《巴克禮普世版聖經（試讀本）》

 | | | 轉寄

巴克禮普世版（試讀本） 馬可福音第十一章

作者 巴克禮普世版小組 2013.02.24

Iâ-so͘ Kong-êng Chìn-ji̍p Iâ-lō͘-sat-léng (Mt 21:1-11; Lk 19:28-40; Ih 12:12-19)
Iâ-so͘ kah bûn-tô͘ óa-kīn Iâ-lō͘-sat-léng, lâi-kàu Kan-ná-soaⁿ piⁿ ê Pek-hoat-kî kah Pek-tāi-nî ê sî, 2 Iâ-so͘ chhe nn̄g-ê bûn-tô͘, kā in kóng, " Lín khì tùi-bīn ê chng-siā, lín ji̍p-khì chiū ē tú-tio̍h chi̍t chiah iáu m̄-bat hō͘ lâng khiâ-kòe ê lî-á pa̍k tī hia. Lín kā i tháu-khui, khan lâi chia. 3 Nā ū-lâng mn̄g lín kóng ná-ē beh án-ne chò? Lín tio̍h kā i kóng, ' Chú beh ēng chit chiah lî-á, liâm-piⁿ ē khan tńg-lâi hêng.' " 4 Hit nn̄g-ê bûn-tô͘ chiū khì, khòaⁿ-tio̍h lō͘-piⁿ chi̍t chiah lî-á pa̍k tī mn̂g-gōa, chiū kā i tháu-khui. 5 Piⁿ-á teh khiā ê lâng mn̄g in kóng, " Lín tháu lî-á beh chhòng siáⁿ-mi̍h?" 6 In chiàu Iâ-so͘ só͘ hoan-hù ê kā in kóng. Hiah-ê lâng chiū pàng hō͘ in khì khan. 7 In chiū khan hit chiah lî-á tńg-lâi hō͘ Iâ-so͘, kā in ka-kī ê saⁿ phoa̍h tī lî-á téng-bīn. Iâ-so͘ chiū peh khí-lih khiâ. 8 Ū chin-chē lâng ēng in ê gōa-saⁿ pho͘ tī lō͘-ni̍h, mā ū-lâng ēng tùi hn̂g-ni̍h chhò lâi ê chhiū-ki, pho͘ tī lō͘-ni̍h kā I hoan-gêng. 9 Chêng-kiâⁿ āu-tòe ê lâng tōa-siaⁿ hoah kóng, " Hô-sàn-ná! hōng Chú ê miâ lâi ê Hit-ūi, eng-kai tit-tio̍h o-ló!( chù: SPh 118:26) 10 Hit-ê teh-beh lâi ê ông-kok, chiū-sī lán ê chó͘-sian Tāi-pi̍t ê ông-kok, eng-kai tit-tio̍h o-ló! O-ló kui tī chì-koân ê Siōng-Chú!" 11 Iâ-so͘ chìn-ji̍p Iâ-lō͘-sat-léng, ji̍p-khì sèng-tiān lāi, sì-kè khòaⁿ chi̍t liàn-tńg, in-ūi thiⁿ í-keng àm à, chiū kah cha̍p-jī sù-tô͘ chhut-khì, lâi-kàu Pek-tāi-nî.

Iâ-so͘ Chiù-chó͘ Bû-hoa-kó-chhiū (Mt 21:18-19)
12 Keh-tńg-ji̍t, Iâ-so͘ kah bûn-tô͘ tùi Pek-tāi-nî chhut-lâi ê sî, Iâ-so͘ pak-tó͘ iau. 13 I tùi Hn̄g-hn̄g khòaⁿ-tio̍h chi̍t châng ū chin-chē hio̍h-á ê bû-hoa-kó-chhiū, chiū óa-khì khòaⁿ hit téng-bīn ū kóe-chí á-bô. Kàu-ūi chi̍t khòaⁿ, chhiū-téng kan-taⁿ ū hio̍h-á, kî-tha bô pòaⁿ-hāng, in-ūi m̄-sī bû-hoa-kó ê sî-kî. 14 Iâ-so͘ chiū tùi hit châng chhiū kóng, " Tùi taⁿ í-āu, éng-oán bô-lâng ē koh chia̍h-tio̍h lí ê kóe-chí." I ê bûn-tô͘ ū thiaⁿ-tio̍h chit-kù ōe.

