《巴克禮普世版聖經（試讀本）》

 | | | 轉寄

巴克禮普世版（試讀本） 路加福音第十五章

作者 巴克禮普世版小組 2013.07.21

Bê-iûⁿ ê Phì-jū (Mt 18:12-14)
1 Ū chi̍t pái, chin-chē thiu-sòe-ê kah pháiⁿ-lâng, lâi Iâ-so͘ hia beh thiaⁿ I kóng tō-lí. 2 Hoat-lī-sài-phài ê lâng kah keng-ha̍k kàu-su ka̍uh-ka̍uh-liām kóng, " Chit-ê lâng chiap-la̍p pháiⁿ-lâng koh kah in chò-hóe chia̍h-pn̄g!" 3 Iâ-so͘ ēng chit-ê phì-jū tùi in kóng, 4 " Lín tiong-kan siáⁿ-lâng ū chi̍t-pah chiah iûⁿ, phah-m̄-kiàn chi̍t chiah, kám bē chiām-chhiáⁿ pàng káu-cha̍p-káu chiah tī soaⁿ-ni̍h, khì chhōe hit chiah phah-m̄-kiàn ê, it-ti̍t kàu chhōe-tio̍h ûi-chí? 5 Chhōe-tio̍h liáu-āu chiū hoaⁿ-hí, kā hit chiah iûⁿ phāiⁿ tòa keng-kah-thâu. 6 Tńg-kàu chhù chiū kiò chhù-piⁿ ê pêng-iú lâi, kā in kóng, " Lâi kah góa tàu hoaⁿ-hí, in-ūi góa chhōe-tio̍h phah-m̄-kiàn hit chiah iûⁿ.' 7 Góa kā lín kóng, tī thiⁿ-téng mā chhin-chhiūⁿ án-ne, ūi-tio̍h pháiⁿ-lâng tiong-kan ū chi̍t-ê lâng hóe-kái lâi hoaⁿ-hí, pí ūi-tio̍h m̄-bián hóe-kái ê káu-cha̍p-káu ê gī-lâng koh-khah hoaⁿ-hí."

Phah-m̄-kiàn Chîⁿ ê Phì-jū
8 " Á-sī ū chi̍t-ê hū-jîn-lâng ū cha̍p-ê gîn-á, nā phah-m̄-kiàn chi̍t-ê, kám bē tiám teng, piàⁿ-sàu chhù-lāi, phah-piàⁿ chhōe, kàu chhōe-tio̍h ûi-chí? 9 I chi̍t-ē chhōe-tio̍h chiū kiò pêng-iú kah chhù-piⁿ lâi, kā in kóng, ' Lâi kah góa tàu hoaⁿ-hí, in-ūi góa phah-m̄-kiàn ê gîn-á í-keng chhōe-tio̍h.' 10 Góa kā lín kóng, chhin-chhiūⁿ án-ne, Siōng-Chú ê thiⁿ-sài ē ūi-tio̍h pháiⁿ-lâng tiong-kan ū chi̍t-ê lâng hóe-kái, lâi hoaⁿ-hí."

