《巴克禮普世版聖經（試讀本）》

 | | | 轉寄

巴克禮普世版（試讀本） 猶大書第一章

作者 巴克禮普世版小組 2017.01.02

1 Góa sī Iâ-so͘ Ki-tok ê lô͘-po̍k, Ngá-kok ê hiaⁿ-tī, Iû-tāi. Góa siá phoe kià hō͘ hiah-ê siū soán-tiàu, tit-tio̍h Thiⁿ-Pē Siōng-Chú ê thiàⁿ, koh siū Iâ-so͘ Ki-tok pó-siú ê lâng. 2 Goān lín chhiong-móa Siōng-Chú ê liân-bín, pêng-an kah thiàⁿ-thàng.

Ké ê Kàu-su
3 Chhin-ài ê hiaⁿ-tī chí-mōe, góa chá to̍h it-ti̍t siūⁿ-beh siá phoe hō͘ lín, lâi tâm-lūn lán lóng ū hūn ê chín-kiù. Taⁿ góa kám-kak chin su-iàu siá phoe lâi kó͘-lē lín, tio̍h ūi Siōng-Chú chi̍t-piàn to̍h oân-chéng thoân hō͘ sìn-tô͘ ê sìn-gióng lâi hùn-tàu. 4 In-ūi ū chi̍t-kóa bô kèng-ùi Siōng-Chú ê lâng thau-thau-á chǹg ji̍p-lâi lán tiong-kan, khiok-kái Siōng-Chú ê un-tián tòng-chò hòng-chhiòng ê chià-kháu, koh kī-choa̍t to̍k-it ê Chú-cháiⁿ, lán ê Chú Iâ-so͘ Ki-tok. Sèng-keng chá to̍h ī-giân chiah-ê lâng it-tēng tio̍h siū hêng-hoa̍t. 5 Lín sui-jiân í-keng chai chiah-ê tāi-chì, góa iáu-koh beh kā lín thê-chhéⁿ, Siōng-Chú chi̍t-piàn to̍h chiong Í-sek-lia̍t chú-bîn tùi Ai-ki̍p ê só͘-chāi kiù chhut-lâi, āu-lâi koh chiong hiah-ê m̄-sìn ê lâng húi-bia̍t. 6 Koh ū hiah-ê bô siú pún-hūn ê thiⁿ-sài, lī-khui ka-kī ê chit-ūi, Siōng-Chú ēng éng-oán ê só-liān kā in liān tòa o͘-àm ê chhim-ian, tī hia thèng-hāu tōa Ji̍t-kî ê sím-phòaⁿ. 7 Só͘-to-má kah Gô͘-mô͘-la̍h í-ki̍p sì-chiu-ûi siâⁿ-chhī ê lâng, mā kah hiah-ê thiⁿ-sài kāng-khoán kiâⁿ îm-loān, hòng-chhiòng ûi-hoán chū-jiân ê sèng-io̍k, siū-tio̍h éng-oán bē-hoa ê hóe ê hêng-hoa̍t. Che thang chò chèng-lâng ê kéng-kài. 8 Hiah-ê khong-su bōng-sióng ê lâng mā kāng-khoán hō͘ in ê jio̍k-thé hoān-chōe, koh biáu-sī Siōng-Chú ê koân-ui, siat-to̍k thiⁿ-téng chun-kùi-.ê. 9 Thiⁿ-sài-tiúⁿ Bí-ka-le̍k kah Mô͘-kúi ūi-tio̍h Mô͘-se ê sin-si teh cheng-lūn ê sî, mā m̄-káⁿ ēng húi-pòng ê ōe kā i chek-pī, kan-taⁿ kóng, "Chú tio̍h kā lí chek-pī!" 10 M̄-koh chiah-ê lâng siat-to̍k ka-kī m̄-chai ê tāi-chì, koh kah bô lêng-sèng ê tōng-bu̍t kāng-khoán khì chò pún-lêng liáu-kái ê tāi-chì, kiat-kó ka-kī pāi-hoāi. 11 In ē ū chai-hō! in-ūi in kiâⁿ Kai-ún ê lō͘, koh ūi-tio̍h chîⁿ-châi hām-lo̍h tī Pa-lân ê chhò-gō͘, mā kah Khó-la̍h kāng-khoán in-ūi pōe-poān lâi bia̍t-bông. 12 Chiah-ê lâng tī lín ê ài-chhan chia̍h-toh-tiong kò͘-chia̍h kò͘-lim bô kò͘ thé-bīn, in ióng-chhī ka-kī lóng bô kiaⁿ pòaⁿ-lâng. In ná chhin-chhiūⁿ bē lo̍h pòaⁿ-tiám hō͘ ê hûn, hō͘ hong sàu-lâi sàu-khì; koh ná chhiu-thiⁿ bô kiat kóe-chí ê chhiū, hō͘ lâng liân kin to khau khí-lâi, sí kah ta-khok-khok. 13 In mā chhin-chhiūⁿ hái-tiong ê kông-éng, lō͘-chhut ka-kī thang kiàn-siàu ê phoe̍h; koh chhin-chhiūⁿ lī-khui kúi-tō ê chheⁿ lak lo̍h-khì Siōng-Chú ūi-tio̍h in pó-liû ê o͘-àm chhim-ian. 14 A-tong ê tē-chhit tāi sun Í-lo̍k ī-giân chiah-ê lâng, kóng, "Khòaⁿ ah! Siōng-Chú ē tòa chheng-chheng bān-bān ê sèng thiⁿ-sài lâi, 15 beh sím-phòaⁿ só͘-ū ê lâng, hêng-hoa̍t só͘-ū bô kèng-khiân ê chōe-jîn, in-ūi in ēng bô kèng-khiân ê chhiú-tōaⁿ chò it-chhè bô kèng-khiân ê tāi-chì, koh kóng siat-to̍k Siōng-Chú ê ōe." 16 Chiah-ê lâng put-sî nga̍uh-nga̍uh-liām, bâi-oàn, hòng-chhiòng su-io̍k, kóng khoa-kháu ê ōe, ūi-tio̍h ka-kī ê lī-ek kā lâng phô͘-tháⁿ.

