《巴克禮普世版聖經（試讀本）》

 | | | 轉寄

巴克禮普世版（試讀本） 約翰福音第十章

作者 巴克禮普世版小組 2013.12.08

Iûⁿ-tiâu ê Phì-jū
1 " Góa si̍t-chāi kā lín kóng, beh ji̍p-khì iûⁿ-tiâu nā bô tùi hit-ê mn̂g, tùi pa̍t só͘-chāi pôaⁿ kòe-khì ê sī chha̍t, sī kiông-tō. 2 Tùi mn̂g ji̍p-khì ê chiah sī iûⁿ ê bo̍k-chiá. 3 Kò͘-mn̂g ê kā bo̍k-chiá khui mn̂g, iûⁿ ē jīn-tit bo̍k-chiá ê siaⁿ. Bo̍k-chiá chiū kā ka-kī ê iûⁿ chi̍t-chiah chi̍t-chiah kiò miâ, kā in chhōa chhut-lâi. 4 Bo̍k-chiá kā ka-kī ê iûⁿ lóng pàng chhut-khì liáu-āu, kiâⁿ tī iûⁿ-kûn ê thâu-chêng. Iûⁿ chiū tòe bo̍k-chiá kiâⁿ, in-ūi in ē jīn-tit i ê siaⁿ. 5 Iûⁿ it-tēng bē tòe chheⁿ-hūn-lâng khì, tian-tò ē siám-phiah, in-ūi in bē jīn-tit chheⁿ-hūn-lâng ê siaⁿ. 6 Iâ-so͘ kā in kóng chit-ê phì-jū, m̄-koh in m̄-chai I teh kóng sím-mi̍h.

Iâ-so͘ Sī Hó Bo̍k-chiá
7 Só͘-í Iâ-so͘ koh kā in kóng, "Góa si̍t-chāi kā lín kóng, Góa chiū-sī iûⁿ-tiâu ê mn̂g. 8 Só͘-í pí Góa khah tāi-seng lâi ê sī chha̍t, sī kiông-tō, m̄-koh iûⁿ bô thiaⁿ in. 9 Góa chiū-sī mn̂g, tùi góa chit-ê mn̂g ji̍p-lâi ê ē tit-tio̍h kiù, ē-tàng chhut-chhut ji̍p-ji̍p, mā ē chhōe-tio̍h bo̍k-chháu. 10 Chha̍t lâi, it-tēng sī beh thau-the̍h, beh thâi, beh húi-bia̍t. Góa lâi sī beh hō͘ in tit-tio̍h hong-sēng ê oa̍h-miā." 11 Góa sī hó ê bo̍k-chiá. Hó bo̍k-chiá ūi-tio̍h iûⁿ lâi pàng-sak sèⁿ-miā. 12 Hō͘ lâng chhiàⁿ chò-kang ê lâng m̄-sī bo̍k-chiá, iûⁿ mā m̄-sī ka-kī ê iûⁿ; i khòaⁿ-tio̍h chhâi-lông lâi, chiū kā iûⁿ pàng-sak khì tô-cháu, chhâi-lông kā hiah-ê iûⁿ, koh kā in kóaⁿ-sòaⁿ. 13 I án-ne tô-cháu, sī in-ūi i sī hō͘ lâng chhiàⁿ ê kang-lâng, tùi iûⁿ lóng bô koan-sim. 14 Góa sī hó ê bo̍k-chiá. Góa bat ka-kī ê iûⁿ, hiah-ê iûⁿ mā bat Góa. 15 Chhin-chhiūⁿ Thiⁿ-Pē bat Góa, Góa mā bat Thiⁿ-Pē. Góa koh ūi-tio̍h iûⁿ pàng-sak sèⁿ-miā. 16 Góa iáu ū kî-tha bô sio̍k chit-ê iûⁿ-tiâu ê iûⁿ. Góa it-tēng tio̍h khì kā in chhōa lâi. In mā ē thiaⁿ Góa ê siaⁿ lâi chiâⁿ-chò chi̍t kûn, kui-sio̍k chi̍t-ê bo̍k-chiá." 17 " Só͘-í Thiⁿ-Pē thiàⁿ Góa, in-ūi Góa pàng-sak ka-kī ê sèⁿ-miā, thang koh tit-tio̍h sèⁿ-miā. 18 Bô-lâng chhiúⁿ Góa ê sèⁿ-miā, sī Góa ka-kī chū-goān pàng-sak. Góa ū koân thang pàng-sak, mā ū koân thang koh tit-tio̍h. Che sī Góa tùi Thiⁿ-Pē niá-siū ê bēng-lēng." 19 In-ūi Iâ-so͘ kóng chiah-ê ōe, Iû-thài-lâng koh khí hun-lia̍t. 20 Kî-tiong chin-chē lâng kóng, "I hō͘ siâ-sîn hū-sin teh khí-kông, ná-tio̍h thiaⁿ I ê ōe?" 21 Koh ū-lâng kóng, "Che m̄-sī hō͘ siâ-sîn hū-sin ê lâng só͘ kóng ê ōe, kám kóng kúi ē khui chheⁿ-mê lâng ê ba̍k-chiu?"