Hòng-tōng Kiáⁿ ê Phì-jū
11 Iâ-so͘ koh kóng, " Ū chi̍t-ê lâng ū nn̄g-ê kiáⁿ. 12 Hit-ê sè-hàn-kiáⁿ kā lāu-pē kóng, " A-pa, chhiáⁿ kā góa eng-kai tit ê châi-sán pun hō͘ góa." Lāu-pē chiū pun ke-hóe hō͘ nn̄g-ê kiáⁿ. 13 Keh bô kúi ji̍t, hit-ê sè-hàn-kiáⁿ kā só͘ tit-tio̍h ê châi-sán choân-pō͘ ōaⁿ-chò hiān-kim, chiū chhut-gōa khì chin-hn̄g ê só͘-chāi. I tī hia hòng-tōng loān khai chîⁿ. 14 I kā só͘-ū ê chîⁿ khai liáu-liáu ê sî, hit só͘-chāi tú-tio̍h tōa ki-hng. I chiah kak-gō͘ khiàm-khoeh ê kan-khó͘. 15 I chiū khì hō͘ hit só͘-chāi ê chi̍t-ê lâng chhiàⁿ. Hit-ê lâng chhe i khì soaⁿ-ni̍h ê hn̂g chhī ti. 16 I iau kah siūⁿ-beh the̍h ti teh chia̍h ê tāu-phoh lâi chí-iau, m̄-koh lóng bô-lâng beh hō͘ i chia̍h. 17 Āu-lâi i kak-chhéⁿ kóng, ' Góa ê lāu-pē ū hiah-chē tn̂g-kang, bí-niû chia̍h kah ū chhun, m̄-koh góa tī chia teh-beh iau sí-khì. 18 Góa beh tńg lâi-khì chhōe góa ê lāu-pē, kā i kóng, ' A-pa, góa ū tek-chōe thiⁿ , mā ū tek-chōe lí. 19 Taⁿ góa bô chu-keh koh chò lí ê kiáⁿ. Chhiáⁿ hō͘ góa chò lí ê tn̂g-kang to̍h hó.' 20 I chiū chhut-hoat tńg-khì chhōe i ê lāu-pē. Lī in lāu-pē iáu-koh chin hn̄g, lāu-pē to̍h khòaⁿ-tio̍h i, kám-kak chin m̄-kam, cháu óa-khì kā i lám-teh, ti̍t-ti̍t kā i chim. 21 Kiáⁿ kā lāu-pē kóng, ' A-pa, góa ū tek-chōe thiⁿ , mā ū tek-chōe lí.Taⁿ góa bô chu-keh koh chò lí ê kiáⁿ.' 22 M̄-koh lāu-pē tùi hiah-ê lô͘-po̍k kóng, ' Kín hiaⁿh siōng-hó ê saⁿ lâi kā i chhēng, kā i kòa chhiú-chí, koh kā i chhēng ê. 23 Sòa khan hit chiah pûi ê gû-á-kiáⁿ lâi thâi, lâi pān-toh hoaⁿ-hí khèng-chiok. 24 In-ūi góa chit-ê kiáⁿ sí-khì ū koh-oa̍h, phah-m̄-kiàn ū koh chhōe-tio̍h.' In chiū chò-hóe hoaⁿ-hí khèng-chiok." 25 Hit sî, tōa-kiáⁿ tùi hn̂g-ni̍h tńg-lâi, beh kàu chhù ê sî, thiaⁿ-tio̍h chàu-ga̍k kah thiàu-bú ê siaⁿ. 26 I kiò chi̍t-ê lô͘-po̍k lâi, mn̄g i khòaⁿ teh chò siáⁿ-mi̍h tāi-chì. 27 Hit-ê lô͘-po̍k kā i kóng, ' Lín sió-tī tńg-lâi à. Lín lāu-pē in-ūi i pêng-an bô-sū tńg-lâi, só͘-í thâi hit chiah pûi ê gû-á-kiáⁿ. 28 Tōa-kiáⁿ chin siū-khì, m̄ ji̍p-khì. Lāu-pē chhut-lâi kā i khó͘-khǹg. 29 M̄-koh i ìn lāu-pē kóng, ' Lí khòaⁿ, góa ho̍k-sāi lí hiah-chē nî, lóng m̄ bat ûi-pōe lí ê bēng-lēng. Lí mā m̄ bat hō͘ góa chi̍t chiah iûⁿ-á-kiáⁿ, thang kah góa ê pêng-iú chò-hóe hoaⁿ-hí lim-chia̍h. 30 M̄-koh lí chit-ê kiáⁿ, kau-pôe chhiong-ki, kā lí pun hō͘ i ê châi-sán choân-pō͘ khai liáu-liáu. I chi̍t-ē tńg-lâi, lí chiū ūi-tio̍h i thâi pûi ê gû-á-kiáⁿ.' 31 Lāu-pē kā i kóng, ' Góa ê kiáⁿ ah, lí siông-siông kah góa chò-hóe. Góa só͘-ū ê châi-sán lóng sī lí ê. 32 M̄-koh lí ê sió-tī sí ū koh-oa̍h, phah-m̄-kiàn koh chhōe-tio̍h. Lán eng-kai tio̍h lâi hoaⁿ-hí khèng-chiok!'"