《巴克禮普世版聖經（試讀本）》

 | | | 轉寄

巴克禮普世版（試讀本） 約翰福音第四章

作者 巴克禮普世版小組 2013.10.20

Iâ-so͘ kah Sat-má-lī-á ê Hū-jîn-lâng
1 Hoat-lī-sài-phài ê lâng thiaⁿ-tio̍h Iâ-so͘ pí Iok-hān chio-tio̍h khah chē bûn-tô͘, mā kā khah chē lâng sé-lé. 2 Kî-si̍t Iâ-so͘ ka-kī bô kā lâng sé-lé, sī I ê bûn-tô͘ kā lâng sé-lé. 3 Iâ-so͘ thiaⁿ-tio̍h chit-ê tāi-chì chiū lī-khui Iû-thài, koh tńg-khì Ka-lī-lī-séng. 4 I tio̍h keng-kòe Sat-má-lī-a. 5 Iâ-so͘ lâi-kàu Sat-má-lī-a chi̍t-ê kiò-chò Sū-ka ê siâⁿ. Chit-ê siâⁿ óa-kīn Ngá-kok hō͘ i ê kiáⁿ Iok-sek hit-tè tē, tī hia ū Ngá-kok ê chúi-chéⁿ. 6 Iâ-so͘ kiâⁿ-lō͘ kiâⁿ kah chin-siān chiū chē tī chéⁿ-piⁿ. Hit sî chha-put-to sī tiong-tàu. 7 Ū chi̍t-ê Sat-má-lī-a ê hū-jîn-lâng lâi chhiūⁿ-chúi. Iâ-so͘ kā i kóng, " Chúi pun góa lim chi̍t-ē." 8 Hit sî I ê bûn-tô͘ í-keng ji̍p-khì siâⁿ-lāi bé chia̍h-mi̍h. 9 Sat-má-lī-a ê hū-jîn-lâng kā I kóng, " Lí sī Iû-thài-lâng, ná-ē tùi góa Sat-má-lī-a ê hū-jîn-lâng thó chúi lim?" Hit tong-sî Iû-thài-lâng kah Sat-má-lī-a-lâng bô óng-lâi. 10 Iâ-so͘ ìn kóng, " Lí nā chai Siōng-Chú hō͘ lâng ê un-sù kah tùi lí kóng, ' Chúi pun góa lim chi̍t-ē' ê sī siáⁿ-lâng, lí it-tēng ē kā I kiû. I ē chiong oa̍h-chúi hō͘ lí." 11 Hū-jîn-lâng kóng, " Sian-siⁿ, Lí bô chhiūⁿ-chúi ê khì-kū, chéⁿ koh chhim, Lí beh tùi tó-ūi tit-tio̍h oa̍h-chúi? 12 Goán ê chó͘-sian-sian Ngá-kok lâu chit-kháu chéⁿ hō͘ goán, i ka-kī kah kiáⁿ-jî í-ki̍p cheng-seⁿ lóng lim chit-kháu chéⁿ ê chúi. Lí kám ē pí Ngá-kok khah úi-tāi?" 13 Iâ-so͘ ìn kóng, " Lim chit-ê chéⁿ-chúi ê lâng lóng ē koh chhùi-ta. 14 M̄-koh lim Góa só͘ beh hō͘ i lim chúi ê lâng éng-oán bē koh chhùi-ta, in-ūi Góa só͘ beh hō͘ i lim ê chúi tī i ê lāi-bīn ē chiâⁿ-chò chúi-chôaⁿ, it-ti̍t chhèng khí-lâi, hō͘ i tit-tio̍h éng-oán ê oa̍h-miā." 15 Hū-jîn-lâng kóng, " Sian-siⁿ, chhiáⁿ hō͘ góa chit-ê chúi, góa chiah bē koh chhùi-ta, mā bián koh lâi chiah hn̄g chhiūⁿ-chúi." 16 Iâ-so͘ kā i kóng, " Khì kiò lín ang lâi chia." 17 Hū-jîn-lâng ìn kóng, " Góa bô ang." Iâ-so͘ kā i kóng, " Lí kóng, ' Bô ang,' bô m̄-tio̍h. 18 Lí bat ū gō͘-ê ang, taⁿ kah lí tông-ki ê m̄-sī lí ê ang. Lí án-ne kóng bô m̄-tio̍h." 19 Hū-jîn-lâng kā i kóng, " Sian-siⁿ, góa khòaⁿ Lí sī sian-ti. 20 Goán chó͘-sian tī chit-ê soaⁿ kèng-pài, m̄-koh lín kóng Iâ-lō͘-sat-léng chiah sī kèng-pài ê só͘-chāi." 21 Iâ-so͘ kā i kóng, " Hū-jîn-lâng ah, tio̍h sìn góa, sî beh kàu à. Hit sî lín bē tī chit-ê soaⁿ mā bē tī Iâ-lō͘-sat-léng kèng-pài Thiⁿ-Pē. 