《巴克禮普世版聖經（試讀本）》

 | | | 轉寄

巴克禮普世版（試讀本） 希伯來書第十章

作者 巴克禮普世版小組 2016.07.17

1 Kì-jiân lu̍t-hoat ū teh-beh lâi ê hó tāi-chì ê iáⁿ, m̄-sī hó tāi-chì ê chin siōng, só͘-í bē-tàng ta̍k nî ēng kāng-khoán ê chè-mi̍h lâi hō͘ chhin-kīn Siōng-Chú ê lâng tit-tio̍h oân-choân. 2 Kèng-pài Siōng-Chú ê lâng nā ē-tàng chi̍t-pái chiū sé-chheng i ê chōe, liông-sim bô koh ū chōe ê ì-sek, it-chhè m̄-bián koh-chài hiàn-chè. 3 Kî-si̍t ta̍k-nî só͘ hiàn ê chè-mi̍h ē hō͘ lâng koh siūⁿ-khí in ê chōe. 4 In-ūi gû kah iûⁿ ê hoeh bē-tàng tû-khì lâng ê chōe. 5 Só͘-í Iâ-so͘ lâi-kàu sè-kan ê sî ū tùi Siōng-Chú kóng: Chè-sū kah lé-mi̍h Lí bô ài, m̄-koh Lí ū kā góa chún-pī seng-khu. 6 Sio-chè kah sio̍k-chōe-chè, Lí bô kah-ì. 7 Hit sî, Góa kóng: Siōng-Chú ah, Lí khòaⁿ, Góa lâi sī beh chiàu Lí ê chí-ì lâi si̍t-hiān. Koan-hē Góa ê tāi-chì ū kì-chài tī chheh-ni̍h.( chù: SPh 40:6-8) 8 Góa téng-bīn ū kóng, Chè-sū kah lé-mi̍h, sio-chè kah sio̍k-chōe-chè, Lí lóng bô ài, mā bô kah-ì. Sui-jiân chiah-ê lóng sī chiàu lu̍t-hoat lâi hiàn ê, I iáu-koh án-ne kóng." 9 Iâ-so͘ āu-lâi koh kóng, "Lí khòaⁿ, Góa lâi sī beh chiàu Lí ê chí-ì lâi si̍t-hiān." Án-ne Siōng-Chú sī beh hùi-tû í-chêng ê hiàn-chè, beh ēng Ki-tok ê hi-seng lâi tāi-thè. 10 Iâ-so͘ Ki-tok chun-hêng Siōng-Chú ê chí-ì, chí-iàu chi̍t pái hiàn ka-kī ê seng-khu chiū kàu-gia̍h hō͘ lán tit-tio̍h sèng-hòa lâi kui-hiòng Siōng-Chú. 11 Iû-thài-lâng ê chè-si ta̍k-ji̍t khiā-teh lâi ho̍k-sāi Siōng-Chú, chi̍t-pái koh chi̍t-pái hiàn siâng-khoán ê chè, mā éng-oán bē-tàng tû-khì jîn-lūi ê chōe. 12 M̄-koh Ki-tok hiàn chi̍t-pái chiū éng-oán ū-hāu ê chè, jiân-āu chē tī Siōng-Chú ê chiàⁿ-pêng, 13 Tī hia thèng-hāu Siōng-Chú hō͘ I ê tùi-te̍k chò I ê kha-ta̍h. 14 Thong-kòe Iâ-so͘ chi̍t-pái ê hiàn-chè, hō͘ sèng-hòa kui-sio̍k Chú ê lâng éng-oán oân-choân. 15 Sèng-Sîn mā í-keng kā lán chò-chèng. I tāi-seng án-ne kóng, 16 " Chú kóng, Chiah-ê ji̍t liáu-āu, Góa kah in só͘ beh li̍p ê bêng-iok sī án-ne: Góa beh chiong Góa ê lu̍t-hoat khǹg tī in ê sim, Khek tī in ê thâu-náu. 17 I kè-sio̍k kóng, "Góa choa̍t-tùi bô koh kì-tit in ê chōe-ok kah put-gī."( chù: ILB 31:33-34) 18 Kì-jiân chōe tit-tio̍h sià-bián, chiū bián koh hiàn sio̍k-chōe-chè.

