《巴克禮普世版聖經（試讀本）》

 | | | 轉寄

巴克禮普世版（試讀本）_馬太福音第26章

作者 巴克禮普世版小組 2011.09.25

1, Iâ-so͘ kóng chiah-ê ē soah, chiū kā I ê bûn-tô͘ kóng,
2, Lín chai koe3nng7 ji̍t pôaⁿ-kè-choeh chiū kàu, Jîn-chú tú-tio̍h kè/2-sàng khì tèng si̍p-jī-kè.
3, Hit sî hiah-ê chè-si-thâu kap jîn-bîn ê tiúⁿ-ló chū-chi̍p tī chè-si-thâu, miâ Kai-a-hoat ê īⁿ,
4, saⁿ-kap chham-siông ēng khúi-khiat ê koe3liah8 Iâ-so͘ lâi thâi I.
5, Tān-sī kóng, Tng choeh-kî m̄-thang, kiaⁿ-liáu jîn-bîn ê tiong-kan ū jiáu-loān.
6, Iâ-so͘ tī Pek-tāi-nî, thái-ko Se-bûn ê chhù,
7, ū hū-jîn-lâng tòa ge̍k-pân, lāi-bīn té ke̍k kùi-khì ê hiuⁿ-iû, chiū-kūn I, tng I chē toh ê sî piàⁿ tī I thâu-khak téng.
8, Bûn-tô͘ khòaⁿ-tio̍h chiū siū-khì, kóng, Án-ne phòa-hùi ū siáⁿ lō͘-ēng?
9, In-ūi chit-ê iû ē bē-tàng chē-chē gûn, lâi hō͘ sàn-chhiah lâng.
10, Iâ-so͘ chai chiū kā in kóng, Lín siáⁿ-sū thiau-lân chit-ê hū-jîn-lâng ah? in-ūi i só͘ kiâⁿ lâi khoán-thāi góa ê sī hó sū.
11, In-ūi siông-siông ū sàn-chhiah lâng kap lín tī-teh, tān-sī góa bô siông-siông kap lín tī-teh.
12, In-ūi i tò chit-ê iû tī góa seng-khu, chiū-sī chún-pī góa bâi-chòng lâi kiâⁿ ê.
13, Góa si̍t-chāi kā lín kóng, Phó͘ thiⁿ-ē, bô lūn sím-mi̍h só͘-chāi thoân chit-ê hok-im, iā boeh kóng-khí chit-ê hū-jîn-lâng só͘ kiâⁿ, lâi kì-liām i.
14, Hit sî cha̍p-jī ê bûn-tô͘ chi̍t-ê, miâ chò Ka-lio̍k lâng Iû-tāi, khì kìⁿ hiah-ê chè-si-thâu,
15, kóng, Lín boeh hō͘ góa jōa chōe, góa boeh chiong I kau hō͘ lín? In chiū kap i iok, hō͘ i gûn saⁿ-cha̍p.
16, Tùi hit sî i chhōe ki-hōe chiong Iâ-so͘ kau hō͘ in.
17, Tû-kàⁿ-choeh ê thâu-chi̍t ji̍t, bûn-tô͘ chiū-kūn Iâ-so͘ kóng, Ài goán tī sím-mi̍h só͘-chāi kā lí chún-pī chia̍h pôaⁿ-kè-choeh?
18, I kóng, Lín ji̍p siâⁿ chhōe bó͘ lâng, kā i kóng, Sian-siⁿ kóng, Góa ê sî kūn à; góa kap góa ê bûn-tô͘ siú pôaⁿ-kè-choeh tī lí tau.
19, Bûn-tô͘ chiàu Iâ-so͘ só͘ hoan-hù ê khì kiâⁿ: chiū chún-pī pôaⁿ-kè-choeh.
20, Kàu ji̍t àm Iâ-so͘ kap cha̍p-jī ê bûn-tô͘ chē toh.
21, Chia̍h ê sî, Iâ-so͘ kóng, Góa si̍t-chāi kā lín kóng, lín tiong-kan chi̍t lâng boeh bē góa.
22, Chèng lâng chin iu-būn, chi̍t-ê chi̍t-ê kā I kóng, Chú ah, chóng bô sī góa o͘h?
23, I ìn kóng, Kap góa chhun chhiú tī pôaⁿ-ni̍h ê, hit-ê boeh bē góa.
24, Jîn-chú tńg-khì chiàu só͘ kì-chài chí I ê ōe; tān-sī bē Jîn-chú ê ū chai-ē ah! hit lâng bô chhut-sì khah hó.
25, Bōe I ê Iû-tāi kóng, Lia̍p-pí, chóng bô sī góa o͘h? Kā i kóng, Lí í-keng kóng à.
26, In teh chia̍h ê sî, Iâ-so͘ the̍h piáⁿ, chiok-siā peh-phòa, pun hō͘ bûn-tô͘, kóng, The̍h-khì chia̍h; chit-ê sī góa ê seng-khu.
