《巴克禮普世版聖經（試讀本）》

 | | | 轉寄

巴克禮普世版（試讀本） 約翰福音第十六章

作者 巴克禮普世版小組 2014.01.19

" Góa kā lín kóng chiah-ê tāi-chì, sī beh hō͘ lín ê sìn-sim bē khí iô-tāng. 2 Sè-kan-lâng ē kā lín kóaⁿ-chhut hōe-tn̂g. Sî teh-beh kàu, hiah-ê siūⁿ-beh thâi lín ê lâng lóng ē siūⁿ-kóng in teh ho̍k-sāi Siōng-Chú. 3 In ē chò chiah-ê tāi-chì sī in-ūi in m̄-bat Thiⁿ-Pē, mā m̄-bat Góa. 4 M̄-koh Góa ū kā lín kóng chiah-ê tāi-chì, sī beh hō͘ lín kàu sî thang kì-tit Góa bat kā lín kóng."

Sèng-Sîn ê Kang-chok
" Góa bô tùi khí-thâu kā lín kóng chiah-ê tāi-chì, sī in-ūi Góa iáu kah lín chò-hóe. 5 Taⁿ Góa teh-beh tńg-khì chhe-phài Góa lâi ê Hit-ūi hia. Lín tiong-kan bô-lâng mn̄g góa, kóng, ' Lí beh khì tó-ūi?' 6 Góa kā lín kóng chiah-ê tāi-chì liáu-āu, lín soah móa-sim iu-būn. 7 M̄-koh Góa tio̍h chiong si̍t-chêng kā lín kóng. Góa khì sī tùi lín ū lī-ek. Góa nā bô khì, Hit-ūi Pó-hūi-su chiū bē lâi lín chia; Góa nā khì, chiū ē chhe I lâi lín chia. 8 Sèng-Sîn lâi ê sî, ē kā sè-kan-lâng chí-chèng in tùi chōe, tùi gī, tùi sím-phòaⁿ ê chhò-gō͘ koan-liām. 9 Tùi chōe, in-ūi in m̄ sìn Góa; 10 Tùi gī, in-ūi Góa teh-beh tńg-khì Thiⁿ-Pē hia, lín bē koh khòaⁿ-tio̍h Góa; 11 Tùi sím-phòaⁿ, in-ūi chit sè-kan ê thóng-tī-chiá í-keng siū sím-phòaⁿ." 12 Góa iáu ū chin-chē hāng tāi-chì beh kā lín kóng, m̄-koh lín chit-má iáu bē-tàng liáu-kái. 13 Chin-lí ê Sèng-Sîn lâi ê sî, I ē chhōa lín liáu-kái it-chhè ê chin-lí. I m̄-sī chiàu ka-kī ê ì-sù lâi kóng, sī chiong I só͘ thiaⁿ-tio̍h-.ê lâi kóng, mā ē chiong bī-lâi ê tāi-chì pò lín chai. 14 I ē kā êng-kng kui hō͘ Góa, in-ūi I ē chiong tùi Góa só͘ niá-siū ê thoân-pò hō͘ lín. 15 Thiⁿ-Pē só͘ ū ê it-chhè lóng sī Góa ê, só͘-í Góa chiah kóng, Sèng-Sîn ē chiong tùi Góa só͘ niá-siū ê chin-lí thoân-pò hō͘ lín."

