《巴克禮普世版聖經（試讀本）》

 | | | 轉寄

巴克禮普世版（試讀本） 約翰福音第九章

作者 巴克禮普世版小組 2013.12.01

Iâ-so͘ I-hó Chhut-sì To̍h Chheⁿ-mê ê Lâng
1 Iâ-so͘ kiâⁿ kòe ê sî, khòaⁿ-tio̍h chi̍t-ê chhut-sì to̍h chheⁿ-mê-.ê. 2 I ê bûn-tô͘ mn̄g kóng, "Lāu-su, chit-ê lâng chhut-sì to̍h chheⁿ-mê, sī siáⁿ-lâng hoān-chōe? sī i pún-sin, á-sī i ê pē-bú?" 3 Iâ-so͘ ìn kóng, "Chit-ê lâng bô hoān-chōe, i ê pē-bú mā bô. Sī beh thong-kòe i lâi hián-bêng Siōng-Chú ê chok-ûi. 4 Thàn iáu ji̍t-sî, lán tio̍h chò chhe-phài Góa lâi Hit-ūi ê kang. Àm-sî chi̍t-ē kàu, chiū bô-lâng ē-tàng chò-kang. 5 Góa tī sè-kan ê sî, sī sè-kan ê kng." 6 Chiah-ê ōe kóng-liáu, chiū phùi nōa tī thô͘-kha, ēng chhùi-nōa kiáu thô͘ lâi kô͘ chheⁿ-mê lâng ê ba̍k-chiu, kā i kóng, 7 " Khì Se-lô-a-tî sé lí ê ba̍k-chiu." (Se-lô-a ê ì-sù sī " Hōng chhe-khián"). I chiū khì sé, tńg-lâi ê sî í-keng ē khòaⁿ-kìⁿ. 8 I ê chhù-piⁿ kah pêng-sî bat khòaⁿ-tio̍h i í-chêng chò khit-chia̍h ê lâng kóng, "Chit-ê kám m̄-sī put-sî chē-teh chò khit-chia̍h hit-ê lâng?" 9 Ū-lâng kóng, "Chiū-sī i." Ū-lâng kóng, "M̄-sī, kah-ná chhin-chhiūⁿ i." I ka-kī kóng, "Góa chiū-sī." 10 Chèng-lâng chiū mn̄g i kóng, "Lí ê ba̍k-chiu án-chóaⁿ piàn ē khòaⁿ-kìⁿ?" 11 I ìn kóng, "Hit-ê miâ-kiò Iâ-so͘ ê lâng kiáu thô͘ kô͘ góa ê ba̍k-chiu, kā góa kóng, "Khì Se-lô-a-tî sé." Góa sûi-sî khì sé, chiū piàn ē khòaⁿ-kìⁿ." 12 Tāi-ke mn̄g i kóng, "Hit lâng tī tó-ūi?" I ìn kóng, "Góa m̄-chai."

