《巴克禮普世版聖經（試讀本）》

 | | | 轉寄

巴克禮普世版（試讀本） 馬可福音第十二章

作者 巴克禮普世版小組 2013.03.03

Pháiⁿ Tiān-lông ê Phì-jū (Mt 21:33-46; Lk 20:1-8)
Iâ-so͘ koh ēng phì-jū kā in kóng, " Ū chi̍t-ê lâng khai-khún chi̍t-tè phû-tô-hn̂g, ēng chhiûⁿ-ûi-á ûi khí-lâi, ó͘ chi̍t khang lâi chò chiú-khut, khí chi̍t-chō chiú-kiⁿ-lâu, cho͘ hō͘ tiān-lông, chiū khì pa̍t-ê só͘-chāi. 2 Kàu siu-sêng ê sî-kî, i chiū chhe chi̍t-ê lô͘-po̍k lâi chhōe tiān-lông, beh tùi tiān-lông siu hn̂g-cho͘. 3 Tiān-hō͘ kā hit-ê lô͘-po̍k lia̍h lâi phah, hō͘ i khang-chhiú tńg-khì. 4 Hn̂g-chú koh chhe lēng-gōa chi̍t-ê lô͘-po̍k khì siu-cho͘, tiān-lông phah-siong i ê thâu-khak, koh kā i lêng-jio̍k. 5 Āu-lâi hn̂g-chú koh chhe pa̍t-ê lô͘-po̍k khì, in chiū kā i thâi-sí. I koh chhe chin-chē lô͘-po̍k khì, ū-ê hō͘ in phah, ū-ê hō͘ in thâi-sí. 6 I iáu ū chi̍t-ê i só͘ thiàⁿ ê kiáⁿ, chòe-āu mā chhe i khì kā tiān-lông siu cho͘, siūⁿ-kóng in ē chun-kèng i ê kiáⁿ. 7 M̄-koh hiah-ê tiān-lông hō͘-siōng chham-siông kóng, ' Chit-ê sī i ê kè-sêng-jîn, lán lâi kā i thâi-sí, i ê châi-sán chiū lóng kui lán.' 8 Tiān-lông chiū kā i lia̍h khí-lâi, kā i thâi-sí, kā i hiat chhut-khì phû-tô-hn̂g gōa-bīn. 9 Án-ne hn̂g-chú ē án-chóaⁿ chhù-lí? I ē lâi châu-bia̍t hiah-ê tiān-lông, kā i ê hn̂g cho͘ hō͘ pa̍t-lâng. 10 Sèng-keng ū kì-chài: Khí-chhù sai-hū só͘ khì-sak ê chio̍h, soah chiâⁿ-chò chhù-kak-thâu ê ki-chio̍h. 11 Che sī Siōng-Chú ê chok-ûi, tùi lán lâi kóng si̍t-chāi chin kî-biāu."( chù: SPh 118:22-23) 12 Hiah-ê Iû-thài-lâng ê thâu-lâng chai-iáⁿ chit-ê phì-jū sī teh chí in, chiū ài beh kā I lia̍h khí-lâi, m̄-koh in kiaⁿ kûn-chiòng hoán-tôaⁿ, chiū lī-khui Iâ-so͘.

La̍p-sè ê Būn-tê (Mt 22:15-22; Lk 20:20-26)
13 In āu-lâi chhe Hoat-lī-sài-phài kah Hi-lu̍t-tóng kúi-nā lâng lâi Iâ-so͘ hia, ài beh chhōe I só͘ kóng ê ōe-phāng, thang lâi kā I hām-hāi. 14 In lâi kàu-ūi chiū tùi Iâ-so͘ kóng, " Lāu-su, goán chai Lí sī chi̍t-ê láu-si̍t-lâng, tùi-thāi múi chi̍t-ê lâng lóng bô chha-pia̍t, in-ūi Lí bô khòaⁿ lâng ê gōa-māu. Lí tiong-si̍t chiong Siōng-Chú ê tō-lí kà-sī lâng. La̍p sòe hō͘ Lô-má hông-tè kám ū ha̍h lu̍t-hoat? Goán tio̍h la̍p-sòe á m̄-bián?" 15 M̄-koh Iâ-so͘ khòaⁿ-chhut in ê kúi-kè, chiū kā in kóng, " Lín ná-ē beh kā Góa chhì-thàm? The̍h chi̍t-ê gîn-pè lâi hō͘ Góa khòaⁿ." 16 In chiū the̍h chi̍t-ê gîn-pè lâi. Iâ-so͘ mn̄g in kóng, " Chit-ê siōng kah jī-hō sī siáⁿ-lâng ê?" In ìn kóng, " Sī hông-tè ê." 17 Iâ-so͘ kā in kóng, " Lín tio̍h kā hông-tè ê la̍p hō͘ hông-tè, kā Siōng-Chú ê la̍p hō͘ Siōng-Chú." In tùi Iâ-so͘ ê hôe-tap kám-kak chin tio̍h-kiaⁿ.