Iu-būn Kah Hoaⁿ-hí
16 Koh bô jōa kú, lín chiū bē-tàng khòaⁿ-tio̍h Góa, koh-chài bô jōa kú, lín chiū ē koh khòaⁿ-tio̍h Góa." 17 Ū kúi-nā-ê bûn-tô͘ hō͘-siōng kóng, "I kā lán kóng, ' Koh bô jōa kú, lín chiū bē-tàng khòaⁿ-tio̍h Góa, koh-chài bô jōa kú, lín chiū ē koh khòaⁿ-tio̍h Góa.' Koh kóng, ' In-ūi Góa teh-beh tńg-khì Thiⁿ-Pē hia.' Chiah-ê ōe sī sím-mi̍h ì-sù?" 18 Só͘-í in it-ti̍t mn̄g, " I só͘ kóng ê ' Koh bô jōa kú.' sī sím-mi̍h ì-sù? Lán m̄-chai I teh kóng sím-mi̍h." 19 Iâ-so͘ chai in ài beh mn̄g I, chiū kā in kóng, "Lín in-ūi Góa kóng, ' Koh bô jōa kú, lín chiū bē-tàng khòaⁿ-tio̍h Góa, koh-chài bô jōa kú, lín chiū ē koh khòaⁿ-tio̍h Góa.' teh mn̄g-lâi mn̄g-khì sī-bô? 20 Góa si̍t-chāi kā lín kóng, lín ē thî-khàu ai-siong, m̄-koh sè-kan-lâng ē hoaⁿ-hí. Lín ē iu-būn, m̄-koh lín ê iu-būn beh piàn-chò hoaⁿ-hí. 21 Hū-jîn-lâng beh seⁿ-kiáⁿ chiū iu-būn, in-ūi i ê sán-kî kàu à, m̄-koh eⁿ-á chhut-sì liáu-āu, bô koh kì-tit seⁿ-kiáⁿ ê thòng-khó͘, in-ūi i ē hoaⁿ-hí ū eⁿ-á chhut-sì tī sè-kan. 22 Chhin-chhiūⁿ án-ne, lín chit-má ū iu-būn, m̄-koh Góa ē koh kìⁿ-tio̍h lín, lín ê sim chiū ē hoaⁿ-hí. Bô-lâng ē-tàng kā lín ê hoaⁿ-hí chhiúⁿ-khì." 23 " Kàu hit ji̍t, lín bē koh mn̄g Góa sím-mi̍h. Góa si̍t-chāi kā lín kóng, lín hōng Góa ê miâ tùi Thiⁿ-Pē só͘ kiû ê, I lóng ē siúⁿ-sù hō͘ lín. 24 Lín kàu taⁿ iáu m̄-bat hōng Góa ê miâ kiû sím-mi̍h. Lín tio̍h kiû, chiū ē tit-tio̍h, hō͘ lín ê hoaⁿ-hí móa-móa."

Iâⁿ-kòe Sè-kan
25 " Chiah-ê tāi-chì Góa lóng ēng phì-jū kā lín kóng kòe à. Sî teh-beh kàu, Góa bô koh-chài ēng phì-jū kā lín kóng. Góa beh bêng-khak tùi lín kóng-khí Thiⁿ-Pē ê tāi-chì. 26 Hit-ê ji̍t nā kàu, lín tio̍h hōng Góa ê miâ kî-kiû. Góa bô kā lín kóng, Góa beh thè lín tùi Thiⁿ-Pē khún-kiû. 27 Thiⁿ-Pē pún-sin to̍h thiàⁿ lín, sī in-ūi lín ū thiàⁿ Góa, koh ū sìn Góa sī tùi Thiⁿ-Pē hia lâi-.ê. 28 Góa tùi Thiⁿ-Pē hia chhut-lâi, lâi-kàu sè-kan. Taⁿ koh beh lī-khui sè-kan, tńg-khì Thiⁿ-Pē hia." 29 Bûn-tô͘ mn̄g kóng, "Taⁿ Lí bêng-khak tùi goán kóng, m̄-sī ēng phì-jū. 30 Taⁿ goán chai Lí bû-só͘ put-ti, m̄-bián lâng kā Lí mn̄g, in-ūi án-ne, goán sìn Lí sī tùi Siōng-Chú hia lâi-.ê." 31 Iâ-so͘ mn̄g kóng, "Taⁿ lín ū sìn bô? 32 Sî teh-beh kàu, kî-si̍t í-keng kàu à. Lín ē sì-sòaⁿ, ta̍k-lâng tńg-khì ka-kī ê só͘-chāi, pàng Góa ka-kī chi̍t-ê, m̄-koh Góa m̄-sī ka-kī chi̍t-ê, in-ūi ū Thiⁿ-Pē kah Góa tông-chāi. 33 Góa í-keng chiong chiah-ê tāi-chì kā lín kóng, sī beh hō͘ lín tī Góa ê lāi-bīn ū pêng-an. Lín tī sè-kan ē ū khó͘-lān, m̄-koh lín thang hòng-sim, Góa í-keng iâⁿ-kòe sè-kan."