Hoat-lī-sài-phài ê Lâng Chit-mn̄g Hit-ê Chheⁿ-mê ê Lâng
13 In chhōa hit-ê chêng chheⁿ-mê ê lâng khì kìⁿ Hoat-lī-sài-phài ê lâng. 14 Iâ-so͘ kiáu thô͘ lâi khui i ê ba̍k-chiu ê ji̍t sī An-hioh-ji̍t. 15 Só͘-í Hoat-lī-sài-phài ê lâng koh mn̄g i ná-ē khòaⁿ-kìⁿ. I chiū kā in kóng, "I chiong thô͘-môe kô͘ góa ê ba̍k-chiu, góa khì sé, chiū ū khòaⁿ-kìⁿ. 16 Hoat-lī-sài-phài ê lâng tiong-kan ū-ê kóng, "Chit-ê lâng bô siú An-hioh-ji̍t, m̄-sī tùi Siōng-Chú lâi." Ū-ê kóng, "Ū chōe ê lâng ná-ē kiâⁿ chit khoán sîn-jiah ?" In chiū án-ne ì-kiàn hun-lia̍t. 17 In koh kā chheⁿ-mê-.ê kóng, "I í-keng khui lí ê ba̍k-chiu, lí kóng I sī sím-mi̍h khoán lâng?" I ìn kóng, "I sī sian-ti." 18 Iû-thài-lâng m̄ sìn i chêng chheⁿ-mê, chit-má ē koh khòaⁿ-kìⁿ. Chiū kiò i ê pē-bú lâi, 19 mn̄g in kóng, "Chit-ê sī lín kóng chhut-sì to̍h chheⁿ-mê ê kiáⁿ sī-bô? Taⁿ i ná-ē ū khòaⁿ-kìⁿ?" 20 I ê pē-bú ìn kóng, "Goán chai i sī goán ê kiáⁿ, goán mā chai i chhut-sì to̍h chheⁿ-mê. 21 Taⁿ i ná-ē koh ū khòaⁿ-kìⁿ, goán m̄-chai. Siáⁿ-lâng khui i ê ba̍k-chiu, goán mā m̄-chai. I í-keng tōa-hàn à, lín khì kā i mn̄g, i ē-hiáu ka-kī kóng." 22 I ê pē-bú án-ne kóng, sī in-ūi kiaⁿ Iû-thài-lâng, in-ūi Iû-thài-lâng í-keng ū iok-sok hó-sè, nā ū-lâng jīn Iâ-so͘ chò Ki-tok, tio̍h kā i tùi hōe-tn̂g kóaⁿ chhut-khì. 23 Só͘-í i ê pē-bú kóng, "I í-keng tōa-hàn à, thang khì mn̄g i ka-kī." 24 In chiū koh kiò chêng chheⁿ-mê-.ê lâi mn̄g i kóng, "Tī Siōng-Chú ê bīn-chêng tio̍h chiàu si̍t kóng, goán chai hit-ê lâng sī ū chōe ê lâng." 25 I ìn kóng, "I sī ū chōe ê lâng á m̄-sī, góa m̄-chai. Góa kan-taⁿ chai chi̍t-hāng tāi-chì, chêng góa chheⁿ-mê, taⁿ góa ē khòaⁿ-kìⁿ." 26 In chiū mn̄g i kóng, "Hit-ê lâng kā lí chò sím-mi̍h? I án-chóaⁿ khui lí ê ba̍k-chiu?" 27 I ìn kóng, "Góa í-keng kā lín kóng kòe, lín m̄ thiaⁿ, ná-ē beh koh thiaⁿ? Lín mā siūⁿ-beh chò I ê bûn-tô͘ sī-bô?" 28 In chiū kā i mē, kóng, "Lí chiah sī hit-ê lâng ê bûn-tô͘, goán sī Mô͘-se ê bûn-tô͘. 29 Goán chai Siōng-Chú ū tùi Mô͘-se kóng-ōe, m̄-koh chit-ê lâng tùi tó-ūi lâi, goán m̄-chai." 30 Hit-ê lâng ìn kóng, "Che to̍h chin kî-koài à, I i-hó góa ê ba̍k-chiu, lín iáu-koh m̄-chai I tùi tó-ūi lâi. 31 Lán chai Siōng-Chú bô thiaⁿ chōe-jîn ê kî-kiû, m̄-koh lâng nā kèng-pài Siōng-Chú lâi chun-hêng I ê chí-ì, Siōng-Chú chiū ē thiaⁿ i ê kî-kiû. 32 Tùi kó͘-chá í-lâi, m̄-bat thiaⁿ kòe ū-lâng hō͘ chhut-sì to̍h chheⁿ-mê ê lâng ē koh khòaⁿ-kìⁿ. 33 Chit-ê lâng nā m̄-sī tùi Siōng-Chú hia lâi, bô khó-lêng chò chit khoán tāi-chì." 34 In chiū tùi i kóng, "Lí chhut-sì to̍h ū chōe, tī chōe-ok tiong tōa-hàn, tian-tò beh kà-sī goán?" In chiū tùi hōe-tn̂g kā i kóaⁿ chhut-khì.

Sim-lêng ê Chheⁿ-mê
35 Iâ-so͘ thiaⁿ-tio̍h in kā i kóaⁿ chhut hōe-tn̂g. Āu-lâi chhōe-tio̍h i, chiū kā i mn̄g kóng, "Lí ū sìn Jîn-Chú bô?" 36 I ìn kóng, "Sian-siⁿ ah, siáⁿ-lâng sī Jîn-chú? Chhiáⁿ Lí kā góa kóng thang hō͘ góa sìn I?" 37 Iâ-so͘ kā i kóng, "Lí bat khòaⁿ-tio̍h I, chit-má kah lí teh kóng-ōe ê chiū-sī." 38 I chiū kóng, "Chú ah, góa sìn." I chiū kūi lo̍h-khì kā I pài. 39 Iâ-so͘ kóng, "Góa ūi-tio̍h sím-phòaⁿ lîm-kàu chit sè-kan, hō͘ bô khòaⁿ-kìⁿ ê lâng ē khòaⁿ-kìⁿ, mā hō͘ ū khòaⁿ-kìⁿ ê lâng piàn-chò chheⁿ-mê." 40 Chi̍t-kóa Hoat-lī-sài-phài ê lâng thiaⁿ-tio̍h chiah-ê ōe, chiū mn̄g Iâ-so͘ kóng, "Chóng bô goán mā sī chheⁿ-mê sī-bô?" 41 Iâ-so͘ ìn kóng, "Lín nā chheⁿ-mê, chiū bô chōe; taⁿ lín kóng, ' Goán ū khòaⁿ-kìⁿ.' Án-ne lín goân-chāi ū chōe."