27, Koh phâng poe chiok-siā hō͘ in, kóng, Lín lóng tio̍h lim i;
28, chit-ê sī góa ê huih, chiū-sī bêng iok ê huih, ūi-tio̍h chē-chē lâng lâi lâu-chhut ê, tì-kàu chōe tit-tio̍h sià-bián.
29, Tān-sī góa kā lín kóng, taⁿ liáu-āu góa bô lim chit-ê phû-tô ê chiap, thèng-hāu hit ji̍t góa kap lín lim hit ê sin-ê tī góa ê Pē ê kok.
30, Í-keng gîm si, chiū chhut-lâi, khì Kaⁿ-ná soaⁿ.
31, Hit sî Iâ-so͘ kā in kóng, Kim-mî lín lóng boeh ūi-tio̍h góa lâi siū that-gāi, in-ūi ū kì-chài kóng, Góa boeh phah bo̍k-chiá, chiū iûⁿ-kûn sì-sòaⁿ.
32, Tān-sī góa koh-oa̍h liáu-āu boeh tāi-seng lín khì Ka-lī-lī-séng.
33, Pí-tek ìn I kóng, Chèng lâng sui-jiân ūi-tio̍h lí lâi siū that-gāi, iā góa éng-éng bô siū that-gāi.
34, Iâ-so͘ kā i kóng, Góa si̍t-chāi kā lí kóng, kim-mî koe iáu-bē thî, lí boeh saⁿ pái m̄ jīn góa.
35, Pí-tek kā I kóng, Góa chiū nā tio̍h kap lí sí, iā choa̍t-tùi bô m̄ jīn lí. Chèng bûn-tô͘ iā lóng sī án-ne kóng.
36, Iâ-so͘ kap in kàu chi̍t só͘-chāi, miâ Khek-se-má-nî, kā I ê bûn-tô͘ kóng, Lín chiah-ê chē chia, thèng-hāu góa khì hia kî-tó.
37, Chiah chhōa Pí-tek kap Se-pí-thài nn̄g ê kiáⁿ saⁿ-kap khì; chiū iu-būn, chhám-chhoeh.
38, Kā in kóng, Góa ê sim chin iu-būn kàu boeh sí, lín tòa chia kap góa kéng-séng.
39, Lio̍h-lio̍h-á chìn-chêng, bīn phak tī tē-ni̍h, kî-tó, kóng, Góa ê Pē ah, nā ē chò-tit, tio̍h hō͘ chit-ê poe lī-khui góa; tān-sī m̄-sī chiàu góa só͘ ài, sī chiàu lí só͘ ài.
40, Chiū lâi bûn-tô͘ hia, khòaⁿ-tio̍h in teh khùn, kā Pí-tek kóng, Án-cháiⁿ-iūⁿ, lín bōe-ōe kap góa kéng-séng pòaⁿ-sî kú ah?
41, Tio̍h kéng-séng, tio̍h kî-tó, bián-tit ji̍p tī bê-he̍k; sim-sîn kam-goān, tān-sī jio̍k-thé nńg-chiáⁿ.
42, Tē jī pái koh khì kî-tó, kóng, Góa ê Pē ah, chit-ê poe nā bē-tàng lī-khui góa, tek-khak tio̍h góa lim i, chiū goān lí ê chí-ì tit chiâⁿ.
43, Koh-chài lâi khòaⁿ-tio̍h in iū teh khùn, in-ūi in ê ba̍k-chiu siap.
44, Lī-khui in koh khì, tē saⁿ pái kî-tó, iā sī kóng hiah-ê ōe.
45, Hit tia̍p koh chiū-kūn bûn-tô͘, kā in kóng, Taⁿ thang khùn lâi an-hioh à. Sî kūn à, Jîn-chú siū bē tī chōe-jîn ê chhiú.
46, Khí-lâi saⁿ-kap kiâⁿ; bē góa ê lâng kūn à.
47, Iáu teh kóng ê sî, hut-jiân cha̍p-jī ê bûn-tô͘ ê chi̍t ê, Iû-tāi, lâi, iā ū kui tīn lâng kia̍h to kap thûi-á, tùi chiah-ê chè-si-thâu kap jîn-bîn ê tiúⁿ-ló hia saⁿ-kap lâi.
48, Bōe I ê bat kap in thò àm-hō, kóng, Góa kā I chim ê, hit lâng chiū-sī, lín thang lia̍h I.
49, Chek-sî chiū-kūn Iâ-so͘, kóng, Lia̍p-pí, pêng-an; chiū ti̍t-ti̍t kā I chim.
50, Iâ-so͘ kā i kóng, Pêng-iú ah, lí boeh lâi chò ê, chiū chò. Hiah-ê lâng chiū chìn-chêng, khí chhiú lia̍h Iâ-so͘.
51, Hut-jiân ū kap Iâ-so͘ tī-teh ê chi̍t lâng chhun chhiú pu̍ih to, thâi chè-si-thâu ê lô͘-po̍k, siah-khì i chi̍t ê hī-á.
52, Iâ-so͘ chiū kā i kóng, Siu lí ê to ji̍p goân-ūi, in-ūi hoān-nā kia̍h to ê boeh tùi to sí.