22 Lín m̄-chai lín teh kèng-pài sím-mi̍h, goán chai goán teh kèng-pài sím-mi̍h, in-ūi chín-kiù sī tùi Iû-thài-lâng chhut-lâi ê. 23 M̄-koh sî teh-beh kàu, hiān-kim chiū-sī. Chin-chiàⁿ kèng-pài ê lâng ē ēng sim-lêng kah chin-sêng lâi kèng-pài Thiⁿ-Pē, in-ūi Thiⁿ-Pē ài chit khoán lâng kèng-pài I. 24 Siōng-Chú sī Sîn, kèng-pài I ê lâng tio̍h ēng sim-lêng kah chin-sêng lâi kèng-pài." 25 Hū-jîn-lâng kā I kóng, " Góa chai Ki-tok teh-beh lâi-lîm. I nā kàu ē chiong it-chhè ê tāi-chì kā goán kóng." 26 Iâ-so͘ kā i kóng, " Góa chit-ê teh kah lí kóng-ōe ê chiū-sī." 27 Hit-sî Iâ-so͘ ê bûn-tô͘ tńg-lâi. In khòaⁿ-tio̍h Iâ-so͘ kah hū-jîn-lâng teh kóng-ōe kám-kak kî-koài, m̄-koh bô-lâng mn̄g hū-jîn-lâng kóng, " Lí beh chhòng sím-mi̍h?" á-sī mn̄g Iâ-so͘ kóng, " Lí ná-ē kah hū-jîn-lâng kóng-ōe?" 28 Hū-jîn-lâng chiū chiong chúi-pân pàng hē-teh, ji̍p-khì siâⁿ-lāi kā lâng kóng, 29 " Lín lâi khòaⁿ, chit-ê lâng chiong góa kòe-khì ê tāi-chì lóng kā góa kóng. Chit-ê lâng kám to̍h sī Ki-tok?" 30 In chiū chhut-siâⁿ khì beh khòaⁿ Iâ-so͘. 31 Hit sî bûn-tô͘ kā Iâ-so͘ kóng, " Lāu-su, lâi chia̍h." 32 M̄-koh Iâ-so͘ ìn kóng, " Góa ū lín só͘ m̄-chai ê chia̍h-mi̍h thang chia̍h." 33 Bûn-tô͘ chiū mn̄g-lâi mn̄g-khì kóng, " Kám ū-lâng hō͘ I chia̍h-mi̍h?" 34 Iâ-so͘ kā in kóng, " Chun-hêng chhe-phài Góa lâi Hit-ūi ê chí-ì, koh oân-sêng I ê kang-chok, chiū-sī Góa ê chia̍h-mi̍h. 35 Lín kám bô án-ne kóng, ' Koh sì goe̍h-ji̍t chiū ū thang siu-sêng ā?' Góa kā lín kóng, lín khòaⁿ sì-bīn ê chhân-hn̂g. Ngó͘-kok í-keng se̍k, thang siu-sêng ā. 36 Siu-sêng ê lâng í-keng teh niá kang-chîⁿ, koh ūi-tio̍h éng-oán ê oa̍h-miā teh chek-chū ngó͘-kok. Hō͘ iā-chéng ê lâng kah siu-koah ê lâng chò-hóe hoaⁿ-hí. 37 In-ūi sio̍k-gí kóng, ' Chi̍t-ê iā-chéng, lēng-gōa chi̍t-ê siu-sêng.' Si̍t-chāi kóng liáu chin tio̍h. 38 Lín bô lô-khó͘ keng-choh ê chhân-hn̂g, Góa chhe lín khì siu-sêng. Lín hióng-siū pa̍t-lâng lô-khó͘ keng-choh ê sêng-kó." 39 Hit-ê siâⁿ ū chin-chē Sat-má-lī-a-lâng sìn Iâ-so͘, in-ūi hit-ê hū-jîn-lâng kiàn-chèng kóng, " Chit-ê lâng chiong góa kòe-khì ê tāi-chì lóng kā góa kóng." 40 Só͘-í Sat-má-lī-a-lâng lâi kìⁿ Iâ-so͘, kiû I kah in tòa. I chiū tī hia tòa nn̄g ji̍t. 41 In-ūi thiaⁿ-tio̍h Iâ-so͘ ê tō-lí lâi sìn ê lâng koh-khah chē. 42 Hiah-ê lâng kā hū-jîn-lâng kóng, " Goán taⁿ m̄-sī tùi lí ê ōe lâi sìn, sī in-ūi goán chhin-sin thiaⁿ-tio̍h Iâ-so͘ ê tō-lí. Goán chai I chin-chiàⁿ sī sè-kan ê Kiù-Chú."

