《巴克禮普世版聖經（試讀本）》

 | | | 轉寄

巴克禮普世版（試讀本） 約翰福音第五章

作者 巴克禮普世版小組 2013.10.27

Iâ-so͘ I-hó Phòa-pēⁿ Saⁿ-cha̍p-peh Nî-kú ê Lâng
1 Chiah-ê tāi-chì liáu-āu, ū Iû-thài-lâng ê cheh-kî, Iâ-so͘ chiūⁿ-khì Iâ-lō͘-sat-léng. 2 Tī Iâ-lō͘-sat-léng, kīn Iûⁿ-mn̂g ê só͘-chāi ū chi̍t-ê tî. Hi-pek-lâi-ōe kiò-chò Pit-sū-tāi, ū gō͘-ê cháu-lông. 3 Chin-chē pēⁿ-lâng tó tī cháu-lông lāi-bīn, ū chheⁿ-mê ê, pái-kha ê, piàn-sūi ê.(Ū ê chhau-pún ke: "In teh tán chúi tín-tāng, 4 Ū sî Chú ê thiⁿ-sài ē lo̍h-lâi tî-ni̍h kā chúi phah tín-tāng. Chúi tín-tāng liáu-āu, thâu-chi̍t ê lo̍h-khì ê lâng, bô-lūn sím-mi̍h pēⁿ lóng ē hó-khì.”) 5 Tī hia ū chi̍t-ê phòa-pēⁿ saⁿ-cha̍p-peh nî-kú ê lâng. 6 Iâ-so͘ khòaⁿ-tio̍h i tó tī hia, chai-iáⁿ i í-keng phòa-pēⁿ chin kú, chiū óa-khì kā i kóng, " Lí ū ài lí ê pēⁿ hó khí-lâi bô?" 7 Hit-ê pēⁿ-lâng ìn kóng, " Sian-siⁿ ah, chúi tín-tāng ê sî, bô-lâng thang hû góa lo̍h tî. Góa siūⁿ-beh lo̍h-khì ê sî, pa̍t-lâng chiū pí góa seng lo̍h-khì à." 8 Iâ-so͘ kā i kóng," Khí-lâi, giâ lí ê chhn̂g-pho͘ khí-lâi kiâⁿ." 9 Hit-ê lâng sûi-sî hó-khì, chiū giâ i ê chhn̂g-pho͘ khí-lâi kiâⁿ. Hit ji̍t sī An-hioh-ji̍t. 10 Iû-thài-lâng chiū kā tit-tio̍h i-hó ê lâng kóng, " Kin-á-ji̍t sī An-hioh-ji̍t, lí giâ chhn̂g-pho͘ sī bô ha̍p-hoat." 11 Hit lâng ìn kóng, " Hit-ê kā góa i-hó ê lâng kā góa kóng, ' Giâ lí ê chhn̂g-pho͘ khí-lâi kiâⁿ.'" 12 Hiah-ê Iû-thài-lâng mn̄g i kóng, " Kā lí kóng, ' Giâ chhn̂g-pho͘ khí-lâi kiâⁿ.' ê sī siáⁿ-lâng?" 13 Tit-tio̍h i-hó ê lâng m̄-chai I sī siáⁿ-lâng, in-ūi ū chin-chē lâng tī hia, Iâ-so͘ mā í-keng tiām-tiām-á lī-khui hia. 14 Āu-lâi Iâ-so͘ tī sèng-tiān tú-tio̍h hit-ê lâng, chiū kā i kóng, " Lí ê pēⁿ í-keng hó à. M̄-thang koh hoān-chōe, lí chiah bē tú-tio̍h koh-khah chhám ê tāi-chì." 15 Hit lâng chiū khì kā Iû-thài-lâng kóng, kā i i-hó ê lâng chiū-sī Iâ-so͘. 16 Ūi-tio̍h án-ne, Iû-thài-lâng khai-sí pek-hāi Iâ-so͘, in-ūi I tī An-hioh-ji̍t kā lâng i-pēⁿ. 17 Iâ-so͘ ìn kóng, " Góa ê Thiⁿ-Pē kè-sio̍k teh chò-kang. Góa mā sī án-ne teh chò-kang." 18 Só͘-í Iû-thài-lâng tong-kio̍k koh-khah siūⁿ-beh hāi-sí Iâ-so͘, in-ūi I m̄-nā hoān-tio̍h An-hioh-ji̍t ê kui-tēng, koh chheng Siōng-Chú chò I ê Thiⁿ-Pē, khòaⁿ ka-kī kah Siōng-Chú pêng-téng.