53, Á-sī lí phah-sǹg góa bōe-ōe kiû góa ê Pē, chiū I tī chit tia̍p boeh kā góa chhe cha̍p-jī iâⁿ khah ke ê thiⁿ-sài mah?
54, Nā án-ne, chiū sèng-keng só͘ kóng chit-ê tāi-chì tek-khak ū ê, cháiⁿ-iūⁿ ē èng-giām ah?
55, Hit sî Iâ-so͘ kā in hiah-ê lâng kóng, Lín kia̍h to kap thûi-á chhut-lâi lia̍h góa, chhin-chhiūⁿ boeh lia̍h chha̍t mah? Góa ji̍t-ji̍t chē tī tiān-lāi kà-sī lâng, iā lín bô lia̍h góa.
56, Tān-sī chit-ê sū lóng chiâⁿ, sī boeh èng-giām sian-ti só͘ kì-chài ê. Hit sî bûn-tô͘ lóng lī-khui I cháu.
57, Lia̍h Iâ-so͘ ê tòa I kàu chè-si-thâu Kai-a-hoat ê só͘-chāi, tī hia hiah-ê keng-ha̍k-kàu-su kap tiúⁿ-ló í-keng chū-chi̍p.
58, Pí-tek hn̄g-hn̄g tè I kàu chè-si-thâu ê īⁿ, ji̍p lāi-bīn kap hiah-ê chhe-ia̍h saⁿ-kap chē, boeh khòaⁿ hit ê kiat-kio̍k.
59, Chiah-ê chè-si-thâu kap choân kong-hōe chhōe lām-sám ê kiàn-chèng kong-kek Iâ-so͘, ài hō͘ I sí.
60, Sui-jiân chē-chē lām-sám kiàn-chèng ê lâi, iā bô tit-tio̍h. Āu-lâi ū nn̄g-ê kàu, kóng,
61, Chit-ê lâng bat kóng, Góa ē húi-hoāi Siōng-chú ê tiān, saⁿ ji̍t chiū khí i.
62, Chè-si-thâu khí-lâi kā I kóng, Lí lóng bô ìn mah? Chiah-ê lâng só͘ kiàn-chèng lí ê sī sím-mi̍h?
63, Tān-sī Iâ-so͘ chēng-chēng. Chè-si-thâu kā I kóng, Tng chit-ê chin-oa̍h Siōng-chú, góa bēng-lēng lí chiù-chōa lâi kā goán kóng, lí kó-jiân sī Siōng-chú ê Kiáⁿ, Ki-tok, á m̄-sī.
64, Iâ-so͘ kā i kóng, Lí í-keng kóng à; tān-sī góa kā lín kóng, Tùi chit tia̍p liáu-āu lín boeh khòaⁿ-tio̍h Jîn-chú chē tī ū koân-lêng ê ê tōa pêng, chē thiⁿ ê hûn lâi.
65, Tùi án-ne chè-si-thâu thiah-li̍h ka-kī ê saⁿ, kóng, I kóng-chhut chhiàm-koân siat-to̍k ê ōe; lán iáu-kú khiàm sím-mi̍h kiàn-chèng ah? Taⁿ lín í-keng thiaⁿ-tio̍h I ê chhiàm-koân siat-to̍k à.
66, Lín phah-sǹg cháiⁿ-iūⁿ? Ìn kóng, I kai sí.
67, Chiū phùi-nōa tī I ê bīn, ēng kûn-thâu-bú cheng I; iā ū-ê ēng chhiú siàn I,
68, kóng, Ki-tok ah, lí sī sian-ti, tio̍h kā goán kóng, phah lí ê sī siáⁿ-lâng.
69, Pí-tek chē tī gōa īⁿ; ū chi̍t ê lú-pī kūn-óa i kóng, Lí iā bat kap Ka-lī-lī-séng lâng Iâ-so͘ chò tīn.
70, Pí-tek tng chèng lâng ê bīn-chêng m̄ jīn kóng, Góa m̄ chai lí teh kóng sím-mi̍h.
71, Chhut-khì kàu īⁿ mn̂g, koh chi̍t ê lú-pī khòaⁿ-tio̍h i, kā tī hia ê lâng kóng, Chit-ê iā bat kap Ná-sat-le̍k-lâng Iâ-so͘ chò tīn.
72, Pí-tek koh m̄ jīn, sòa chiù-chōa kóng, Góa m̄ bat hit ê lâng.
73, Ū hiah kú, piⁿ-á teh khiā ê lâng kūn-óa kā Pí-tek kóng, Lí si̍t-chāi iā sī in ê tóng, in-ūi tùi lí ê khiuⁿ-kháu lō͘-chhut.
74, I chiah chiù-mē, koh chiù-chōa, kóng, Góa m̄ bat hit ê lâng. Koe chiū thî.
75, Pí-tek chiū kì-tit Iâ-so͘ ê ē kóng, Koe iáu-bē thî, lí boeh saⁿ pái m̄ jīn góa. Chiū chhut-khì gōa-bīn, tōa thî-khàu.