《巴克禮普世版聖經（試讀本）》

 | | | 轉寄

巴克禮普世版（試讀本） 路加福音第十九章

作者 巴克禮普世版小組 2013.08.18

Iâ-so͘ Kah Sat-kai
1 Iâ-so͘ ji̍p-khì Iâ-lī-ko-siâⁿ, tī ke-lō͘ teh kiâⁿ ê sî, 2 Ū chi̍t-ê lâng miâ-kiò Sat-kai, sī thiu-sòe-ê thâu-lâng, mā sī hó-gia̍h-lâng. 3 I ài beh khòaⁿ Iâ-so͘ sī siáⁿ-lâng, m̄-koh lâng chin-chē, i ê sin-châi koh é, soah khòaⁿ bē-tio̍h. 4 Só͘-í i chiū cháu chò-chêng, peh khí-lih chi̍t châng sng-châi-chhiū, beh khòaⁿ Iâ-so͘ tùi hia keng-kòe. 5 Iâ-so͘ kiâⁿ kàu hit só͘-chāi, gia̍h thâu khí-lâi khòaⁿ, kā i kóng, " Sat-kai, kóaⁿ-kín lo̍h-lâi, kin-á-ji̍t Góa it-tēng tio̍h tòa lí ê chhù." 6 Sat-kai chiū kóaⁿ-kín lo̍h-lâi, hoaⁿ-hoaⁿ hí-hí khì gêng-chiap Iâ-so͘. 7 Chèng-lâng khòaⁿ-tio̍h chiū nga̍uh-nga̍uh-liām kóng, " Chit-ê lâng soah ji̍p-khì pháiⁿ-lâng ê chhù tòa!" 8 Sat-kai khiā-teh, tùi Chú kóng, " Chú ah, góa chiong só͘ ū châi-sán ê chi̍t pòaⁿ lâi chín-chè sàn-chhiah lâng. Góa nā bat pián siáⁿ-lâng ê chîⁿ, beh sì-pōe pôe i." 9 Iâ-so͘ tùi i kóng, " Kin-á-ji̍t kiù-un lâi-kàu chit-ê ke, in-ūi i mā sī A-pek-la̍h-hán ê kiáⁿ-sun. 10 In-ūi Jîn-chú sī beh lâi chhōe sit-bê ê lâng, lâi kā i chín-kiù."

Cha̍p-niú Gîn-á ê Phì-jū (Mt 25:14-30)
11 In thiaⁿ-tio̍h chiah-ê ōe ê sî, Iâ-so͘ koh kā in kóng chi̍t-ê phì-jū, sī in-ūi I teh-beh kàu Iâ-lō͘-sat-léng à, hiah-ê lâng mā siūⁿ-kóng Siōng-Chú Kok-tō͘ liâm-piⁿ to̍h ē chhut-hiān. 12 Só͘-í Iâ-so͘ kā in kóng, " Ū chi̍t-ê kùi-cho̍k beh khì chin-hn̄g ê só͘-chāi siū-hong chò-ông liáu chiah tò tńg-lâi. 13 I kiò cha̍p-ê lô͘-po̍k lâi, hō͘ in múi lâng chi̍t-niú gîn-á, tùi in kóng, ' Kàu góa tńg-lâi í-chêng, ēng chiah-ê gîn-á khì chò seng-lí.' 14 M̄-koh hit-ê kùi-cho̍k pún-kok ê jîn-bîn oàn-hūn i, chhe chi̍t-ê sù-chiá tòe-āu khì chàu kóng, ' Goán bô ài chit-ê lâng chò goán ê ông.' 15 " Chit-ê kùi-cho̍k siū-hong chò ông tńg-lâi, kiò hiah-ê tùi i niá gîn-á ê lô͘-po̍k lâi, ài beh chai in chò seng-lí thàn jōa-chē chîⁿ. 16 Thâu chi̍t-ê lâi i ê bīn-chêng kóng, ' Chú-lâng ah, góa ēng lí hō͘ góa hiah-ê gîn-á thàn cha̍p niú à.' 17 Chú-lâng kā i kóng, ' Chin hó, hó ê lô͘-po̍k, lí kì-jiân tī sió-khóa ê tāi-chì chīn-tiong, taⁿ hō͘ lí koán cha̍p-ê siâⁿ.' 18 Tē-jī ê lâi kóng, ' Chú-lâng, góa ēng lí hit-ê gîn-á thàn gō͘ niú à.' 19 Chú-lâng mā án-ne kā i kóng, ' Hō͘ lí mā koán-lí gō͘-ê siâⁿ.' 20 Koh chi̍t-ê lô͘-po̍k lâi kóng, ' Chú-lâng, lí khòaⁿ, lí chi̍t niú gîn-á tī chia, góa ēng chhiú-kin-á kā i pau khí-lâi khǹg-teh. 21 Góa kiaⁿ lí, in-ūi lí sī khek-po̍k ê lâng, bô kià mā beh niá, bô iā-chéng mā beh siu-koah.' 22 Chú-lâng kā i kóng, ' Lí chit-ê pháiⁿ ê lô͘-po̍k, chiàu lí só͘ kóng ê, góa beh kā lí tēng-chōe. Lí kì-jiân chai góa sī khek-po̍k ê lâng, bô kià mā beh niá, bô iā-chéng mā beh siu-koah. 23 Lí ná-ē bô kā góa ê gîn-á khì lok tī chîⁿ-tiàm, kàu góa tńg-lâi ê sî, thang niá bó-kim kah lī-sek?' 24 Chú-lâng kā khiā tī piⁿ-á ê lâng kóng, ' Kā i ê chi̍t-niú gîn-á the̍h-lâi, kau hō͘ hit-ê ū cha̍p-niú ê.' 25 In tùi chú-lâng kóng, ' Chú-lâng ah, i í-keng ū cha̍p niú à.' 26 Chú-lâng ìn kóng, ' Góa kā lín kóng, í-keng ū ê lâng, góa beh hō͘ i koh-khah-chē; bô-ê lâng, liân i só͘-ū ê mā beh kā i the̍h-lâi. 27 M̄-koh hiah-ê bô ài góa chò in ê ông ê tùi-te̍k, tio̍h kā in thoa lâi, tī góa ê bīn-chêng kā in thâi-sí.'"