Sí-lâng Koh-oa̍h ê Būn-tê (Mt 22:23-33; Lk 20:27-40)
18 Ū chi̍t-kóa bô chú-tiuⁿ koh-oa̍h ê Sat-to͘-kai-phài ê lâng, lâi chhōe Iâ-so͘. 19 In mn̄g Iâ-so͘ kóng, " Lāu-su, Mô͘-se só͘ siá ê lu̍t-hoat chí-sī goán kóng, ' Nā ū-lâng ê hiaⁿ-ko sí-khì, lâu lo̍h-lâi i ê bó͘, m̄-koh bô lâu kiáⁿ. Chò sió-tī ê tio̍h chhōa hiaⁿ-só chò bó͘, thang hó seⁿ-kiáⁿ lâi thè i ê hiaⁿ-ko thoân-chong chiap-tāi.'( SBK 25:5; CSK 38:8) 20 Bat ū hiaⁿ-tī chhit lâng, tōa-hiaⁿ chhōa bó͘ bô seⁿ kiáⁿ chiū sí-khì. 21 Tē-jī ê chhōa hiaⁿ-só chò bó͘, mā bô seⁿ kiáⁿ to̍h sí-khì. Tē-saⁿ ê mā sī án-ne. 22 Chit chhit-ê hiaⁿ-tī lóng bô seⁿ-kiáⁿ to̍h sí-khì. Kàu lō͘-bóe hit-ê hū-jîn-lâng mā sí-khì. 23 Kàu koh-oa̍h ê sî, chit-ê hū-jîn-lâng beh chò in tiong-kan tó chi̍t lâng ê bó͘? In-ūi chit chhit-ê lâng lóng ū chhōa i chò bó͘." 24 Iâ-so͘ kā in kóng, " Lín siūⁿ m̄-tio̍h khì à. Lín m̄-bat Sèng-keng mā m̄-bat Siōng-Chú ê koân-lêng. 25 In-ūi tùi sí-lâng tiong koh-oa̍h ê sî, kah thiⁿ-téng ê thiⁿ-sài kāng-khoán bô kè bô chhōa. 26 Koan-hē sí-lâng koh-oa̍h, lín kám bô tha̍k-tio̍h Mô͘-se ê chheh, ' Teh to̍h ê chhì-phè' hit phiⁿ só͘ kì-chài ê? Siōng-Chú kā Mô͘-se kóng, ' Góa sī A-pek-la̍h-hán ê Siōng-Chú, Í-sat ê Siōng-Chú, Ngá-kok ê Siōng-Chú.'( chù: CAK 3:6, 15-16) 27 I m̄-sī sí-lâng ê Siōng-Chú, sī oa̍h-lâng ê Siōng-Chú. Lín hoān-tio̍h chin tōa ê chhò-gō͘!"

