū ê êng-kng. Thiⁿ-Pē ah, taⁿ kiû Lí hō͘ Góa tī Lí ê bīn-chêng tit-tio̍h êng-iāu, chiū-sī chhòng-chō sè-kan í-chêng Góa kah Lí chò-hóe ū ê êng-iāu."

6 Lí só͘ siúⁿ-sù góa chhut tī sè-kan ê lâng, góa í-keng ēng lí ê miâ tùi in hián-bêng; in pún sī lí ê, lí ēng in siúⁿ-sù góa; in ia̍h í-keng siú lí ê tō-lí. " Lí tùi sè-kan kéng-soán chhut-lâi hō͘ Góa ê lâng, Góa í-keng ū chiong Lí ê miâ tùi in hián-bêng. In goân-pún sī Lí ê, Lí chiong in siúⁿ-sù hō͘ Góa. In mā í-keng ū chun-siú Lí ê tō-lí. 7 Taⁿ in chai kìⁿ-nā lí só͘ hō͘ góa ê, lóng sī tùi lí lâi; Taⁿ in chai Lí hō͘ Góa ê ta̍k-hāng lóng sī tùi Lí lâi-.ê. 8 in-ūi lí só͘ hō͘ góa ê ōe, góa í-keng hō͘ in; in sêng-siū i, ia̍h khak-si̍t chai góa tùi lí chhut, koh sìn lí chhe góa. In-ūi Góa ū chiong Lí hō͘ Góa ê sìn-sit thoân hō͘ in. In ū chiap-siū hiah-ê sìn-sit, mā khak-si̍t chai Góa sī tùi Lí hia lâi, koh ū sìn sī Lí chhe-phài Góa lâi."

9 Góa ūi-tio̍h in kiû; m̄ sī ūi-tio̍h sè-kan kiû, chiū-sī ūi-tio̍h lí só͘ hō͘ góa ê lâng; in-ūi in sī lí ê. " Góa ūi-tio̍h in tùi Lí kî-kiû, m̄-sī ūi-tio̍h sè-kan-lâng kiû, sī ūi-tio̍h Lí hō͘ Góa ê lâng lâi kiû, in-ūi in sī Lí-.ê. 10 Kìⁿ-nā góa ê, chiū-sī lí ê; lí ê, chiū-sī góa ê; koh góa tī in ū tit-tio̍h êng-kng. Góa ê it-chhè lóng sī Lí ê, Lí ê it-chhè mā lóng sī Góa-.ê. Góa koh ū thong-kòe in tit-tio̍h êng-iāu. 11 Taⁿ liáu-āu góa bô tī sè-kan; in tī sè-kan, góa kui tī lí. Sèng ê Pē ah, goān lí tī lí ê miâ, chiū-sī lí só͘ hō͘ góa ê, lâi pó-siú in, hō͘ in chòe chi̍t-ê, chhin-chhiūⁿ lán chi̍t iūⁿ. Góa bô koh tiàm tī sè-kan, m̄-koh in iáu tī sè-kan. Sèng ê Thiⁿ-Pē ah, goān Lí ēng Lí ê miâ, chiū-sī Lí hō͘ Góa ê, lâi pó-siú in, thang hō͘ in chiâⁿ-chò chi̍t-thé, chhin-chhiūⁿ lán sī chi̍t-thé. 12 Góa kap in tī-teh ê sî, bat tī lí ê miâ, chiū-sī lí só͘ hō͘ góa ê, lâi pó-siú in; góa ia̍h ū chiàu-kò͘ in, kî-tiong bô chi̍t-ê tîm-lûn; chí ū hit ê tîm-lûn ê lâng nā-tiāⁿ, hō͘ sèng-keng tit-tio̍h èng-giām. Góa kah in chò-hóe ê sî, bat hōng Lí ê miâ, chiū-sī Lí hō͘ Góa ê, lâi pó-siú in. Tû-liáu hit-ê chù-tēng tîm-lûn ê lâng í-gōa, Góa mā ū chiàu-kò͘ in, hō͘ in lóng bô tîm-lûn, án-ne sī beh hō͘ Sèng-keng ê ōe tit-tio̍h èng-giām. 13 Taⁿ góa chiū-kūn lí; góa iáu tiàm sè-kan kóng chiah ê ōe, beh hō͘ in ū góa ê hoaⁿ-hí móa-móa tī in ê sim-lāi. Taⁿ góa khì Lí hia. Góa iáu tiàm sè-kan ê sî kóng chiah-ê ōe, sī beh hō͘ in sim-lāi chhiong-móa Góa ê hoaⁿ-hí. 14 Góa í-keng chiong lí ê tō-lí hō͘ in; sè-kan oàn-hūn in, in-ūi in bô sio̍k sè-kan, chhin-chhiūⁿ góa bô sio̍k sè-kan. Góa ū chiong Lí ê tō-lí thoân hō͘ in, sè-kan-lâng oàn-hūn in, in-ūi in bô koh sio̍k chit sè-kan, chhin-chhiūⁿ Góa bô sio̍k chit sè-kan. 15 Góa m̄ sī kiû lí hō͘ in chhut sè-kan, chiū-sī pó-siú in thoat-lī pháiⁿ-ê. Góa m̄-sī kiû Lí chhōa in lī-khui chit sè-kan, sī teh kiû Lí pó-siú in thoat-lī hit-ê siâ-ok. 16 In bô sio̍k sè-kan, chhin-chhiūⁿ góa bô sio̍k sè-kan. In bô koh sio̍k chit sè-kan, chhin-chhiūⁿ Góa bô sio̍k chit sè-kan. 17 Goān lí ēng chin-lí hō͘ in chiâⁿ-sèng; lí ê tō-lí chiū-sī chin-lí. Kiû Lí ēng chin-lí kā in sèng-hòa, Lí ê ōe chiū-sī chin-lí. 18 Chhin-chhiūⁿ lí chhe góa ji̍p sè-kan, góa ia̍h ū chhe in ji̍p sè-kan. Chhin-chhiūⁿ Lí ū chhe-phài Góa ji̍p sè-kan, Góa mā ū chhe-phài in ji̍p sè-kan. 19 Góa ūi-tio̍h in lâi chòe sèng, hō͘ in ia̍h tùi chin-lí lâi chiâⁿ-sèng. Taⁿ Góa ūi-tio̍h in lâi sèng-hòa Góa ka-kī hō͘ Lí ēng, thang hō͘ in mā ē-tàng thong-kòe chin-lí lâi sèng-hòa in ka-kī hō͘ Lí ēng."

