《巴克禮普世版聖經（試讀本）》

 | | | 轉寄

巴克禮普世版（試讀本） 提摩太後書第三章

作者 巴克禮普世版小組 2016.04.03

Sè-kài ê Boa̍t-ji̍t
1 Lí tio̍h chai, tī sè-kài ê boa̍t-ji̍t ū chióng-chióng ê khó͘-lān. 2 Hit sî, lâng ē chū-su, tham-châi, khoa-kháu, kiau-ngō͘, húi-pòng, pōe-ge̍k pē-bú, bōng-un, bô sèng-kiat, 3 bô chêng-gī, pōe-iok, tiòng-siong, hêng-ge̍k, chân-jím, oàn-hūn hó-sū, 4 kan-kúi, chip-phiah, phòng-hong, ài hióng-lo̍k khah kòe-thâu tī thiàⁿ Siōng-Chú, 5 ū kèng-khiân ê gōa-māu, m̄-koh bô kèng-khiân ê si̍t-chit. Lí tio̍h siám-phiah chit-chióng lâng. 6 In tiong-kan ū-lâng thau-thau-á ji̍p-khì lâng ê chhù, bê-he̍k gōng-gōng ê hū-lí, chiū-sī hiah-ê siū chōe-ok kah chêng-io̍k chi-phòe ê hū-lí. 7 Chiah-ê hū-lí put-sî to teh ha̍k-si̍p, m̄-koh lóng bô-hoat-tō͘ bêng-pe̍k chin-lí. 8 Chhin-chhiūⁿ chá-chêng ê Ngá-nî í-ki̍p Iông-pì kah Mô͘-se tùi-te̍k, chit-má chiah-ê lâng mā án-ne kah chin-lí tùi-te̍k, in ê sim-chì í-keng pāi-hoāi, tī sìn-gióng-siōng bô-hoat-tō͘ koh siū khó-giām. 9 M̄-koh chiah-ê lâng bē-tàng koh hoat-hui sím-mi̍h chok-iōng, in-ūi in ê gû-gōng ē chhin-chhiūⁿ téng-bīn hit nn̄g-lâng, tī chèng-lâng ê bīn-chêng lō͘-hiān.

Chòe-āu ê Kà-sī
10 Lí ū sūn-ho̍k góa ê kà-sī, koh o̍h-tio̍h góa ê phín-hēng, chì-hiòng, sìn-khò, khoan-iông, thiàⁿ-sim, thun-lún, í-ki̍p só͘ siū ê pek-hāi kah khó͘-lān. 11 Lí mā chai góa tī An-thê-o, Í-ko-liām, Lō͘-su-tek só͘ tú-tio̍h ê pek-hāi kah jím-siū, m̄-koh Chú lóng kiù góa thoat-lī chiah-ê khó͘-lān. 12 Só͘-ū ài-beh kah Ki-tok Iâ-so͘ kiat-liân lâi kòe kèng-khiân seng-oa̍h ê lâng lóng ē siū pek-hāi. 13 Pháiⁿ-lâng kah phiàn lâng ê ông-lo̍k-á-sian ē ná lâi ná pháiⁿ, in khi-phiàn lâng, ka-kī mā siū khi-phiàn. 14 M̄-koh lí tio̍h chhî-siú só͘ ha̍k-si̍p kah só͘ khak-sìn ê tō-lí, in-ūi lí chai chiah-ê tō-lí sī tùi siáⁿ-lâng o̍h-.ê. 15 Lí mā chai lí tùi sè-hàn to̍h bat hiah-ê Sèng-keng. Chit-ê Sèng-keng ē-tàng hō͘ lí ū tì-hūi thang thong-kòe sìn Ki-tok Iâ-so͘ lâi tit-kiù. 16 Só͘-ū siū Siōng-Chú be̍k-sī lâi siá ê Sèng-keng, tùi kà-sī kah tok-chek, í-ki̍p hō͘ lâng kui-chèng koh ín-chhōa lâng o̍h gī-lí, lóng ū lī-ek. 17 Án-ne ho̍k-sāi Siōng-Chú ê lâng tit-tio̍h chhiong-hun ê chong-pī, thang chò ta̍k-chióng ê hó-sū.