Iâ-so͘ Kong-êng Chìn-ji̍p Iâ-lō͘-sat-léng (Mt 21:1-11; Mk 11:1-11; Ih 12:12-19)
28 Iâ-so͘ kóng chiah-ê ōe liáu-āu, kè-sio̍k hiòng-chêng kiâⁿ, chiūⁿ Iâ-lō͘-sat-léng. 29 Teh-beh kàu kiò-chò Kan-ná-soaⁿ soaⁿ-kha ê Pek-hoat-kî kah Pek-tāi-nî ê sî, Iâ-so͘ chhe nn̄g-ê bûn-tô͘, 30 Hoan-hù in kóng, " Lín khì tùi-bīn ê chng-siā, ji̍p-khì ê sî ē tú-tio̍h chi̍t chiah iáu-bōe ū-lâng khiâ kòe ê lî-á pa̍k tī hia. Lín kā i tháu-khui khan lâi chia. 31 Nā ū-lâng mn̄g kóng, ' Lín tháu lî-á beh chhòng-siáⁿ?' lín tio̍h kóng, ' Chú teh su-iàu ēng.'" 32 Hit nn̄g-ê bûn-tô͘ chiū khì, só͘ tú-tio̍h ê tāi-chì, kó-jiân kah Iâ-so͘ só͘ kóng ê oân-choân kāng-khoán. 33 In teh tháu lî-á ê sî, chú-lâng mn̄g in kóng, " Tháu lî-á beh chhòng-siáⁿ?" 34 In ìn kóng, " Chú teh su-iàu ēng." 35 In chiū khan hit chiah lî-á lâi hō͘ Iâ-so͘. Kā in ka-kī ê gōa-saⁿ phoa̍h tòa lî-á téng, hû Iâ-so͘ khí-lih khiâ. 36 Iâ-so͘ khiâ lî-á hiòng chêng kiâⁿ ê sî, chèng-lâng kā ka-kī ê gōa-saⁿ pho͘ tī lō͘-ni̍h. 37 Iâ-so͘ tú beh lo̍h Kan-ná-soaⁿ ê sî, kui tōa-tīn ê bûn-tô͘ khòaⁿ-tio̍h it-chhè kî-biāu ê tāi-chì, chiū tōa hoaⁿ-hí, tōa-siaⁿ o-ló Siōng-Chú, 38 kóng, " Hōng Chú ê miâ lâi ê ông, eng-kai tit-tio̍h o-ló, goān thiⁿ-téng hô-pêng, kui êng-kng hō͘ chì-koân ê Siōng-Chú." 39 Chèng-lâng tiong-kan ū kúi-nā-ê Hoat-lī-sài-phài ê lâng tùi Iâ-so͘ kóng, " Lāu-su ah, tio̍h chek-pī Lí ê bûn-tô͘." 40 Iâ-so͘ ìn kóng, " Góa kā lín kóng, in nā tiām-tiām, hiah-ê chio̍h-thâu mā ē tōa-siaⁿ hoah."

Iâ-so͘ Ūi Iâ-lō͘-sat-léng Ai-khàu
41 Iâ-so͘ teh-beh kàu Iâ-lō͘-sat-léng, khòaⁿ-tio̍h siâⁿ chiū ūi-tio̍h chit-ê siâⁿ thî-khàu, 42 kóng, " Góa si̍t-chāi chin ài lí tī chit ji̍t to̍h chai koan-hē pêng-an ê tāi-chì! M̄-koh hiān-chhú-sî lí ê ba̍k-chiu khòaⁿ bē chhut. 43 In-ūi sî-ji̍t teh-beh kàu, lí ê tùi-te̍k ē tī lí ê sì-chiu-ûi khí thô͘-chhiûⁿ, lâi kā lí hong-só khí-lâi. 44 In koh ē hō͘ lí kah lí siâⁿ-lāi ê jîn-bîn lóng húi-bia̍t, bô lâu kah nn̄g-tè chio̍h sio-tha̍h, in-ūi lí m̄-chai Siōng-Chú lâi beh chín-kiù lí ê hó ki-hōe."

Iâ-so͘ Chheng-kiat sèng-tiān (Mt 21:12-17; Mk 11:15-19; Ih 2:13-22)
45 Iâ-so͘ ji̍p-khì sèng-tiān, chiū kóaⁿ-chhut hiah-ê bē mi̍h-kiāⁿ ê lâng. 46 I kā in kóng, " Sèng-keng ū kì-chài: Góa ê chhù beh chò kî-tó ê chhù,' m̄-koh lín hō͘ i piàn-chò chha̍t-siū."( chù: ISA 56:7; ILB 7:11) 47 Iâ-so͘ ta̍k-ji̍t tī sèng-tiān kà-sī lâng. Chiah-ê chè-si-tiúⁿ, keng-ha̍k kàu-su í-ki̍p jîn-bîn ê thâu-lâng, kè-bô͘ beh sat-hāi Iâ-so͘. 48 M̄-koh lóng chhōe bô pō͘, in-ūi jîn-bîn lóng chin tì-ì teh thiaⁿ Iâ-so͘ ê ōe.