Siōng-Chú ê Kiáⁿ ê Koân-pèng
19 Iâ-so͘ chiū ìn kóng, " Góa si̍t-chāi kā lín kóng, Kiáⁿ bē-tàng chiàu ka-kī ê ì-sù chò tāi-chì, tio̍h chiàu Thiⁿ-Pē án-chóaⁿ chò khì chò, in-ūi Thiⁿ-Pē só͘ chò ê, Kiáⁿ mā chiàu án-ne khì chò. 20 In-ūi Thiⁿ-Pē thiàⁿ Kiáⁿ, chiong ka-kī só͘ chò ê lóng kā Kiáⁿ chí-sī. mā ē chiong pí chiah-ê koh-khah tōa ê tāi-chì chí-sī Kiáⁿ, beh hō͘ lín kám-kak kî-koài. 21 Pē hō͘ sí-lâng koh-oa̍h, siúⁿ-sù in oa̍h-miā. Chhin-chhiūⁿ án-ne, Kiáⁿ mā beh chiong oa̍h-miā siúⁿ-sù hō͘ I só͘ ì-ài ê lâng. 22 Thiⁿ-Pē lóng bô kā lâng sím-phòaⁿ. I chiong sím-phòaⁿ ê koân-pèng lóng kau-tài Kiáⁿ. 23 Án-ne sī beh hō͘ chèng-lâng lóng chun-kèng Kiáⁿ ná chhin-chhiūⁿ chun-kèng Thiⁿ-Pē. Bô chun-kèng Kiáⁿ ê lâng, chiū-sī bô chun-kèng chhe-phài I lâi ê Thiⁿ-Pē." 24 " Góa si̍t-chāi kā lín kóng, Thiaⁿ góa ê ōe, mā sìn chhe-phài Góa Hit-ūi ê lâng chiū ū éng-oán ê oa̍h-miā, m̄-bián siū sím-phòaⁿ, i í-keng chhut-sí ji̍p-oa̍h ā. 25 Góa si̍t-chāi kā lín kóng, sî teh-beh kàu, hiān-chāi chiū-sī à. Sí-lâng ē thiaⁿ-tio̍h Siōng-Chú ê Kiáⁿ ê siaⁿ, thiaⁿ-tio̍h ê lâng chiū ē koh oa̍h khí-lâi. 26 In-ūi Thiⁿ-Pē pún-sin sī oa̍h-miā ê kin-goân. I mā sī án-ne hō͘ Kiáⁿ chiâⁿ-chò oa̍h-miā ê kin-goân. 27 Koh in-ūi Kiáⁿ sī Jîn-chú, Thiⁿ-Pē í-keng chiong sím-phòaⁿ ê koân-pèng hō͘ Kiáⁿ. 28 Lín m̄-thang kám-kak chit-ê tāi-chì kî-koài, in-ūi sî teh-beh kàu, só͘-ū tī bōng-ni̍h ê sí-lâng ē thiaⁿ-tio̍h Kiáⁿ ê siaⁿ, tùi bōng-ni̍h chhut-lâi. 29 Chò hó ê lâng ē koh khí-lâi tit-tio̍h oa̍h-miā. Chò pháiⁿ ê lâng ē koh khí-lâi siū sím-phòaⁿ tēng-chōe."