Siōng Tiōng-iàu ê Kài-bēng (Mt 22:34-40; Lk 10:25-28)
28 Ū chi̍t-ê keng-ha̍k kàu-su óa-lâi thiaⁿ-tio̍h in teh piān-lūn, khòaⁿ Iâ-so͘ ìn liáu chin hó, chiū mn̄g I kóng, " Chiah-ê kài-bēng tiong tó chi̍t tiâu siōng iàu-kín?" 29 Iâ-so͘ ìn kóng, " Siōng iàu-kín ê sī:Í-sek-lia̍t-lâng ah, lín tio̍h thiaⁿ! Chú lán ê Siōng-Chú sī to̍k-it ê Chú. 30 Lí tio̍h chīn-sim, chīn-sèng, chīn-ì, chīn la̍t thiàⁿ Chú, chiū-sī lí ê Siōng-Chú.( chù: SBK 6:4-5) 31 Tē jī sī: Tio̍h thiàⁿ lí ê chhù-piⁿ chhin-chhiūⁿ ka-kī.( chù: LBK 19:18) Bô pa̍t-ê kài-bēng pí chit nn̄g tiâu khah tiōng-iàu." 32 Hit-ê Keng-ha̍k-kàu-su tùi Iâ-so͘ kóng, " Lāu-su, Lí kóng liáu chin tio̍h, Siōng-Chú chí-ū chi̍t-ê, I í-gōa bô pa̍t-ê; 33 Koh-chài tio̍h chīn-sim, chīn-ì, chīn la̍t thiàⁿ Siōng-Chú, koh tio̍h thiàⁿ chhù-piⁿ chhin-chhiūⁿ ka-kī, che pí hiàn kui-chiah cheng-seⁿ ê sio-chè kah chè-mi̍h koh-khah iàu-kín." 34 Iâ-so͘ khòaⁿ-tio̍h i ìn-liáu chin sek-tòng, chiū kā i kóng, " Lí lī Siōng-Chú Kok-tō͘ bô hn̄g à." Tùi hit sî khí, bô-lâng káⁿ koh mn̄g Iâ-so͘ siáⁿ-mi̍h būn-tê.

Koan-hē Ki-tok ê Būn-tê (Mt 22:41-46; Lk 20:41-44)
35 Iâ-so͘ tī sèng-tiān kà-sī ê sî, mn̄g in kóng, " Chiah-ê keng-ha̍k kàu-su ná-ē kóng Ki-tok sī Tāi-pi̍t ê kiáⁿ-sun? 36 Tāi-pi̍t hō͘ Sèng-Sîn kám-tōng kóng: Chú kā góa ê Chú kóng, chē Góa ê tōa-pêng, Thèng-hāu Góa kā Lí ê tùi-te̍k khut-ho̍k tī Lí ê kha-ē.( chù: SPh 110:1) 37 Tāi-pi̍t kì-jiân ka-kī chheng Ki-tok chò Chú, án-ne Ki-tok ná-ē chò Tāi-pi̍t ê kiáⁿ-sun?"

Thê-hông Keng-ha̍k-kàu-su (Mt 23:1-36; Lk20:45-47)
Kûn-chiòng lóng ài thiaⁿ Iâ-so͘ ê kà-sī. 38 Iâ-so͘ kà-sī kóng, " Tio̍h tî-hông hiah-ê keng-ha̍k kàu-su, in ài chhēng tn̂g-saⁿ sì-kè kiâⁿ, ài tī ke-lō͘-ni̍h hō͘ lâng chhéng-an, 39 koh tī hōe-tn̂g lāi ài chē koân-ūi, tī iàn-se̍k chē tōa-ūi. 40 in chhim-chiàm kóaⁿ-hū ê ke-hóe, thiau-kang kî-tó chin tn̂g. In ē siū koh-khah tāng ê hêng-hoa̍t."

Kóaⁿ-hū ê Hōng-hiàn (Lk 21:1-4)
41 Iâ-so͘ chē tī hiàn-kim-siuⁿ ê tùi-bīn teh khòaⁿ chèng-lâng hiàn chîⁿ lo̍h-khì. Ū chin-chē hó-gia̍h-lâng hiàn chin-chē chîⁿ. 42 Ū chi̍t-ê sàn-chhiah-ê kóaⁿ-hū, lâi hiàn nn̄g-ê tâng-chîⁿ-á, chiū-sī chi̍t kak gîn. 43 Iâ-so͘ chiū kiò bûn-tô͘ lâi, kā in kóng, " Góa si̍t-chāi kā lín kóng, chit-ê sàn-chhiah-ê kóaⁿ-hū só͘ hiàn ê, pí chèng-lâng hiàn ê khah-chē. 44 In-ūi hiah-ê kûn-chiòng sī tùi in ū chhun ê lâi hiàn, m̄-koh chit-ê hū-jîn-lâng sui-jiân chin sàn-chhiah, iáu-koh kā choân-pō͘ ê seng-oa̍h-hùi lóng hiàn lo̍h-khì."