Kéng-kò Kah Kà-sī
17 Chhin-ài ê hiaⁿ-tī chí-mōe, tio̍h ē-kì-tit lán ê Chú Iâ-so͘ Ki-tok ê sù-tô͘ chá-chêng só͘ kóng ê ōe. 18 In ū kā lín kóng, "Boa̍t-ji̍t ê sî, ū chi̍t-kóa chiàu in ka-kī bô kèng-khiân ê su-io̍k chò tāi-chì ê lâng ē chhut-hiān, in ài thí-chhiò pa̍t-lâng ê sìn-gióng." 19 Chiah-ê lâng chè-chok hun-cheng, in siū ka-kī ê pún-sèng khòng-chè, bô kah Sèng-Sîn kiat-liân. 20 M̄-koh lín chiah-ê hiaⁿ-tī chí-mōe, tio̍h chiong ka-kī kiàn-li̍p tī chì-sèng ê sìn-gióng téng-bīn, tio̍h khò Sèng-Sîn lâi kî-tó. 21 Mā tio̍h kè-sio̍k seng-oa̍h tī Siōng-Chú ê thiàⁿ lāi-bīn, gióng-bōng lán ê Chú Iâ-so͘ Ki-tok ê liân-bín, ti̍t-kàu tit-tio̍h éng-oán ê oa̍h-miā. 22 Lín tio̍h liân-bín hiah-ê ū giâu-gî-sim ê lâng. 23 Ū chi̍t-kóa lâng, lín tio̍h tùi hóe-tiong kā in kiù chhut-lâi; koh ū chi̍t-kóa lâng, lín tio̍h kín-sīn lâi kā in liân-bín, liân in hō͘ chêng-io̍k bak lah-sap ê saⁿ-khò͘ mā tio̍h thó-ià.

Siōng-chàn
24 Siōng-Chú ē pó-siú lín bē tūi-lo̍h, mā hō͘ lín bô khoat-tiám, hoaⁿ-hoaⁿ hí-hí khiā tī I êng-kng ê bīn-chêng. 25 Goān to̍k-it ê Siōng-Chú lán ê Kiù-Chú, thong-kòe lán ê Chú Iâ-so͘ Ki-tok, tit-tio̍h êng-kng, ui-giâm, koân-lêng, khùi-la̍t, tùi bān-sè í-chêng kàu hiān-kim, ti̍t-kàu éng-oán. Amen!