Ūi Iâ-so͘ Chò-chèng
30 " Góa ka-kī bē-tàng chò sím-mi̍h, Góa chiàu só͘ thiaⁿ-tio̍h ê lâi sím-phòaⁿ. Góa ê sím-phòaⁿ kong-chèng, in-ūi Góa bô chiàu ka-kī ê ì-sù, sī chun-chiàu chhe-phài Góa lâi Hit-ūi ê chí-ì. 31 " Góa nā ūi ka-kī chò kiàn-chèng, Góa ê kiàn-chèng chiū bô chin-si̍t. 32 Ū lēng-gōa chi̍t-ê lâng teh ūi góa chò kiàn-chèng. Góa chai i ūi Góa só͘ chò ê kiàn-chèng sī chin-si̍t. 33 Lín bat phài lâng khì kìⁿ Iok-hān, i ū ūi chin-lí chò kiàn-chèng. 34 M̄-sī Góa bô su-iàu lâng ūi Góa chò kiàn-chèng. Góa kóng-khí chiah-ê tāi-chì sī beh hō͘ lín tit-tio̍h kiù. 35 Iok-hān sī chi̍t-pha teh to̍h teh chiò-kng ê teng. Lín chêng-goān chiām-sî hióng-siū i ê kng. 36 M̄-koh Góa ū pí Iok-hān khah ū-la̍t ê kiàn-chèng, in-ūi Thiⁿ-Pē só͘ kau-tài Góa lâi oân-sêng ê tāi-chì, chiū-sī Góa só͘ teh chò chiah-ê kang-chok, thang lâi kiàn-chèng góa sī Thiⁿ-Pē só͘ chhe-phài lâi ê. 37 Chhe-phài Góa lâi ê Thiⁿ-Pē mā bat ūi Góa chò kiàn-chèng. Lín chiông-lâi m̄-bat thiaⁿ-tio̍h I ê siaⁿ, mā m̄-bat khòaⁿ-tio̍h I ê hêng-siōng. 38 Lín bô chiong I ê ōe khǹg tī sim-lāi, in-ūi lín m̄ sìn I só͘ chhe-phài lâi ê Hit-ūi. 39 Lín gián-kiù chiah-ê Sèng-keng, in-ūi lín siūⁿ-kóng hit tiong-kan chhōe ē-tio̍h éng-oán ê oa̍h-miā. Kî-si̍t chiū-sī chiah-ê Sèng-keng teh ūi Góa chò kiàn-chèng. 40 Án-ne lín iáu-koh bô beh lâi Góa chia tit-tio̍h oa̍h-miā. 41 Góa m̄-sī teh ài lâng o-ló. 42 M̄-koh Góa bat lín kah ū chhun, lín kin-pún bô thiàⁿ Siōng-Chú ê sim. 43 Góa hōng Góa ê Thiⁿ-Pē ê miâ lâi, lín bô beh chiap-la̍p Góa. Nā ū pa̍t-lâng hōng ka-kī ê miâ lâi, lín tian-tó kā i chiap-la̍p. 44 Lín tāi-ke hō͘-siōng ài o-ló lâi o-ló khì, m̄ kiû tùi to̍k-it Siōng-Chú lâi ê chheng-chàn. Án-ne lín ná-ē sìn Góa? 45 M̄-thang siūⁿ-kóng Góa ē tī Thiⁿ-Pē ê bīn-chêng khòng-kò lín. Teh khòng-kò lín ê sī lín só͘ gióng-bōng ê Mô͘-se. 46 Lín nā chin-chiàⁿ ū sìn Mô͘-se, mā ē sìn Góa, in-ūi i ū kì-chài Góa ê tāi-chì. 47 I siá ê chheh lín to m̄ sìn, ná-ē sìn Góa ê ōe?"