Iâ-so͘ Hō͘ Iû-thài-lâng Khì-sak
22 Tī tang-thiⁿ sî, Iâ-lō͘-sat-léng ū teh khèng-chiok hiàn-tiān ê cheh. 23 Iâ-so͘ tī sèng-tiān ê Só͘-lô-bûn cháu-lông teh kiâⁿ. 24 Iû-thài-lâng ûi-lûi óa-lâi kā I kóng, "Lí beh hō͘ goán ê sim giâu-gî kàu tang sî? Lí nā sī Ki-tok, tio̍h chiàu-si̍t kā goán kóng." 25 Iâ-so͘ ìn kóng, "Góa bat kā lín kóng, m̄-koh lín m̄ sìn. Góa hōng Góa ê Thiⁿ-Pē ê miâ só͘ chò ê tāi-chì, lóng sī teh ūi Góa chò kiàn-chèng. 26 M̄-koh lín m̄ sìn, in-ūi lín m̄-sī Góa ê iûⁿ. 27 Góa ê iûⁿ thiaⁿ Góa ê siaⁿ, Góa bat in, in mā tòe Góa. 28 Góa koh siúⁿ-sù in ū éng-oán ê oa̍h-miā, hō͘ in éng-oán bē tîm-lûn. Bô-lâng ē tùi Góa ê chhiú kā in chhiúⁿ-khì. 29 Kā hiah-ê iûⁿ siúⁿ-sù hō͘ Góa ê Thiⁿ-Pē pí it-chhè lóng khah úi-tāi. Bô-lâng ē-tàng kā in tùi Thiⁿ-Pē ê chhiú chhiúⁿ-khì. 30 Góa kah Thiⁿ-Pē chiâⁿ-chò chi̍t-thé." 31 Iû-thài-lâng koh the̍h chio̍h-thâu beh tìm Iâ-so͘. 32 Iâ-so͘ ìn kóng, "Thiⁿ-Pē ài Góa chò ê chin-chē hó-sū, Góa lóng chò hō͘ lín khòaⁿ. Lín sī ūi-tio̍h tó chi̍t-hāng tāi-chì, beh ēng chio̍h-thâu kā Góa tìm?" 33 Hiah-ê Iû-thài-lâng ìn kóng, "Goán ēng chio̍h-thâu kā Lí tìm, m̄-sī ūi-tio̍h Lí chò hó-sū, sī in-ūi Lí siat-to̍k Siōng-Chú. Lí put-kò sī chi̍t-ê lâng, iáu-koh ka-kī chū-chheng-chò Siōng-Chú." 34 Iâ-so͘ ìn kóng, "Lín ê lu̍t-hoat kám bô kì-chài: Siōng-Chú kóng, ' Góa kóng lín sī sîn-bêng'?( chù: SPh 82:6) 35 Sèng-keng ê ōe éng-oán bē kái-piàn. Kì-jiân Siōng-Chú chheng-ho͘ hiah-ê chiap-siū Siōng-Chú ê ōe ê lâng chò sîn-bêng. 36 Taⁿ Thiⁿ-Pē kā Góa hun-piat88 chò sèng, koh chhe-phài Góa ji̍p sè-kan. Sī án-chóaⁿ Góa kóng, ' Góa sī Siōng-Chú ê Kiáⁿ', lín chiū kóng Góa teh siat-to̍k Siōng-Chú? 37 Góa nā m̄-sī teh chò Thiⁿ-Pē ê tāi-chì, lín m̄-bián sìn Góa. 38 Góa nā teh chò Siōng-Chú ê kang, lín sui-jiân m̄ sìn Góa, mā tio̍h sìn Góa só͘ chò ê tāi-chì, án-ne thang hō͘ lín chai, Thiⁿ-Pē tī Góa ê lāi-bīn, Góa mā tī Thiⁿ-Pē ê lāi-bīn." 39 In koh-chài siūⁿ-beh lia̍h Iâ-so͘, I chiū thoat-lī in ê chhiú lī-khui hia. 40 Iâ-so͘ koh khì Iok-tàn-hô ê tùi-hōaⁿ, kàu Iok-hān chá-chêng kā lâng sé-lé ê só͘-chāi, chiū tòa tī hia. 41 Ū chin-chē lâng koh lâi kìⁿ Iâ-so͘, kóng, "Iok-hān lóng bô kiâⁿ sîn-jiah, m̄-koh i só͘ kóng koan-hē chit-ê lâng ê tāi-chì lóng sī chin-si̍t." 42 Tī hia ū chin-chē lâng sìn Iâ-so͘.