Iâ-so͘ Chheng-khì sèng-tiān (Mt 21:12-17; Lk 19:45-48; Ih 2:13-22)
15 Āu-lâi Iâ-so͘ kah bûn-tô͘ lâi-kàu Iâ-lō͘-sat-léng, Iâ-so͘ ji̍p-khì sèng-tiān, chiū kā tiān-lāi teh chò bé-bē ê lâng kóaⁿ chhut-khì, koh chhia-tó ōaⁿ-chîⁿ ê lâng ê toh-á kah bē hún-chiáu ê lâng ê í-á. 16 Mā m̄ chún lâng tòa mi̍h-kiāⁿ, kā sèng-tiān tòng-chò thong-lō͘ lâi-lâi khì-khì. 17 Iâ-so͘ koh kà-sī hiah-ê lâng kóng, " Sèng-keng kám bô kì-chài:: Góa ê chhù beh kiò-chò bān-bîn kî-tó ê tiān?( chù: ISA 56:7) M̄-koh lín soah kā i piàn-chò chha̍t-siū.( chù: ILB 7:11)" 18 Chè-si-tiúⁿ kah keng-ha̍k kàu-su thiaⁿ-tio̍h, chiū it-ti̍t chhōe-khòaⁿ ū siáⁿ-mi̍h pān-hoat, lâi hāi-sí Iâ-so͘, m̄-koh in kiaⁿ Iâ-so͘, in-ūi kûn-chiòng tùi I ê kà-sī lóng chin kám-ho̍k. 19 Hông-hun ê sî, Iâ-so͘ kah bûn-tô͘ chiū chhut-khì siâⁿ-gōa.

Tùi Bû-hoa-kó-chhiū Tit-tio̍h Kà-sī (Mt 21:20-22)
20 Keh-tńg-chá-khí, Iâ-so͘ kah bûn-tô͘ tùi hia keng-kòe ê sî, khòaⁿ-tio̍h hit châng bû-hoa-kó-chhiū í-keng ta-khì à. 21 Pí-tek siūⁿ-tio̍h chiū kā Iâ-so͘ kóng, " Lāu-su, Lí khòaⁿ, Lí só͘ chiù-chó͘ hit châng bû-hoa-kó-chhiū í-keng ta-khì à!" 22 Iâ-so͘ ìn kóng, " Lín tio̍h sìn Siōng-Chú. 23 Góa si̍t-chāi kā lín kóng, lâng kā chit-chō soaⁿ kóng, ' Sóa-khì thiām hái!' sim-lāi bô giâu-gî, sìn i só͘ kóng ê it-tēng ē si̍t-hiān, it-tēng ē chiàu i ê ì-sù hō͘ i si̍t-hiān. 24 Só͘-í góa kā lín kóng, lín kî-tó bô-lūn kiû siáⁿ-mi̍h, tio̍h siong-sìn í-keng tit-tio̍h, chiū lóng ē chiàu án-ne si̍t-hiān. 25 Lín khiā-teh kî-tó ê sî, siūⁿ-tio̍h ū-lâng tek-chōe lí siáⁿ-mi̍h, tio̍h kā i sià-bián. Lín ê Thiⁿ-Pē mā ē sià-bián lín ê kòe-sit. 26 Lín nā m̄ sià-bián lâng, lín ê Thiⁿ-Pē mā bē sià-bián lín ê kòe-sit."( chù: Ū-ê chhau-pún bô chit chat.)

Lūn Iâ-so͘ ê Koân-pèng (Mt 21:23-27; Lk 20:1-8)
27 Iâ-so͘ kah bûn-tô͘ koh lâi-kàu Iâ-lō͘-sat-léng. Iâ-so͘ tī tiān-lāi teh kiâⁿ ê sî, hiah-ê chè-si-tiúⁿ, keng-ha̍k kàu-su kah tiúⁿ-ló lâi chhōe Iâ-so͘, 28 mn̄g I kóng, " Lí khò siáⁿ-mi̍h koân-pèng lâi chò chiah-ê tāi-chì? koh sī siáⁿ-lâng hō͘ Lí chit-ê koân-pèng lâi chò chiah-ê tāi-chì?" 29 Iâ-so͘ kā in kóng, " Góa mā beh mn̄g lín chi̍t-kù ōe. Lín nā ìn Góa, Góa chiah beh kā lín kóng, Góa khò siáⁿ-mi̍h koân-pèng lâi chò chiah-ê tāi-chì. 30 Iok-hān ê sé-lé ê koân-pèng sī tùi thiⁿ á-sī tùi lâng lâi ê? Lín tio̍h kā Góa kóng." 31 In chiū hō͘-siōng gī-lūn kóng, " Lán nā kóng, ' Tùi thiⁿ', I ē kóng, 'Án-ne lín ná-ē m̄ sìn Iok-hān?' 32 M̄-koh lán kám thang kóng, ' Tùi lâng'?" In án-ne kóng sī teh kiaⁿ kûn-chiòng, in-ūi chèng-lâng lóng lia̍h Iok-hān chò sian-ti. 33 In chiū ìn Iâ-so͘ kóng, " Goán m̄-chai." Iâ-so͘ chiū tùi in kóng, " Góa mā bô beh kā lín kóng, Góa sī khò siáⁿ-mi̍h koân-pèng lâi chò chiah-ê tāi-chì."