《巴克禮普世版聖經（試讀本）》

 | | | 轉寄

巴克禮普世版（試讀本） 啟示錄第一章

作者 巴克禮普世版小組 2017.01.09

1 Che sī Iâ-so͘ Ki-tok ê khé-sī. Siōng-Chú hō͘ Ki-tok chit-ê khé-sī, ài chiong liâm-piⁿ it-tēng ē hoat-seng ê tāi-chì chí-sī Siōng-Chú ê lô͘-po̍k. Ki-tok ū chhe-khián I ê thiⁿ-sài khì chí-sī Siōng-Chú ê lô͘-po̍k Iok-hān. 2 Iok-hān chiong só͘ khòaⁿ-tio̍h koan-hē Siōng-Chú ê sìn-sit kah Iâ-so͘ Ki-tok ê kiàn-chèng tùi só͘-ū ê lâng chò-chèng. 3 Tha̍k chit-pún chheh kah thiaⁿ hiah-ê ī-giân koh chun-siú kî-tiong só͘ kì-chài ê lâng chin ū hok-khì, in-ūi èng-giām chiah-ê tāi-chì ê ji̍t-kî teh-beh kàu à.

Tùi Chhit-keng Kàu-hōe Chhéng-an
4 Góa, Iok-hān siá-phoe kià hō͘ A-se-a-séng ê chhit-keng kàu-hōe. Goān hiān-chāi chûn-chāi, chá-chêng chûn-chāi, chiong-lâi mā chûn-chāi ê Siōng-Chú, kah I chō-ūi chêng chhit-ê sîn-lêng, í-ki̍p Iâ-so͘ Ki-tok sù lín un-tián kah pêng-an. 5 Ki-tok sī tiong-si̍t ê kiàn-chèng-jîn, thâu chi̍t-ê tùi sí-lâng-tiong koh-oa̍h, sī tē-chiūⁿ bān-ông ê Chú-cháiⁿ. 6 Ki-tok thiàⁿ lán, ūi-tio̍h lán lâu-hoeh hi-seng lâi tháu-pàng lán thoat-lī lán ê chōe, mā hō͘ lán chiâⁿ-chò kok-tō͘, chò chè-si lâi ho̍k-sāi I ê Thiⁿ-Pē Siōng-Chú. Goān êng-kng kah koân-lêng kui tī Iâ-so͘ Ki-tok, kàu tāi-tāi bô-chīn. Amen! 7 Lí khòaⁿ, Ki-tok chē hûn teh lâi, chèng-lâng ē khòaⁿ-tio̍h I. Liân ēng chhiuⁿ chha̍k I ê lâng mā ē khòaⁿ-tio̍h I. Tē-chiūⁿ bān-bîn lóng ē in-ūi I ê chài-lîm lâi hóe-kái thî-khàu. It-tēng ē án-ne hoat-seng. Amen! 8 Chú Siōng-Chú kóng, "Góa sī khí-thâu-ê(α) koh sī kiat-bóe-ê(Ω), hiān-chāi chûn-chāi, chá-chêng chûn-chāi, chiong-lâi mā chûn-chāi ê, sī choân-lêng-.ê."

Ki-tok Tùi Iok-hān Hián-hiān
9 Góa, Iok-hān sī lín ê hiaⁿ-tī, kah lín chò-hóe ū hun-tam Iâ-so͘ ê khó͘-lān kah thun-lún, koh ū-hūn tī I ê kok-tō͘. Ūi-tio̍h thoân Siōng-Chú ê sìn-sit kah kiàn-chèng Iâ-so͘ ê hok-im, góa bat tòa tī chi̍t-ê miâ-kiò Poa̍t-mô͘ ê hái-tó. 10 Ū chi̍t-ê Chú-ji̍t, góa hō͘ Sèng-Sîn kám-tōng, thiaⁿ-tio̍h tī góa ê āu-bīn ū chhin-chhiūⁿ la-pa ê tōa-siaⁿ, 11 kóng, "Lí tio̍h chiong só͘ khòaⁿ-tio̍h ê siá-chò chheh, kià hō͘ hit chhit-keng kàu-hōe, chiū-sī Í-hut-só͘, Sū-múi-ná, Pia̍t-ka-mô͘, Chhui-ngá-chhui-lat, Sat-te̍k, Hui-lia̍p-thiat-hui, Ló-tí-ka." 12 Góa oa̍t-tńg-sin siūⁿ-beh khòaⁿ kah góa kóng-ōe ê sī siáⁿ-lâng, kiat-kó khòaⁿ-tio̍h chhit-ki kim teng-tâi. 13 Teng-tâi ê tiong-ng ū chi̍t-ūi chhin-chhiūⁿ Jîn-chú, chhēng chi̍t-niá tn̂g-phàu, heng-khám hâ kim-tòa. 14 I ê thâu-mn̂g pe̍h kah ná chhin-chhiūⁿ iûⁿ-mî á-sī seh, I ê ba̍k-chiu chhin-chhiūⁿ hóe-iām. 15 I ê kha chhin-chhiūⁿ kòe hóe-lô͘ thoàn-liān koh bôa-kòe ê tâng hiah-ni̍h kim. I ê siaⁿ chhin-chhiūⁿ tōa-chúi-chhiâng ê hiáng-siaⁿ. 16 Tī I ê chiàⁿ-chhiú ū chhit-lia̍p chheⁿ, I ê chhùi thò͘-chhut siang-bīn-lāi ê kiàm, I ê bīn-māu hoat-kng chhin-chhiūⁿ tiong-tàu-sî ê ji̍t-thâu hiah kng. 17 Góa chi̍t-ē khòaⁿ-tio̍h I chiū kah-ná sí-lâng phak tī I ê kha-chêng. I ēng chiàⁿ-chhiú hōaⁿ góa, kóng, "M̄-bián kiaⁿ, Góa sī khí-thâu-ê, mā-sī kiat-bóe-ê. 18 Góa sī Hit-ūi éng-oán oa̍h-teh-.ê. Góa bat sí, taⁿ Góa oa̍h-teh koh ē oa̍h kàu bān-sè-tāi. Góa chiáng-koán sí-bông kah im-hú ê só-sî. 19 Só͘-í lí tio̍h chiong só͘ khòaⁿ-tio̍h-.ê, hiān-kim só͘ teh hoat-seng ê, kah chiong-lâi ē hoat-seng ê tāi-chì lóng siá lo̍h-lâi. 20 Lí só͘ khòaⁿ-tio̍h góa chiàⁿ-chhiú hit chhit-lia̍p chheⁿ kah chhit-ki kim teng-tâi ê ò-biāu sī án-ne: chhit-lia̍p chheⁿ sī chhit-keng kàu-hōe ê sù-chiá, chhit-ki teng-tâi sī chhit-keng kàu-hōe."