Iâ-so͘ I-hó Koaⁿ-oân ê Kiáⁿ
43 Nn̄g ji̍t āu, Iâ-so͘ lī-khui hia khì Ka-lī-lī-séng. 44 In-ūi Iâ-so͘ ka-kī bat kóng, " Sian-ti tī ka-kī ê kò͘-hiong bē siū chun-tiōng." 45 Só͘-í Iâ-so͘ lâi-kàu Ka-lī-lī-séng ê sî, Ka-lī-lī-lâng kā I hoan-gêng, in-ūi chiah-ê lâng khì Iâ-lō͘-sat-léng kòe Pôaⁿ-kòe-cheh ê sî mā ū khòaⁿ-tio̍h I tī cheh-kî tiong só͘ chò ê it-chhè tāi-chì. 46 Iâ-so͘ koh lâi-kàu Ka-lī-lī-séng ê Ka-ná, chiū-sī I ēng chúi piàn-chò chiú ê só͘-chāi. Tī hia ū chi̍t-ê Ka-pek-lông koaⁿ-oân ê kiáⁿ phòa-pēⁿ. 47 Thiaⁿ-kìⁿ Iâ-so͘ tùi Iû-thài-séng lâi-kàu Ka-lī-lī-séng, chiū khì kiû I lo̍h-khì Ka-pek-lông i-tī i ê kiáⁿ, in-ūi i ê kiáⁿ teh-beh sí à. 48 Iâ-so͘ kā i kóng, " Lín nā bô khòaⁿ-tio̍h sîn-jiah kî-sū it-tēng m̄ sìn." 49 Hit-ê koaⁿ-oân ìn kóng, " Sian-siⁿ, thàn góa ê sè-kiáⁿ iáu-bōe sí, kín lâi-khì." 50 Iâ-so͘ kā i kóng, " Lí tńg-khì, lí ê kiáⁿ bē sí." Hit-ê lâng siong-sìn Iâ-so͘ kā i kóng ê ōe, chiū tńg-khì. 51 I tī lō͘-tiong tú-tio̍h i ê lô͘-po̍k. Lô͘-po̍k kā i kóng i ê kiáⁿ oa̍h khí-lâi à. 52 I chiū mn̄g in khòaⁿ i ê kiáⁿ sím-mi̍h sî chiah hó khí-lâi. In ìn kóng, " Chang-ē-po͘ chi̍t tiám, jia̍t chiū thè." 53 Lāu-pē chai-iáⁿ hit sî tú-tú sī Iâ-so͘ kóng, " Lí ê kiáⁿ bē sí." ê sî. I ka-kī kah choân-ke ê lâng chiū lóng sìn Iâ-so͘. 54 Che sī Iâ-so͘ tùi Iû-thài-séng lâi-kàu Ka-lī-lī-séng í-āu só͘ kiâⁿ ê tē-jī pái sîn-jiah.