《巴克禮普世版聖經（試讀本）》

 | | | 轉寄

巴克禮普世版（試讀本） 啟示錄第五章

作者 巴克禮普世版小組 2017.02.06

Chheh Kah Iûⁿ-ko
1 Góa khòaⁿ-tio̍h chē tī pó-chō Hit-ūi ê chiàⁿ-chhiú the̍h chi̍t-kńg chheh, lāi-gōa-bīn lóng ū bûn-jī, ēng chhit-ê ìn hong-teh. 2 Góa koh khòaⁿ-tio̍h chi̍t-ê ū koân-lêng ê thiⁿ-sài tōa-siaⁿ soan-pò͘ kóng, "Siáⁿ-lâng ū chu-keh thang thiah-khui hit-ê hong-ìn, hian-khui hit-kńg chheh?" 3 Tī thiⁿ-téng, tē-chiūⁿ kah tē-hā lóng bô-lâng ē-tàng hian-khui á-sī tha̍k hit-kńg chheh. 4 Chhōe bô-lâng ē-tàng hian-khui á-sī tha̍k hit-kńg chheh, góa chiū tōa-siaⁿ khàu. 5 Hiah-ê tiúⁿ-ló tiong-kan ê chi̍t-ê tùi góa kóng, "M̄-thang khàu, lí khòaⁿ! Tùi Iû-tāi chi-cho̍k chhut-lâi ê sai, Tāi-pi̍t ê kin-thâu. I í-keng tek-sèng thang thiah-khui hit-ê hong-ìn, hian-khui hit-kńg chheh. 6 Jiân-āu góa khòaⁿ-tio̍h hō͘ sì-ê oa̍h-mi̍h kah hiah-ê tiúⁿ-ló ûi-teh ê pó-chō chêng ū chi̍t-chiah Iûⁿ-ko khiā-teh. Iûⁿ-ko ná chhin-chhiūⁿ bat siū sat-hāi, ū chhit-ki kak, chhit-lúi ba̍k-chiu, chiū-sī siū Siōng-Chú chhe-phài khì choân sè-kài hit chhit-ê sîn-lêng. 7 Iûⁿ-ko chiū kiâⁿ chìn-chêng, tùi chē tī pó-chō Hit-ūi ê chiàⁿ-chhiú the̍h hit-kńg chheh. 8 Iûⁿ-ko the̍h-tio̍h hit-kńg chheh ê sî, hit sì-ê oa̍h-mi̍h kah jī-cha̍p-sì-ê tiúⁿ-ló lóng phak tī Iûⁿ-ko ê bīn-chêng, ta̍k-ê ū the̍h khîm kah té hiuⁿ móa-móa ê kim-lô͘. Hiah-ê hiuⁿ chiū-sī Siōng-Chú chú-bîn ê kî-tó. 9 In gîm chi̍t-siú sin ê si, kóng, "Lí ū chu-keh the̍h hit-kńg chheh, thiah-khui i ê hong-ìn, in-ūi Lí ū siū sat-hāi, ēng Lí ê hoeh tùi kok cho̍k-kûn, kok-chióng gí-giân, kok bîn-cho̍k, kok-kok ê lâng sio̍k-hôe lâi kui Siōng-Chú. 10 Lí hō͘ in chiâⁿ-chò kok-tō͘ kah chè-si lâi ho̍k-sāi Siōng-Chú. In mā ē tī tē-chiūⁿ chiáng-koân. 11 Góa koh siông-sè khòaⁿ, thiaⁿ-tio̍h chheng-chheng bān-bān thiⁿ-sài ê siaⁿ. In lóng ûi tī pó-chō kah oa̍h-mi̍h í-ki̍p tiúⁿ-ló ê sì-chiu-ûi, 12 tōa-siaⁿ kóng, "Siū sat-hāi ê Iûⁿ-ko eng-kai tit-tio̍h koân-lêng, hù-jū, tì-hūi, khùi-la̍t, chun-kùi, êng-kng kah o-ló!" 13 Góa koh thiaⁿ-tio̍h thiⁿ-téng, tē-chiūⁿ, tē-hā kah hái-ni̍h it-chhè siū-chō ê mi̍h, í-ki̍p kî-tiong ê bān-bu̍t lóng gîm-si kóng, "Goān O-ló, chun-kùi, êng-kng kah koân-sè lóng kui hō͘ chē tī pó-chō Hit-ūi kah Iûⁿ-ko, it-ti̍t kàu tāi-tāi bô chīn!" 14 Hit sì-ê oa̍h-mi̍h ìn kóng, "Amen!" Hiah-ê tiúⁿ-ló chiū phak lo̍h-khì kèng-pài.