20 Góa m̄ nā ūi-tio̍h chiah ê lâng kiû, ia̍h ūi-tio̍h tùi in ê ōe lâi sìn góa ê lâng kiû; " Góa m̄-nā ūi-tio̍h chiah-ê lâng kî-kiû, mā ūi-tio̍h tùi chiah-ê lâng só͘ thoân ê tō-lí lâi sìn Góa hiah-ê lâng kî-kiû. 21 hō͘ in lóng chòe chi̍t-ê; chhin-chhiūⁿ Pē, lí tiàm-tī góa, góa tiàm-tī lí, hō͘ in ia̍h án-ni tiàm-tī lán; chiū hō͘ sè-kan sìn lí chhe góa. Thang hō͘ in lóng chiâⁿ-chò chi̍t-thé. Thiⁿ-Pē ah, chhin-chhiūⁿ Lí tiàm-tī Góa lāi-bīn, Góa tiàm-tī Lí lāi-bīn. Kiû Lí hō͘ in mā án-ne tiàm-tī lán lāi-bīn, thang hō͘ sè-kan-lâng siong-sìn, sī Lí chhe-phài Góa lâi. 22 Lí só͘ hō͘ góa ê êng-kng, góa í-keng hō͘ in; hō͘ in chòe chi̍t-ê, chhin-chhiūⁿ lán ê chòe chi̍t-ê; Lí hō͘ Góa ê êng-iāu, Góa mā ū hō͘ in, thang hō͘ in chiâⁿ-chò chi̍t-thé, chhin-chhiūⁿ lán sī chi̍t-thé. 23 góa tiàm-tī in, lí tiàm-tī góa, hō͘ in ōe oân-choân lâi chòe chi̍t-ê; hō͘ sè-kan chai lí chhe góa, ia̍h chai lí thiàⁿ in chhin-chhiūⁿ thiàⁿ góa chi̍t iūⁿ. Góa tī in lāi-bīn, Lí tī Góa lāi-bīn, sī beh hō͘ in ē-tàng oân-choân chiâⁿ-chò chi̍t-thé, thang hō͘ sè-kan-lâng chai, sī Lí chhe-phài Góa, mā chai Lí ū thiàⁿ in chhin-chhiūⁿ Lí ū thiàⁿ Góa."

24 Pē ah, lí só͘ hō͘ góa ê, góa ài in tī góa só͘ tī-teh ê só͘-chāi, ia̍h kap góa saⁿ-kap tī hia; hō͘ in khòaⁿ-kìⁿ lí só͘ siúⁿ-sù góa ê êng-kng; in-ūi chhòng-chō sè-kan í-chêng lí í-keng thiàⁿ góa. " Thiⁿ-Pē ah, Lí kau-tài Góa hiah-ê lâng, Góa bô-lūn tī tó-ūi lóng ài in kah Góa chò-hóe tī hia, thang hō͘ in khòaⁿ-tio̍h Lí siúⁿ-sù Góa ê êng-iāu, in-ūi Lí tī chhòng-chō sè-kan í-chêng to̍h í-keng thiàⁿ Góa. 25 Gī ê Pē ah, sè-kan bē bat lí; to̍k-to̍k góa ū bat lí; chiah ê lâng ia̍h bat lí ū chhe góa; Kong-gī ê Thiⁿ-Pē ah, sè-kan-lâng m̄-bat Lí, m̄-koh Góa bat Lí. Chiah-ê lâng mā chai Lí ū chhe-phài Góa. 26 góa bat ēng lí ê miâ chí-sī in, koh beh chí-sī in; hō͘ lí thiàⁿ góa ê thiàⁿ-thàng tiàm-tī in, góa ia̍h tiàm-tī in. Góa í-keng ū hō͘ in bat Lí ê miâ, mā beh kè-sio̍k chí-sī in. Thang hō͘ Lí tùi Góa ê thiàⁿ-thàng tī in lāi-bīn, Góa mā tī in lāi-bīn."