《巴克禮普世版聖經（試讀本）》

 | | | 轉寄

巴克禮普世版（試讀本） 提摩太後書第四章

作者 巴克禮普世版小組 2016.04.10

1Tī Siōng-Chú kah teh-beh sím-phòaⁿ oa̍h-lâng kah sí-lâng ê Ki-tok Iâ-so͘ ê bīn-chêng, koh in-ūi Ki-tok beh hián-hiān chài-lîm, góa pek-chhiat hoan-hù lí: 2 tio̍h thoân hok-im, bô-lūn tio̍h-sî á-sī bô tio̍h-sî, lóng tio̍h choan-sim lâi chìn-hêng, ēng kok-chióng ê khoan-iông kah kà-sī lâi khoàn-bián, kéng-kài kah kó͘-lē. 3 In-ūi hit-ê sî-ji̍t beh kàu, lâng ē m̄ thiaⁿ toan-chiàⁿ ê kà-sī, tian-tò hīⁿ-khang chiūⁿ koh chiàu ka-kī ê su-io̍k, phèng-chhiáⁿ chi̍t-ê koh chi̍t-ê in kah-ì thiaⁿ ê lāu-su. 4 In oa̍t thâu m̄ thiaⁿ chin-lí, tian-tò ài thiaⁿ bô-iáⁿ bô-chiah ê thoân-soat. 5 Chóng-sī lí bô-lūn tī sím-mi̍h khoân-kéng lóng tio̍h chiat-chè, jím-siū kan-khó͘, chò thoân hok-im ê kang, lâi chīn lí ê chit-hūn. 6 Taⁿ góa hi-seng hiàn hō͘ Siōng-Chú ê kî í-keng kàu à, chit chūn sī góa lī-khui sè-kan ê sî-khek. 7 Góa í-keng keng-le̍k hit-ê hó ê cheng-chiàn, í-keng oân-sêng tio̍h pháu-cháu ê lō͘-chām, í-keng kian-siú tio̍h chhî-siú ê sìn-gióng. 8 Taⁿ kong-gī ê koan-bián í-keng kā góa chún-pī hó-sè, chiū-sī Chú chò kong-gī ê sím-phòaⁿ-chiá tī hit ji̍t beh hō͘ góa. M̄-nā hō͘ góa, mā beh hō͘ só͘-ū him-bō͘ Ki-tok chài-lîm hián-hiān ê lâng.

Su-jîn ê Kau-tài
9 Lí tio̍h chīn-liōng kóaⁿ-kín lâi góa chia. 10 In-ūi Tí-má tham-loân chit-ê sè-kan, chiū lī-khui góa khì Thiap-sat-lô-nî-ka. Kek-le̍k-sū mā khì Ka-lia̍p-thài, Thê-to mā khì That-má-thài. 11 Chí-ū Lō͘-ka kah góa tī chia. Lí tio̍h chhōa Má-khó kah lí chò-hóe lâi, in-ūi i tùi góa ê kang-chok chin ū pang-chō͘. 12 Góa í-keng chhe-phài Chhui-ki-kó͘ khì Í-hut-só͘. 13 Góa tī Te̍k-lô-a ê sî lâu tī Ka-pò͘ in tau ê gōa-saⁿ, lí lâi ê sî tio̍h sòa tòa lâi, mā tio̍h kā hiah-ê chheh tòa lâi, iû-kî sī hiah-ê iûⁿ-phôe ê chheh. 14 Phah-tâng sai-hū A-le̍k-san-tāi kā góa hāi kah chin chhám. Chú ē chiàu i ê só͘-chò lâi kā i pò-èng. 15 Lí ka-kī mā tio̍h tî-hông, in-ūi i put-chí ke̍k-le̍k hoán-tùi goán só͘ thoân ê tō-lí. 16 Góa thâu chi̍t pái ūi ka-kī piān-kái ê sî, bô-lâng tī góa ê sin-piⁿ chi-chhî góa, chèng-lâng lóng kā góa pàng-sak. Goān Siōng-Chú bô kā chit-ê chōe kui tī in. 17 M̄-koh Chú kah góa tông-chāi, hō͘ góa ū khùi-la̍t thang chhiong-hun pò-iông sìn-sit, hō͘ só͘-ū ê Gōa-pang-lâng lóng thiaⁿ-tio̍h. Chòe-āu góa mā tùi sai ê chhùi pī kiù chhut-lâi. 18 Chú ē kiù góa thoat-lī só͘-ū ê siâ-ok, mā ē an-choân chhōa góa chìn-ji̍p tī I thiⁿ-téng ê kok-tō͘. Goān êng-kng kui I ti̍t-kàu éng-oán bô chīn. Amen!

Chòe-āu ê Chhéng-an
19 Chhiáⁿ thè góa kā Pek-ki-lah, A-ku-lah, kah O-nî-sek-hut choân-ke chhéng-an. 20 Í-lah-to͘ kè-sio̍k tiàm-tī Ko-lîm-to. Tek-lô-hui-mô͘ in-ūi phòa-pēⁿ, góa kā i lâu tī Bí-lī-to͘. 21 Lí tio̍h chīn-liōng tī tang-thiⁿ í-chêng lâi, Iú-pò͘-lô, Po͘-tiân, Lī-lô͘, Kek-ló-tia kah chèng hiaⁿ-tī chí-mōe lóng beh kā lí chhéng-an. 22 Goān Chú kah lí ê sim-lêng tông-chāi! Goān Siōng-Chú ê un-tián kah lín tông-chāi!