Lán Lâi Chhin-kīn Siōng-Chú
19 Só͘-í hiaⁿ-tī chí-mōe ah, lán óa-khò Iâ-so͘ ê lâu-hoeh sí-bông chiū ē-tàng hó-táⁿ chìn-ji̍p Chì-sèng-só͘. 20 Iâ-so͘ thong-kòe tiùⁿ-lî, chiū-sī I ka-kī ê seng-khu, ūi lán khui chi̍t-tiâu sin ê oa̍h-lō͘. 21 Lán í-keng ū chi̍t-ūi Chè-si-tiúⁿ teh tī-lí Siōng-Chú ê ke. 22 Án-ne lán ê sim í-keng siū kiat-chēng, lóng bô liông-sim ê chek-pī, seng-khu mā ēng chúi sé chheng-khì, tio̍h ēng sêng-si̍t kah kian-tēng ê sìn-gióng lâi chhin-kīn Siōng-Chú. 23 Lán tio̍h kian-chhî kong-khai sêng-jīn ê ǹg-bāng, in-ūi Siōng-Chú ê èng-ín sī sìn-si̍t khó-khò-.ê. 24 Lán tio̍h hō͘-siōng koan-hoâi lâi kek-lē thiàⁿ-sim kah chò hó-sū. 25 M̄-thang o̍h chi̍t-kóa lâng thêng-chí chū-hōe, tio̍h hō͘-siōng khoàn-bián. Kì-jiân í-keng chai Chú chài-lîm ê ji̍t teh-beh kàu, koh-khah tio̍h án-ne chò. 26 Lán kì-jiân í-keng chin-chiàⁿ bat chin-lí, nā kò͘-ì hoān-chōe, chiū bô koh ū thang sio̍k-chōe ê chè-mi̍h. 27 Chí-ū ēng kiaⁿ-hiâⁿ ê sim lâi thèng-hāu sím-phòaⁿ í-ki̍p teh-beh thun-bia̍t kah Siōng-Chú chò tùi-te̍k ê lâng ê jia̍t hóe. 28 Ûi-pōe Mô͘-se lu̍t-hoat ê lâng, nā ū nn̄g-saⁿ-ê lâng chò-chèng, chiū thang kā i chhù sí-hêng, bián kā i liân-bín. 29 Nā án-ne kóng khí-lâi, hiah-ê thún-ta̍h Siōng-Chú ê Kiáⁿ, biáu-sī hō͘ in pún-sin sèng-hòa kui Chú bêng-iok ê hoeh, koh bú-jio̍k si-un ê Sèng-Sîn ê lâng, lín siūⁿ eng-kai siū ê hêng-hoa̍t tio̍h ke jōa tāng? 30 Lán chai lâng teh kóng, "Sin-oan chāi góa, góa beh pò-èng."( chù: SBK 32:35) Koh kóng, "Chú beh sím-phòaⁿ I e chú-bîn."( chù: SBK 32:36; SPh 135:14) hit-ūi sī siáⁿ-lâng? 31 Hām-lo̍h éng-oán oa̍h-miā Siōng-Chú ê chhiú si̍t-chāi chin thang kiaⁿ! 32 Lín tio̍h ē-kì-tit kòe-khì ê ji̍t-chí, lín tit-tio̍h kng-chiò liáu-āu ū jím-siū kau-chiàn ê thòng-khó͘, 33 ū-sî hō͘ lâng kong-khai bú-jio̍k kah hì-lāng, á-sī kah pa̍t-lâng tâng-siū khó͘-lān. 34 Lín ū thé-thiap siū koaiⁿ-kaⁿ ê lâng, lín mā jím-siū lâng chhiúⁿ-kiap lín ê sán-gia̍p, in-ūi lín chai ka-kī ū koh-khah hó koh kú-tn̂g ê sán-gia̍p. 35 Só͘-í m̄-thang sit-khì lín ê ióng-khì, in-ūi chit-ê ióng-khì ē hō͘ lín tōa pò-siúⁿ. 36 Lín iàu-kín tio̍h ū nāi-sim chiah ē-tàng si̍t-hiān Siōng-Chú ê chí-ì, thang niá-siū I só͘ èng-ín ê hok-khì. 37 In-ūi Sèng-keng kóng, "Koh chi̍t-sî-á kú, Hit-ê teh-beh lâi-ê ē kàu, bē iân-chhiân. 38 Góa ê chú-bîn ē thong-kòe sìn-sim lâi tit-tio̍h oa̍h-miā, m̄-koh i nā kiâⁿ hoan-thâu, Góa ē bô kah-ì i."( chù: HPK 2:3-4) 39 Lán m̄-sī kiaⁿ-tio̍h chiah kiâⁿ hoan-thâu soah tîm-lûn. Lán sī ū sìn-sim lâi tit-kiù ê lâng.